1 የሱሲ ታማነ ናምኡ ሀዋረታ ባኮ ፄግድ፥ ቱና አያናታ ከሳና መላነ ሀርገ ኡባ ፓꬃና መላ ዎልቃነ ማታ እሚስ። 2 ፆሳ ካዎተꬃባ ማርካታናዳነ ሀርጋንቾታ ፓꬃናዳ ኪትስ። 3 እ ኤንታኮ፥ “ፃምአ ግድን ኦጎሮ ግድን ካꬅ ግድን ሚሸ ግድን ላምድ ማእያ አፍላ ግድን ኦገስ ግድ አይኮካ ኦይኮፍተ። ሉቃ 10:4-11. 4 ሄ ካታማፐ ህንተ ከያና ጋካናዉ እማꬃተꬃን ህንተ ገልዳ ኬꬃን ጋምእተ። 5 ኦንካ ህንተና ሞኮና እፅኮ ሄ ካታማፐ ከይሸ ኤንታዉ ማርካ ግዳና መላ ህንተ ቶሁዋን ደእያ ባና ፕትድ ከይተ።” 6 ኤንትካ ኪተትዳይሳዳ ከይድ ዎንገላ ኦድሸነ ዱማ ዱማ ጉታታን ሀርጋንቾታ ፓꬅሸ አꬍዶሶና።

7 ጋልላ ቢታ ሃርያ ሄሮዲስ የሱሲ ኦꬅዳባ ኡባ ስእዳ ዎደ ዳጋምስ። አይስ ጊኮ፥ እስ እስ አሳት ዮሃንስ ሀይቆፐ ደንዶና አገና ያጎሶና። ማቶ 16:14፤ ማር 8:28፤ ሉቃ 9:19. 8 ባጋት፥ “ኤልያስ ቆንጭስ” ጎሶና፤ ሀራት ቃስ፥ “በን ናበታፐ እሶይ ሀይቆፐ ደንድስ” ያግድ ኦደቶሶና። 9 ሽን ሄሮዲስ፥ “ታኒ ዮሃንሳ ቆꬍያ ቃንፅሳዳ ዎꬋስ። ያትን፥ ሀይሳꬆ ያገትድ እያባ ኦደተይ፥ እ ኦኔ?” ያግድ ባ አይፈን በአናዉ ኮዬስ።

10 ታማነ ናምኡ ሀዋረት ጉየ ስም ይድ፥ ኤንቲ ኦꬅዳባ ኡባ የሱሳስ ኦድዶሶና። እ ኤንታና ኤክድ ቤተሳይዳ ካታማፐ ጋፃ ኤፍስ። 11 ሽን ዳሮ አሳይ የሱሳ ግደይሳ ኤርድ እያ ካልዶሶና። እ ኤንታ ሞክ ኤክድ ፆሳ ካዎተꬃባ ታማርስስ፤ ፓፃናዉ ኮየይሳታካ ፓꬅስ።

12 ሳእ ኦማርስያ ዎደ ታማነ ናምኡ ሀዋረት እያኮ ሺቅድ፥ “ኑ ደኤይ መላ ቢታ ግድያ ግሾ አሳይ ዱማ ዱማ ጉታታነ ካታማታ ብድ፥ ካꬅነ አቅያ በሲ ኮያና መላ አሳ ሞይዛ” ያግዶሶና።

13 ሽን እ፥ “ኤንታዉ ምያባ ህንተ እምተ” ያግስ።

ኤንቲ፥ “ኑስ ደኤይ እቻሹ ኡይꬅነ ናምኡ ሞሎ ግድያ ግሾ፥ ሀ አሳስ ግድያ ካꬅ ኑኒ ብድ ሻሞና እፅኮ ግደና” ያግዶሶና። 14 ሄ በሳን እቻሹ ሙኩሉ ግድያ አደት ደኦሶና።

የሱሲ ባ ታማረታኮ፥ “እሻታማን እሻታማን ሻክ ሻክ አሳ ኡትስተ” ያግስ።

15 እያ ታማረት፥ እ ኪትዳይሳዳ አሳ ኡትስዶሶና። 16 እ እቻሹ ኡይꬃነ ናምኡ ሞሎታ ኤክድ፥ ሳሎ ፄልድ፥ ፆሳ ጋላትድ፥ መንꬅድ አሳ ኡባ ጋꬃና መላ ባ ታማረታስ እሚስ። 17 ኡባይ ምድ ካልዶሶና። ኤንታፈ አትዳ ቲፈይ ታማነ ናምኡ ጋይታ ኩመꬅ ግድስ።

18 የሱሲ ባ ፃላላ ዎስሽን፥ እያ ታማረት እያኮ ይዶሶና። እ፥ “አሳይ ታና ኦና ጎና?” ግድ ኦይችስ።

19 ኤንቲ ዛሪድ “እሶት እሶት፥ ‘ፃማቅያ ዮሃንሳ፥ ባጋት ኤልያሳ፥ ሀራት ቃስ፥ በን ናበታፐ እሶይ ሀይቆፐ ደንድስ’ ያጎሶና” ያግዶሶና። ማቶ 14:1፥ 2፤ ማር 6:14-15፤ ሉቃ 9:7-8.

20 እ ዛሪድ፥ “ያትን ህንተ ታና ኦና ጌቲ?” ያግስ። ጰፅሮስ፥ “ኔኒ ፆሳፈ ኪተትዳ ክርስቶሳ” ያግድ ዛርስ። ዮሀ 16:20-28፤ ማር 8:30—9:1.

21 የሱሲ ሀይሳ ኦደስካ ኦዶፕተ ግድ ምንꬅድ ኦድስ። 22 ቃስካ የሱሲ፥ “አሳ ናእ ዳሮ መቱዋ ኤካና። ቢታ ጭማታ፥ ካህነ ሀላቃታነ ህገ አስታማረታ ኩሸን አꬍድ እመታና። ኤንቲ እያ ዎꬋና፥ ሽን እ ሄꬓንꬆ ጋላስ ሀይቆፐ ደንዳና” ያግስ።

23 የሱሲ አሳ ኡባኮ፥ “ታና ካላናዉ ኮየይ ኦንካ ደእኮ ባና ካዶ፥ ባ ማስቃልያ ጋላስ ጋላስ ቶክድ ታና ካሎ። ማቶ 10:38፤ ሉቃ 14:27. 24 ባ ሸምፕዉ አሻናዉ ኮያ ኡባይ እዮ ꬋይሴስ፥ ባ ሸምፕዉ ታ ግሾ ግድ ꬋይስያ ኦንካ እዮ አሼስ። ማቶ 10:39፤ ሉቃ 17:33፤ ዮሀ 12:25. 25 አስ አላመ ኡባ ሃርድ፥ ግዶሽን፥ ባ ሸምፕዉ ꬋይስያባ ዎይኮ ቆህያባ ግድኮ እያ አይ ማዲ? 26 ኦንካ ታናንነ ታ ቃላን ዬላትኮ፥ አሳ ናእ ባ ቦንቹዋራ ሄሳዳካ አዋ ቦንቹዋራነ ጌሻ ኪታንቾታ ቦንቹዋራ ያ ዎደ እያን ዬላታና። 27 ታ ህንተዉ ቱማ ኦዳይስ፤ ሀይሳን ኤቅዳይሳታ ግዶፈ ፆሳ ካዎተꬃ በኦናሽን ሀይቆና አሳት ደኦሶና” ያግስ።

28 የሱሲ ሄ ኦዳ ኦድን፥ ሆስፑን ጋላሳፐ ጉየ፥ ጰፅሮሳ፥ ያይቆባነ ዮሃንሳ ባራ ኤክድ ዎሳናዉ ዙማ ቦላ ከይስ። 2 ጰፅ 1:17-18. 29 እ ዎሳ ቦላ ደእሽን እያ አይፈ ካረይ ላመትስ፤ አፍላይካ ቦፅድ፥ አዋ መላ ጶልስ። 30 ናምኡ አሳት፥ ኤንትካ ሙሰራነ ኤልያሳራ ቦንቾን ቆንጭድ፥ 31 የሩሳላመን ፖለታናዉ ደእያባ፥ ሄስካ፥ እ ሀ አላምያፐ ሻከታናባ እያራ ኦደቶሶና። 32 ጰፅሮሳነ እያራ ደኤይሳታ ꬍስኮይ ኤፍን፥ ኤንቲ ꬍስኮፈ ባርክያ ዎደ እያ ቦንቹዋነ እያራ ኤቅዳ ናምኡ አሳታ በእዶሶና። 33 አሳት የሱሳፐ ሻከትድ ባና ሀንሽን፥ ጰፅሮስ የሱሳኮ፥ “ጎዳዉ፥ ኑ ሀይሳን ግድኮ ኑስ አይ መላ ሎኦ! እስኖ ነዉ፥ እስኖ ሙሰስ፥ እስኖ ኤልያሳስ ኦꬅድ፥ ሄꬑ ሻቃራ ሻቃሮስ” ያግስ። ሽን እ አይ ግዳኮ ኤረና።

34 እ ያግድ ኦደትሽን ሻራይ ይድ ኤንታና ካምስ። ኤንቲ ሄ ሻራ ግዶ ገልሸ ባብዶሶና። 35 ሻራ ግዶፈ፥ “ታ ዶርዳ ናአይ ሀይሳ እያ ስእተ” ግያ ቃል ስኤትስ። እሳ 42:1፤ ማቶ 3:17፤ 12:18፤ ማር 1:11፤ ሉቃ 3:22. 36 ቃል ስኤትዳፐ ጉየ፥ የሱሲ ባርካ ደእሸ በንትስ። ሄ ዎደ ኤንቲ በእዳባ ኦደስካ ኦዶና፥ ባንታ ዎዛናን ኦይክድ ስእ ግዶሶና።

37 ዎንተ ኤንቲ ዙማ ቦላፈ ዎꬍያ ዎደ ዳሮ አሳይ ይድ እያራ ጋሄትዶሶና። 38 ሄ ዎደ አሳ ግዶፈ እስ አስ፥ “አስታማርያዉ፥ ታ እስ ናኣ ያዳ በአርክ። 39 ቱና አያናይ ቆፖና ኦይክድ ዋስሴስ፤ ጎፖንቶ የግስድ ቃከረꬄስ፥ አሳተꬃ ቆህድ ኡንኤꬅድ የዴስ። 40 ነ ታማረት ከሳና መላ ዎሳስ፥ ሽን ኤንቲ ዳንዳእቦኮና” ያግድ ዎስስ።

41 የሱሲ፥ “አማኖይ ባይና ጌላ የለታቶ፥ አዉደ ጋካናዉ ታ ህንተራ ዳነ፥ ህንተና ዳንዳአኔ? ነ ናኣ ባዳ ሃ ኤካያ” ያግስ።

42 ናኣ ኤክድ ያ ዎደ ቱና አያናይ ሳአን ሆል የግድ ኮኮርስስ። ሽን የሱሲ ቱና አያና ሀንቅድ ናኣፐ ከስስ። ናኣካ ናኣ አዋስ እሚስ። 43 አሳ ኡባይ ፆሳ ግታ ዎልቃን ማላለትዶሶና። ኤንቲ እ ኦꬅዳባን ማላለትሽን፥ የሱሲ ባ ታማረታኮ፥ 44 “ሀይሳ ታ ህንተዉ ኦደይሳ ሎይꬅ ስእተ፤ አሳ ናእ ሞርከታ ኩሸን አꬍድ እመታና” ያግስ። 45 ሽን እ ግዳባይ ኤንታፈ ጌምዳ ግሾ፥ አኬክቦኮና። ሄሳ ግሾ፥ ዛሪድ ኦይቻናዉ ባብዶሶና።

46 የሱሳ ታማረት፥ “ኑ ግዶን ግታ ግዳናይ ኦኔ?” ግድ ፓላማ ኦይክዶሶና። ሉቃ 22:24. 47 የሱሲ ኤንታ ዎዛና ቆፋ ኤርድ ዮጋ ናኣ ባ ማታን ኤስድ፥ 48 “ሀ ዮጋ ናኣ ታ ሱንꬃን ሞክያ ኦንካ ታና ሞኬስ፥ ታና ሞከይ ታና ኪትዳይሳ ሞኬስ፥ ህንተ ኡባፈ ጉፀይስ፥ እ ግታ ግዳና” ያግስ። ማቶ 10:40፤ ሉቃ 10:16፤ ዮሀ 13:20.

49 ዮሃንስ፥ “ጎዳዉ፥ እስ አስ ነ ሱንꬃን ቱና አያናታ ከስሽን በእድ፥ እ ኑራ ግዶና ግሾ ድግዳ” ያግስ።

50 የሱሲ ዛሪድ፥ “ህንተራ ኤቀቶናይስ፥ እ ህንተ ባጋ። ሄሳ ግሾ፥ እያ ድጎፍተ” ያግስ።

51 የሱሲ ሳሎ ብያ ዎደይ ማታትዳ ግሾ፥ የሩሳላመ ባናዉ ቃንፅድ ደንድስ። 52 ሳማረ ቢታን ደእያ እስ ጉታ ብድ፥ ኡባባ እያዉ ጊግሳና መላ አሰ ያ ኪትስ። 53 ሽን እ በይ የሩሳላመ ግድያ ግሾ፥ ኤንቲ እያ ሞክ ኤክቦኮና። 54 የሱሳ ታማረት ያይቆባራነ ዮሃንሳራ ሄሳ በእድ፥ “ጎዳዉ፥ ሳሎፐ ታም ዎꬍድ ኤንታ ሞ ጋና መላ ነ ኮያይ” ያግዶሶና። 2 ካዎ 1:9-16. 55 ሽን የሱሲ ጉየ ስም ኤንታ ሀንቀትድ፥ “ህንተ ጋርሳን አይብ አያን ደእያኮ ህንተ ኤረከታ። አሳ ናእ አሰ አሻናዉ ይስፐ አትሽን፥ ꬋይሳናሳ ግደና” ያግስ። 56 ያፐ ደንድድ ሀራ ጉታ ብዶሶና።

57 ኤንቲ ኦገራ ብሽን፥ እስ አስ፥ “ነ ብያ ሶ ኡባ ታ ካላና” ያግስ።

58 የሱሲ ዛሪድ፥ “ዎርካናታስ ኦል፥ ሳሎ ካፎታስ ኬꬅ ደኤስ፥ ሽን አሳ ናእ ባ ሁጰ ሸምፕስያ በሲ ባዋ” ያግስ።

59 ሀንኩዋኮ፥ “ኔኒ ታና ካላ” ያግስ። ሽን ኡራይ፥ “ጎዳዉ፥ ኮይሮታዳ ታ አዋ ሞጋዳ ያና” ያግስ።

60 ሽን የሱሲ፥ “ሀይቅዳይሳት ሀይቅዳይሳታ ሞጋና መላ ኤንታዉ አጋጋ፤ ኔኒ ባዳ ፆሳ ካዎተꬃ ሳባካ” ያግስ።

61 ቃስ ሀራ አስ፥ “ጎዳዉ፥ ታ ነና ካላና፥ ሽን ኮይሮታዳ ታ ሶ አሳ ሳሮꬃዳ ያና” ያግስ። 1 ካዎ 19:20.

62 የሱሲ ዛሪድ፥ “ኮፀ ኦይክድ ጉየ ፄልያ ኦንካ ፆሳ ካዎተꬃስ በሰና” ያግስ።