1-2 ሄ ዎደ ፃማቅያ ዮሃንስ፥ “ፆሳ ካዎተꬃይ ማታትዳ ግሾ ህንተ ናጋራፐ ስምተ” ያግድ ሳባክሸ ይሁዳ መላ ቢታ ብስ። ማቶ 4:17፤ ማር 1:15. 3 ናብያ እሳያስ ዮሃንሳባ ኦድዳይሳ መላ፥

4 ዮሃንስ ግማለ እክሰፐ ኦሰትዳ አፍላ ማኤስ። ባ ፄሳን ዳፎ ዳንጬስ። እ ምያ ካꬃይካ ቦለነ ደገራ ኤስ። 2 ካዎ 1:8. 5 አሳይ ሄ ዎደ የሩሳላመ ካታማፐ፥ ይሁዳ ቢታ ኡባፈነ ዮርዳኖሰ ሻፋ ሄራፐ እያኮ ዮሶና። 6 ባንታ ናጋራ ፓፅድ ዮርዳኖሰ ሻፋን ዮሃንሳ ኩሸን ፃማቀቶሶና።

7 ዮሃንስ፥ ዳሮ ፋርሳወትነ ሳዱቃወት ፃማቀታናዉ ባኮ የይሳታ በእድ፥ ኤንታኮ፥ “ሀ ኢታ ሾሻቶ፥ ያና ፆሳ ሀንቁዋፈ ባቃታና መላ ህንተና ኦነ ዞርዳይ?ማቶ 12:34፤ 23:33. 8 ህዛ፥ ህንተ፥ ህንተ ናጋራፐ ስምዳይሳ ኤርስያባ ኦꬅተ። 9 ህንተ፥ ህንተ ዎዛናን፥ ‘አብራሃመይ፥ ኑ አዋይ ደኤስ’ ግድ ቆፖፍተ። ሎይꬅ ስእተ! ፆሳይ ሀ ሹቻታፐ አብራሃመስ ናአ ከሳናዉ ዳንዳኤስ። ዮሀ 8:33. 10 ቤፀይ ምꬃ ፃጶን ጊግድ ኡትስ፤ ሎኦ አይፈ አይፎና ምꬃ ኡባይ ቃንፀትድ ታማን የገታና። ማቶ 7:19.

11 “ህንተ፥ ህንተ ናጋራፐ ስምዳይሳ ኤርሳናዉ ታኒ ህንተና ሃꬃን ፃማቃይስ። ሽን ታፐ ጉየራ የይስ ህንተና ጌሻ አያናንነ ታማን ፃማቃና። እ ታፐ ዳሮ ዎልቃሜስ፤ ታኒ ሀር አቶሽን እያ ጫማ ቶካናዉካ በስከ። 12 ካꬃ ጌሽያ ፕይ እያ ኩሸን ደኤስ። ካꬃ ሎይꬅ ጌሼስ፤ ግስትያ ባ ሻልያን ቆላና፥ ሽን ፑኑዋ ቶኦና ታማን ፁጋና” ያግስ።

13 ሄ ዎደ የሱሲ ዮሃንሳ ኩሸን ፃማቀታናዉ ጋልላፐ ዮርዳኖሰ ሻፋ ብስ። 14 ሽን ዮሃንስ እያ ድጋናዉ ኮይድ፥ “ታኒ ነናን ፃማቀታናዉ ኮሽሽን ኔኒ ታኮ ያይ?” ያግስ። 15 ሽን የሱሲ ዛሪድ፥ “ፆሳይ ኑፐ ኮያባ ኡባ ኑ ፖላናዉ በሲያ ግሾ፥ ሀእ ታዉ ኤሮ ጋ” ያግስ። ዮሃንስ እያዉ ኤሮ ግድ ኤክስ። 16 የሱሲ ፃማቀትዳ መላ ሃꬃፈ ከይስ። ኢራካ ሳሎይ ዶየትን ፆሳ አያናይ ሆለዳ ይሽን ቃስ ባ ቦላ ዎልአምድ ዎꬍሽን በእስ። 17 ሄ ዎደ፥ “ታ ዶስያ፥ እያን ታና ኡፋይስያ ታ ናአይ ሀይሳ” ግያ ቃላይ ሳሎፐ ይስ። ማቶ 12:18፤ 17:5፤ ማር 1:11፤ ሉቃ 9:35.