1 ሄ ዎደ ዳሮ ሙኩሉን ታይበትያ አሳይ ዎል ቦላ የታና ጋካናዉ አስ አሳ ቦላ ሺቅድ ደእሽን፥ የሱሲ ባ ታማረታኮ፥ “ፋርሳወታ እርሾፈ ናገትተ። ሄስካ ኤንታ ጩቦተꬃ።ማቶ 16:6፤ ማር 8:15. 2 ቆንጮና ቆሰትድ፥ ኤረቶና ጌምድ አትያባይ አይኮይካ ባዋ። ማር 4:22፤ ሉቃ 8:17. 3 ህዛ፥ ህንተ ꬉማን ኦደትዳባይ ኡባይ ፖኦን ስኤታና፥ ቆልአ ጋꬃን ካልካሽዳባይ ዳባባን ኦደታና።

4 “ታ ባጋቶ፥ ታ ኦደይሳ ስእተ፤ አሹዋ ዎꬎኦሶናፐ አትሽን፥ ሀራ አይኮካ ኦꬃናዉ ዳንዳኦናይሳታስ ባቦፍተ። 5 ሀኖሽን፥ ህንተ ባባናዉ በሰይሳ ታ ህንተዉ ቆንጭሳና። ሄስካ ዎꬍዳፐ ጉየ ጋናመን የጋናዉ ዎልቃይ ደኤይሳስ እያዉ ባብተ። ኤ፥ ቱማ ኦዳይስ፤ እያዉ ባብተ። 6 እቻሹ ቡበት እስ ሳንትመስ ባይዘቶኮናዬ? ሀኖሽን፥ ኤንታፈ እስናካ ፆሳ ስንꬃን ዶገቱኩ። 7 ሀር አቶሽን፥ ህንተ ሁጰ ብናናይካ ፓይደትድ ደኤስ። ህዛ፥ ባቦፍተ፤ ዳሮ ቡበታፐ ህንተ አታ።

8 “ታ ኦደይሳ ስእተ፤ አሳ ስንꬃን ታዉ ማርካትያ ኡባስ አሳ ናእ ፆሳ ኪታንቾታ ስንꬃን ማርካታና። 9 አሳ ስንꬃን ታና ካደይሳስ ፆሳ ኪታንቾታ ስንꬃን ታ እያ ካዳና። 10 አሳ ናአ ቦላ ካ ቃላ ሃሳያ ኡባይ ማሮታ ደማና፥ ሽን ጌሻ አያና ቦላ ካ ቃላ ኦደተይስ ማረተና። ማቶ 12:32፤ ማር 3:29.

11 “አስ ህንተና ኦይክድ አይሁደ ዎሳ ኬꬃን፥ ዳይናታ ስንꬃንነ ካዎታ ስንꬃን ጎሸችያ ዎደ አይ ኦዳነኮነ ዎይግ ዛራነኮ ህርጎፍተ። ማቶ 10:19-20፤ ማር 13:11፤ ሉቃ 21:14-15. 12 ሄ ዎደ ህንተ ኦዳናባ ጌሻ አያን ህንተና ታማርሳና” ያግስ።

13 አሳ ግዶፈ እስ አስ የሱሳኮ ይድ፥ “ታ እሻይ ታዉ ኑ አዋ ላታፐ ሻካና መላ እያዉ ኦዳ” ያግስ።

14 የሱሲ ዛሪድ፥ “ላ አድያዉ፥ ህንተ ቦላ ታና ዳይናነ ላታ ሻክያ ጭማ ኦꬅዳይ ኦኔ?” ያግስ። 15 ጉጅድካ፥ የሱሲ፥ “አሳ ደኦይ ሻሎ ዳሮተꬃን ግዶና ግሾ ያረ አግድ ምንꬅድ ህንተና ናግተ” ያግስ።

16 ካልድካ ሌምሶን፥ “ጋደይ ዳሮ ካꬅ እምያ እስ ዱረ ኡራይ ደኤስ። 17 ሄ ኡራይ፥ ‘ታ ካꬃ ታኒ ሺሻናዉ በሲ ጉፅዳ ግሾ አይ ኦꬆ?’ ያግድ ባ ዎዛናን ቆፕስ። 18 ህዛፐ ያታና፤ ካሰ ደእያ ሻለታ ላላዳ ሀራ ዳልጋ ሻለታ ኬፃና። ካꬅነ ታዉ ደእያባ ኡባ እያን የጋና። 19 ባ ሸምፐኮ፥ ‘ታ ሸምፐተ፥ ዳሮ ላይꬃስ ነዉ ግድያ ሻሎ ሺሻስ። ህዛ፥ ሸምፓዳ ማ፥ ኡያ፥ ኡፋይታ’ ያጋና።

20 “ሽን ፆሳይ፥ ‘ላ፥ ኤያ ኡራዉ፥ ሀች ቃማ ነ ሸምፕያ ኔፐ ኤከታዉሱ። ህዛ፥ ነ ሺሽዳባይ ኦደስ ግዳኔ?’ ያግስ።

21 “ሄሳ ግሾ፥ ባዉ ዱረተꬅ ሳአን ሺሽያ አሳስ፥ ፆሳ ማታን ዱረ ግዶና አሳስ ዉርሰꬃይ ሀ ኡራ መላ” ያግስ።

22 ሄሳፈ ጉየ፥ የሱሲ ባ ታማረታኮ፥ “ህዛ፥ ታ ኦድያባ ስእተ፥ ህንተ ሸምፑዋስ አይ ሚኖ? ህንተ አሳተꬃስ አይ ማእኖ? ያግድ ኡንኤቶፍተ። 23 ሸምፖይ ካꬃፈ፥ አሳተꬅ አፍላፐ አꬌስ። 24 ካፎታ በእተ ዘሮኮና፥ ኪሾኮና፥ ኤለይነ ሻለይ ኤንታዉ ባዋ። ሽን ፆሳይ ኤንታና ሙዜስ። ህንተ ካፎታፐ ዳሮ አታ። 25 ሀኖሽን፥ ህንተፈ ኡንኤትድ ባ ላይꬃ ቦላ እስ ቃማ ጉጃናዉ ዳንዳኤይ ኦኔ? 26 ህዛ፥ ሀ ጉꬃባ ኦꬃናዉ ዳንዳኦና ህንተ፥ ሀራባስ አይስ ኡንኤተቲ? 27 አነ ጪሻት ዋንድ ድጭያኮ በእተ። ዋዮኮናነ ሱቆኮና። ሀር አቶሽን፥ ሶሎሞነይ ባ ደእያ ቦንቾ ኡባን ኤንታፈ እሱዋ መላካ ማእቤና። 1 ካዎ 10:4-7፤ 2 ታር 9:3-6. 28 ህንተኖ፥ አማኖይ ፓጭዳይሳቶ፥ ህዛ፥ ፆሳይ ሀች በንትድ ዎንቶ ታማን የገታና ጪሻታ ሀይሳዳ ማይዝኮ፥ ህንተና ዋት አꬅድ ማይዘኔ? 29 ሄሳ ግሾ፥ አይ ምኖ ዎይኮ አይ ኡይኖ ግድ ኡንኤቶፍተ። 30 ሄ ኡባስ ፆሳ አማኖና አሳት ኡንኤቶሶና። ሽን ህንተ አዋይ ፆሳይ ሄስ ኡባይ ህንተዉ ኮሸይሳ ኤሬስ። 31 ኡባፈ አꬅድ ፆሳ ካዎተꬃ ኮይተ፤ ሄስ ኡባይ ህንተዉ ጉጅ እመታና።

32 “ህንተኖ፥ ጉꬃ ደረቶ፥ ያዮፍተ፤ ህንተ አዋ ፆሳይ ካዎተꬃ ህንተዉ እማናዉ ኡፋይቴስ። 33 ህንተዉ ደእያባ ባይዝድ ማንቆታስ እምተ። ካይሶይ ኤኮናሶን፥ ብል ሞናሶን፥ ጭሞና ካርፂታን፥ ዉሮና ሻሎ ሳሎን ሺሽተ። 34 ህንተ ዎዛናይ ህንተ ሻሎይ ደእያ በሳን ግዳና።

35 “ቃንꬃን ዳንጭድ ጊገትተ፤ ህንተ ፆምፐይ ፖኦ። ማቶ 25:1-13. 36 ባንታ ጎዳይ ያጋኖፐ ስማና ጋካናዉ ባርክድ ናገይሳታዳ፥ ጎዳይ ይድ ፄግያ ዎደ ኤለስድ ዶያናዉ ጊግዳ አሳታ ዳንተ። ማር 13:34-36. 37 ባንታ ጎዳይ ስምያ ዎደ ꬍስኮና ደእሸ ናገይሳት አንጀትዳይሳታ። ቱማ ጋይስ፤ ጎዳይ ቃንꬃን ዳንጭድ ጋይታ ዩሾን ኡትስድ ሞኬስ። 38 ጎዳይ ላደ ግድን፥ ግድ ብላሄ ግድን፥ ዎይኮ ዎንት ማ ግድን ይድ፥ ሄሳ መላ ꬍስኮና ናግሽን ደምያ ሄ አይለት አንጀትዳይሳታ። 39 ሽን ሀይሳ ኤርተ፤ ካይሶይ አዉደ ያነኮ ኬꬃ አዋይ ኤርያኮ ኬꬃይ ቦከትያ ዎደ ስእ ግድ በኤና። ማቶ 24:23-44. 40 ህንተካ ጊግድ ናግተ፤ አሳ ናእ ህንተ ቆፖና ዎደ ያና” ያግስ።

41 ጰፅሮስካ፥ “ጎዳዉ ሀ ሌምሱዋ ኑ ፃላላስ ኦዳየ ዎይኮ አሳ ኡባሴ?” ያግስ።

42 ጎዳይ ዛሪድ፥ “ህዛ፥ ካꬃ ሙዛናዉ በሲያ ዎድያን እማና መላ ጎዳይ ባ አይለታ ቦላ ሹምዳ አማንይስነ ዎዛናማ ሀላቃይ ኦኔ? 43 ጎዳይ ስምያ ዎደ ሄሳ መላ ኦꬅሸ በንትያ አይለይ፥ እ አንጀትዳይሳ 44 ታ ህንተዉ ቱማ ኦዳይስ፤ ባ ጎዳስ ደእያ ሻሎ ኡባ ቦላ እ፥ ሹመታና። 45 ሽን ሄ አይለይ፥ ‘ታ ጎዳይ ኤለ ዬና’ ያግድ ባ ዎዛናን ቆፕድ፥ ማጫ አይለታነ አደ አይለታ ዋꬍኮ፥ ቃስ ባዉ ኮይዳ መላ ምሸነ ኡይሸ ማꬆትኮ፥ 46 ሄ አይልያ ጎዳይ፥ እ ቆፖና ጋላሳንነ ህርጎና ዎደ ያና። ይድ እያ ቃንፀረꬅድ፥ እያ ቃዳ አማኖና አሳራ ኦꬃና።

47 “ጎዳ ሸንያዳ ጊጎናይስነ እያ ጎዳይ አይ ዶስያኮ ኤርሸ ኦꬆና አይለይ ዳሮ ጋራፈታና። 48 ሽን ባ ጎዳ ሸንያ ኤሮና አትድ ጋራፈታናዉ በሰይሳ ኦꬅዳይ ጉꬃራ ጋራፈታና። ጋሶይካ ዳሮ እመትዳይሳፈ ዳሮ ኮየቴስ፥ ዳሮ ሀዳራ ኤክዳይሳፈካ ዳሮ እማና ግድ ናገቴስ።

49 “ታኒ ይዳይ ቢታ ቦላ ታማ ኦይꬃናሳ። ሀእ ታማይ ኦይክያኮ ታና ዋንድ ኡፋይሳንደሻ! 50 ሀኖሽን፥ ታ ሀእ ፃማቀተይ ፅንቃተይ ደኤስ። እ ፖለታና ጋካናዉ ታ ዳሮ ኡንኤታይስ። ማር 10:38. 51 ሳአ ቦላ ሳሮተꬅ ኤሀናዉ ይዳ ህንተዉ ዳኒ? ግደና፥ ታ ይዳይ ሻካናሳ። 52 ሀእፈ ዶምድ ዎል ግዶን ሻከትዳ እቻሹ ኬꬃ አሳት እስፈ ደኦሶና። ናምአት ሄꬓታ ቦላ፥ ሄꬓትካ ናምአታ ቦላ፥ ደንድድ ሻከቶሶና። 53 አዋይ ናኣ ቦላ፥ ናአይካ አዋ ቦላ፥ አይያ ናኤ ቦላ፥ ናእያ አየ ቦላ፥ አዝና አይያ ናአ ማቸ ቦላ፥ ናአ ማችያ አዝና አየ ቦላ፥ ደንድድ ሻከታና።”ምክ 7:6.

54 ቃስካ አሳኮ፥ “ዉሎሀ ባጋራ ሳሎይ ሻራትያ ዎደ በእድ፥ ኤለስድ፥ ‘እር ያና’ ያጌታ፥ ሄሳዳካ ሀኔስ። 55 ዱገሀ ጫርኮይ ጫርክያ ዎደ ‘ሳእ አዋና’ ያጌታ፥ ሄሳዳካ ሀኔስ” ያግስ። 56 ህንተኖ፥ ጩቦቶ፥ ሳሎባነ ሳአባ ሻክድ ኤሬታሽን ሀ ዎድያ ሻክድ ኤሮይ ህንተና ዋንድ ፆንዴ?

57 “ያትን፥ ህንተ ሁጰስ አይስ ቱማ ፕርደከቲ? 58 ነ ሞርክያራ ዎላ ዳይና ስንꬃን ኤቃናዉ ባሸ ኦገ ቦላ ጊጋናዉ ኮያ። ነ ጊጎና እፅኮ ጎሸችድ ዳይና ስን ነና ኤፋና። ዳይናይ ነና ቃችያ አሳስ አꬅድ እማና። እ ነና ዎይነን የጋና። 59 ስእተ፥ እስ ባካን አቶና ጭጋ ኦንጋና ጋካናዉ ነ ያፐ ከዮናይሳ ኤራ” ያግስ።