1 ሄ ዎደ የሱሳ ታማረት ይድ፥ “ሳሎ ካዎተꬃን ኡባፈ አይ ኦኔ?” ያግድ ኦይችዶሶና። ሉቃ 22:24. 2 የሱሲ እስ ጉꬃ ናአ ፄግድ ኤንታ ግዶን ኤስድ ሀይሳዳ ያግስ። 3 “ታኒ ህንተዉ ቱማ ኦዳይስ፤ ህንተ ላመቶናነ ጉꬃ ናይታዳ ሀኖና እፅኮ ሳሎ ካዎተꬃ ኡባራካ ገላናዉ ዳንዳኤከታ። ማር 10:15፤ ሉቃ 18:17. 4 ህዛ፥ ሀ ጉꬃ ናአዳ ባና ካዉሽያ ኦንካ ሳሎ ካዎተꬃን ኡባፈ አይሳ ግዳና። 5 ሀይሳ መላ ናአ ታ ሱንꬃን ሞክያ ኦንካ ታና ሞኬስ።

6 “ሽን ታናን አማንያ ሀ ጉꬃታፐ እሱዋ ናጋራ ኦꬃና መላ ꬉበ ግድያ ኦንካ ግታ ጋቻ ዎፃ ባ ቆን ቃችድ ጪሞ አባን ምተትኮ እያዉ ሎኦ። 7 አላመን አሳይ ናጋራ ኦꬃና መላ ኦꬅያባት ደእያ ግሾ አላምያ አየ! ሄሳ መላባት ዮና አተና፥ ሽን ꬉበይ እያ ጋሶን ያ ኡራ አየ!

8 “ነ ኩሸይ ዎይኮ ነ ቶሆይ ነና ባለꬅኮ ኔፐ ቃንፃ የጋ። ኔኒ ናምኡ ኩሸራ ዎይኮ ናምኡ ቶሆራ መርና ታማን የገታናፐ ኩሸ ዎይኮ ቶሆ ዱፃ ግዳዳ መርና ደኦ ደመይስ ነዉ ሎኦ። ማቶ 5:30. 9 ቃስ ነ አይፈይ ነና ባለꬅኮ እዮ ዎጫ ከሳዳ ዎራ ሆላ። ኔኒ ናምኡ አይፈራ ጋናመ ታማን የገተይሳፈ እስ አይፈራ መርና ደኡዋ ገለይስ ነዉ ሎኦ። ማቶ 5:29.

10 “ታ ህንተዉ ኦዳይስ፤ ሳሎን ደእያ ኤንታ ናግያ ኪታንቾት ኡባ ዎደ ሳሎን ደእያ ታ አዋ ስንꬃን ደእያ ግሾ፥ ህንተ ሀ ጉꬃታፐ እሱዋካ ካꬎና መላ ናገትተ። ሉቃ 19:10. 11 አሳ ናአይ ꬋይዳይሳታ አሻናዉ ይስ”*አሳ ናአይ ꬋይዳይሳታ አሻናዉ ይስ፦ እስ እስ በን ማፃፋት ፓይዶ 11 ጉጆሶና። ያግስ።

12 ቃስ የሱሲ፥ “ህንተዉ አይ ዳኒ? እስ ኡራስ ፄቱ ዶርሳት ደኤይሳታፐ እሶይ ꬋይኮ ኡዱፉን ታማነ ኡዱፉናታ ደርያ ቦላ የግ አግድ ሄ ꬋይዳይሳ ኮያናዉ ቤኔ? 13 ታ ቱማ ኦዳይስ፤ እ ደምዳ ዎደ ኡዱፉን ታማነ ኡዱፉናታፐ አꬅድ ꬋይድ በንትዳ እስ ዶርሳ ግሾ ኡፋይቴስ። 14 ሄሳዳካ፥ ሳሎን ደእያ ህንተ አዋይ ሀ ጉꬃታፐ እሶይ ꬋያና መላ ኮየና።

15 “ነ እሻይ ነና ቆህኮ ነርካ እያኮ ባዳ እያ ቆሁዋ እያዉ ኦዳ። እ ነና ስእኮ እያ ነዉ እሻ ኦꬃ።ሉቃ 17:3. 16 ሽን እ ነና ስኦና እፅኮ፥ ናምኡ ዎይኮ ሄꬑ አሳ ማርካን ሞቶይ ላሰትያ ግሾ፥ እስ ዎይኮ ናምኡ አስ ኤካዳ እያኮ ባ። ዛረ 19:15. 17 እ ኤንታና ስኦና እፅኮ፥ ዎሳ ኬꬃስ ኦዳ። ዎሳ ኬꬅ ግያባ ስኦና እፅኮ አማኖና አሳዳ ዎይኮ ቃራፃ ቃንፅስያ አሳዳ እያ ፓይዳ።

18 “ታ ህንተዉ ቱማ ኦዳይስ፤ ሳአን ህንተ ድግያባት ኡባይ ሳሎን ፆሳ ማታን ድገትዳባ ግዳና። ሳአን ህንተ ሀኖ ግያባት ኡባይ ሳሎን ፆሳ ማታን ሀንዳባ ግዳና። ማቶ 16:19፤ ዮሀ 20:23.

19 “ቃስካ ታ ህንተዉ ኦዳይስ፤ ሳአን ህንተፈ ናምአይ ባንታ ዎስያባስ እስ ዎዛናን ግድድ ፆሳ ዎስያባ ግድኮ ሳሎን ደእያ ታ አዋይ ህንተዉ ኦꬃና። 20 ታና ካለይሳታፐ ናምአ ዎይኮ ሄꬓ ግድድ ሺቅያ በሳን ታኒ ኤንታ ግዶን በንታና” ያግስ።

21 ሄ ዎደ ጰፅሮስ የሱሳኮ ይድ፥ “ጎዳዉ፥ ታ እሻይ ታና ቆህኮ አፑን ቶሆ ታኒ አቶ ጋናዉ በሲ? ላፑን ቶሆ ጋካናሰዬ?” ግድ ኦይችስ። ሉቃ 17:3-4.

22 የሱሲ ዛሪድ፥ “ግደና፥ ላፑን ታሙ ቶሆ ላፑናፐ አትሽን፥ ላፑን ቶሆ ግደና። መ 4:24.

23 “ሄሳ ግሾ፥ ፆሳ ካዎተꬃይ ባ ኦሳንቾታራ ባ ሚሸይ ፓጭዳኮነ ፓላህዳኮ በአናዉ ቆፕዳ ካዋ ዳኔስ። 24 ሄ ካዎይ ሚሸይ ፓጭዳኮነ ፓላህዳኮ በእያ ዎደ ዳሮ ግንድግንዳ አጮይ ደእያ እስ ኡራ እያኮ ኤህዶሶና። 25 ሽን ሄ አይለይ አጩዋ ቃንፃናዉ ፆነትን እያራ፥ እያ ማቸራ፥ እያ ናይትነ እያዉ ደእያባይ ኡባይ ባይዘትድ አጮይ ጭገታና መላ እያ ጎዳይ ኪትስ። 26 ያትን አይለይ ባ ጎዳ ቶሁዋ ቦላ ጉልባትድ፥ ‘ታ ጎዳዉ፥ ሀያና ጉꬃ ዎደ ታካርክ፥ ታ አጩዋ ኡባ ታ ጭጋና’ ያግድ ዎስስ። 27 ካዎይ እያዉ ቃትድ፥ የድ አግስ፤ እያ አጩዋ ማርስ።

28 “ሽን ሄ አይለይ ከይ ብድ ባ ላገ ኦሳንቾታፐ እሶይ ባፐ ዳሮ ጉꬃ ሚሸ ታልእዳይሳ፥ ‘ነ ቦላ ደእያ ታ ሚሽያ ታዉ ጭጋ’ ግድ ቆ ኦይክስ።

29 “ሄ እያ ላገ አይሌይ እያ ስንꬃን ጉልባትድ፥ ‘ሀያና ጉꬃ ዎደ ታካርክ ታኒ ታ አጩዋ ኡባ ጭጋና’ ያግድ ዎስስ።

30 “ሽን እፅድ ኤክ ኤፍድ ባ ላገይ አጩዋ ቃንፃና ጋካናዉ ቃሾ ኬꬅ ገልስስ። 31 ሄሳ ግሾ፥ ሀራ ላገ ኦሳንቾት ሄሳ በእዳ ዎደ ዳሮ ይሎትድ፥ ብድ ባንታ ጎዳስ እ ኦꬅዳባ ኡባ ኦድዶሶና።

32 “ያትን ካዎይ ሄ አይልያ ፄግስድ፥ ‘ሀ ኢታ አይልያዉ፥ ኔኒ ታና ዎስዳ ግሾ፥ ታ ነ አጩዋ ኡባ ነዉ ማራስ። 33 ያትን፥ ታኒ ነ አጩዋ ማርዳይሳዳ ኔኒ ነ ላገ አይልያ አጩዋ ማራናዉ ነዉ በሰኔ?’ ያግስ። 34 ሄሳ ግሾ፥ ካዎይ ዳሮ ይሎትድ፥ እ ባ አጩዋ ኡባ ጭጋና ጋካናዉ ፓፃ ካኤታና መላ ቃሾ ኬꬃን የግስ።

35 “ሄሳዳካ፥ ህንተ እሶይ እሶይ ህንተ እሻ ዎዛናፐ ማሮና እፅኮ ሳሎን ደእያ ታ አዋይ ህንተና ሄሳዳ ኦꬃና” ያግስ።