11
ፃማቅያ ዮሃንስ ኪትዳ አሳታ
(ሉቃ 7:18-35)
1 የሱሲ ታማነ ናምኡ ታማረታ ኪትዳፐ ጉየ ያፐ ደንድድ ታማርሳናዉነ ሳባካናዉ ጋልላ ካታማታ ብስ።
2 ዮሃንስ ቃሾ ኬꬃን ደእሸ ክርስቶስ ኦꬅያባታ ስእድ፥ ባ ታማረታፐ እያኮ ኪትድ፥ 3 “ያና ጌተትዳይ ነነዬ? ዎይኮ ኑኒ ሀራ ናግኖ?” ያግድ ኦይችስ።
4 የሱሲ ኤንታኮ ዛሪድ፥ “ብድ ህንተ ስእያባነ ህንተ በእያባ ዮሃንሳስ ኦድተ። 5 ቆቀት ፄሎሶና፥ ዎበት ሄመቶሶና፥ ባሮ ሀርጋንቾት ፓፆሶና፥ ቱለት ስኦሶና፥ ሀይቅዳይሳት ሀይቆፐ ደንዶሶና፤ ማንቆታስ ዎንገላይ ሳባከቴስ። እሳ 35:5. 6 ታናን ꬉበቶናይ አንጀትዳይሳ” ያግስ።
7 ዮሃንሳ ታማረት ጉየ ስሚድ ብን፥ የሱሲ ደርያስ ዮሃንሳባ ኦድሸ፥ “ሀ መላ ቢታ አይ በአናዉ ከይደቲ? ጫርኮይ ቃꬅያ ማይረ በአናዉ ይደትዬ? 8 ያትን፥ አይ በአናዉ ከይደቲ? ኮይሰ ማኦ ማእዳ አሰ በአናሰዬ? ኮይሰ ማኦ ማእዳ አሳት ካዎ ጋꬎን ደኦሶና። 9 ያትን፥ አይ በአናዉ ከይደቲ? ናበ በአናሰዬ? ሄኮ፥ ህንተ ናበፐ አይሳ በኤታ።
10 “ነ ኦግያ ነ ስንꬃን ጊግስያ
ታ ኪታንቹዋ ኔፐ ስን ኪታና”
ጌተትድ ፃፈትዳይ እያሳ። ምልክ 3:1.
11 ታ ህንተዉ ቱማ ኦዳይስ፤ ማጫሳፐ የለትዳይሳታ ግዶፈ ዮሃንሳፐ አይ ኦንካ ባዋ፤ ሳሎ ካዎተꬃን ኡባፈ ጉፀይ እ፥ እያፐ አꬋና። 12 ፃማቅያ ዮሃንሳ ዎድያፐ ዶምድ ሀች ጋካናዉ ሳሎ ካዎተꬃይ ዳሮ ናቀቴስ፥ ምንዳ አሳት ዎልቃን ያ ገላና። ሉቃ 16:16. 13 ናበት ኡባይነ ሙሰ ህገይ ዮሃንሳ ዎደ ጋካናዉ ሳሎ ካዎተꬃባ ትንብተ ኦድዶሶና። 14 ህዛ፥ ህንተ ኤንታ ኪታ አማናና ግድኮ፥ ያና ጌተትዳ ኤልያስ፥ እ ዮሃንሳ። ምልክ 4:5፤ ማቶ 17:10. 15 ህዛ፥ ስእያ ሀይꬅ ደኤይ ስኦ።
16 “ህዛ፥ ሀ ዎድያ የለተꬃ አይብራ ዳንሶ? ግያ ግዶን ኡትድ ዎል ፄግድ፥
17 ‘ኑ ህንተዉ ሱሱልኤ ፑንን፤
ህንተ የፀከታ።
ኑ ሳቢድ ዘሌልን፤
ህንተ ዬከከታ’
ግያ ናይታ ዳኖሶና። 18 ፃማቅያ ዮሃንስ ሞናነ ኡዮና ይን፥ ‘ቱና አያን ደኤስ’ ያግደታ። 19 አሳ ናአይ ምሸነ ኡይሸ ይን፥ ‘ያራምባነ ኡሻንቾ፥ ቃራፃ ቃንፅሰይሳታነ ናጋራንቾታ ዳቦ’ ያግደታ። ህዛ፥ ጭንጫተꬃ ቱማተꬃይ እያ ኦሱዋን ቆንጬስ” ያግስ።
አማኖና እፅዳ ካታማታ
(ሉቃ 10:13-15)
20 ሄሳፈ ጉየ፥ የሱሲ ዳሮ ማላታታ ኦꬅዳ ካታማታን ደእያ አሳት ባንታ ናጋራፐ ስሚድ ማሮታን ገሎና እፅዳ ግሾ ኤንታና፥ 21 “ኮራዝነ ካታማዉ ነና አየ! ቤተሳይዳ ካታማዉ ነና አየ! አይስ ጊኮ፥ ህንተ ግዶን ኦሰትዳ ማላታት ፅሮሳንነ ስዶናን ኦሰትዳ ግድያኮ፥ ኤንቲ በን ብዶ ትየትድ፥ ካዮ ማኦ ማእድ ባንታ ናጋራፐ ስም አጋና። እሳ 23:1-18፤ እዩ 3:4-8፤ አሞ 1:9-10፤ ዛካ 9:2-4. 22 ሽን ታ ህንተዉ ኦዳይስ፤ ፕርዳ ጋላስ ህንተፈ አꬅድ ፅሮሳስነ ስዶናስ ፕርዳይ ካዉያና። 23 ቃስ፥ ቅፍርናሆማ፥ ኔኒ ፑደ ሳሎ ከያናዉ ኮያይ? ሀነና! ኔኒ ስኦለን የገታና። አይስ ጊኮ፥ ነ ግዶን ኦሰትዳ ማላታት ሶዶመን ኦሰትዳባ ግድያኮ፥ ሶዶመይ ሀች ጋካናዉ ደአናሽን። እሳ 14:13. 24 ሽን ታ ነዉ ኦዳይስ፤ ፕርዳ ጋላስ ኔፐ አꬅድ ሶዶመስ ፕርዳይ ካዉያና” ያግድ ሀንቀትስ። ማቶ 10:15፤ ሉቃ 10:12.
ክርስቶስ እምያ ሸምፖ
(ሉቃ 10:21-22)
25 ሄ ዎደ የሱሲ፥ “አዋዉ፥ ሳሉዋነ ሳኣ ጎዳዉ፥ ኔኒ ሀይሳ ኤራንቾታፐነ ጭንጫታፐ ገንꬃዳ ናይታስ ቆንጭስዳ ግሾ፥ ነና ጋላታይስ። 26 ኤ፥ ታ አዋዉ፥ ሀይስ ነ ሎኦ ሸንያዳ ሀንስ።
27 “ኡባይ ታዉ ታ አዋፐ እመትስ። አዋፐ ሀር ናአ ኤረይ ባዋ፥ ናኣፐነ እ ኤንታዉ ቆንጭሳናዉ ኮየይሳታፐ ሀር አዋ ኤራናዉ ዳንዳኤይ ባዋ። ዮሀ 1:18፤ 3:35፤ 10:15.
28 “ህንተኖ፥ ዳቡራንቾቶ፥ ቶሆይ ዴፅዳ ኡባይ ታኮ ሃ ዪተ፤ ታኒ ህንተና ሸምፕሳና። 29 ታኒ ታ ዎዛናን አሽከነ አዳ ግድያ ግሾ፥ ታ ቃምባራን ገልተ፥ ታፐ ታማርተ፤ ህንተ፥ ህንተ ሸምፑዋስ ሸምፖ ደማና። ኤርም 6:16. 30 ታ ቃምባራይ ሊቆ፥ ቃስ ታ ቶሆይካ ካዉሸ” ያግስ።