1 ሄሳፈ ጉየ፥ ሳምባታ ጋላስ፥ የሱሲ ጋደ ግዶራ አꬌስ። የሱሳ ታማረት ኮሻትዳ ግሾ ትያ ባንጋ ሽርክድ ሞሶና። ዛረ 23:25. 2 ሽን ፋርሳወት ሄሳ በእድ የሱሳኮ፥ “ሄኮ፥ ነ ታማረት ሳምባታ ጋላስ ኦꬃናዉ በሶናባ ኦꬆሶና” ያግዶሶና።

3 የሱሲ ዛሪድ፥ “ዳዊቲ ኮሻትዳ ዎደ እያራ ደኤይሳታራ አይ ኦꬅዳኮ ናባብበከቲ?1 ሳሜ 21:1-6. 4 ዳዊቲ ፆሳ ኬꬅ ገልድ ካህነታ ፃላላፐ አትሽን፥ እነ እያራ ደኤይሳታስ በሶና ጌሻ ዳቡዋ ምስ። ሌወ 24:9. 5 ዎይኮ ካህነት ሳምባታ ዎጋ ሻርድ ፆሳ ኬꬃን ሳምባታ ጋላስ ኦሶ ኦꬅኮ ኤንታዉ ባላ ግዶናይሳ ሙሰ ህግያን ናባብበከቲ?ታይቦ 28:9-10. 6 ሽን ስእተ! ፆሳ ኬꬃፈ አይ ሀይሳን ደኤስ። 7 ‘ታኒ ህንተ ያርሹዋ ግዶናሽን ሀራታ ማራና መላ ኮያይስ’ ግያ ቃላይ ወይ ጉሰኮ ህንተ ኤርዳኮ፥ ፅሎ አሳ ቦላ ፕርደከታ። ማቶ 9:13፤ ሆሰ 6:6. 8 አሳ ናአይ ሳምባታ ጎዳ” ያግስ።

9 የሱሲ ያፐ ብድ አይሁደ ዎሳ ኬꬅ ገልስ። 10 ያን ኩሸይ ጉንድዳ እስ ኡራይ ደኤስ። የሱሳ ሞታናዉ ጋሶ ኮይያ አሳት፥ “ሳምባታ ጋላስ ፓꬃናዉ በሲ በሰኔ?” ያግድ ኦይችዶሶና።

11 እ ኤንታኮ፥ “ህንተ ግዶፈ እሱዋስ ዶርስ ሳምባታ ጋላስ አፎን ዉልኮ፥ ጎችድ ከሶናይ ኦኔ?ሉቃ 14:5. 12 ያትን አስ ዶርሳፈ ዋንድ ዳሮ አኔ? ሄሳ ግሾ፥ ሳምባታ ጋላስ ሎኦባ ኦሶይ በሴስ” ያግስ።

13 ሄሳፈ ጉየ፥ የሱሲ አድያኮ፥ “ነ ኩሽያ ፕድ ኦꬃ” ያግን፥ ኡራይ ፕድ ኦꬅስ። እያ ኩሸይ ፓፅድ ሀንኮ ኩሽያዳ ሀንስ። 14 ሽን ፋርሳወት ያፐ ካረ ከይድ፥ የሱሳ ዋት ዎꬋነኮ ማቀትዶሶና።

15 የሱሲ ኤንታ ቆፋ ኤርድ ሄ በሳ አግድ ሀራ ሶ ብስ። ዳሮ አሳይ እያ ካልድ ብዶሶና፥ ሀርጋንቾታ ኡባ ፓꬅስ። 16 የሱሲ፥ “ታባ ሀራ ኦደስካ ኦዶፕተ” ያግድ ምንꬅ ኦድስ። 17 ሄስካ ናብያ እሳያስ፥

22 ሄሳፈ ጉየ፥ ቱና አያናን ኦይከትዳ ቆቀነ ሙመ አሰ ደኤይሳ እያኮ ኤህዶሶና። የሱሲ ኡራ ፓꬅን፥ ኡራይ ፄልስ፤ ኦደትስ። 23 አሳ ኡባይ ማላለትድ፥ “ሀይስ ዳዊታ ናኣ ግዳንደሻ?” ያግዶሶና።

24 ሽን ፋርሳወት ሄሳ ስእድ፥ “ሀ ኡራይ ቱና አያናታ ከሰይ ቱና አያናታ ሀላቃ ብኤል-ዘቡላ ዎልቃና” ያግዶሶና። ማቶ 9:34፤ 10:25.

25 የሱሲ ኤንታ ቆፋ ኤርድ፥ “ዎል ግዶን ሻከትያ ካዎተꬃ ኡባይ ኩንዳና፤ ቃስ ዎል ግዶን ሻከትያ ካታማይ ዎይኮ ኬꬃይ ምንድ ኤቀና። 26 ፃላሄይ ፃላሄ ከስያባ ግድኮ ባ ግዶን ሻከትስ ጉሱ። ሄሳꬆ ሀንያባ ግድኮ እያ ካዎተꬃይ ዋንድ ምንድ ኤቃናዉ ዳንዳኢ? 27 ታኒ ቱና አያና ከሰይ ብኤል-ዘቡላ ዎልቃን ግድኮ ህንተና ካልያ አሳት ኦደ ዎልቃን ከሳኔ? ሄሳ ግሾ፥ ህንተና ካልያ አሳት ህንተና ፕርዳና። 28 ሽን ታኒ ቱና አያናታ ከሰይ ፆሳ አያናን ግድኮ፥ ፆሳ ካዎተꬃይ ህንተኮ ይስ።

29 “ዎይኮ እስ አስ ዎልቃማ አሳ ሶ ገልድ እያ ሻሉዋ ቦንቃናዉ ኮይኮ ኮይሮትድ ሄ ኡራ ቃቾና እፅኮ ዋትድ ዳንዳኢ? ያትኮ እያ ሻሉዋ ቦንቃናዉ ዳንዳኤስ።

30 “ታራ ግዶናይ ኦንካ ታራ ኤቀቴስ፤ ቃስ ታራ እስፈ ሺሾና ኡባይ ላሌስ። ማር 9:40. 31 ሄሳ ግሾ፥ ስእተ፤ አሳይ ኦꬅያ አይ ናጋርነ ጫሻ ቃል ኡባይ አቶ ጌተታና፥ ሽን ጌሻ አያና ጫይያ ኦደስካ እያ ናጋራይ አቶ ጌተተና። ሉቃ 12:10. 32 ኦንካ አሳ ናአ ቦላ ኢታባ ኦደትኮ እያዉ አቶ ጌተታና፥ ሽን ጌሻ አያና ቦላ ኢታባ ኦደትያ ኦደስካ ሀ ሳአን ግድን ያና አላምያን እያ ናጋራይ አቶ ጌተተና። ሉቃ 12:10.

33 “ሎኦ ምꬃይ ሎኦ አይፈ አይፌስ፤ ቃስ ኢታ ምꬃይ ኢታ አይፌስ። ህዛ፥ ምꬃይ ኤረተይ ባ አይፍያና። 34 ህንተኖ፥ ሾሻ ናይቶ፥ ህንተ ኢታ ግድሸ ዋንድ ሎኦባ ኦደታናዉ ዳንዳኤቲ? አስ ባ ዎዛናን ኩምዳባፐ ዶናን ኦደቴስ። ማቶ 3:7፤ 23:33፤ ሉቃ 3:7፤ ማቶ 15:18፤ ሉቃ 6:45. 35 ሎኦ አስ ባ ዎዛናን ዎꬅዳ ሎኦባፐ፥ ሎኦባ ከሴስ፤ ኢታ አስ ባ ዎዛናን ዎꬅዳ ኢታባፐ፥ ኢታባ ከሴስ። 36 ሽን ስእተ፥ አሳይ ኦደትያ ጮ ኦዳ ኡባስ ፕርዳ ጋላስ ዛሮ እማና። 37 አይስ ጊኮ፥ ነ ኦደትያ ነ ቃላን ፅላና፤ ነ ኦደትያ ነ ቃላይ ነ ቦላ ፕርዳና” ያግስ።

38 ሄሳፈ ጉየ፥ እስ እስ ፋርሳወትነ ህገ አስታማረት የሱሳኮ፥ “አስታማርያዉ፥ ኔኒ ማላታ ኦꬃዳ ኑና በሳ” ያግዶሶና። ማቶ 16:1፤ ማር 8:11፤ ሉቃ 11:16.

39 ሽን የሱሲ ዛሪድ፥ “አማነቶናነ ኢታ የለተꬃይ ማላታ ኮዬስ። ሽን ናብያ ዮናሳ ማላታፐ ሀራ ማላት እያዉ እመተና። ማቶ 16:4፤ ማር 8:12. 40 ዮናስ ግታ ሞሎ ኡሎን ሄꬑ ጋላስነ ሄꬑ ቃማ ጋምእዳይሳ መላ አሳ ናአይ ሄꬑ ጋላስነ ሄꬑ ቃማ ቢታ ጋርሳን ጋምአና። ዮሀ 1:17. 41 ናናወ አሳይ ፕርዳ ጋላስ ደንድድ ሀ የለተꬃ ቦላ ፕርዳና፤ አይስ ጊኮ፥ ኤንቲ ዮናስ ሳባክን፥ ስእድ ባንታ ናጋራፐ ስምዶሶና። ሄኮ፥ ዮናሳፐ አይስ ሀይሳን ደኤስ። ዮሀ 3:5. 42 ፕርዳ ጋላስ ዱገሀ ካውያ ደንዳዳ ሀ የለተꬃ ቦላ ፕርዳና፤ አይስ ጊኮ፥ እያ ሶሎሞነ ጭንጫተꬃ ስአናዉ ቢታ ጋፃፐ ያሱ። ሄኮ፥ ሶሎሞነፐ አይ ሀይሳን ደኤስ። 1 ካዎ 10:1-10፤ 2 ታር 9:1-12.

43 “ቱና አያናይ አሳፐ ከይዳፐ ጉየ ባዉ ሸምፕያ በሲ ኮይድ ሃꬅ ባይና መላ በሳን ዳቡሬስ፥ ሽን ባ ኮይያ ሸምፑዋ ደመና። 44 ያንን፥ ‘ታ አጋ ከይዳ ኬꬃ ስማዳ ባና’ ያጌስ። እ ስምያ ዎደ ኬꬃይ ካይስ ግደይሳነ ፕተትድ ጊግድ ኡትዳይሳ ደሜስ። 45 ህዛ፥ ስም ብድ፥ ባፐ ኢትያ ሀራ ላፑን ኢታ አያናታ ኤክድ ዬስ፤ ኤንትካ ኡራ ግዶ ገልድ ደኦሶና። ሄ ኡራስ ካሰይሳፈ ጉየይስ ዳሮ ኢቴስ። ሀ ኢታ የለተꬃ ቦላ ሄሳ መላ ሀናና” ያግስ።

46 የሱሲ ደርያስ ኦዳ ቦላ ደእሽን እያ አያነ እያ እሻት እያ ኦድሳናዉ ኮይድ ካረን ኤቅዶሶና። 47 እስ አስ እያኮ፥ “ነ አያነ ነ እሻት ነና ኦድሳናዉ ኮይድ ካረን ኤቅዶሶና” ያግስ።

48 የሱሲ ዛሪድ፥ “ታ አይያ ኦኔ? ታ እሻትካ ኦናንቴ?” ያግስ። 49 ባ ኩሽያራ ታማረታ ማልሸ፥ “በእተ፥ ታ አያነ ታ እሻት ሀይሳታ። 50 ሳሎን ደእያ ታ አዋ ሸንያ ኦꬅያ ኡባይ ታ እሻ፥ ታ ምቾነ ታ አዮ” ያግስ።