1 ሄ ዎደ የሱሳኮ አሳይ ይድ ጵላፆስ ዎꬍድ ኤንታ ሱꬃራ ኤንታ ያርሹዋ ዋላክዳ ጋልላ አሳባ ኦድዳ አሳት ሄ በሳን ደኦሶና። 2 እ ሀይሳዳ ያግድ ዛርስ፤ “ያትን ሄ ጋልላ አሳት ሄ ኢታ ሀይቆ ሀይቅዳ ግሾ፥ ጋልላን ደእያ አሳ ኡባፈ አꬍዳ ናጋራንቾ ዳኖና? 3 ግደና! ግዶሽን፥ ህንተካ ማሮታን ስሞና እፅኮ፥ ኡባይ ሄሳዳ ꬋያና። 4 ዎይኮ ቃስ ሳልሆመ ጌተትያ በሳን ግምበይ ዎድድ ዎꬍዳ ታማነ ሆስፑን አሳይ የሩሳላመን ደእያ አሳ ኡባፈ አꬍዳ ናጋራንቾ ዳኖና? 5 ግደና! ሽን ህንተካ ማሮታን ስሞና እፅኮ ኡባይ ሄሳዳ ꬋያና።”

6 ቃስካ የሱሲ ሀይሳዳ ግድ ሌምሶ ኦድስ፦ “እስ ኡራስ ዎይነ ጋደን ቶከትዳ ባላሰ ምꬅ ደአዉሱ። እ ኢፐ አይፈ ደማናዉ ኮይድ አይኮካ ደምቤና። 7 ዎይነ ጋድያ ጎዳይ ዎይነ ኦሳንቹዋኮ፥ ‘አይፈ ደማናዉ ኮያዳ ሄꬑ ላይꬅ ስመረታዳ አይኮካ ደማብከ። ሄሳ ግሾ፥ ቃንፃ ድጋ፤ አይስ ቢታ መልሳይ?’ ያግስ።

8 “ሽን ኦሳንቾይ፥ ‘ጎዳዉ፥ እ ዩሹዋ ኦꬃዳ ኦሻ የጋና ጋካናዉ ሀ ላይꬃስ አጋርክ። 9 ሀ ላይꬅ አይፍኮ ሎኦ፥ እፅኮ ቃንፃ አጋ’ ” ያግድ ዛርስ።

10 የሱሲ ሳምባታ ጋላስ አይሁደ ዎሳ ኬꬃን ታማርሴስ። 11 ሄ በሳን ታማነ ሆስፑን ላይꬅ ቱና አያን ዞኮ ኩንስዳ እስ ማጫስያ ደአዉሱ። እያ ኩናፐ ደንዶይሳን ሱረ ኤቃናዉ ዳንዳኡኩ። 12 የሱሲ እዮ በእዳ ዎደ ፄግድ፥ “ሀ ማጫሰተ፥ ነ ሀርግያፈ ፓፃዳሳ” ያግስ። 13 ባ ኩሽያ እ ቦላ ዎꬅን፥ እያ ኤለሳዳ፥ ሱራዳ ኤቃሱ። ፆሰ ጋላታሱ።

14 ሽን አይሁደ ዎሳ ኬꬃ ሀላቃይ ይሎትድ አሳኮ፥ “ኦሶ ኦꬅያ ኡሱፑን ጋላሳት ደኦሶና። ሄሳ ግሾ፥ ሄ ጋላሳታን ይድ ፓፅተፐ አትሽን፥ ሳምባታ ጋላስ ግደና” ያግስ። ከሳ 20:9-10፤ ዛረ 5:13-14.

15 ጎዳይ፥ “ጩቦቶ፥ ህንተ ግዶፈ ቦር ዎይኮ ሀረ ሳምባታ ጋላስ ዛዳሎፐ ብልድ ሃ ኡሻናዉ ኤፎናይ ኦኔ? 16 ያትን፥ ሀ ማጫስያ አብራሃመ ናአ ግዳሸ ፃላሄን ቃሸታዳ ታማነ ሆስፑን ላይꬅ ኩመꬅ ደእዳርስ ሳምባታ ጋላስ ብርሸተꬅ ኮሸኔ?” ያግድ ኦይችስ።

17 እ ሄሳ ኦድዳ ዎደ ኤቀተይሳት ኡባይ ዬላትዶሶና። ሽን አሳ ኡባይ እ ኦꬅዳ ማላልስያ ኦሶ ኡባን ኡፋይትዶሶና።

18 ሄሳፈ ጉየ፥ የሱሲ ሀይሳዳ ያግስ፥ “ፆሳ ካዎተꬅ አይ ዳኒ? እያ አይብራ ዳንሶ? 19 ፆሳ ካዎተꬅ እስ አስ ባ ጎሻን ቶክዳ ዎላ አይፈ መላ። እ ድጭድ ምꬅ ግድስ። ሳሎ ካፎት እያ ታሽያ ቦላ ሸምፕዶሶና።”

20 ቃስ፥ “ፆሳ ካዎተꬃ አይብራ ዳንሶ? 21 እስ ማጫስያ ዳሮ ꬊለራ ዋላካዳ ሙኑቅዳ ጉꬃ እርሾ ዳኔስ” ያግስ።

22 ሄሳፈ ጉየ፥ የሱሲ የሩሳላመ ብሸ እ ካንꬅያ ኦግያን ደእያ ካታማታንነ ጉታታን ታማርስሸ አꬍስ። 23 እስ አስ የሱሳኮ፥ “ጎዳዉ፥ አታናይ ጉꬃ አሳ ፃላሌ?” ያግድ ኦይችስ።

የሱሲ ኤንታኮ፥ 24 “ስእተ፥ ፁንꬃ ዉላራ ገላናዉ ባፀትተ። ዳሮት ገላናዉ ኮዮሶና ሽን ኤንታዉ ሀነና። 25 ኬꬃ አዋይ ደንድድ ዉላ ጎርድዳፐ ጉየ፥ ‘ኑስ ዶያርክ’ ያግሸ ካረን ኤቅድ ፄስ ኦይከታ። ሽን እ፥ ‘ህንተ ኦነኮነ አዉፐ ይዳኮ ታ ኤርከ’ ግድ ዛራና። 26 ሄ ዎደ ህንተ፥ ‘ኔራ ዎላ ምዳ፥ ኡይዳ፥ ኑ ዳባባንካ ታማርሳዳሳ’ ያጋና።

27 “እ ዛሪድ፥ ‘ህንተ ኦነኮነ አዉፐ ይዳኮ ኤርከ። ህንተኖ፥ ጌላቶ ታፐ ሃክተ’ ያጋና። ማዝ 6:8. 28 አብራሃመ፥ ይሳቃ፥ ያይቆባነ ናበታ ኡባ ፆሳ ካዎተꬃን በአና፥ ሽን ህንተ ካረን ዎꬍድ አትያ ዎደ ህንተዉ ዬሆነ አቸ ጋርጨꬅ ግዳና። 29 አሳይ ዶሎሀፐ፥ ዉሎሀፐ፥ ፑደሀፐነ ዱገሀፐ ይድ ፆሳ ካዎተꬃን ግብራ ቦላ ኡታና። ማቶ 8:11-12፤ 22:13፤ 25:30. 30 ሄሳ ግሾ፥ ሀእ ደꬃን ጉየ ግድዳይሳታፐ ስን ግዳናይሳት፥ ስን ግድዳይሳታፐ ጉየ ግዳናይሳት ደኦሶና” ያግስ። ማቶ 19:30፤ 20:16፤ ማር 10:31.

31 ሄ ዎደ ፋርሳወታፐ እሶት እሶት ይድ፥ “ሄሮዲስ ነና ዎꬋናዉ ኮይያ ግሾ ሀ በሳፈ ደንዳዳ ባ” ግዶሶና።

32 እ ዛሪድ፥ “ብድ፥ ሄ ዎርካናስ፥ ‘ሄኮ፥ ሀችነ ዎንቶ ቱና አያናታ ከሳና፥ ሀርጋንቾታ ፓꬃና፥ ሄꬓንꬆ ጋላሳን ኩሻ ቦላ ጋካና’ ያግስ ጊተ። 33 ሀኖፐ አትሽን፥ ናበይ የሩሳላመፐ ካረን ሀይቃናዉ በሰና። ሄሳ ግሾ፥ ሀች፥ ዎንቶነ ዎንት ፔእን ሄ በሳ ባናዉ ደንዳስ።

34 “የሩሳላመ፥ የሩሳላመ፥ ናበታ ዎꬍያረ፥ ኔኮ ኪተትዳይሳታ ሹቻን ጫድያረ፥ ኩቶይ ባ ናይታ ባ ቀፍያፐ ጋርሳን ሺሽያዳ ነ ናይታ ታ ቀስያፐ ጋርሳን አፑን ቶሆ ሺሻናዉ ኮያድና፥ ሽን ህንተ እፃስ ግደታ። 35 ታ ህንተዉ ኦዳይስ፤ ህንተ ኬꬃይ ካይሳታና። ጎዳ ሱንꬃን የይስ አንጀትዳይሳ ህንተ ጋና ጋካናዉ ታና ደመከታ” ያግስ። ማዝ 118:26፤ ኤርም 22:5.