ማርቆስ ፃፍዳ
የሱስ ክርስቶሳ ዎንገላ
ጋꬃ ቆፋ
ማርቆሳ ዎንገላይ ኮይሮ ዶምሸ፥ “ሀይስ ፆሳ ናኣ የሱስ ክርስቶሳ ዎንገላ ዶመꬅ” ያጌስ። ሀ ዎንገላን የሱሲ ኦሶ አስነ ማታ አዋ ግድድ በንቴስ። እያ ማታይ፥ እያ ትምርትያን፥ ቱና አያና ቦላ ደእያ ዎልቃንነ አሰ ናጋራፐ ማሮን ቆንጭድ ኤረትስ። የሱሲ፥ “ታኒ፥ አሰ ናጋራ አይለተꬃፈ ከሳናዉ ታ ሸምፑዋ አꬃዳ እማናዉ ይዳ አሳ ናኣ” ያግድ ባ ዶናን ኦድስ።
ማርቆስ የሱሳ ታርክያ ሱረነ ዎልቃራ ደእያ ኦገን ኦድስ። ማርቆስ የሱሳ ቃላነ ትምርትያ ግዶናሽን፥ እ ኦꬅዳ ማላልስያ ኦሶታ ባይራይድ ኦዴስ። ማርቆስ ፃማቅያ ዮሃንሳ ታርክያ፥ የሱሳ ፅንቃትያ፥ እያ ፓጨተꬃ፥ እያ ትምርትያነ እ አሰ ፓꬅዳ ኦገታ ዳልግስድ ኦዴስ። አቅ አቅ ብሽን የሱሳ ታማረት፥ የሱሳ ጉጅድ ኤር ኤር ብዶሶና፥ ሽን የሱሳ እፀይሳት አꬅድ እፅሸ ብዶሶና። ማፃፋ ዉርሰꬃ ሸምፖት ዉርሰꬃ ሳምንታን፥ የሱሳ ደኦን ፖለትዳ ኦሶታ፥ ሄሳትካ እያ ካቀተꬃነ እያ ደንዱዋ ኦዶሶና።
ማፃፋ አይፈ ቆፋታ
ዎንገላ ዶመꬅ (1:1-13)
የሱሲ ባ ኦሱዋ ጋልላን ዶምስ (1:14—9:50)
የሱሲ የሩሳላመን ኦꬅዳ ኦሱዋ (10:1-52)
የሩሳላመ ሄራን አꬅዳ ዉርሰꬃ ሳምንታ (11:1—15:47)
የሱሲ ሀይቆፐ ደንዱዋ (16:1-8)
ሀይቆፐ ደንድድ አሳስ በንቶነ ሳሎ ቡሱ (16:9-20)
1
ፃማቅያ ዮሃንስ ኦገ ፕተꬃ
(ማቶ 3:1-12፤ ሉቃ 3:1-18፤ ዮሀ 1:19-28)
1 ሀይስ ፆሳ ናአ የሱስ ክርስቶሳ ዎንገላ ዶመꬅ። 2 ናብያ እሳያስ ፃፍዳ ማፃፋን ፆሳይ፥
“ሄኮ፥ ታኒ ታ ኪታንቹዋ
ታኒ ኔፐ ስን የዳና።
እ ነ ኦግያ ጊግሳና። ምልክ 3:1.
3 እሶይ መላ ቢታን ባ ቃላ ꬎቁ ኦꬅድ፥
‘ጎዳ ኦግያ ጊግስተ፤
እ ሄመታና ሆሮጋ
እያዉ ሱርስተ ግስ’ ”
ያጌስ።እሳ 40:3.
4 ፃማቅያ ዮሃንስ አሳ ፃማቅሸ፥ “ህንተ ናጋራፐ ስሚድ ፃማቀትተ፤ ፆሳይ ህንተ ናጋራ አቶ ጋና” ያግድ ቃላ ኦድሸ መላ ቢታፈ ይስ። 5 ይሁዳ ቢታን ደእያ አሳ ኡባይነ የሩሳላመ ካታማ አሳ ኡባይ ዮሃንሳኮ ዮሶና። ባንታ ናጋራ ፓፅን፥ ዮሃንስ ኤንታ ዮርዳኖሰ ሻፋን ፃማቄስ።
6 ዮሃንስ ግማለ እክሰፐ ዳደትዳ አፍላ ማኤስ። ባ ፄሳን ዳፎ ዳንጬስ፤ ቃስ ቦለነ ደገራ ኤስ ሜስ። 2 ካዎ 1:8. 7 ዮሃንስ ቃላ ኦድሸ፥ “ታፐ ጉየራ ዳሮ ምነይስ ዬስ። ሀር አቶሽን፥ ታኒ እያ ጫማ ዎዶሩዋ ሆካዳ ብላናዉ በስከ። 8 ታኒ ህንተና ሃꬃን ፃማቃይስ፥ ሽን እ ህንተና ጌሻ አያናን ፃማቃና” ያግስ።
የሱሳ ፃማቀተꬅነ ፓጨተꬅ
(ማቶ 3:13-17፤ 4:1-11፤ ሉቃ 3:21-22፤ 4:1-13)
9 የሱሲ ሄ ዎደ ጋልላ ቢታን ደእያ ናዝረተ ካታማፐ ይን፥ ዮሃንስ ዮርዳኖሰ ሻፋን እያ ፃማቅስ። 10 የሱሲ ሃꬃፈ ከይያ ዎደ ሳሎይ ዶየትን፥ ጌሻ አያናይ ባ ቦላ ሆለዳ ዎꬍሽን በእስ። 11 ቃስ ሳሎፐ፥ “ታኒ ዶስያ ታ ናአይ ነና፤ ታ ነናን ኡፋይታይስ” ግያ ቃላይ ይስ። መ 22:2፤ ማዝ 2:7፤ እሳ 42:1፤ ማቶ 3:17፤ 12:18፤ ማር 9:7፤ ሉቃ 3:22.
12 ኢራ ጌሻ አያናይ የሱሳ መላ ቢታ ኤፍስ። 13 የሱሲ መላ ቢታን ፃላሄን ፓጨትሸ ኦይታሙ ጋላስ ጋምእስ። ዶአታራ ደእስ፥ ሽን ኪታንቾት ይድ እያ ማድዶሶና።
የሱሲ ፄግዳ ኮይሮ ታማረታ
(ማቶ 4:12-22፤ ሉቃ 4:14-15፤ 5:1-11)
14 ዮሃንስ ቃሸትዳፐ ጉየ፥ የሱሲ ፆሳ ካዎተꬃ ዎንገላ ኦድሸ ጋልላ ቢታ ብስ። 15 ያን፥ “ዎደይ ጋክስ፤ ፆሳ ካዎተꬃይ ማታትስ። ህንተ ናጋራፐ ስሚድ፥ ዎንገላን አማንተ” ያግስ። ማቶ 3:2.
16 የሱሲ ጋልላ አባ ማታራ አꬍሸ፥ ሞሎ ኦይክያ፥ ስሞናነ እያ እሻ እንድርያሳ፥ ባንታ ግትያ አባን የገይሳታ በእስ። 17 ኤንታኮ፥ “ታና ካልተ፤ ታኒ ህንተና አሰ ኦይꬁ ታማርሳና” ያግስ። 18 ኤንቲ ኤለስድ ባንታ ግትያ የግ አግድ የሱሳ ካልዶሶና።
19 የሱሲ ጉꬅ ስን ብድ፥ ናምኡ እሻታ ዛብድዮሳ ናይታ፥ ያይቆባነ ዮሃንሳ ዎጎሉዋ ግዶን ባንታ ግትያ ጊግሰይሳታ በእስ። 20 እ ኤንታ በእዳ መላ ፄግስ። ኤንቲ ባንታ አዋ ዛብድዮሳ፥ እያ ኦሳንቾታራ ዎጎሉዋ ግዶን የግ አግድ የሱሳ ካልድ ብዶሶና።
ቱና አያን ኦይክዳ ኡራ
(ሉቃ 4:31-37)
21 ኤንቲ ቅፍርናሆማ ካታማ ገልዶሶና። ሳምባት ገልዳ መላ የሱሲ ኤለስድ አይሁደ ዎሳ ኬꬅ ገልድ ታማርሶ ኦይክስ። 22 ማታራ ደእያ አሳዳ ታማርሰስፐ አትሽን፥ ህገ አስታማረታꬆ ታማርሶና ግሾ፥ አሳይ እያ ትምርትያን ማላለትዶሶና። ማቶ 7:28.
23 ሄ ዎደ ቱና አያናይ ኦይክዳ እስ ኡራይ አይሁደ ዎሳ ኬꬅ ገልድ ባ ቃላ ꬎቁ ኦꬅድ፥ 24 “ናዝረተ የሱሳ፥ ኔኒ ኑፐ አይ ኮያይ? ኑና ꬋይሳናዉ ያዲ? ኔኒ ኦነኮ ታ ኤራይስ፤ ኔኒ ፆሳ ጌሻ ግድኪ?” ያግስ።
25 የሱሲ ሄ ቱና አያና፥ “ሀይዛ፥ ሀ አድያፈ ከያ” ግድ ኪትስ።
26 ቱና አያናይ ኡራ ዳፈረꬅድ፥ ዋስድ እያፐ ከይስ። 27 አሳ ኡባይ ማላለትድ፥ “ሀይስ አይቤ? ሀ ኡራይ ባ ማታን ሀር አቶሽን ቱና አያናታካ ኪቴስ። ኤንቲ እያዉ ኪተቶሶና፤ ሀይስ አይብ ኦራꬃ ትምርቴ?” ግድ፥ ባንታ ግዶን እሶይ እሱዋ ኦይችዶሶና።
28 የሱሳ ሱንꬃይ ኤለስድ ጋልላ ቢታን ደእያ ሄራ ኡባን ከይስ።
ዳሮ ሀርጋንቾት ፓፅዶሶና
(ማቶ 8:14-17፤ ሉቃ 4:38-41)
29 የሱሲ አይሁደ ዎሳ ኬꬃፈ ከይድ፥ ያይቆባራነ ዮሃንሳራ ስሞና ሶነ እንድርያሳ ሶ ብስ። 30 ስሞና ማቸ አይያ ቆፆ ምሻ ሀርጋዳ ዝንእዳሮ የሱሲ ያ ጋክያ ዎደ እያዉ ኦድዶሶና። 31 እ ኢኮ ሺቅድ፥ እ ኩሽያ ኦይክድ፥ እዮ ደንꬅድ ኤስስ። ቆፆይነ ምሻይ አግን እያ ኤንታ ሞካሱ።
32 ሀርግዳ አሳ ኡባነ ቱና አያናት ኦይክዳ አሳ ኡባ ኦማርስ አዋይ ዉልዳፐ ጉየ፥ እያኮ ኤህዶሶና። 33 ካታማን ደእያ አሳ ኡባይ ሄ ኬꬃ ካረ ሺቅዶሶና። 34 የሱሲ ዱማ ዱማ ሀርገን ኦይከትዳ ዳሮ አሳ ፓꬅድ፥ ዳሮ ቱና አያናታ ከስስ። እ ኦነኮ ቱና አያናት ኤርዳ ግሾ፥ ኤንታ ኦድሶና ድግስ።
የሱሲ ጋልላን ታማርሶ ዶመꬃ
(ሉቃ 4:42-44)
35 የሱሲ ዎንታ ጉራ ደንድድ፥ አስ ባይና በሲ ብድ፥ ያን ፆሳ ዎስስ። 36 ስሞንነ እያራ ደኤይሳት እያ ኮይሸ ብዶሶና። 37 ኤንቲ እያ ደምድ፥ “አሳ ኡባይ ነና ኮዬስ” ያግዶሶና።
38 የሱሲ ቃስ ኤንታ፥ “ሄ ሄራን ደእያ ሀራ ካታማታ የꬍተ። ታኒ ይዳይ ዎንገላ ኦዳናዉ ግድያ ግሾ ያንካ ቃላ ኦዳናዉ በሴስ” ያግስ። 39 አይሁደ ዎሳ ኬꬃታን ቃላ ኦድሸነ ቱና አያናታ ከስሸ፥ ጋልላ ቢታ ኡባን ዩይስ። ማቶ 4:23፤ 9:35.
ባሮ ሀርጋንቹዋ
(ማቶ 8:1-4፤ ሉቃ 5:12-17)
40 ባሮይ ኦይክዳ እስ ኡራይ የሱሳኮ ይድ፥ እያ ስንꬃን ጉልባትድ፥ “ኔኒ ኮይኮ ታና ጌሻናዉ ዳንዳኣሳ” ያግድ ዎስስ።
41 የሱሲ እያዉ ቃትድ፥ ባ ኩሽያ የድድ እያ ቦችድ፥ “ታኒ ኮያይስ፥ ጌይያ” ያግስ። 42 ኤለስድ ባሮይ ኡራ የድን ኡራይ ፓፅስ። 43 የሱሲ ኡራ ምንꬅ ናግስድ ከስ የድስ። 44 የሱሲ እያ፥ “ነና ኤራ፥ ሀይሳ ኦደስካ ኦዶፓ። ሽን ባዳ ነ አሳተꬃ ካህነ በሳ። ኔኒ ሀእ ጌሽ ግድዳይሳ አሳ ኤርሳናዉ፥ ሙሰይ ኪትዳ ያርሹዋ ያርሻ” ያግስ። ሌወ 14:1.
45 ሽን ኡራይ ብድ፥ ጉታ ኡባን አሳ ኡባስ ኦድስ። ሄሳ ግሾ፥ የሱሲ ቆንጨ ከይድ፥ ካታማ ገላናዉ ዳንዳእቤና። ሽን አስ ባይና በሳን ጋፃን ደእስ፤ ቃስ አሳይ ኡባ በሳፈ እያኮ ዮሶና።