1 የሱሲ ሄሳ ኡባ አሳ ስንꬃን ታማርስድ ኦንግዳፐ ጉየ፥ ቅፍርናሆማ ካታማ ብስ። 2 ሄ በሳን እስ ማቶ ሀላቃይ ደኤስ። እ ዳሮ ዶስያ አይለይ ሀርገትድ ሀይቆስ ጋክስ። 3 እ የሱሳባ ስእዳ ዎደ ባ አይልያ ፓꬃና መላ እያ ዎሶ ግድ እስ እስ አይሁደ ጭማታ የሱሳኮ ኪትስ። 4 ኪተትዳይሳት፥ የሱሳኮ ብድ፥ “ነ እያዉ ሀይሳ ኦꬃናዉ በሴስ። 5 አይስ ጊኮ፥ ሀ ኡራይ ኑ አሳ ዶሴስ፥ አይሁደ ዎሳ ኬꬃካ ኬፅስ” ግድ ምንꬅ ዎስዶሶና 6 የሱሲካ ኤንታራ ብስ።

ማቶ ሀላቃ ሶኮ ማትያ ዎደ ባ ላገታ እያኮ ኪትድ፥ “ጎዳዉ፥ ታ ካራፐ ጋርሳን ነ ገላናዉ ታ በሶና ግሾ፥ ዳቡሮፓ። 7 ታካ ታና ነ ስን ሺቃናዉ በሲያ አስ ጋዳ ቆፕከ። ሽን ነ እስ ቃላ ኦዳ፤ ታ አይለይ ፓፃና። 8 ታዉ ታፐ ቦላራ ሀላቃይ ደኤስ፥ ታፐ ጋርሳን ታ ኪትያ ዎታዳረት ደኦሶና። እሱዋ፥ ‘ባ’ ጊኮ ቤስ፥ ሀንኩዋ፥ ‘ሃያ’ ጊኮ ዬስ። ታ አይልያኮ፥ ‘ሀኖ ኦꬃ’ ጊኮ ኦꬄስ” ያግስ።

9 የሱሲ ሄሳ ስእዳ ዎደ ማላለትስ። ጉየ ስሚድ ባራ ያ አሳኮ፥ “ታኒ ህንተዉ ቱማ ኦዳይስ፤ ሀር አቶሽን እስራኤለንካ ሀይሳ መላ ግታ አማኖ ደማብከ” ያግስ። 10 ኪተትዳ አሳት ሶ ስምያ ዎደ አይለይ ፓፅን ደምዶሶና።

11 ጉꬃ ዎደፐ ጉየ የሱሲ ናይነ ካታማ ብስ። እያ ታማረታራነ ሀራ ዳሮ አሳት እያራ ብዶሶና። 12 እ ካታማ ገላና ሀንያ ዎደ አሀ ቶክዳ ዳሮ አሳት ካታማፐ ከዮሶና። ሀይቅዳ ናአይ ባ አየስ እሱዋ፥ እያካ አምኦ ግዳዳ ደአዉሱ። ካታማ አሳፐ ዳሮት ኢራ ደኦሶና። 13 ጎዳይ እዮ በእዳ ዎደ ቃትድ፥ “ዬኮፋ” ያግስ።

14 ሺቅድ ሀላ ቦችን ቶክዳ አሳት ኤቅዶሶና። የሱሲ፥ “ላ፥ ያላጋዉ ደንዳ” ያግስ። 15 ሀይቅዳይስ ደንድ ኡትድ ኦዳ ኦይክስ። የሱሲ ናኣ ኤክድ አየስ እሚስ።

16 አሳ ኡባይ ያሸትድ፥ “ግታ ናበይ ኑ ግዶን ደንድስ፤ ፆሳይ ባ አሳ በእስ” ያግድ ፆሳ ጋላትዶሶና። 17 እያ ሱንꬃይ ይሁዳንነ ሄ ሄራን ደእያ ቢታ ኡባን ስኤትስ።

18 ፃማቅያ ዮሃንሳ ታማረት ሄሳ ኡባ ዮሃንሳስ ኦድዶሶና። እ ኤንታ ግዶፈ ናምአታ ፄግድ፥ 19 “ያና ጌተትዳይ ነነዬ? ዎይኮ ሀራ ናግኖ?” ያግድ ኦይችተ ግድ ጎዳኮ ኪትስ።

20 አሳት “የሱሳኮ ብድ፥ ፃማቅያ ዮሃንስ፥ ‘ያና ጌተትዳይ ነነዬ? ዎይኮ ሀራ ናግኖ?’ ጊተ ግድ ኑና ኔኮ ኪትስ” ያግዶሶና።

21 ሄ ሳተንካ የሱሲ ዳሮ አሳ ሀርግያፈ ፓꬅስ። ቱና አያናታ ከስስ፥ ቆቅዳ አይፍያካ ፄልስስ። 22 ዮሃንሳ ማታፐ ኪተትድ ይዳይሳታኮ፥ “ብድ ህንተ በእዳይሳነ ስእዳይሳ ዮሃንሳስ ኦድተ። አይፈ ቆቀት ፄሎሶና፥ ጉንዳት ብርሸትድ ሄመቶሶና፥ ባሮ ሀርጋንቾት ጌዮሶና፥ ቱለት ስኦሶና፥ ሀይቅዳይሳት ሀይቆፐ ደንዶሶና፥ ማንቆታስ ዎንገላይ ሳባከቴስ። እሳ 35:5-6፤ 61:1. 23 ታናን ꬉበቶና ኦንካ አንጀትዳይሳ።”

24 ዮሃንስ ኪትዳይሳት ብዳፐ ጉየ የሱሲ አሳስ ዮሃንሳባ ያግድ ኦድስ፦ “ህንተ አይ በአናዉ መላ ቢታ ከይደቲ? ጫርኮይ ቃꬅያ ማታ በአናሰዬ? 25 ያትን፥ አይ በአናዉ ከይደቲ? ኮይሰ ማኦ ማእዳ አሳ በአናሰዬ? ኮይሰ ማኦ ማእዳይሳትነ ሳእ እንጀትዳ አሳይ ካዎ ጋꬎን ደኦሶና። 26 ያትን፥ አይ በአናዉ ከይደቲ? ናብያ በአናሰዬ? ኤ፥ ታ ያጋይስ፦ ህንተ በአናዉ ከይዳይ ናበፐ አይሳ።

29 ሀር አቶሽን፥ የሱሳ ቃላ ስእዳ ቃራፃ ቃንፅሰይሳት ኡባይ ዮሃንሳ ኩሸን ፃማቀትድ ፆሳይ ፅሎ ግደይሳ ቆንጭስዶሶና። ማቶ 21:32፤ ሉቃ 3:12. 30 ሽን ፋርሳወትነ ህገ አስታማረት ዮሃንሳ ኩሸን ፃማቀቶና እፅድ ፆሳ ዞርያ ለቅስዶሶና።

31 የሱሲ ካልድ ሀይሳዳ ያግስ፦ “ህዛ፥ ሀ ዎድያ የለተꬃ አይብራ ዳንሶ? ኤንትካ ኦና ዳኖና? 32 ግያ ግዶን ኡትድ ዎል ፄግድ፥ ‘ኑ ህንተዉ ሱሱልኤ ፑንን፥ ህንተ የፀከታ። ኑ ሳቢድ ዘሌልን፥ ህንተ ዬከከታ’ ግያ ናይታ ዳኖሶና። 33 ፃማቅያ ዮሃንስ ሞናነ ኡዮና ይን፥ ‘ኢታ አያናራ ደኤስ ግደታ።’ 34 አሳ ናአይ ምሸነ ኡይሸ ይን፥ ‘ያራምባነ ኡሻንቾ፥ ቃራፃ ቃንፅሰይሳታነ ናጋራንቾታ ዳቦ’ ግደታ። 35 ህዛ፥ ጭንጫተꬃ ቱማተꬃይ እያ ናይታ ኡባ ማታን ኤረትስ” ያግስ።

36 እስ ፋርሳወይ የሱሳ ካꬅ ሙዛናዉ ባ ሶ ፄግስ። እ ፋርሳውያ ሶ ብድ ጋይታ ቦላ ኡትስ። 37 ሄ ካታማን እስ ናጋራንቾ ማጫስ፥ የሱሲ ፋርሳውያ ሶን ግብራ ቦላ ደኤይሳ ስእዳ ዎደ ዳሮ አልኦ ጵልቃፀ ሽቶ ኤካዳ ያሱ። ማቶ 26:7፤ ማር 14:3፤ ዮሀ 12:3. 38 የሱሳፐ ጉየ ባጋራ፥ እያ ቶሁዋ ማታን ኤቃዳ ዬካሸ እያ ቶሁዋ ባ አፉꬃራ ላኮꬃዉሱ። ባ ብናናራ እያ ቶሁዋ ቁቻሸነ ዬራሸ ሽቶ ትያሱ።

39 ግብራ ጊግስዳ ፋርሳወይ ሄሳ በእዳ ዎደ ባ ዎዛናን፥ “ሀይስ ናበ ግድያኮ ሀ ማጫስያ፥ እያ ቦችያራ ኦነኮ ቃስ እያ ናጋራንቾ ግደይሳካ እ ኤራናሽን” ያግስ።

40 የሱሲ፥ “ስሞና፥ ታ ነዉ ኦድያባይ ደኤስ” ያግስ።

እ፥ “አስታማርያዉ፥ ታዉ ኦዳ” ያግስ።

41 የሱሲ እያኮ፥ “ናምኡ አሳት እስ ኡራፐ ሚሸ ታልእዶሶና። እሶይ እቻሹ ፄቱ ብራ ሀንኮይ ቃስ እሻታሙ ብራ ታልእዶሶና። 42 ናምአይካ ታልእያ ጭጋናዉ ፆነትን፥ ናምአታስካ ታልእያ ማርስ። ህዛ፥ ሀ ናምአታፐ ሄ ኡራ ዳሮ ዶሳናይ ነዉ ኦና ዳን” ያግስ።

43 ስሞን፥ “ዳሮ አጮይ ማረትዳ ኡራይ ዳሮ ዶሳና ዳኔስ” ያግስ። የሱሲ፥ “ነ ቱማ ፕርዳዳሳ” ያግስ። 44 ሄሳፈ ጉየ፥ የሱሲ ማጫሴኮ ስም ፄልድ፥ ስሞናኮ፥ “ሀኖ ማጫስዉ በአይ? ታኒ ነ ሶ ገልን ሀር አትሽን፥ ነ ታዉ ቶሆ ሃ እማባካ፥ ሽን እያ ታ ቶሁዋ ባ አፉꬃን ላኮꬃዳ ባ ብናናን ቁቻሱ። 45 ኔኒ ታና ዬራ ኤካባካ፥ ሽን እያ ታ ነ ሶ ገሎሳፐ ዶማዳ ታ ቶሁዋ ዬሮ አጋቡኩ። 46 ኔኒ ታ ሁጵያን ዛይተ ትያባካ፥ ሽን እያ ታ ቶሁዋ ሽቶ ትያዉሱ። 47 እያ ታና ዳሮ ዶስዳ ግሾ፥ እ ዳሮ ናጋራይ አቶ ጌተትስ። ጉꬃ ናጋር አቶ ጌተትዳ ኡራይ ጉꬃራ ዶሴስ።”

48 የሱሲ ማጫሴኮ፥ “ነ ናጋራይ አቶ ጌተትስ” ያግስ።

49 እያራ እስፈ ጋይታን ኡትድ ምያ እማꬃት፥ “ናጋራ አቶ ያገይ፥ እ ሀይስ ኦኔ?” ያግድ ባንታ ዎዛናን ቆፕዶሶና።

50 የሱሲ ማጫሴኮ፥ “ነ አማኖይ ነና አሽስ፤ ሳሮ ባ” ያግስ።