1 የሱሲ ባ ታማረታኮ፥ “እስ ዱረ ኡራስ እያፐ ጋርሳራ እስ ሹም ደኤስ። ሄ ሹማይ ባ ጎዳ ሻሉዋ ቶቼስ ግያ ዎረይ ኬꬃ አዋ ጋክስ። 2 ኬꬃ አዋይ ሹማ ፄግስድ፥ ‘ታኒ ዎይግያባ ስአድና? ህዛፐ ኔኒ ታ ኬꬃስ ሹማ ግዳዳ ኦꬃናዉ ዳንዳኦና ግሾ፥ ታ ሻሉዋ ታዉ ሼꬋ’ ያግስ።

3 “ሄ ሹማይ ባ ዎዛናን ሀይሳዳ ያግድ ቆፕስ፦ ‘ታ ጎዳይ ታና ሹማተꬃፈ ዎꬃና ሀኔስ፥ ጎያ አቃናዉ ዎልቅ ባዋ፥ ዎሳ ማናዉ ዬላዬስ፤ ያትን ታ ዋኖ? 4 ሹማተꬃፈ ታ ዎꬍያ ዎደ አሳይ ታና ሞካና መላ ኦꬃናባ ታ ኤራይስ’ ያግስ።

5 “ሄሳ ግሾ፥ እያ ጎዳ አጮይ ደእያ አሳ እሱዋ እሱዋ ፄግ ኤህድ ኮይሮ ኡራኮ፥ ‘ነ ቦላ ታ ጎዳ አጮይ አይ መል ደኢ?’ ያግድ ኦይችስ።

6 “እ፥ ‘ላታሙ ባርሜለ ዛይተ አጮይ ደኤስ’ ያግስ።

“ሹማይ፥ ‘ዉለ ዋርቃትያ ሄኤ፥ ኤለሳዳ፥ ታሙ ባርሜለ ዛይተ አጮይ ደኤስ ጋዳ ፃፋ’ ያግስ።

7 “ሄሳፈ ካልድ ናምአንꬁዋኮ፥ ‘ነዉ አፑን ደኢ?’ ያግስ።

“እ፥ ‘ሄꬑ ፄታነ ላፑን ታሙ ኩንታለ ግስተ አጮይ ደኤስ’ ያግስ።

“ሹማይ፥ ‘ነ ዉለ ዋርቃትያ ሄኤ፥ ኤለሳዳ፥ 296 ኩንታለ ያጋዳ ፃፋ’ ያግስ። 8 ኬꬃ አዋይ አማነትቦና ሹማ እያ ጭንጫተꬃስ ናሽስ። ሀ አላምያ ናይት አሰ ኦይꬃን ፖኦ ናይታፐ አꬍዳ ዎዛናማታ።

9 “ሄሳ ግሾ፥ ታ ህንተዉ ኦዳይስ፤ ሀ አላምያ ሚሸይ ዉርያ ዎደ መርና ኬꬃን ሞከታና መላ ሀ ሚሽያራ ህንተዉ ላገታ ሻምተ። 10 ኡባፈ ጉꬃባን አማነትዳይ ዳሮባን አማነትዳይሳ ግዴስ። ቃስ ኡባፈ ጉꬃባን አማነቶናይስ ዳሮባን አማነተና። 11 ህዛ፥ ሀ አላመ ሚሸን ህንተ አማነቶና እፅኮ፥ ቱማ ሚሸ ህንተዉ ኦን ሀዳራ እማኔ? 12 ህንተ ሀራ አሳ ሚሸን አማነቶና እፅኮ፥ ህንተ ቡዞ ሚሸ ህንተዉ ኦን እማኔ?

13 “እስ አይለይ ናምኡ ጎዳታስ ሃረታናዉ ዳንዳኤና። እሱዋ እፅኮ ሀንኩዋ ዶሴስ ዎይኮ እሱዋኮ ሺቅኮ ሀንኩዋ ካꬌስ። ሄሳዳካ፥ ህንተ ፆሳስነ ሚሸስ ሃረታናዉ ዳንዳኤከታ።”ማቶ 6:24.

14 ሚሸ ዶስያ ፋርሳወት ሄሳ ስእዳ ዎደ የሱሳ ቀልቅስዶሶና። 15 እ፥ “ህንተ፥ ህንተና አሳ ስንꬃን ፅልሴታ፥ ሽን ፆሳይ ህንተ ዎዛና ኤሬስ። አሳ ስንꬃን ቦንቸትዳይስ ፆሳ ስንꬃን ቦረትዳይሳ።

16 “ሙሰ ህገይነ ናበታ ኪታይ ዮሃንሳ ጋካናዉ ህንተዉ ኦደትሸ ጋምእስ። ሄሳፈ ጉየ፥ ፆሳ ካዎተꬃ ዎንገላይ ሳባከትሸ ጋምእስ። አስ ኡባይ ያ ገላናዉ ዳፈቴስ። ማቶ 11:12-13. 17 ግዶሽን፥ ህግያፈ እስ ላፋ ፕዳለይ አታናፐ ሳሎይነ ሳእ አይስ ካዉዬስ። ማቶ 5:18.

18 “ባ ማችዉ የድድ ሀራ ኤክያ ኡባይ ላሜስ። ባ አዝናፐ አንጀትዳሮ ኤከይስካ ላሜስ” ያግስ። ማቶ 5:32፤ 2 ቆሮ 7:10-11.

19 “አልኦነ አሌቆ አፍላ ማእያ፥ ሳእ እንጀትን ጋላስ ጋላስ ኡፋይሳን ደእያ እስ ዱረ አስ ደኤስ። 20 ሀር ቃስ አሳተꬃይ ኩመꬅ ማዱንፅዳ እስ አላዛራ ጌተትያ ማንቆይ ሄ ዱረ ኡራ ካረን የገትድ አትዳይስ ደኤስ። 21 ኮሻፐ ደንዶይሳን ዱረ ኡራ ጋይታፐ ዎꬍያ ቲፍያ ማናዉ አሞትሸ ደኤስ። ሀር አቶሽን፥ ካናት ይድ እያ ማዱንꬃ ላጮሶና።

22 “ሄ ማንቆይ ሀይቅስ፤ ኪታንቾት እያ አብራሃመ ክኦ ኤፍዶሶና። ቃስ ዱረ ኡራይካ ሀይቅድ ሞገትስ። 23 ስኦለን ኡንኤትድ ደእሸ ꬎቁ ግድ ሃሆን አብራሃመነ እያ ክኦን ደእያ አላዛራ በእስ። 24 እ፥ ‘አዋዉ አብራሃመ፥ ታዉ ቃታርክ፤ ሀ ታማ ላጮን ኡንኤታዳ ደእያ ግሾ አላዛር ባ ብራꬍያ ሃꬃን የድድ ታ እንፃርሳ ላኮꬃና መላ ሀያና እያ የዳርክ’ ያግድ ዋስስ።

25 “ሽን አብራሃመይ እያኮ፥ ‘ታ ናአዉ፥ ነ ሳአን ደእያ ዎደ ሎኦባታ ኤክዳይሳ፥ ቃስ አላዛር ኢታባታ ኤክዳይሳ አኬካ። ሽን ሀእ እ ሀይሳን ኡፋይቴስ፥ ቃስ ኔኒ ዋየታሸ ደኣሳ’ ያግስ። 26 ሀ ኡባፈ አꬍድ፥ ‘ሃፐ ህንተኮ፥ ህንፐ ሃ ኑኮ አꬋናዉ ኮየይሳት ፕኖና መላ ኑስነ ህንተዉ ግዶን ግታ አፎይ ደኤስ’ ያግስ።

27 “ዱረ ኡራይ፥ ‘አዋዉ፥ ያኮ አላዛራ ታ አዋ ሶ ኪታና መላ ታ ነና ዎሳይስ። 28 ታዉ እቻሹ እሻት ደእዶሶና፥ ኤንትካ ሀ ዋየ በሳ ዮና መላ ኤንታዉ ብድ ማርካቶ’ ያግስ።

29 “ሽን አብራሃመይ፥ ‘ኤንታዉ ሙሰራነ ናበታራ ደኦሶና፤ ኤንቲ ኦድያባ ስኦና’ ያግስ።

30 “ዱረ ኡራይ፥ ‘አዋዉ አብራሃመ፥ ሄሳꬆ ግደና፤ እስ አስ ሀይቆፐ ደንድድ ቢኮ ኤንቲ ማሮታን ገላና’ ያግስ።

31 “አብራሃመይ፥ ‘ሙሰነ ናበታ ስኦና እፅኮ፥ ሀር አቶሽን ሀይቆፐ እስ አስ ደንድ ኦድኮካ አማኖኮና’ ያግስ።”