16
ማላታ በአናዉ ኦይችዳ ኦይሻ
(ማር 8:11-13፤ ሉቃ 12:54-56)
1 ፋርሳወትነ ሳዱቃወት የሱሳኮ ይዶሶና። እያ ፓጫናዉ ኮይድ፥ ባንታና ሳሎፐ ማላታ በሶ ግድ ኦይችዶሶና። ማቶ 12:38፤ ሉቃ 11:16. 2 ሽን እ ኤንታኮ፥ “ሳእ ኦማርስያ ዎደ፥ ‘ሳሎይ ዞእዳ ግሾ ዎንቶ ቦቃላና’ ያጌታ። 3 ዎንትያ ዎደ፥ ‘ሳሎይ ዞእድ ሻራትዳ ግሾ እሪ ቡካና’ ያጌታ። ያትን ህንተ ሳሎ ማላ በእድ ኤሬታ፥ ሽን ዎድያ ማላ ኤራናዉ ዳንዳእቤከታ። 4 ኢታነ አማኖና የለተꬃይ ማላታ ኮዬስ። ሽን እያዉ ዮናሳ ማላታፐ ሀራ ማላት እመተና” ያግስ። ሄሳፈ ጉየ፥ ኤንታና ያን አግድ ሀራ ሶ ብስ። ማቶ 12:39፤ ሉቃ 11:29.
ፋርሳወታነ ሳዱቃወታ እርሾ
(ማር 8:14-21)
5 ኤንቲ አባፈ ሄፍንꬅ ፕንዳ ዎደ ዳቦ ኤክድ ያናይሳ ዶግዶሶና። 6 የሱሲ ኤንታኮ፥ “ፋርሳወታፐነ ሳዱቃወታ እርሹዋፈ ናገትተ” ያግስ። ሉቃ 12:1. 7 ኤንትካ ባንታ ጋርሳን፥ “እ ሄሳ ግዳይ ኑ ዳቦ ኤክድ ዮና ግሾሳ ግዳና” ያግዶሶና። 8 የሱሲ ኤንታ ቆፋ ኤርድ፥ “ህንተኖ፥ አማኖይ ፓጭዳይሳቶ! ዳቦ ኤኮና ይዳ ግሾ ዎል ግዶን አይስ ኦደቴቲ? 9 ሀእካ ህንተ አኬከቲ? እቻሹ ሙኩሉ አሳስ እቻሹ ኡይꬃ ግሽዳይሳነ ኤንቲ ምድ ካልን ህንተ አፑን ጋይታ ኩመꬅ ደንꬅዳኮ ዶግደቲ?ማቶ 14:17. 10 ሄሳዳካ፥ ላፑን ኡይꬃ ኦይዱ ሙኩሉ አሳስ ግሽዳይሳነ ኤንቲ ምድ ካልን፥ ህንተ አፑን ግታ ጋይታ ኩመꬅ ደንꬅዳኮ አኬከከቲ?ማቶ 15:34. 11 ህዛ፥ ታኒ ፋርሳወታነ ሳዱቃወታ እርሹዋፈ ናገትተ ጋዳ ኦደይስ ዳቦባ ግዶናይሳ አኬከከቲ?” ያግስ። 12 ያትን፥ እያ ታማረት የሱሲ ኦደይ ሙኑቃ ደንꬃናዉ የገትያ እርሾባ ግዶናሽን ፋርሳወታነ ሳዱቃወታ ትምርትያፈ ናገታናይሳ ግደይሳ አኬክዶሶና።
ጰፅሮሳ ማርካተꬃ
(ማር 8:27-30፤ ሉቃ 9:18-21)
13 የሱሲ ቅሳረ ፍልጶሳ ቢታ ጋክዳ ዎደ ባ ታማረታኮ፥ “አሳይ፥ አሳ ናኣ ኦና ጎና?” ያግድ ኦይችስ።
14 ኤንትካ፥ “እሶት እሶት ፃማቅያ ዮሃንሳ፥ ሀራት ኤልያሳ ቃስ ሀንኮት ኤርምያሳ ዎይኮ ናበታፐ እሱዋ ጎሶና” ያግዶሶና። ማቶ 14:1.
15 የሱሲ ዛሪድ፥ “ያትን፥ ህንተ ታና ኦና ጌቲ?” ግድ ኤንታ ኦይችስ።
16 ስሞና ጰፅሮስ ዛሪድ፥ “ኔኒ ክርስቶሳ፥ ደኦ ፆሳ ናአ” ያግስ። ዮሀ 6:68.
17 የሱሲ ጰፅሮሳኮ፥ “ዮና ናኣ ስሞና፥ ኔኒ አንጀትዳይሳ! ሀይሳ ነዉ ቆንጭስዳይ ሳሉዋን ደእያ ታ አዋፐ አትሽን፥ አሰ ግደና። 18 ታ ነዉ ኦዳይስ ጰፅሮሳ፥ ኔኒ ዛላ! ታኒ ሀ ዛላ ቦላ ታ ዎሳ ኬꬃ ኬፃና። ሀይቆ ዎልቃትካ እዮ ፆኖኮና። 19 ሳሎ ካዎተꬃ ቁልፐታ ታ ነዉ እማና። ሳአን ኔኒ ድግያባይ ኡባይ ሳሎን ፆሳ ማታን ድገትዳባ ግዳና። ሳአን ኔኒ ሀኖ ግያባይ ኡባይ ሳሎን ፆሳ ማታን ሀንዳባ ግዳና” ያግስ። ማቶ 18:18፤ ዮሀ 20:23.
20 ሄሳፈ ጉየ፥ እ፥ ክርስቶሳ ግደይሳ ኦደስካ ኦዶና መላ ባ ታማረታ ምንꬅድ ኪትስ።
የሱሲ ባና ጋካና ዋያ ኦድስ
21 ሄ ዎድያፐ ዶምድ የሱሲ ባ ታማረታስ፥ “ታኒ የሩሳላመ ባናዉ በሴስ። ያን ደርያ ጭማታን፥ ካህነ ሀላቃታነ ህገ አስታማረታ ኩሸን ዋየ ኤካናዉ በሴስ። ኤንቲ ታና ዎꬋና፥ ሽን ታኒ ሄꬓንꬆ ጋላስ ሀይቆፐ ደንዳና” ያግድ ቆንጭስስ።
22 ጰፅሮስ የሱሳ ጋፃ ከስድ፥ “ጎዳዉ፥ ሄስ ሀነና! ሄሳ መላባይ ነና ኡባራካ ጋኮፎ!” ያግድ ሀንቀትስ።
23 የሱሲ ጰፅሮሳኮ ጉየ ስሚድ፥ “ሀ ፃላህያዉ፥ ታፐ ሃካ! ኔኒ አሳ ቆፋ ቆፓሳፐ አትሽን፥ ፆሳ ቆፋ ቆፖና ግሾ ታዉ ꬉበ ግዳሳ” ያግስ።
24 ሄሳፈ ጉየ፥ የሱሲ ባ ታማረታኮ፥ “ኦንካ ታና ካላናዉ ኮያባ ግድኮ ባና ካዶ፥ ባ ማስቃልያ ቶክድ ታና ካሎ። ማቶ 10:38፤ ሉቃ 14:27. 25 ባ ደኡዋ አሻናዉ ኮይያ ኡባይ ꬋይሴስ። ሽን ባ ደኡዋ ታ ግሾ ግድ አꬅድ እመይስ አሼስ። ማቶ 10:39፤ ሉቃ 17:33፤ ዮሀ 12:25. 26 አስ አላመ ኩመꬅ ባዉ ኦꬅድ፥ ግዶሽን ባ ሸምፑዋ ꬋይስኮ እያ አይ ማዲ? ዎይኮ አስ ባ ሸምፑዋ ላመ አይ እማናዉ ዳንዳኢ? 27 አሳ ናአይ ባ አዋ ቦንቹዋን ባ ኪታንቾታራ ያና። ሄ ዎደ እስ እስ ኡራስ እያ ኦሱዋዳ እማና። ማቶ 25:31፤ ማዝ 62:12፤ ሮመ 2:6. 28 ታ ቱማ ኦዳይስ፤ ሀይሳን ኤቅዳ አሳታፐ አሳ ናአይ ካዎ ግድድ ስመይሳ በአና ጋካናዉ ሀይቆናይሳት ሀይሳን ደኦሶና” ያግስ።