1 እስ ጋላስ የሱሲ እስ በሳን ዎሴስ። ዎሳ ዉርስዳ ዎደ እያ ታማረታፐ እሶይ፥ “ጎዳዉ፥ ዮሃንስ ባ ታማረታ ዎሳ ታማርስዳ መላ ነካ ኑና ዎሳ ታማርሳ” ያግስ።

2 የሱሲ፥ “ሀይሳዳ ያግድ ዎስተ፦

5 ካልድካ፥ የሱሲ ባ ታማረታኮ ያግስ፦ “ሌምሶስ ህንተፈ እሱዋስ ላገይ ደኤስ። እ ግድ ብላሄ ባ ላግያ ሶ ብድ፥ ‘ታ ላግያዉ፥ ምያባይ ደእኮ ታዉ እማርክ። 6 ታዉ ላገ ግድዳ እስ አስ ኦገፐ ይን፥ እያዉ አꬅያባ ꬋያስ’ ያግኮ፥

7 “እያ ላገይ ኬꬃ ግዶን ግድድ፥ ‘ሀያና ታና ዋይሶፓ፥ ፐንገይ ጎርደትስ። ታ ናይትካ ታራ አርሳ ቦላ ዝንእዶሶና። ያንያ ግሾ፥ ደንዳዳ ነ ኮያባ እማናዉ ዳንዳእከ’ ያግዬ? 8 ታ ህንተዉ ኦዳይስ፤ ላገተꬃ ግሾ ደንድድ እማናዉ ኮዮና እፅኮካ ዎሳን ሳለꬅዳ ግሾ፥ ደንድድ ኮሽያባ ኡባ እሜስ።

9 “ሄሳ ግሾ፥ ታኒ ህንተዉ ኦዳይስ፤ ዎስተ ህንተዉ እመታና፤ ኮይተ ህንተ ደማና፤ ካረ ይድ ፄግተ ህንተዉ ዶየታና። 10 ጋሶይካ፥ ዎስያ ኡባይ ኤኬስ፤ ኮየይ ደሜስ፤ ካረ ይድ ፄገይሳስ ዶየቴስ።

11 “ህንተኖ፥ አዋቶ ህንተ ግዶፈ ናእ ኡይꬅ ዎስን፥ ሹቹ እመይ ኦኔ? ሞሎ ዎስን ሾሽ እመይ ኦኔ? 12 ዎይኮ ጱጱለ ዎስኮ ኮርነ እሚ? 13 ህንተ ኢታታ ግድሸ ህንተ ናይታስ ሎኦባ እሞ ኤርኮ፥ ሳሎን ደእያ ህንተ አዋይ ዎሰይሳታስ ጌሻ አያና ዋትድ አꬅድ እመኔ?” ያግስ።

14 እስ ጋላስ የሱሲ፥ ዶና ሙምስዳ ቱና አያና እስ ኡራፐ ከስስ። ቱና አያናይ ከይዳ መላ ሙመ ኡራይ ኦደትስ። አሳይካ ማላለትስ። 15 ሽን እሶት እሶት፥ “ቱና አያና ሀላቃ፥ ብኤል-ዘቡላ ዎልቃን ቱና አያናታ ከሴስ” ያግዶሶና። ማቶ 9:34፤ 10:25. 16 ሀራት ቃስ ፓጬስ ሳሎፐ ማላ በሳና መላ ኮይዶሶና። ማቶ 12:38፤ 16:1፤ ማር 8:11.

17 ሽን የሱሲ ኤንታ ቆፋ ኤርድ ኤንታኮ፥ “ዎል ግዶን ሻከትያ ካዎተꬅ ኡባይ ꬋዬስ፤ ዎል ግዶን ሻከትያ ኬꬅ ኩንዴስ። 18 ፃላሄይ ዎል ግዶን ሻከትኮ እያ ካዎተꬃይ ዋንድ ምንድ ኤቃኔ? ህንተ ታና፥ ‘እ ቱና አያናታ ብኤል-ዘቡላ ዎልቃን ከሴስ’ ያጌታ። 19 ህዛ፥ ታኒ ቱና አያና ብኤል-ዘቡላ ዎልቃን ከስያባ ግድኮ ህንተ ናይት ኦደ ዎልቃን ከሶናሻ? ሄሳ ግሾ፥ ኤንቲ ህንተ ቦላ ፕርደይሳታ ግዳና። 20 ሽን ታኒ ቱና አያናታ ፆሳ ብራን ከስያባ ግድኮ፥ ህዛ፥ ፆሳ ካዎተꬃይ ህንተኮ ማትዳይሳ ኤርተ።

21 “ምኖ አስ ቶራነ ጎንዳለ ኦይክድ፥ ባ ኬꬃ ናግያባ ግድኮ፥ እያ ሻሎይ ቦሸተና። 22 ሀኖሽን፥ እያፐ አꬍድ ምኖ ግድዳ አስ ይድ፥ እያ ቆህድ ፆንኮ፥ አማነትዳ ቶራነ ጎንዳለ ዎስስ ኤክድ፥ እያ ሻሉዋ ቦንቅድ ሀራስ ሻኬስ።

23 “ታራ ግዶናይስ ታና እፄስ፤ ታራ ሺሾናይስ ላሌስ። ማር 9:40.

24 “ቱና አያናይ አሳፐ ከይዳ ዎደ ሸምፕያ በሲ ኮይድ ሃꬅ ባይና ሶራ ዩዬስ። ሸምፕያ በሲ ꬋይዳ ዎደ፥ ‘ታ ከይዳሱዋ ስማና’ ያጌስ። 25 እ ስምያ ዎደ ኬꬃይ ፕተትድ ሎእድ ደእሽን ደምስ። 26 ሄሳፈ ጉየ፥ ብድ እያፐ አꬍድ ኢትዳ ሀራ ላፑን ቱና አያናታ ኤክድ ዬስ። እያን ገልድ ዱሱ ኦይኬስ። ሄ ኡራስ ኮይሮይሳፈ አꬍድ ጉየይስ ኢታ ግዴስ” ያግስ።

27 የሱሲ ሄሳ ኦዳ ቦላ ደእሽን፥ እስ ማጫስ አሳ ጋꬃፈ ደንዳዳ፥ ባ ቃላ ꬎቁ ኦꬃዳ፥ “ነና ቶክዳ ኡሎይነ ኔኒ ꬋምዳ ꬋንꬃት አንጀትዶሶና” ያጋሱ።

28 ሽን እ፥ “አንጀትዳይሳት ፆሳ ቃላ ስእድ ኪተተይሳታ” ያግስ።

29 ዳሮ አሳይ ሺቅዳ ዎደ የሱሲ፥ “ሀ የለተꬃይ ኢታ የለተꬅ፤ ኦራꬃ ማላ ኮዬስ። ሽን ዮናሳ ማላታፐ አትሽን፥ ሀር ኤንታዉ እመተና። ማቶ 16:4፤ ማር 8:12. 30 ዮናስ ናናወ አሳስ ማላ ግድዳ መላ አሳ ናእካ ሀ የለተꬃስ ማላ ግዳና። ዮሀ 3:4. 31 ዱገሀ ካውያ ፕርዳ ጋላስ ሀ የለተꬃራ ደንዳዳ ፕርዳና። ጋሶይካ፥ እያ ሶሎሞነ ጭንጫተꬃ ስአናዉ ቢታ ጋፃፐ ደንዳዳ ያሱ። ሄኮ ሶሎሞነፐ አይ ሀይሳን ደኤስ 1 ካዎ 10:1-10፤ 2 ታር 9:1-12. 32 ናናወ አሳት ፕርዳ ጋላስ ሀ የለተꬃራ ደንድድ ኤንታ ቦላ ፕርዳና። ጋሶይካ፥ ዮናሳ ስብካትያን ማሮታ ገልዶሶና። ሄኮ፥ ዮናሳፐ አይ ሀይሳን ደኤስ” ያግስ። ዮሀ 3:5.

33 “ፆምፐ ኦይꬅድ ቆሳ በሳን ዎይኮ ኦቶ ግዶን ዎꬅያ አስ ዴና። አስ ፖኡዋ በአና መላ ꬎቃ በሳን ዎꬄስ።ማቶ 5:15፤ ማር 4:21፤ ሉቃ 8:16. 34 ነ አሳተꬃስ ፖኦይ ነ አይፍያ። ነ አይፈይ ሎኦ ግድኮ፥ ነ ኩመꬃ አሳተꬃይ ፖኤስ። ነና አይፈይ ሳክኮ ነ አሳተꬃይ ኡባይ ꬉሜስ። 35 ሄሳ ግሾ፥ ነ ጋርሳን ደእያ ፖኦይ ꬉሞና መላ ናገታ። 36 ህዛ፥ ነ ኩመꬃ አሳተꬃይ ፖኦ ግድኮ፥ ነ አሳተꬃንካ ሀር ꬉማ በሲ ꬋይኮ፥ ነ አሳተꬃ ኩመꬃይ ዎልለ ፖኦ መላ ግዴስ” ያግስ።

37 የሱሲ ባ ኦዳ ኦንግዳ መላ እስ ፋርሳወይ ባራ ካꬅ ማና መላ ፄግስ። የሱሲ፥ እያራ እስፈ ገልድ ግብራ ቦላ ኡትስ። 38 ፋርሳወይ የሱሲ ካꬅ ማናፐ ስን ኩሸ ሜጮናይሳ በእድ ማላለትስ።

39 ጎዳይ እያኮ፥ “ህንተ ፋርሳወት ቁለስነ ሻተስ ቦላ ባጋ ሜጨታ። ሽን ህንተ ጋꬃይ ኡዘተꬃንነ ኢታተꬃን ኩምስ። 40 ህንተኖ፥ ኤያቶ፥ ካረ ባጋ መꬍዳይ፥ ጋꬃ ባጋ መꬍዳይ እያ ግደኔ? 41 ሽን ቁልያንነ ሻትያን ደኤይሳ ማንቆታስ እምተ። ሄ ዎደ ህንተዉ ኡባባይ ጌሽ ግዳና።

42 “ፋርሳወቶ ህንተና አየ! ሳዎፐ፥ ፃሎተፐነ ሄሳ መላባፐ አስራታ ከሴታ። ሽን ፅሎተꬅነ ፆሰ ዶሶይ ህንተናን ባዋ። ሀራታ አጎና ሀይሳታካ ኦꬃናዉ በሴስ፥ ሽን አግደታ። ሌወ 27:30.

43 “ፋርሳወቶ ህንተና አየ! አይሁደ ዎሳ ኬꬃን ቦንቾ ኦይደ፥ ግያ ግዶን ቦንቾ ሳሮꬆ ዶሴታ።

44 “ማል ꬋይን፥ አሳይ ኤሮና ቦላራ ብያ ዱፎ ዳነይሳቶ ህንተና አየ!” ያግስ።

45 ህገ አስታማረይ ዛሪድ፥ “አስታማርያዉ፥ ነ ሄሳ ጋሸ ኑና ጫያሳ” ያግስ።

46 የሱሲ፥ “ህንተኖ፥ ህገ አስታማረቶ፥ ህንተናካ አየ! አሳይ ቶካናዉ ዳንዳኦና ዴፆ ቶሆ ቶሰታ፥ ሽን ህንተ ህንተ ሁጰስ ሀር አቶሽን ብራ ፄራንካ ቦቸከታ።

47 “ህንተ አዋት ዎꬍዳ ናበታ ዱፉዋ ህንተ ጊግስያ ግሾ፥ ህንተና አየ! 48 ህዛ፥ ህንተ አዋታ ኦሱዋ ምንꬃናዉ ኤንቲ ዎꬍዳ ናበታ ዱፉዋ ህንተ ሎይꬅያ ግሾ፥ ኤንታ ኢታ ኦሱዋስ ህንተ ማርካ። 49 ሄሳ ግሾ፥ ፆሳይ ባ ጭንጫተꬃን፥ ‘ናበታነ ሀዋረታ ታ ህንተዉ ኪታና፥ ሽን ህንተ ባጋታ ዎꬋና፤ ሀራታ ጎዳና’ ያግስ። 50 ሀ የለተꬃይ አላመይ መቶሳፐ ሀኖ ጋካናዉ ጉክዳ ናበታ ኡባ ሱꬃስ ኦይሸታና። 51 አበላፐ ዶምድ ያርሾ በሳስነ ፆሳ ኬꬃፈ ግዱዋን ጉክዳ ዛካርያሳ ሱꬃ ግሾ ሀ የለተꬃይ ኦይሸታና። መ 4:8፤ 2 ታር 24:20-21.

52 “ህገ አስታማረቶ፥ ህንተና አየ! ኤራተꬃ ቁልፕያ ህንተ ኩሸን ኦይክደታ፥ ሽን ህንተዉ ገለከታ ሀራታካ ገልሰከታ” ያግስ።

53 የሱሲ ያፐ ባናዉ ከይያ ዎደ፥ ህገ አስታማረትነ ፋርሳወት እያራ ኤቀትድ ኦይሾን ዋይሶሶና። 54 እያ ዶናፐ ከይያ ቃላን እያ ኦይካናዉ ኮይድ ሄሳ ኦꬅዶሶና።