19
ኤኮ ገሎባ
(ማር 10:1-12)
1 የሱሲ ሄሳ ኦድ ኦንግዳፐ ጉየ፥ ጋልላፐ ደንድድ ዮርዳኖሰ ሻፋፐ ሄፍንꬃን ደእያ ይሁዳ ቢታ ብስ። 2 ዳሮ አሳይ እያ ካልድ ብን ኤንታ ግዶፈ ሀርጋንቾታ ፓꬅስ።
3 ፋርሳወት እያ ፓጫናዉ ኮይድ እያኮ ይድ፥ “እስ አስ አይ ጋሶንካ ባ ማችዉ የዳናዉ በሲ?” ያግድ ኦይችዶሶና።
4 የሱሲ ዛሪድ፥ “ፆሳይ ኮይሮ አደነ ማጫስ ኦꬅ መꬍዳይሳ ህንተ ናባብበከቲ?መ 1:27፤ 5:1. 5 ‘ሄሳ ግሾ፥ እስ አስ ባ አዋነ ባ አይዉ አግድ ባ ማቸራ እስኖ ግዴስ፥ ናምአይካ እስ አሾ ግዶሶና።’መ 2:24. 6 ሄሳ ግሾ፥ ኤንቲ እስ አስ ግዶሶናፐ አትሽን፥ ናምኡ አስ ግዶኮና። ህዛ፥ ፆሲ ቃችዳይሳ አስ ሻኮፎ” ያግስ።
7 ፋርሳወት፥ “ያትን፥ ሙሰይ እስ አስ አንጆ ዎርቃተ እምድ የዳና መላ አይስ ኪትዴ?” ያግድ ኦይችዶሶና። መ 24:1.
8 የሱሲ ዛሪድ፥ “ህንተ፥ ህንተ ማቸታ የዳና መላ ሙሰይ ህንተና ኪትዳይ፥ ህንተ ዎዛና ምኖተꬃ ግሾፐ አትሽን፥ ኮይሮፐ ሄሳ መላ ግደና። 9 ታ ህንተዉ ኦዳይስ፤ ባ ማችያ ላይማቶና ደእሽን የድድ ሀራ ኤክያ ኦንካ ላሜስ” ያግስ። ማቶ 5:32፤ 2 ቆሮ 7:10.
10 እያ ታማረት እያኮ፥ “አዝናባይነ ማችባይ ሄሳ መላ ግድኮ ኤኮ ገሎይ አትኮ ሎኦ” ያግዶሶና።
11 የሱሲ ዛሪድ፥ “ሄሳ መላ ትምርተይ ፆሳይ ዳንዳአ እምዳይሳታሳፈ አትሽን፥ አሳ ኡባሳ ግደና። 12 ህዛ፥ የለትሸ ሹፋ ግድድ የለትዳይሳት ደኦሶና፥ ቃስ አስ ቃራትዳይሳት ደኦሶና፥ ቃስ ሳሎ ካዎተꬃ ግሾ ግድ ባንታና ሹፋይዳይሳት ደኦሶና። ሄሳ ግሾ፥ ሀይሳ ኤካናዉ ዳንዳእያ ኦንካ ኤኮ” ያግስ።
የሱሲ ዮጋ ናይታ አንጅስ
(ማር 10:13-16፤ ሉቃ 18:15-17)
13 የሱሲ ባ ኩሽያ ጉꬃ ናይታ ቦላ ዎꬅድ ኤንታዉ ዎሳና መላ እስ እስ አሳይ ናይታ እያኮ ኤህዶሶና። ሽን እያ ታማረት አሳ ሀንቀትዶሶና። 14 ሽን የሱሲ፥ “ፆሳ ካዎተꬃይ ሀይሳታ መላሳ ግድያ ግሾ፥ ጉꬃ ናይት ታኮ የይሳ ድጎፍተ፤ ዮ ጊተ” ያግስ።
15 ባ ኩሽያ ኤንታ ቦላ ዎꬅዳፐ ጉየ ሄ በሳፈ አግድ ብስ።
ዱረ ናአተꬃ ኡራ
(ማር 10:17-31፤ ሉቃ 18:18-30)
16 እስ ጋላስ እስ ኡራይ የሱሳኮ ይድ፥ “አስታማርያዉ፥ ታኒ መርና ደኦ ደማናዉ አይ ሎኦባ ኦꬆ?” ያግስ። 17 የሱሲ እያኮ፥ “ሎኦባ ነ ታና አይስ ኦይቻይ? እስ ፆሳፈ አትሽን፥ ሀር ሎኦይ ባዋ። ሽን ኔኒ መርና ደኡዋ ኤካናዉ ኮይኮ ኪታታ ናጋ” ያግስ።
18 ኡራይ ዛሪድ፥ “አዉሳ ኪታታ” ያግድ ኦይችስ።
የሱሲ ዛሪድ፥ “ዎꬎፓ፥ ላይማቶፓ፥ ካይሶቶፓ፥ ዎርዶ ማርካቶፋ፥ ከሳ 20:13-16፤ ዛረ 5:17-20. 19 ነ አዋነ ነ አይዉ ቦንቻ፥ ነ ሾሩዋ ነ ሁጰዳ ዶሳ” ያግስ። ከሳ 20:12፤ ዛረ 5:16፤ ሌወ 19:18.
20 ሄ ናአተꬃይ፥ “ታኒ ሀይሳታ ኡባ ናአተꬃፈ ዶማዳ ናጋስ። ያትን፥ ሀር ታዉ ፓጭያባይ አይቤ?” ያግድ ኦይችስ።
21 የሱሲ ዛሪድ፥ “ኔኒ ፖሎ ግዳናዉ ኮይኮ ባዳ ነዉ ደእያባ ባይዛዳ ማንቆታስ እማ፤ ኔኒ ሳሎን ዱረታና። ያታ ስማ ያዳ ታና ካላ” ያግስ።
22 ሽን ሄ ናአተꬃ ኡራይ ዳሮ ዱረ ግድያ ግሾ፥ ሄሳ ስእዳ ዎደ አዛንሸ አግድ ብስ። 23 ሄሳፈ ጉየ፥ የሱሲ ባ ታማረታ፥ “ታኒ ህንተዉ ቱማ ኦዳይስ፤ ዱረይ ሳሎ ካዎተꬅ ገላናይስ ዳሮ መቶ። 24 ዱረ አስ ፆሳ ካዎተꬃ ገላናይሳፈ ግማለይ ናርፐ ሉሆራ አይስ ካዉዬስ” ያግስ።
25 የሱሳ ታማረት ሄሳ ስእድ ማላለትድ፥ “ያትን፥ ኦን አታናዉ ዳንዳኢ?” ያግድ ኦይችዶሶና።
26 የሱሲ ኤንታ ጫድ ፄልድ፥ “ሀይስ አሳስ ዳንዳኤተና፥ ሽን ፆሳስ ኡባይ ዳንዳኤቴስ” ያግስ።
27 ጰፅሮስ ዛሪድ፥ “ኑኒ ኡባባ አግድ ነና ካልዳ። ያትን፥ ኑኒ አይ ደማኔ?” ያግስ። 28 የሱሲ ኤንታኮ ሀይሳዳ ያግስ፦ “ታኒ ህንተዉ ቱማ ኦዳይስ፤ አሳ ናአይ ያና አላምያን ባ ቦንቾ አራታን ኡትያ ዎደ ህንተ ታማነ ናምአት፥ ታና ካልዳይሳት፥ ታማነ ናምኡ አራታን ኡትድ ታማነ ናምኡ እስራኤለ ዘረꬃታ ቦላ ፕርዳና። ማቶ 25:31፤ ሉቃ 22:30. 29 ታ ሱንꬃ ግሾ ኬ ዎይኮ እሻታ ዎይኮ ምቸታ ዎይኮ አዋ ዎይኮ አይዉ ዎይኮ ናይታ ዎይኮ ጋዴ አግዳይ ኦንካ ፄቱ ኩሸ ኤካና። ቃስ መርና ደኡዋካ ኤካና። 30 ሽን ዳሮት ሀእ ደꬃን ስን ግድዳይሳት ጉየ ግዳና፥ ቃስ ጉየ ግድዳይሳት ስን ግዳና” ያግስ። ማቶ 20:16፤ ሉቃ 13:30.