14
የሱሲ ፋርሳውያ ሶን
1 እስ ሳምባታ ጋላስ የሱሲ እስ ፋርሳወታ ሀላቃ ሶ ካꬅ ማናዉ ገልያ ዎደ አሳይ ጫድ ፄሎሶና። 2 ሄ በሳን ሻዉሄ ሀርገን ዋየትያ እስ አስ እያዉ ስንꬃ ባጋራ ዝንእስ። 3 የሱሲ ፋርሳወታነ ህገ አስታማረታ፥ “ሳምባታ ጋላስ ሀርጋንቾ ፓሶይ ዎገየ ዎጋ ግደኔ?” ያግድ ኦይችስ። 4 ኤንቲ ስእ ግዶሶና። የሱሲ ሀርገትያ ኡራ ቦች ፓꬅድ ሞይዝስ።
5 “ቃስካ ህንተፈ እሱዋስ ናእ ዎይኮ ቦር ሳምባታ ጋላስ አፎን ዉልኮ፥ ኤለስድ ከሶናይ ኦኔ?”ማቶ 12:11. ያግድ ኦይችስ። 6 ኤንቲ እስባካ ዛራናዉ ዳንዳእቦኮና።
7 የሱሲ እማቱዋስ ፄገትዳይሳት ቦንቾ በሲ ዶርሽን በእድ፥ ሀ ሌምሱዋ ኦድስ፦ 8 “እስ አስ ነና ያጋኖ ፄግኮ ቦንቾ በሳን ኡቶፋ። ኔፐ አꬍድ ቦንቸትያ አስ ፄገታናዉ ዳንዳኤስ። ሌም 25:6-7. 9 ህንተና ናምአታካ ፄግዳይስ ይድ፥ ‘ነ በሳ ሀ እማꬃስ የዳ’ ግያ ዎደ ኔኒ ዬላታሸ ዝቃ በሲ ዎꬋሳ። 10 ግዶሽን፥ ነ ፄገትዳ ዎደ ኮይሮታዳ ዝቃ በሲ በአዳ ኡታ። ፄጎይስ ይድ፥ ‘ታ ላግያዉ፥ ሀ ቦንቾ በሳን ኡታ’ ያጋና። ሄ ዎደ ኔራ እስፈ ፄገትዳ አሳ ኡባ ስንꬃን ነ ቦንቸታና። 11 ባና ꬎቁ ꬎቁ ኦꬅያ ኡባይ ካዉያና፤ ባና ዝቅ ዝቅ ኦꬅያ ኡባይ ꬎቁ ꬎቁ ጋና።”ማቶ 23:12፤ ሉቃ 18:14.
12 ቃስ የሱሲ እያ ሞክዳ ኬꬃ አዋኮ፥ “ቁማ ዎይኮ ካሆ እማቶ ፄግያ ዎደ፥ ኔኒ ኩሸ ዛሮ ፄጎና መላ ነ ላገታ ዎይኮ ነ እሻታ ዎይኮ ነ ዳቦታ ዎይኮ ነ ዱረ ሾሮታ እማቶ ፄጎፓ። 13 ግዶሽን፥ ነ እማቶ ጊግስዳ ዎደ ማንቆታ፥ ዎበታ፥ ጉንዳታነ ቆቀታ ፄጋ፤ ኔኒ አንጀታና። 14 ሀይሳቲ ኩሸ ዛራናዉ ዳንዳኦና ግሾ ኩሸ ዛሮይ ጌሻታ ደንዶ ጋላሳን ነዉ ስማና” ያግስ።
ግታ እማቶ ሌምሶ
(ማቶ 22:1-10)
15 የሱሳራ ዎላ እማቶ ቦላ ኡቶይሳታ ግዶፈ እሶይ፥ ሄሳ ስእድ፥ “ፆሳ ካዎተꬃን እማቶ ቦላ ኡተይስ አንጀትዳይሳ” ያግስ።
16 የሱሲ፥ “እስ አስ ግታ እማቶ ጊግስድ ዳሮ አሳታ ፄግስ። 17 እማቶይ ሞከትያ ሳተይ ጋክያ ዎደ፥ ፄገትዳ እማꬃታ፥ ‘ሄኮ ኡባባይ ጊግስ፥ ሃ ዪተ’ ያግድ ፄጋናዳ ባ አይልያ ኪትስ።
18 “ሽን ኡባይካ ባንታ ጋሶ ጋሶ መꬍዶሶና። እሶይ፥ ‘ሀእ ቡሮ ጋደ ሻምዳ ግሾ፥ ባዳ በአናዉ ኮሼስ፤ ሀያና ታና አጋርክ ያጋ’ ያግስ። 19 ሀንኮይ፥ ‘እቻሹ ዋꬃ ቦር ሻማስ፤ ኤንታና ዋፃ በአና ግሾ ሀያና ታና ላንጮፋ’ ያግስ። 20 ቃስ ሀራይ፥ ‘ታኒ ቡሮ መዳን ደእያ ግሾ፥ ያናዉ ዳንዳእከ’ ያግስ።
21 “አይለይ ስም ይድ ሄ ኡባ ባ ጎዳስ ኦድስ። ሄ ዎደ ያጋኖ አዋይ ሀንቀትድ አይልያኮ፥ ‘ኤለሳዳ ካታማን ደእያ ዎጋ ኦገታነ ዳጋላታ ባዳ፥ ማንቆታ፥ ዎበታ፥ ቆቀታነ ጉንዳታ ሃ ኤሀ’ ያግስ።
22 “አይለይ፥ ‘ታ ጎዳዉ፥ ነ ኪትዳይስ ኡባይ ፖለትስ፥ ሽን ሀእካ በሲ ደኤስ’ ያግስ።
23 “ጎዳይ አይልያኮ፥ ‘ሆሮጋታ ቦላነ፥ ጋደ ግዶ ኦገታ ከያ፥ ታ ኬꬃይ ኩማና ጋካናዉ ደምዳ ኡባ ያና መላ ኦꬃ። 24 ታ ህንተዉ ኦዳይስ፤ እማቶ ፄገትዳይሳታፐ ኦንካ ታ ግብራፐ ሞናይሳ ኤርተ’ ግስ” ያግስ።
ጎዳ ካሎይ ጭግስያ ጋተ
25 ዳሮ አሳይ እያራ ዎላ ብሽን፥ የሱሲ ኤንታኮ ጉየ ስሚድ፥ 26 “ታኮ ያ ኡባይ ባ አዋነ ባ አይዉ፥ ባ ማችዉነ ባ ናይታ፥ ባ እሻታነ ባ ምቸታ፥ ሀር አቶሽን ባ ደኡዋ እፆናይ ታ ታማረ ግዳናዉ ዳንዳኤና። ማቶ 10:37. 27 ባ ማስቃልያ ቶክድ ታና ካሎናይ ታ ታማረ ግዳናዉ ዳንዳኤና። ማቶ 10:13፤ 16:24፤ ማር 8:34፤ ሉቃ 9:23.
28 “ህንተፈ እስ አስ ሹቻ ኬꬅ ኬፃናዉ ኮይኮ፥ ኬꬃ ኬፅድ ኦንጋናዉ አይ መላ ሚሸ ኮሽያኮ ኮይሮትድ ኤራናዉ ቆፕ በኦናይ ኦኔ? 29 ሄሳ ግዶና እፅኮ፥ ሀ ኡራይ ባሶ ሹቹ ሂፅን ቁስተꬅ ፆንኮ፥ 30 በእያ ኡባይ፥ ‘ሀ ኡራይ ግምበꬅ ኦይክን ቁስታናዉ እያ ፆንስ’ ያግድ ቦሮሶና።
31 “ዎይኮ እስ ካዎይ ሀራ ካዎራ ኦለታናዉ ደንድሸ ላታሙ ሙኩሉ ኦላንቾታ ኤክ ያ ካዉዋራ ታሙ ሙኩሉ ኦላንቾታራ ኤቀታናዉ ዳንዳአናይሳነ ዳንዳኦናይሳ ኡትድ ዞረቶናይ ኦኔ? 32 ኤቀታናዉ ዳንዳኤቶናባ ግድኮ፥ ሄ ካዋራ ሃሆን ደእሽን ጊጋናዉ ኮይሮትድ ጭማ የድድ ኦይቼስ። 33 ሄሳዳካ፥ ህንተፈ ኦንካ ባዉ ደእያባ ኡባ አጎና እፅኮ፥ ታ ታማረ ግዳናዉ ዳንዳኤና።
34 “ማፅነይ ሎኦ፥ ሽን ማፅነይ ባ ማልኡዋ አግኮ፥ ዋንድ ማፅነ ጌተታናዉ ዳንዳኢ? 35 ቢታተꬃስነ አራዳተꬃስ ማዶና ግሾ ዎራ የገቴስ። ህዛ፥ ስእያ ሀይꬅ ደእያ አስ ስኦ” ያግስ።