9
ጉንዳ ኡራ
(ማር 2:1-12፤ ሉቃ 5:17-26)
1 ሄሳፈ ጉየ፥ የሱሲ ዎጎሉዋን ገልድ፥ አባ ፕንድ ባ ካታማ ብስ። 2 ሀንዳ ጉꬃ አሳት እስ ጉንዳ ኡራ አልጋራ ቶክድ የሱሳኮ ኤህዶሶና። የሱሲ ኤንታ አማኑዋ በእድ፥ ጉንዳ ኡራ፥ “ታ ናአዉ፥ ያዮፋ፤ ነ ናጋራይ አቶ ጌተትስ” ያግስ።
3 ሄ ሳትያን፥ አይሁደ ህገ አስታማረታፐ እሶት እሶት፥ “ሀይስ ፆሳ ጫሸ ግደነ” ያግድ ባንታ ዎዛናን ቆፕዶሶና።
4 የሱሲ ኤንታ ቆፋ ኤርድ፥ “ኢታባ ህንተ ዎዛናን አይስ ቆፔቲ? 5 ሀኖሽን፥ ‘ነ ናጋራይ አቶ ጌተትስ’ ገይሳፈነ ‘ደንዳ ኤቃዳ ባ’ ገይሳፈ አዉስ ካዉዪ? 6 ሽን ሳአ ቦላ ናጋራ አቶ ጋናዉ አሳ ናኣስ ማት ደኤይሳ ታ ህንተና ኤርሳና” ያግድ፥ ጉንዳ አድያኮ፥ “ደንዳ ኤቃ፥ ነ አልጋ ቶካዳ፥ ነ ሶ ባ” ያግስ።
7 ጉንዳ ኡራይ ደንድድ ባ ሶ ብስ። 8 ደረይ ሄሳ በእድ ማላለትዶሶና። ሄሳ መላ ማታ አሳስ እምዳ ፆሳ ጋላትዶሶና።
ማቶሳ ፄገተꬅ
(ማር 2:13-17፤ ሉቃ 5:27-32)
9 የሱሲ ያፐ ደንድድ ብሸ ማቶሳ ገይሳ ቃራፃ ቃንፅስያ በሳን ኡትዳሽን በእድ፥ “ታና ካላ” ያግስ።
እካ ደንድድ ካልስ።
10 የሱሲ ማቶሳ ሶን ጋይታ ቦላ ኡትዳሽን፥ ቃራፃ ቃንፅስያ ዳሮ አሳትነ ናጋራንቾት ይድ እያራነ እያ ታማረታራ እስፈ ማናዉ ኡትዶሶና። ሉቃ 15:1-2. 11 እስ እስ ፋርሳወት ሄሳ በእድ፥ የሱሳ ታማረታ፥ “ህንተ አስታማረይ ቃራፃ ቃንፅሰይሳታራነ ናጋራንቾታራ አይስ ሚ?” ያግዶሶና።
12 የሱሲ ሄሳ ስእድ፥ “ꬋለ ኮሸይ ሀርጋንቾታሳፈ አትሽን፥ ፓፃታሳ ግደና። 13 ሽን ህንተ ብድ፥ ‘ታኒ ህንተ ያርሹዋ ግዶናሽን ህንተ ሀራታ ማራና መላ ኮያይስ’ ጌተትድ ፃፈትዳይስ አይ ጉሰኮ ኤርተ። አይስ ጊኮ፥ ታኒ ናጋራንቾታ ፄጋናዉ ያስፐ አትሽን፥ ፅሎታ ፄጋናዉ ያቢከ” ያግስ። ማቶ 12:7፤ ሆሰ 6:6.
የሱሲ ፆማባ ኦይሸትስ
(ማር 2:18-22፤ ሉቃ 5:33-39)
14 ሄ ዎደ ዮሃንሳ ታማረት የሱሳኮ ሺቅድ፥ “ኑነ ፋርሳወት ፆሞስ፥ ሽን ነ ታማረት አይስ ፆሞኮና?” ያግድ ኦይችዶሶና።
15 የሱሲ ዛሪድ ኤንታኮ፥ “ማችዉ ኤከይስ ኤንታራ ደእሽን ፄገትድ ይዳ አሳይ ካዮታናዉ ዳንዳኦና? ሙሹራይ ኤንታ ማታፐ ኤከታና ዎደይ ያና፥ ኤንቲ ሄ ዎደ ፆማና።
16 “ኦራꬃ ማኦፐ ፔꬍድ ጋልአ ማኦ ቦላ ስከይ ኦንካ ባዋ። ሄሳꬆ ኦꬅኮ ኦራꬃይ ጋልአ ፔꬌስ። ፔꬃይካ ጉጅ ዳልጌስ። 17 ኦራꬃ ዎይነ ጋልአ ኦጎሮን ቆልያ ኦንካ ባዋ። ሄሳꬆ ኦꬅኮ ኦራꬃ ዎይነይ ጋልአ ኦጎሩዋ ꬉሴስ ዎይነይካ ጉኬስ፤ ኦጎሮይካ ናምአንꬆ ማዶናባ ግዴስ። ሽን ኦራꬃ ዎይነይ ኦራꬃ ኦጎሮን ቆለታናዉ በሴስ። ሄሳꬆ ኦሰትኮ ናምአይካ ኢቶና ናገቶሶና” ያግስ።
ሀይቅዳ ናእዉነ ሀርገትያ ማጫስዉ
(ማር 5:21-43፤ ሉቃ 8:40-56)
18 የሱሲ ሄሳ ኦዶ ቦላ ደእሽን፥ አይሁደ ሀላቃታፐ እሶይ እያኮ ይድ፥ እያ ስንꬃን ጉልባትድ፥ “ታ ናእያ ሀእ ሀይቃሱ፥ ሽን እያ ፓፃና መላ ኔኒ ያዳ ነ ኩሽያ እ ቦላ ዎꬃርክ” ግድ ዎስስ። 19 የሱሲ ደንድድ እያራ ብስ፤ እያ ታማረትካ ካልዶሶና።
20 እ ብሽን ታማነ ናምኡ ላይꬅ ኩመꬅ ሱꬅ ጎግድ ዋይስያ እስ ማጫስያ ጉየራ ሺቃዳ የሱሳ አፍላ ማጫራ ቦቻሱ። 21 እያ ባ ዎዛናን፥ “ታ እያ አፍላ ማጫራ ፃላላ ቦችያኮ ፓፃና” ያጋዳ ቆፓሱ።
22 የሱሲ ጉየ ስም እዮ ፄልድ፥ “ታ ናተ፥ ያዮፋ! ነና ነ አማኖይ ፓꬅስ” ያግስ። ማጫስያ ኤለሳዳ ፓፃ አጋሱ።
23 የሱሲ አይሁደ ሀላቃ ሶ ጋክያ ዎደ ዛየ ፑነይሳታነ ዬከይሳታ በእድ፥ 24 “አነ ክችተ፤ ጉꬃ ናእያ ꬍስካሱፐ አትሽን፥ ሀይቃቡኩ” ያግስ። ሽን አሳይ እያ ቦላ ሚጭዶሶና። 25 አሳ ካረ ከስዳፐ ጉየ ሶ ገልድ፥ ናኤ ኩሽያ ኦይክስ፥ ናእያ ደንዳ ኤቃሱ። 26 ሄ ዎረይ ሄ ቢታ ኡባ ጋክስ።
ናምኡ ቆቀ አሳታ
27 የሱሲ ያፐ ደንድድ ገደ ስን ብያ ዎደ ናምኡ ቆቀት ባንታ ቃላ ꬎቁ ኦꬅድ፥ “ዳዊታ ናአዉ፥ ኑና ማራርክ” ያግሸ እያ ካልዶሶና።
28 የሱሲ ሶ ገልዳ ዎደ ቆቀት እያ ካልድ ይዶሶና። የሱሲ ኤንታኮ፥ “ታኒ ሄሳ ኦꬃናዉ ዳንዳኤይሳ ህንተ አማነቲ?” ያግስ።
ኤንትካ፥ “ኤ፥ ጎዳዉ” ያግድ ዛርዶሶና።
29 ሄሳፈ ጉየ፥ የሱሲ ኤንታ አይፍያ ቦችድ ኤንታኮ፥ “ህንተዉ፥ ህንተ አማኑዋꬆ ሀኖ” ያግስ። 30 ኤንታ አይፈይካ ዶየትስ። የሱሲ ኤንታኮ፥ “ሀይሳ ኦደስካ ኦዶፕተ” ያግድ ምንꬅ ኦድስ። 31 ሽን አሳት ብድ የሱሳባ ሄ ቢታ ኡባን ኦድዶሶና።
32 ኤንቲ ያፐ ከይያ ዎደ አሳይ ቱና አያናይ ኦይክድ ሙምስዳ እስ አስ የሱሳኮ ኤህዶሶና። 33 ቱና አያናይ ከይዳፐ ጉየ ሙመ ኡራይ ኦደትስ። ደረይካ ማላለትድ፥ “ሀይሳ መላ ኦራꬃባይ እስራኤለ ቢታን ሀንቤና” ያግዶሶና።
34 ሽን ፋርሳወት፥ “ቱና አያናታ ሀላቃን ቱና አያናታ ከሴስ” ያግዶሶና። ማቶ 10:25፤ 12:24፤ ማር 3:22፤ ሉቃ 11:15.
ኦሳንቾት ጉꬃ
35 የሱሲ አይሁደ ዎሳ ኬꬃታን ታማርስሸ፥ ሳሎ ካዎተꬃ ዎንገላ ሳባክሸ፥ አሳ ሀርገ ኡባፈ ፓꬅሸ ካታማታንነ ጉታ ኡባን ዩይስ። ማቶ 4:23፤ ማር 1:39፤ ሉቃ 4:44. 36 ዳሮ ደረይ፥ ሄምያ አስ ባይና ዶርሳዳ ኤንታና በእያ አስ ꬋይን ኡንኤትድ ደኤይሳታ በእድ ኤንታዉ ቃትስ።ታይቦ 27:17፤ 1 ካዎ 22:17፤ 2 ታር 18:16፤ ህዝ 34:5፤ ማር 6:34. 37 ባ ታማረታኮ፥ “ሺቃና ካꬃይ ዳሮ፥ ሽን ካꬃ ሺሽያ አሳይ ጉꬃ።ሉቃ 10:2. 38 ሄሳ ግሾ፥ ጎዳይ ካꬃ ሺሽያ ኦሳንቾታ የዳና መላ ዎስተ” ያግስ።