1 ሄሳፈ ጉየ፥ የሱሲ ፆሳ ካዎተꬃ ዎንገላ ሳባክሸ ካታማራነ ጉታራ አꬍስ። ሄ ዎደ ታማነ ናምኡ ሀዋረት እያራ ደኦሶና። 2 ቃስ ቱና አያናፐነ ዱማ ዱማ ሀርግያፈ ፓፅዳ እስ እስ ማጫሳት እያራ ደኦሶና። ኤንትካ፥ ላፑን ቱና አያናት ከይዳ ማግደላ ማይራሞ፥ ማቶ 27:55-56፤ ማር 15:40-41፤ ሉቃ 23:49. 3 ሄሮዲሳ ሹማ ኩዛ ማችዉ ዮሃና፥ ሶስናራነ ቃስ ሀራ ዳሮት ኤንታና ሚሸን ማደይሳት ደኦሶና።

4 ዳሮ አሳይ ዱማ ዱማ ካታማፐ እያኮ ሺቅን ሌምሶን ኤንታዉ ኦድስ። 5 “እስ ጎሻንቾይ ዘረꬅ ዘራናዉ ከይስ። እ ዘርሽን እስ እስ ዘረꬃይ ኦገ ጋፃን ዎꬍድ የትስ፥ ሳሎ ካፎት ማፅዶሶና። 6 ሀራት ሻሎይ ጋርሳን ደእያ ቢታ ቦላ ዎꬍዶሶና። ቡሮ ዶልዳ መላ ቢታን ላሆይ ባይና ግሾ ምጭዶሶና። 7 ሀራ ዘረꬃይ ቃስ አጉንꬃ ግዶን ዎꬍስ። አጉንꬃራ ዎላ ድጭዳ ግሾ አጉንꬃይ ጩልድ በሳን አሽስ። 8 ሀራት ሎኦ ቢታ ቦላ ዎꬍዶሶና። ዶልዳ ዎደ ፄቱ ኩሸ አይፍዶሶና።” ሄሳ ኦድ ኦንግድ፥ ባ ቃላ ꬎቁ ኦꬅድ፥ “ስእያ ሀይꬅ ደእያ ኡባይ ስኦ” ያግስ።

9 እያ ታማረት፥ “ሀ ሌምሱዋ ብርሸꬃይ አይቤ?” ያግድ ኦይችዶሶና 10 እ፥ “ፆሳ ካዎተꬃ ፁራ ኤራና መላ ህንተዉ እመትስ። ሽን ሀራት በእሸ ደሞና መላ፥ ስእሸ አኬኮና መላ ሌምሶን ኦዳይስ። እሳ 6:9.

11 “ህዛ፥ ሀ ሌምሱዋ ብርሸꬃይ ሀይሳ፦ ዘረ ያገትዳይ ፆሳ ቃላ። 12 ኦገ ጋፃን ዎꬍዳ ዘረꬃይ ቃላ ስኤይሳታ። ግዶሽን፥ ኤንቲ አማንድ አቶና መላ ፃላሄይ ቃላ ኤንታ ዎዛናፐ ማፅ ድጌስ። 13 ሻሎይ ጋርሳን ደእያ ቢታ ቦላ ዎꬍዳ ዘረꬃይ ቃላ ስእድ ኡፋይሳን ኤከይሳታ። ኤንቲ ሀእስ አማኖሶናፐ አትሽን፥ ፃጶይ ባይና ግሾ ፓጨይ ጋክያ ዎደ ኤለስድ ካዶሶና። 14 አጉንꬃ ግዶን ዘረትዳ ዘረꬃይ ቃላ ስኤይሳታ። ኤንትካ አላምያ ቆፋን፥ ዱረተꬃንነ ሳአ ዱሳ ሚኮተꬃን ጩለትድ በሰይሳዳ አይፍቦኮና። 15 ሎኦ ቢታን ዎꬍዳ ዘረꬃይ ሎኦ ዎዛናን ቃላ ስእድ ናገይሳታነ ዳንዳአን ምንድ አይፈ አይፈይሳታ።

16 “ፆምፐ ኦይꬅድ፥ ዳቾ ካመይ ዎይኮ አርሳፈ ጋርሳን ዎይ ዴና። ገልያ አስ በአና መላ ꬎቃ በሳን ዎꬄስ።ማቶ 5:15፤ ሉቃ 11:33.

17 “ሄሳ ግሾ፥ ቆንጨ ከዮና ቆሰትድ አትያባይ፥ ኤረቶና ጌምድ አትያባይ ዴና። ማቶ 10:26፤ ሉቃ 12:2.

18 “ህዛ፥ ህንተ ቃላ ዋት ስእያኮ አኬክተ። ደእያ ኡባስ ጉዠትድ እመታና፥ ባይናይሳስ ሀር አቶሽን እያዉ ደእያ ጉꬅያካ እያፐ ኤከታና” ያግስ። ማቶ 25:29፤ ሉቃ 19:26.

19 የሱሳ አየራነ እሻታራ እያኮ ይዶሶና። ሽን አሳ ዳሮተꬃፈ ደንዶይሳን እያ ደማናዉ ዳንዳእቦኮና። 20 እስ አስ የሱሳኮ፥ “ነ አየራነ ነ እሻታራ ነና ኮይድ ካረን ናጎሶና” ያግስ።

21 የሱሲ ዛሪድ፥ “ፆሳ ቃላ ስእድ ኦሶን ፔሸይሳት ኡባይ፥ ታዉ አዮነ ታዉ እሻ” ያግስ።

22 እስ ጋላስ የሱሳራነ እያ ታማረታራ እስፈ ዎጎሎን ገልድ፥ “አባ ፕኖስ” ያግስ። ኤንትካ ባናዉ ደንድዶሶና። 23 አባ ቦላራ ኤንቲ ፕናናዉ ብሽን የሱሲ ꬍስክስ። ቆፖና ምኖ ጫርኮይ አባ ቦላ ደንድስ። ሃꬅ ዎጎሉዋን ገልን ዎጎሎይ ምተተꬅ ኦይክያ ዎደ ኡባይ ባብዶሶና።

24 እያ ታማረት እያኮ ሺቅድ፥ “ጎዳዉ! ጎዳዉ! ኑ ꬋዮስ” ያግድ የሱሳ ደንꬅዶሶና።

የሱሲ ደንድድ ጫርኩዋነ ጎትያ ሀንቅስ። ኤለስድ ጫርኮይነ ጎተይ ዎፑ ግስ፤ ሳሮተꬅ ስምስ። 25 የሱሲ ባ ታማረታኮ፥ “ህንተ አማኖይ አዉኔ?” ያግስ። ኤንትካ፥ ያይሸነ ማላለትሸ እሶይ እሱዋኮ፥ “ጫርኮይነ ሃꬃይ ኪተተይስ፥ እ ሀይስ ኦኔ” ያግዶሶና።

26 አባ ፕንድ ጋልላ ባጋራ ደእያ ገርገሶነ ቢታ ጋክዶሶና። 27 የሱሲ ዎጎሎፐ ከይድ ሳአን ዎꬍሽን ቱና አያናን ኦይከትዳ ኡራይ ካታማፐ ከይድ እያራ ጋሄትስ። ዳሮ ላይꬅ ማኦ ማኦና ካሎ ዱፎን ደኤስፐ አትሽን፥ ሶ ገለና። 28 የሱሳ በእዳ ዎደ እያ ስንꬃን ጉፋንድ፥ ባ ቃላ ꬎቁ ኦꬅድ፥ “ኡባፈ ቦላ ፆሳ ናአዉ የሱሳ ኔራ ታዉ አይብ እስፈተꬅ ደኢ? ሀያና ታና ሀእ ኡንኤꬆፋርክ” ያግስ። 29 ሄሳ እ ግዳይ፥ ቱና አያናይ ኡራፐ ከያና መላ የሱሲ ሀንቅዳ ግሾሳ። ዳሮ ዎደ ቱና አያናይ እያ ሃርዳ ግሾ ሳንꬃላታንነ ቶሆ ቃችያ ብራታን ቃሸትድ ናገቴስ። ሽን ቃሹዋ ዱꬅድ ቱና አያናን ላገትድ መላ ቢታ ገልስ።

30 የሱሲ፥ “ነ ሱንꬃይ ኦነ” ያግድ ኦይችስ።

እ፥ ዳሮ ቱና አያናት እያ ኦይክዳ ግሾ ባና፥ “ሌግዮና” ግስ። 31 ቱና አያናት ባንታና ስኦለ ኪቶና መላ ዎስዶሶና።

32 ሄ በሳን ዞዘ ቦላ ምያ ጉዱንꬆ ዉደይ ሄመቴስ። ህን ጉዱንꬆታን ገልኖ ግድ ዎስዶሶና፥ እካ “ገልተ” ግስ። 33 ቱና አያናት ኡራፐ ከይድ ጉዱንꬆታን ገልዶሶና። ዉደይ ደርያፐ ዱገ ጉርጉፅድ አባን ገልስ።

34 ሄንꬃንቾት ሀንዳይሳ በእዳ ዎደ ዎፅ ብድ፥ ካታማንነ ጉታ ኡባን ኦድዶሶና። 35 አሳይ ሀንዳባ በአናዉ ከይድ የሱሳኮ ይዶሶና። ቱና አያናይ ከይዳ ኡራይ ማኦ ማእድ፥ እያ ዎዛናይ ስምን፥ የሱሳ ቶሆ ማታን ኡትዳይሳ ደምድ ያይዶሶና። 36 እያ በእዳ አሳይ ቱና አያናን ኦይከትዳ ኡራይ ዋንድ ፓፅዳኮ ኦድዶሶና። 37 ገርገሶነ ዩሾን ደእያ አሳይ ግታ ያሽ ያይድ፥ የሱሲ ባንታ ማታፐ ባና መላ ዎስዶሶና። እ ዎጎሉዋን ገልድ ጉየ ስምስ።

38 ቱና አያናይ ከይዳ ኡራይ የሱሳራ ዳናዉ ዎስስ። 39 ሽን የሱሲ እያኮ፥ “ነ ሶ ስማ፥ ፆሳይ አይ መላ ግታባ ነዉ ኦꬅዳኮ ኦዳ” ያግድ ሞይዝስ። ኡራይካ የሱሲ አይ መላ ግታባ እያዉ ኦꬅዳኮ ካታማ ኡባን ማርካትሸ ብስ።

40 አሳይ ናግድ ጋምእዳ ግሾ የሱሲ ስምያ ዎደ ሞክ ኤክዶሶና። 41 አይሁደ ዎሳ ኬꬃ ሀላቃ ግድዳ እያሮሳ ጌተትያ ኡራይ ባ ሶ ያና መላ የሱሳ ቶሁዋ ቦላ ዎꬍድ ዎስስ። 42 እያዉ ታማነ ናምኡ ላይꬅ ግድዳ ማጫ ናእ ሳከታዳ ሀይቆስ ጋካዳ ደአዉሱ። የሱሲ ብያ ዎደ አሳይ እያ ኡንኤꬄስ። 43 ታማነ ናምኡ ላይꬅ ሱꬅ ጎግሸ ጋምእዳ ማጫስ ደአዉሱ። እያ ባዉ ደእያ ሚሽያ አክመታስ እማዳ ኦንጋሱ። ሽን ፓፃናዉ ዳንዳአቡኩ። 44 እያ የሱሳስ ጉየ ባጋራ ሺቃዳ፥ እያ አፍላ ማጫራ ቦቻሱ፥ ኢራካ ጎግያ ሱꬃይ ኤቅ አግስ።

45 የሱሲ፥ “ታና ቦችዳይ ኦኔ?” ያግስ። ኡባይ፥ “ኑ ቦችቦኮ” ያግን፥ ጰፅሮስ፥ “አስታማርያዉ፥ ዳሮ አሳይ ካልሽንነ ኡንኤꬅሽን በአሸ ዋናዳ፥ ‘ታና ቦችዳይ ኦኔ?’ ጋይ” ያግስ።

46 ሽን የሱሲ፥ “እስ አስ ታና ቦችስ፤ አይስ ጊኮ፥ ዎልቅ ታፐ ከዮይስ ታዉ ኤረትስ” ያግስ።

47 ማጫስያ፥ እባይ ቆንጭዳይሳ ኤርዳ ዎደ ኮኮራሸ ያዳ የሱሳ ቶሁዋ ቦላ ኩንዳሱ። አይስ ቦችዳኮነ ዋናዳ ኤለሳዳ ፓፅዳኮ አሳ ኡባ ስንꬃን ማርካታሱ። 48 እ፥ “ታ ናተ፥ ነ አማኖይ ነና ፓꬅስ፤ ሳሮ ባ” ያግስ።

49 የሱሲ ኦዳ ኦንጎና ደእሽን፥ አይሁደ ዎሳ ኬꬃ ሀላቃ፥ እያሮሳ ሶፐ እስ አስ ይድ፥ “እያሮሳ፥ ነ ናእያ ሀይቃሱ፤ አስታማርያ መላ ዳቡርሶፋ” ያግስ።

50 ሽን የሱሲ ሄሳ ስእድ እያሮሳኮ፥ “ባቦፋ! አማና፥ ነ ናእያ ፓፃና” ያግስ።

51 የሱሲ እያሮሳ ሶ ጋክዳ ዎደ ጰፅሮሳፐ፥ ዮሃንሳፐ፥ ያይቆባፐ፥ ናኤ አዋፐነ አየፐ አትሽን፥ ሀር ገላና መላ ኮይቤና። 52 ሄ በሳን ደእያ አሳ ኡባይ ናኤስ ምሸትድ ዬክሽን፥ የሱሲ፥ “ዬኮፍተ ናእያ ꬍስካሱፐ አትሽን፥ ሀይቃቡኩ” ያግስ።

53 አሳይ ናእያ ሀይቅዳይሳ ኤርያ ግሾ፥ እያ ኦዳ ለቅድ ሚጭዶሶና። 54 ሽን የሱሲ ናኤ ኩሽያ ኦይክድ፥ “ናተ ደንዳ” ያግስ። 55 ናኤስ ሸምፖይ ስምን ደንዳ ኤቃሱ። የሱሲ ኤንታኮ፥ “እዉ ምያባ እምተ” ያግስ። 56 ናኤ አዋራነ አየራ ማላለትዶሶና። ሽን የሱሲ ሀይሳ፥ “ኦደስካ ኦዶፕተ” ያግስ።