8
ባሮ ሀርጋንቾይ ፓፅስ
(ማር 1:40-45፤ ሉቃ 5:12-16)
1 የሱሲ ዙማፐ ዎꬍያ ዎደ ዳሮ አሳይ እያ ካልዶሶና። 2 ሄኮ እስ ባሮ ሀርጋንቾይ እያኮ ሺቅድ፥ እያ ስንꬃን ጉልባትድ፥ “ጎዳዉ፥ ነ ሸነ ግድኮ ታና ጌሻዳ ፓꬃናዉ ዳንዳኣሳ” ያግስ። 3 የሱሲ ባ ኩሽያ የድድ እያ ቦችድ፥ “ኤ፥ ታ ሸነ፥ ፓፃ” ያግስ። ኡራይ ኢራካ ጌይ አግስ። 4 የሱሲ እያኮ፥ “ነ ፓፁዋ ኦደስካ ኦዶፓ። ሽን ባዳ ነ ጌያዳ ፓፆይሳ ካህነ በሳ። ነ ፓፁዋስ ማርካ ግዳና መላ ባዳ ሙሰይ ኪትዳ ያርሹዋ ያርሻ” ያግስ። ሌወ 14:1.
ማቶ ሀላቃ አማኖ
5 የሱሲ ቅፍርናሆማ ካታማ ጋክዳ ዎደ፥ እስ ማቶ ሀላቃይ እያኮ ሺቅድ፥ 6 “ጎዳዉ፥ ታ አይለይ አሳተꬃይ ጉንድን ዳሮ ሀርገትድ፥ ሶን ዝንእድ ደኤስ” ያግድ ዎስስ።
7 የሱሲ ዛሪድ፥ “ታኒ ባዳ እያ ፓꬃና” ያግስ።
8 ሽን ማቶ ሀላቃይ ዛሪድ፥ “ጎዳዉ፥ ነ ታ ሶ ገላናዉ በሲያ አስ ግድከ፥ ሽን ነ ሀን ኡታዳ ቃላ ፃላላ ኦዳ፥ ታ አይለይ ፓፃና። 9 አይስ ጊኮ፥ ታፐ ቦላራ ታና ኪትያ አሳት ደኦሶና፥ ቃስ ታፐ ጋርሳራ ታዉ ኪተተይሳት ደኦሶና። ኤንታፈ እሱዋ፥ ‘ባ’ ግያደ ቤስ፤ ሀንኩዋ ቃስ ‘ሃያ!’ ግያደ ዬስ። ታ አይልያ፥ ‘ሀይሳ ኦꬃ’ ግያደ ኦꬄስ” ያግስ።
10 የሱሲ ሄሳ ስእዳ ዎደ ማላለትድ፥ ባና ካልያ አሳኮ፥ “ታ ህንተዉ ቱማ ኦዳይስ፤ ታኒ ሀይሳ መላ አማኖ እስራኤለ አሳንካ በአብከ። 11 ታ ህንተዉ ኦዳይስ፤ ዳሮት ዶሎሀፐነ ዉሎሀፐ ይድ፥ ሳሎ ካዎተꬃን አብራሃመራ፥ ይሳቃራነ ያይቆባራ እስፈ እማቶ ቦላ ኡታና። ሉቃ 13:29. 12 ሽን ሳሎ ካዎተꬃ ላታናዉ በስሽን አትዳይሳት ካረ ꬉማን ሆለታና። ያን ኤንታዉ ዬሆነ አቻ ጋርጨꬅ ግዳና” ያግስ። ማቶ 22:13፤ 25:30፤ ሉቃ 13:28.
13 የሱሲ ማቶ ሀላቃኮ፥ “ነ ሶ ባ፥ ነ አማኑዋꬆ ነዉ ሀኖ” ያግስ። እያ አይለይ ኢራካ ፓፅ አግስ።
የሱሲ ዳሮ ሀርጋንቾታ ፓꬅስ
(ማር 1:29-34፤ ሉቃ 4:38-41)
14 የሱሲ ጰፅሮሳ ሶ ገልያ ዎደ፥ ጰፅሮሳ ማቸ አይያ ቆፆ ምሻ ሀርገን ሳከታዳ ዝንእዳሮ በእስ። 15 የሱሲ እ ኩሽያ ቦችዳ ዎደ ቆፆይነ ምሻይ አጋግስ። ፓፃ ደንዳዳ እያ ሞካሱ።
16 ሄ ዎደ ኦማርስ ቱና አያናን ኦይከትዳ ዳሮ አሳታ፥ አሳይ የሱሳኮ ኤህዶሶና። እካ ቱና አያናታ ባ ቃላን ከስስ፥ ሀርጋንቾታ ኡባ ፓꬅስ። 17 ሄሳንካ ናብያ እሳያስ፥
“እ ኑ ሀርግያ ባዉ ኤክስ፥
ኑ ዳቡራ ቶክስ”
ግዳ ቃላይ ፖለትስ። እሳ 53:4.
የሱሳ ካሎይ ጭግስያ ጋተ
(ሉቃ 9:57-62)
18 የሱሲ ዳሮ አሳይ እያ ዩሹዋን ኤቅዳይሳ በእድ፥ አባፈ ሄፍንꬅ ፕናና መላ ባ ታማረታ ኪትስ። 19 ህገ አስታማረታፐ እሶይ፥ “አስታማርያዉ፥ ነ ብያ በሳ ኡባ ታ ካላና” ያግስ።
20 የሱሲ እያኮ “ዎርካናታስ ኦል ደኤስ፥ ሳሎ ካፎታስ ኬꬅ ደኤስ። ሽን አሳ ናኣስ ባ ሁጵያ ሸምፕስያ በሲ ባዋ” ያግስ።
21 የሱሳ ካልያ አሳታፐ እሶይ፥ “ጎዳዉ፥ ታኒ ስንꬃታ ባዳ ታ አዋ ሞጋዳ ያና” ያግስ።
22 ሽን የሱሲ፥ “ሀይቅዳይሳት ባንታ ሀይቆታ ሞጎ፤ ኔኒ ታና ካላ” ያግስ።
የሱሲ ሆቢያ ሴርስ
(ማር 4:35-41፤ ሉቃ 8:22-25)
23 የሱሲ ባናዉ ዎጎሉዋን ገልዳ ዎደ፥ እያ ታማረትካ እያራ ባናዉ ገልዶሶና። 24 ኤንቲ ቆፖና ደእሽን፥ ዎልቃማ ሆበይ ሃꬃ ቦላ ደንድን ዎጎሎይ ምተታናዉ ጋክስ። ሽን የሱሲ ꬍስክስ። 25 እያ ታማረት እያኮ ሺቅድ እያ ባርከꬅድ፥ “ጎዳዉ፥ ኑ ꬋዮስ ኑና አሻርክ” ያግዶሶና።
26 የሱሲ ኤንታኮ፥ “ህንተኖ፥ አማኖይ ፓጭዳይሳቶ፥ አይስ ያየቲ?” ያግስ። ደንድድ፥ ሆቢያነ ጎትያ ኤስስ። ኤለስድ ኡባባይ ስእ ግስ።
27 እያ ታማረት ማላለትድ፥ “ሀይስ፥ ሀር አቶሽን፥ ሆበይነ ጎተይ ኪተተይስ ዋንዳ አሴ?” ያግዶሶና።
ቱና አያን ኦይክዳ ናምኡ አሳታ
(ማር 5:1-20፤ ሉቃ 8:26-39)
28 የሱሲ አባፈ ሄፍንꬃን ደእያ ገርገሶነ ቢታ ጋክዳ ዎደ ቱና አያናይ ኦይክዳ ናምኡ አሳት ዱፎፐ ከይድ እያራ ጋሄትዶሶና። ኤንቲ ዳሮ ኢታነ ያሽያ አሳታ ግድያ ግሾ አስ ሄ በሳራ አꬋናዉ ዳንዳኤና። 29 ኤንትካ፥ “ፆሳ ናአዉ፥ ኑናነ ነና አይበ ጋይ? ዎደይ ጋኮና ደእሽን ኑና ፕርዳናዉ ያዲ?” ግድ ዋስዶሶና።
30 ኤንታፈ ዳሮ ሃኮና ጉዱንꬆ ዉደይ ሄመቴስ። 31 ቱና አያናት የሱሳ፥ “ነ ኑና ከሳናባ ግድኮ፥ ህን ጉዱንꬆ ዉድያ ግዶ የዳርክ” ያግድ ዎስዶሶና።
32 የሱሲ፥ “ቢተ” ያግስ። ቱና አያናት አሳታፐ ከይድ ጉዱንꬆታን ገልዶሶና። ጉዱንꬆት ኡባይ አፎ ዶናራ ድርግድ ብድ አባን ምተትድ ሀይቅዶሶና።
33 ጉዱንꬆ ዉድያ ሄመይሳት ባቃትድ ካታማ ብድ፥ ሀንዳባነ ቱና አያናይ ኦይክዳ አሳታ ቦላ ኦሰትዳባ ኡባ ኦድዶሶና። 34 ያትን፥ ካታማን ደእያ አሳ ኡባይ የሱሳ በአናዉ ከይዶሶና። ኤንቲ የሱሳ በእዳ ዎደ ባንታ ቢታፈ ከይድ ባና መላ ዎስዶሶና።