1 ኡሱፑን ጋላሳፐ ጉየ የሱሲ፥ ጰፅሮሳ፥ ያይቆባነ እያ እሻ ዮሃንሳ ባራ ኤክድ ባንታርካ ግዳናዉ ዙማ ቦላ ከይስ። 2 ጰፅ 1:17-18. 2 ያን ኤንታ ስንꬃን የሱሳ ማላይ ኩመꬅ ላመትስ፤ እያ ሶምኦይካ አዋዳ ፆልቅስ። እያ ማኦይካ ዳሮ ቦፅስ። 3 ሄኮ፥ ሙሰይነ ኤልያስ እያራ ኦደትሽን በእዶሶና። 4 ጰፅሮስ የሱሳኮ፥ “ኑኒ ሀይሳ ሀሹ ይዳ። ነ ኮይኮ እስኖ ነዉ፥ እስኖ ሙሰስ፥ እስኖ ኤልያሳስ ሀይሳን ሄꬑ ሻቃራ ሻቃራና” ያግስ። 5 ጰፅሮስ ሄሳ ቡሮ ኦድሽን ቦꬃ ሻራይ ኤንታና ካምስ። ሻራ ግዶራ፥ “ታና ኡፋይስያ፥ ታ ዶስያ ናአይ ሀይሳ፥ እያ ስእተ!” ግያ ቃላይ ይስ። መ 22:2፤ ማዝ 2:7፤ እሳ 42:1፤ ማቶ 3:17፤ 12:18፤ ማር 1:11፤ ሉቃ 3:22፤ ዛረ 18:15. 6 የሱሳ ታማረት ሄሳ ስእዳ ዎደ ዳጋምድ ባንታ ሶምኡዋራ ሳአን ኩንድዶሶና። 7 ሽን የሱሲ ኤንታኮ ሺቅድ ኤንታ ቦችድ፥ “ደንድተ፥ ያዮፍተ!” ያግስ። 8 ኤንቲ ꬎቁ ግድ በእያ ዎደ የሱሳፐ ሀራ ኦናካ በእቦኮና።

9 ኤንቲ ዙማ ቦላፈ ዎꬍሽን የሱሲ ኤንታኮ፥ “አሳ ናአይ ሀይቆፐ ደንዳና ጋካናዉ ሀ ህንተ በእዳባ ኦደስካ ኦዶፕተ” ግድ ኪትስ። 10 የሱሳ ታማረት፥ “ያትን፥ ህገ አስታማረት ኤልያስ ክርስቶሳፐ ካሰትድ ያና ግዳይ አይብሴ?” ያግድ ኦይችዶሶና። ምልክ 4:5.

11 የሱሲ ዛሪድ፥ “ኤ! ኤልያስ ካሰት ይድ ኡባባ ጊግሳና። 12 ሽን ታ ህንተዉ ቱማ ኦዳይስ፤ ኤልያስ ካሰትድ ይስ። ኤንትካ እያ ቦላ ኮይዳባ ኦꬅዶሶናፐ አትሽን፥ እያ ሻክ ኤርቦኮና። ሄሳዳ አሳ ናአይ ኤንታ ኩሸን ዋየታና” ያግስ። ማቶ 11:14.

13 ሄ ዎደ የሱሲ ግዳይ ፃማቅያ ዮሃንሳባ ግደይሳ አኬክዶሶና።

14 ኤንቲ ደርያፐ አሳኮ ስምያ ዎደ እስ አስ የሱሳ ስንꬃን ጉልባትድ፥ 15 “ጎዳዉ፥ ሀያና ታ ናኣስ ቃታርክ፤ እያ ሾጭድ የግያ ሀርገይ ዳሮ ኡንኤꬅድ ታማንነ ሃꬃን የጌስ። 16 ነ ታማረታኮ ኤሀስ፥ ሽን ኤንቲ ፓꬃናዉ ዳንዳእቦኮና” ያግስ።

17 የሱሲ ዛሪድ፥ “ህንተኖ፥ አማኖና ጌላ የለተꬃዉ አዉደ ጋካናዉ ታ ህንተራ ዳኔ? አዉደ ጋካናዉ ታ ህንተና ዳንዳአኔ? አነ ናኣ ሃ ኤክ ዪተ” ያግስ። 18 የሱሲ ቱና አያና ሀንቅን፥ ቱና አያናይ ናኣፐ ከይስ፤ ሄ ሳተንካ ናአይ ፓፅስ። 19 ሄሳፈ ጉየ፥ የሱሳ ታማረት ባንታርካ እያኮ ሺቅድ፥ “ኑኒ ቱና አያና ከሳናዉ ዳንዳእቦናይ አይብሴ?” ያግድ ኦይችዶሶና። 20 እ ኤንታኮ፥ “ህንተዉ አማኖይ ላፍዳ ግሾሳ። ታ ህንተዉ ቱማ ኦዳይስ፤ ጋሸ አይፈ መላ አማኖይ ህንተዉ ደእኮ ‘ሀ ዙማ ሀይሳፈ ደንዳዳ ገደ አꬋ’ ጊኮ ህንተዉ ኪተታና። ህንተዉ ዳንዳኤቶናባይ ዴና። 21 [ሽን ሄሳ መላይ ዎሳፐነ ፆማፐ አትሽን፥ ሀራን ከየና”] ያግስ። ማቶ 21:21፤ ማር 11:23፤ 2 ቆሮ 13:2.*እስ እስ በን ማፃፋታን ፓይዶ 21 ዴና።

22 የሱሳ ታማረት ጋልላን ሺቅድ ደእሽን የሱሲ ኤንታኮ፥ “አሳ ናእ አሳ ኩሸን አꬍድ እመታና። 23 ኤንቲ እያ ዎꬋና፥ ሽን እ ሄꬓንꬆ ጋላስ ሀይቆፐ ደንዳና” ያግስ።

እያ ታማረትካ ዳሮ ቂሮትዶሶና።

24 የሱሳራነ እያ ታማረታራ ቅፍርናሆማ ካታማ ጋክዳ ዎደ ፆሳ ኬꬃ ጊራ ቃንፅሰይሳት ጰፅሮሳኮ ይድ፥ “ህንተ አስታማረይ ፆሳ ኬꬃ ጊራ ጊሪ?” ያግድ ኦይችዶሶና። ከሳ 30:13.

25 ጰፅሮስ ዛሪድ፥ “ጊሬስ” ያግስ። ጰፅሮስ ሶ ገልያ ዎደ የሱሲ ካሰትድ፥ “ጰፅሮሳ፥ ነዉ አይ ዳኒ? ሀ ሳኣ ካዎተꬃት ቃራፃነ ጊራ ኦፐ ኤኮና? ጋደ አሳፐየ ዎይኮ አሳ ጋደ አሳፔ?”†ጋደ አሳፐየ ዎይኮ አሳ ጋደ አሳፔ ሄ ዎደ ካዎተꬃት ባንታ ጋደ አሳፐ ጊራ ኤኮኮና። ያግድ ኦይችስ።

26 ጰፅሮስ “አሳ ጋደ አሳፐ” ግድ ዛርስ።

የሱሲ ዛሪድ፥ “ጋደ አሳይ ጊራ ጊሮኮና ጉሱ። 27 ሽን ኤንቲ ꬉበቶና መላ አባ ባዳ ሞሎ ኦይካናዉ ማንፃቆ የጋ። ኮይሮ ነ ኦይክያ ሞሉዋ ዶና ዶያዳ ጊራስ ግድያ ሚሸ ነ ግሾነ ታ ግሾ ኤፋዳ ጊራ” ያግስ።