1 “ፆሳ ካዎተꬃይ ባ ዎይነ ጋደን ኡነ ኦꬅያ አስ ኦስሳናዉ ዎንታ ጉራ ከይዳ ኡራ ዳኔስ። 2 እ ሄ ኡነ ኦꬅያ አሳ ሀች ሀች እስ ድናረ *እስ ድናረ፦ እስ አስ እስ ጋላስ ኦꬅ ፔእድ ኤክያ ሚሸ። ቃንፃናዉ ኤንታራ ጊግድ፥ ኤንታ ባ ዎይነ ጋድያ ግዶ የድስ።

3 “ቃስ ዎንታፈ ሄꬑ ሳተ ግድሽን ከይድ ኦሶ ꬋይድ ግያ ቦላ ኤቅዳ ሀራ አሳታ ደምስ። 4 እ ኤንታኮ፥ ‘ህንተካ ታ ዎይነ ጋዴ ግዶ ብድ ኦꬅተ፥ ታኒ ህንተዉ በሲያ ጋትያ ቃንፃና’ ያግስ። 5 ኤንትካ ብዶሶና። ቃስካ እ ኡሱፑን ሳተንነ ኡዱፉን ሳተን ከይድ ሄሳዳ ኦꬅስ። 6 ታማነ እስ ሳተ ግድሽን እ ከይያ ዎደ ሀራት ያን ኤቅዳይሳታ ደምድ፥ ‘ህንተ ኦሶ ኦꬆና ጋላስ ኩመꬅ ሀይሳን አይስ ኤቅድ ፔእደቲ?’ ያግስ።

7 “ኤንቲ ዛሪድ፥ ‘ኑና ኡነ ኦስስያ አስ ꬋይዳ ግሾሳ’ ያግዶሶና።

“እካ፥ ‘ህንተካ ታ ዎይነ ጋድያ ግዶ ብድ ኦꬅተ’ ያግስ።

8 “ሳእ ኦማርስን፥ ዎይነ ጋድያ ጎዳይ ኦሳንቾታ ሀላቃኮ፥ ‘ኦሳንቾታ ፄጋዳ ዉርሰꬃን ኦሶ ገልዳይሳታፐ ዶማዳ ኮይሮ ገልዳይሳታ ጋካናዉ ኤንታ ጋትያ ቃንፃ’ ያግስ። ሌወ 19:13፤ ዛረ 24:15. 9 ታማነ እስ ሳተን ኦሶ ኦይክዳይሳት ይድ፥ ሁጰን ሁጰን እስ እስ ድናረ ኤክዶሶና። 10 ኮይሮ ኦሶ ኦይክዳይሳት ይድ፥ ባንታዉ ዳሮ እመታና ግድ ቆፕዶሶና። ሽን ኤንትካ ሁጰን ሁጰን እስ እስ ድናረ ኤክዶሶና። 11 ባንታ ሚሽያ ኤክ ስሚድ ጎዳ ቦላ ዙዙምዶሶና። 12 ‘ሀይሳቲ ጉየፐ ይድ እስ ሳተ ፃላላ ኦꬅዶሶና። ሽን ጋላስ ኩመꬅ አዋ ሱላን ዳቡርድ ፔእዳ ኑራ ኤንቲ ዋንድ እስኖ ግዶና’ ያግዶሶና።

13 “ዎይንያ ጎዳይ ኦሳንቾታፐ እሱዋኮ፥ ‘ታ እሻዉ፥ ታኒ ነና ቆሀብከ፤ ነ ታራ ጊግዳይ እስ ድናረሳ ግደኔ? 14 ነ ሚሽያ ኤካዳ ነ ሶ ባ። ታ ኦማርስ ይዳይሳስካ ነይሳ መላ እማናዉ ኮያይስ። 15 ታኒ ታ ሚሽያን ኮይዳባ ኦꬃናዉ ታዉ ማት ባዌ? ዎይኮ ታኒ ኬሀ ግድዳ ግሾ ኔኒ ቃናታይ?’ ያግስ።

16 “ሄሳዳ ሀእ ደꬃን ጉየ ግድዳይሳት ስንꬃታና፥ ስንꬃትዳይሳት ቃስ ጉየታና” ያግስ። ማቶ 19:30፤ ማር 10:31፤ ሉቃ 13:30.

17 የሱሲ የሩሳላመ ብሸ፥ ታማነ ናምኡ ታማረታ ዱማ ጋፃ ከስድ ኤንታኮ ያግስ፦ 18 “ሄኮ፥ ኑኒ ሀእ የሩሳላመ ቡሳ ቦላ ደኦስ። ያን አሳ ናአይ ካህነ ሀላቃታስነ ህገ አስታማረታስ አꬍድ እመታና። ኤንቲ እያ ቦላ ሀይቆ ፕርዳ ፕርዳና። 19 እያ አይሁደ ግዶና ደርያስ አꬅድ እማና። ኤንቲ እያ ካዉሻና፥ ጋራፋና፥ ያትድ እያ ማስቃልያ ቦላ ካቃና። ሽን እ ሄꬓንꬆ ጋላስ ሀይቆፐ ደንዳና” ያግስ።

20 ሄ ዎደ ዛብድዮሳ ማችያ ባ ናምኡ አደ ናይታራ የሱሳኮ ያዳ፥ እያ ስንꬃን ጉልባታዳ እስባ እያ ዎሳሱ።

21 የሱሲ ኢኮ፥ “ነ አይ ኮያይ?” ያግስ።

እያ ዛራዳ፥ “ነ ካዎተꬃን ሀ ታ ናምኡ ናይት እሶይ ነ ኡሻቻን እሶይ ነ ሀድርሳን ኡቶ ጋርክ!” ያጋሱ።

22 ሽን የሱሲ ናይታኮ ዛሪድ፥ “ህንተ አይ ዎስያኮ ኤረከታ፤ ታኒ ኡያናዉ ደእያ ዋየ ፁኣ ኡያናዉ ዳንዳኤቲ?” ያግስ።

ኤንትካ፥ “ኤ ዳንዳኦስ” ያግዶሶና።

23 የሱሲ፥ “ቱማካ ታኒ ኡያናዉ ደእያ ፁአፐ ህንተ ኡያና። ሽን ታ ኡሻቻንነ ሀድርሳን ኡታናይሳታ ዶረይ ታና ግድከ። ሄ በሳይ እመተይ፥ ታ አዋይ እማናዉ ጊግስዳ አሳታሳ” ያግስ።

24 አትዳ ታሙ እያ ታማረት ሄሳ ስእዳ ዎደ ናምኡ እሻታ ቦላ ሀንቀትዶሶና። 25 ሽን የሱሲ ኤንታ ኡባ ፄግድ ሀይሳዳ ያግስ። “አይሁደ ግዶና አሳ ሃረይሳት ባንታ አሳ ቦላ ጎዳተይሳነ ኤንታ ካለይሳት ዎልቃን ሃረይሳ ህንተ ኤሬታ። 26 ሽን ህንተ ግዶን ሄሳዳ ግዶፖ። ህንተፈ ግታታናዉ ኮይያ ኦንካ ህንተዉ አይለ ግዶ። ማቶ 23:11፤ ማር 9:35፤ ሉቃ 22:26. 27 ህንተ ግዶን ኡባፈ ቦላ ግዳናዉ ኮይያ ኦንካ ህንተዉ አይለ ግዳናዉ በሴስ። 28 ሄሳዳካ፥ አሳ ናአይ አሰ ሀጋዛናዉነ ዳሮ አሳ ዎዛናዉ ባ ሸምፑዋ እማናዉ ይስፐ አትሽን፥ አሳን ሀጋዘታናዉ ይቤና” ያግስ።

29 ሄሳፈ ጉየ፥ የሱሲ ባ ታማረታራ እያርኮፈ ከይድ ብሽን፥ ዳሮ አሳይ ኤንታና ካልዶሶና። 30 ኦገ ጋፃን ኡትዳ ናምኡ ቆቀት የሱሲ ያራ አይሳ ስእድ፥ “ጎዳዉ፥ ዳዊታ ናአዉ፥ ኑስ ቃታርክ” ያግድ ዋስዶሶና። 31 ዳሮ አሳይ ኤንታና፥ “ሀይዝተ” ያግድ ካጭዶሶና። ሽን ኤንቲ፥ “ጎዳዉ፥ ዳዊታ ናአዉ፥ ኑስ ቃታርክ” ግድ ጉጅ ዋስዶሶና።

32 የሱሲ ኤቅድ፥ ኤንታ ፄግድ፥ “ታ ህንተዉ አይ ኦꬃና መላ ኮዬቲ?” ያግድ ኦይችስ።

33 ኤንትካ፥ “ጎዳዉ፥ ኑ አይፈይ ፄላና መላ ኮዮስ” ያግዶሶና። 34 የሱሲ ኤንታዉ ቃትድ፥ ኤንታ አይፍያ ቦችስ። ኤለስድ ኤንታ አይፈይ ፄልስ፤ ኤንቲ እያ ካልድ ብዶሶና።