6
ማንቆታስ እሞባ
1 “አስ በኦ ግድ ህንተ ሎኦ ኦሱዋ አሳ ስንꬃን ኦꬆናዳ ናገትተ። ሄሳꬆ ሀኖና እፅኮ ሳሎን ደእያ ህንተ አዋፐ ዎይቶ ደመከታ። ማቶ 23:5.
2 “ህንተ ማንቆታስ እምያ ዎደ አሳ ስንꬃን ቦንቸታናዉ ግድ ጩቦት ኦግያ ዶናንነ አይሁደ ዎሳ ኬꬃታን ኦይሳዳ አስ በኦ ግድ ኦꬆፍተ። ታ ህንተዉ ቱማ ኦዳይስ፤ ኤንቲ ባንታ ኩመꬃ ዎይቱዋ ኤክዶሶና። 3 ሽን ህንተ ማንቆታስ እምያ ዎደ ህንተ ኡሻቻ ኩሸይ ኦይሳ ህንተ ሀድርሳ ኩሸይ ኤሮፖ፤ 4 ህንተ እሞይ ጌማን ግዶ። ጌማን ኦይሳ በእያ ህንተ አዋይ ህንተዉ ዎይቱዋ ቆንጨን እማና።
ዎሳባ
(ሉቃ 11:2-4)
5 “ዎሳ ዎስሸ ጩቦታꬆ ሀኖፕተ። ኤንቲ፥ ባንታና አስ በኦ ግድ አይሁደ ዎሳ ኬꬃንነ ኦግያ ዶናን ኤቅድ ዎሰይሳ ዶሶሶና። ታ ህንተዉ ቱማ ኦዳይስ፤ ኤንቲ ባንታ ኩመꬃ ዎይቱዋ ኤክዶሶና። ሉቃ 18:10-14. 6 ሽን ኔኒ ዎስያ ዎደ፥ ነ ሶ ገላ፥ ዉላ ጎርዳዳ ጌማን ደእያ ነ አዋኮ ዎሳ፤ ጌማን ኦሰትዳይሳ በእያ ነ አዋይ ነዉ ዎይቱዋ እማና። 7 ህንተ ዎስያ ዎደ አማኖና አሳꬆ ጮ ቃላ ዳርስድ ዎሶፍተ። ኤንቲ አዱስ ዎስን ፆሳይ ስኤስ ግድ ቆፖሶና። 8 ሄሳ ግሾ፥ ኤንታይሳዳ ሀኖፕተ። አይስ ጊኮ፥ ህንተ አዋይ ህንተዉ አይ ኮሽያኮ ህንተ ዎሳናፐ ስንꬃትድ ኤሬስ።
9 “ህዛ፥ ህንተ ያግድ ዎስተ፦
“ ‘ሳሎን ደእያ ኑ አዋዉ፥
ነ ጌሻ ሱንꬃይ አንጀቶ።
10 ነ ካዎተꬃይ ዮ፥
ነ ሸነይ ሳሎን ሀንዳይሳዳ
ሳአንካ ሀኖ።
11 ጋላሳ ካꬃ ሀች ሀች ኑስ እማ።
12 ኑኒ ኑና ቆህዳይሳታ፥ አቶ ገይሳዳ፥
ኑስካ ኑ ቆሁዋ አቶ ጋ።
13 ኑና ኢታፐ አሻፈ አትሽን፥
ፓጨን ገልሶፋ።
[ካዎተꬃይ፥ ዎልቃይነ ቦንቾይ
መርናዉ ኔሳ፤ አምንእ።’]
14 “ህንተ ህንተና ቆህዳይሳታ አቶ ጊኮ፥ ሳሎን ደእያ ህንተ አዋይ ህንተ ቆሁዋካ አቶ ጋና። ማር 11:25-26. 15 ሽን ህንተ ሀራ አሳ ናጋራ አቶ ጎና እፅኮ ህንተ አዋይ ህንተ ናጋራ አቶ ጌና።
ፆማባ
16 “ህንተ ፆምያ ዎደ ጩቦታꬆ ካዮቶፍተ። አይስ ጊኮ፥ ኤንቲ ፆመይሳ አስ ኤራና መላ ባንታ ሶምኡዋ ቅታዮሶና። ታ ቱማ ኦዳይስ፤ ኤንቲ ባንታ ዎይቱዋ ኤክዶሶና።
17 “ሽን ኔኒ ፆምያ ዎደ ነ ሶምኡዋ ሜጫ፥ ነ ሁጵያ ትየታ። 18 ሄሳዳ ነ ኦꬅኮ ነ ፆምያ ፆማይ አሳፐ ጌምዳይሳ፥ ሽን ጌማን ደእያ ነ አዋይ ኤርያ ፆማ ግዳና። ጌማን ኦሰትዳይሳ በእያ ነ አዋይ ነዉ ዎይቱዋ እማና።
ሳሎን ሻሎ ሺሾ
19 “ብል ምያ በሳን፥ ብራት ሽእያሶን፥ ካይሶይ ቦክድ ኤክያሶን፥ ሀ ሳአን፥ ህንተዉ ሻሎ ሺሾፕተ። ያይ 5:2. 20 ሽን ብል ሞናሶን፥ ብራት ሽኦናሶን፥ ካይሶይ ቦክድ ኤኮናሶን ሳሎን ህንተዉ ሻሎ ሺሽተ። 21 ነ ሻሎይ ደእያሱዋን ነ ዎዛናይ ደአና።
22 “አይፈይ አሳተꬃስ ፆምፐ። ሄሳ ግሾ፥ ነ አይፈይ ፓፃ ግድኮ ነ ኩመꬃ አሳተꬃይ ፖኦ ግዴስ። 23 ነ አይፈይ ሀርጋንቾ ግድኮ ነ ኩመꬃ አሳተꬃይ ꬉማ ግዴስ። ህዛ፥ ነናን ደእያ ፖኦይ ꬉማ ግድኮ፥ ꬉማይ አይ መላ አꬍድ ꬉማንዴሻ!
24 “እስ አስ ናምኡ ጎዳስ ሃረታናዉ ዳንዳኤና። እሱዋ ዶስኮ ሀንኩዋ እፄስ፤ ዎይኮ እሱዋ ቦንችኮ ሀንኩዋ ካꬌስ። ፆሳስነ ሚሸስ ሃረታናዉ ዳንዳኤከታ።
ኡንኤቶፍተ
(ሉቃ 12:22-31)
25 “ህዛ፥ ስእተ! ህንተ ደኦን ዳናዉ፥ ‘አይ ማኔ? አይ ኡያኔ? አይ ማአኔ?’ ግድ ኡንኤቶፍተ፤ ደኦይ ካꬃፈ ዎይኮ አሳተꬅ ማኦፐ አኔ? 26 ሳሎ ካፎታ ፄልተ፤ ኤንቲ ዘሮኮና፥ ቡጮኮና፥ ሻለን የጎኮና፥ ሽን ህንተ ሳሎ አዋይ ኤንታ ሙዜስ። ህንተ ኤንታፈ ዳሮ አከቲ? 27 ህንተ ግዶፈ ዳሮ ኡንኤትድ ባ ላይꬃ ቦላ እስ ጋላስ ጉጃናዉ ዳንዳኤይ ደኢ?
28 “ቃስ ህንተ ማእያባስ አይስ ኡንኤተቲ? አነ ጪሻታ በእተ፥ ኦሶን ዳቡሮኮና ዎይኮ ሱቆኮና። 29 ስእተ! ሀር አቶሽን፥ ካዋ ሶሎሞነይ ባ ቦንቾ ኡባን ሀ ጪሻታፐ እሱዋ መላካ ማእቤና። 1 ካዎ 10:4-7፤ 2 ታር 9:3-6. 30 ህንተኖ፥ አማኖይ ፓጭዳይሳቶ፥ ፆሳይ ሀች በንትድ ዎንቶ ታማን ዎꬋናዉ ደእያ ማታ ያትድ ማይዝያባ ግድኮ፥ ህንተና ኤንታፈ አꬅድ ዋት ማይዘኔ? 31 ሄሳ ግሾ፥ ‘አይ ማኔ? አይ ኡያኔ? አይ ማአኔ?’ ግድ ኡንኤቶፍተ። 32 ሄ ኡባ ፆሳ አማኖና አሳይ ዳርስድ ደማናዉ ኡንኤቶሶና። ህንተ ሳሎ አዋይ ሄ ኡባይ ህንተዉ ኮሸይሳ ኤሬስ። 33 ሽን ኡባፈ ስን ፆሳ ካዎተꬃነ እያ ፅሎተꬃ ኮይተ፤ ሄ ኡባይ ህንተዉ ጉጅ እመታና። 34 ሄሳ ግሾ፥ ዎንቶስ ቆፕሸ ኡንኤቶፍተ። ዎንቶይስ ዎንቶስ አቆ፤ እስ እስ ጋላሳይ ባዉ ግድያ መቶራ ደኤስ።