1 እስ ጋላስ ቃራፃ ቃንፀይሳትነ ናጋራንቾት የሱሳ ትምርትያ ስአናዉ እያ ዩሾን ሺቅዶሶና። ሉቃ 5:29-30. 2 ሽን ፋርሳወትነ ህገ አስታማረት፥ “ሀይስ ኡራይ ናጋራንቾታ ሺሽድ ኤኬስ፥ ኤንታራ እስፈ ሜስ” ያግድ ዙዙምዶሶና።

3 የሱሲ ሀ ሌምሱዋ ኤንታዉ ያግድ ኦድስ፦ 4 “ህንተ ግዶፈ እሱዋስ ፄቱ ዶርሳት ደእያባ ግድኮ ኤንታፈ እሶይ ꬋይኮ ኡዱፉን ታማነ ኡዱፉናታ ባዞን አግድ ꬋዮይሳ ደማና ጋካናዉ ኮዮናይ ኦኔ? 5 ደምዳ ዎደ ኡፋይትድ ባ ጋናን ቶክድ፥ 6 ባ ሶ ስሜስ። ባ ላገታነ ሾሮታ ፄግድ፥ ‘ꬋይዳ ታ ዶርሳ ደማስ፥ ታራ እስፈ ኡፋይትተ’ ያጌስ። 7 ሄሳዳካ፥ ማሮት ኮሾና ኡዱፉን ታማነ ኡዱፉን ፅሎታፐ አꬅድ፥ ማሮታን ገልያ እስ ናጋራንቹዋ ጋሶን ሳሎን ግታ ኡፋይስ ግዴስ።

8 “ዎይኮ ታሙ ብር ደእያ እስ ማጫስያ ታማፈ ኢስያ ꬋይኮ ደማና ጋካናዉ ፆምፐ ኦይꬃዳ ኬꬃ ፕታዳ ምንꬃ ኮዮናይ ኦኔ? 9 ደምዳ ዎደ ባ ላገታነ ባ ሾሮታ ፄጋዳ ‘ꬋይዳ ታ እስ ብራ ደምዳ ግሾ ታራ ኡፋይትተ’ ያጋዉሱ። 10 ስእተ፥ ሄሳ መላ እስ ማሮተꬃን ገልያ ናጋራንቹዋን ፆሳ ኪታንቾታ ስንꬃን ኡፋይስ ግዴስ” ያግስ።

11 ዛሪድ የሱሲ፥ “እስ ኡራስ ናምኡ ናይት ደኦሶና። 12 ኤንታፈ ካሎ ናአይ ባ አዋኮ፥ ‘ታ አዋዉ፥ ነ ሻሉዋፐ ታ ግሹዋ ታዉ እማ’ ያግስ። አዋይ ባ ሻሉዋ ባ ናይታስ ሻክስ። 13 ጉꬃ ጋላሳፐ ጉየ፥ ካሎ ናአይ ባ ግሹዋ ኡባ፥ ቃች ኤክድ ሃሆ ቢታ ብስ። ያን አልታጫን ሻሉዋ ቶችድ ኦንግስ። 14 እ ባዉ ደእያባ ኡባ ዉርስዳፐ ጉየ ሄ ቢታ ኡባን ምኖ ኮሽ ከይን መቶትስ። 15 ሄሳ ግሾ፥ ሄ ቢታ አሳፐ እሱዋ ሶ ጋታ ገልስ። ኡራይ እያ ጉዱንꬆ ሄማና መላ ባ ሞꬁ የድስ። 16 ጉዱንꬆት ምያ ሀርቁዋፈ ማናዉ አሞትስ፥ ሽን እዮካ እያዉ እምያ አስ በንትቤና። 17 እ ባ ዎዛናኮ ስሚድ፥ ‘አፑን ታ አዋ አይለታስ ካꬅ ዎራ ዎꬍን ታ ሀይሳን ኮሻራ ሀይቃናዉ ጋካድና?’ 18 ደንዳዳ ታ አዋኮ ባዳ፥ ‘ታ አዋዉ፥ ሳሎን ፆሳ፥ ሳአን ነና ቆሀስ። 19 ህዛፐ ነ ናአ ጌተታዳ ፄገታናዉ ታዉ በሶና ግሾ፥ ነ ሶን ደእያ አይለታፐ እሱዋዳ ታና ፓይዳ’ ያጋና” ያግስ። 20 ሄሳ ግሾ፥ ደንድድ ባ አዋኮ ብስ።

“ሀኖሽን፥ እ ቡሮ ሃሆን ደእሽን አዋይ ቃትድ፥ እያኮ ዎፅ ብድ፥ እድምድ ዬርስ። 21 ናአይካ፥ ‘ታ አዋዉ ሳሎን ፆሳ፥ ሳአን ነና ታ ቆሀስ። ህዛፐ ነ ናአ ጌተታዳ ፄገታናዉ በስከ’ ያግስ።

22 “እያ አዋይ አይለታ ፄግድ፥ ‘ኤለስድ ኡባፈ ሎኦ ግድዳ ማኦ ኤህድ እያ ማይዝተ፤ እያ ብራን ሳጋዮ፥ እያ ቶሆን ጫማ አꬅተ። 23 ሞꬎ ጋታርመንꬆ ኤህድ ሹክተ፥ ሞስ፥ ኡፋይቶስ። 24 ታ ናአይ ሀይስ ሀይቅስ፥ ሽን ሀእ ፓፅስ፤ ꬋይስ፥ ሽን በንትስ’ ያግስ። ሄሳፈ ጉየ፥ ኡፋይስ ዶምዶሶና።

25 “ሄ ዎደ ባይራ ናአይ ጎሻ ጋደን ደኤስ። ያፐ ይሸ ሶ ማትሽን የꬅነ ጉፋ ግርስ ስእስ። 26 እ፥ አይለታፐ እሱዋ ፄግድ ሀንያባይ አይበኮ ኤራናዉ ኦይችስ። 27 አይለይ፥ ‘ነ እሻይ ሳሮ ይዳ ግሾ ነ አዋይ ሞꬎ ጋታርመንꬆ እያዉ ሹክስ’ ያግስ።

28 “ባይራ እሻይ ይሎትድ ሶ ገላናዉካ ኮይቤና። አዋይ ካረ ከይድ ሶ ገላና መላ እያ ዎስስ። 29 ሽን እ ባ አዋኮ፥ ‘ሄኮ፥ ሀይሳ መላ ላይꬅ ታ ነዉ አይለታዳ ነ ኪታፐ እሱዋካ ፓጭሶና ነዉ ኪተትን፥ ታኒ ታ ላገታራ ኡፋይታና መላ ሀር አቶሽን እስ ላቃ ዴሸ እማባካ። 30 ሀኖሽን፥ ሀይስ ነ ናአይ ነ ሻሉዋ ላይማታራ ꬋይስድ ይን፥ ሞꬎ ጋታርመንꬆ ሹካዳሳ’ ” ያግስ።

31 “አዋይካ፥ ‘ታ ናአዉ፥ ኔኒ ኡባ ዎደ ታራ ደኣሳ፥ ታባ ኡባይ ኔሳ። 32 ሀይስ ነ እሻይ ሀይቅስ፥ ሽን ፓፅስ፤ ꬋይስ፥ ሽን በንትስ። ሄሳ ግሾ፥ ዳሮ ኡፋይታናዉ በሴስ’ ያጋና” ያግስ።