1 “ህንተ ቦላ ፕርደቶና መላ ሀራታ ቦላ ፕርዶፍተ። 2 አይስ ጊኮ፥ ሀራታ ቦላ ህንተ ፕርደይሳዳ ህንተ ቦላ ፕርደታና፤ ህንተ ሀራታስ ማክዳባን ህንተዉ ዛር ማከታና። ማር 4:24. 3 ነ አይፈን ደእያ ቱሱ ዳነይሳ በኦና ነ እሻ አይፈን ደእያ ቡርያ አይስ በአይ? 4 ነ አይፈን ቱስ ደእሽን ነ እሻ አይፈን ደእያ ቡርያ ከሶ ጋናዉ ዋና ዳንዳአይ? 5 ነኖ ጩቡዋዉ፥ ኮይሮታዳ ነ አይፈን ደእያ ቱስ ዳነይሳ ከሳ። እያፐ ጉየ፥ ነ እሻ አይፈን ደእያ ቡርያ ከሳናዉ ነ ጌሻ ፄላና።

6 “ጉየ ስሚድ ህንተና ሳፆና መላ ጌሻባ ካናታስ የጎፍተ። ባንታ ቶሁዋን የꬍድ ኢሶና መላ ህንተ አልኦ እንቁዋ ጉዱንꬆታ ስንꬃን የጎፍተ።

7 “ዎስተ ህንተዉ እመታና፥ ኮይተ ህንተ ደማና፥ ካረ ይድ ፄግተ ህንተዉ ዶየታና። 8 ዎስያ ኦደስካ እመታና፥ ኮይያ ኦደስካ በንታና፥ ካረ ይድ ፄግያ ኦደስካ ዶየተና።

9 “ህንተ ግዶፈ ባ ናእ ኡይꬅ ዎስኮ ሹች እመይ ኦኔ? 10 ዎይኮ ሞሎ ዎስኮ ሾሽ እመይ ደኢ? 11 ያትን ህንተ ኢታ ግድሸ ህንተ ናይታስ ሎኦባ እሞ ኤርኮ፥ ህንተ ሳሎ አዋይ ባና ዎሰይሳታስ ሎኦባ ዋት ዳርስድ እመኔ? 12 ሀራት ህንተዉ ኦꬃና መላ ህንተ ኮያባ ኡባ ህንተካ ሀራታስ ኦꬅተ። አይስ ጊኮ፥ ሙሰ ህገይነ ናበት ታማርሰይ ሀይሳ። ሉቃ 6:31.

13 “ፁንꬃ ዉላራ ገልተ፤ አይስ ጊኮ፥ ꬋዮስ ኤፍያ ኦገይ ዎጋ፥ ዉላይካ ዳልጋ። እያራ ገልያ አሳይካ ዳሮ። 14 ሽን ደኡዋኮ ኤፍያ ኦገይነ ዉላይ ፁንꬁ፤ ያ ገልያ አሳይካ ጉꬃ።

15 “ቦላ ባጋራ ዶርሰ ዳንድ ባንታ ጋꬃን ሱꬉመ ግድድ ህንተ ግዶ ገልያ ዎርዳንቾ ናበታፐ ናገትተ። 16 ህንተ ኤንታ፥ ኤንታ አይፍያፐ ኤራና፤ አጉንꬃፈ ዎይነይ፥ ክንቾተፐ ላደይ ማፀተና። 17 ሄሳ መላ ሎኦ ምꬅ ኡባይ ሎኦ አይፈ አይፌስ፤ ኢታ ምꬅ ኢታ አይፈ አይፌስ። 18 ሎኦ ምꬅ ኢታ አይፈ አይፈና፥ ቃስ ኢታ ምꬅ ሎኦ አይፈ አይፋናዉ ዳንዳኤና። 19 ሎኦ አይፈ አይፎና ምꬅ ኡባይ ቃንፀትድ ታማን ፁገታና። ማቶ 3:10፤ ሉቃ 3:9. 20 ሄሳ ግሾ፥ ህንተ ኤንታ፥ ኤንታ አይፍያን ኤራና። ማቶ 12:33.

21 “ሳሎን ደእያ ታ አዋ ሸንያ ኦꬅያ ኡራይ ሳሎ ካዎተꬅ ገላናፐ አትሽን፥ ጮ ታና ‘ጎዳዉ፥ ጎዳዉ’ ግያ ኡባይ ሳሎ ካዎተꬅ ገለና። 22 ፕርዳ ጋላስ ዳሮት፥ ‘ጎዳዉ፥ ጎዳዉ፥ ነ ሱንꬃን ትንብተ ኦድቦኮ? ነ ሱንꬃን ቱና አያናታ ከስቦኮ? ነ ሱንꬃን ማላታታ ኦꬅቦኮ?’ ያጋና። 23 ሄ ዎደ ታኒ፥ ‘ታ ህንተና ኡባራካ ኤርከ፥ ህንተ ኢታ ኦይሳት ታፐ ሃክተ’ ያጋና። ማዝ 6:8.

24 “ህዛ፥ ሀ ታ ቃላ ስእድ ኦꬅያ ኦንካ ባ ኬꬃ ሹቻ ቦላ ኬፅዳ ዎዛናማ አሳ መላ። 25 እራይ ቡክስ፥ ድኦይ ድእስ፥ ጫርኮይካ ጫርክድ ሄ ኬꬃ ሱግስ። ሽን ኬꬃይ ሹቻ ባሶ ቦላ ኬፀትዳ ግሾ ኩንድቤና። 26 ሀ ታ ቃላ ስእድ ኦꬆና ኦንካ ባ ኬꬃ ሻፈ ቦላ ኬፅዳ ኤያ ኡራ መላ። 27 እራይ ቡክድ፥ ድኦይ ድእድ፥ ጫርኮይካ ጫርክድ፥ ሄ ኬꬃ ሱግን፥ ሄ ኬꬃይ ኩንድስ፤ እያ ኩንደꬃይካ ዎልቃማ” ያግስ።

28-29 የሱሲ ባ ኦዳ ኦንግዳ ዎደ እያ ትምርተይ ህገ አስታማረታ መላ ግዶናሽን፥ ማታራ ግድያ ግሾ አሳይ እያ ትምርትያን ማላለትዶሶና። ማር 1:22፤ ሉቃ 4:32.