28
የሱሲ ሀይቆፐ ደንዱዋ
(ማር 16:1-10፤ ሉቃ 24:1-12፤ ዮሀ 20:1-10)
1 ሳምባት አꬍን፥ ዎጋ ዎደ ዎንታ ጉራ፥ ማግደላ ማይራማነ ሀንኮ ማይራማ የሱሲ ሞገትዳ ጎንጎሉዋ በአናዉ ብዶሶና። 2 ቆፖና ዎልቃማ ቢታ ቃፆይ ሀንስ። ጎዳ ኪታንቾይ ሳሎፐ ዎꬍድ ዱፉዋ ዶናን ደእያ ሹቻ ጎንዶርስድ እያ ቦላ ኡትስ። 3 እያ ማላይ ዎልአንꬅ ዳኔስ። እያ ማኦይካ ሻቻዳ ቦꬅ። 4 ናገይሳት ኪታንቹዋ በእድ፥ ያሻን ኮኮርድ፥ ሀይቅዳ አሳዳ ሀንዶሶና።
5 ኪታንቾይ ማጫሳታኮ፥ “ህንተ ማስቃልያ ቦላ ካቀትዳ የሱሳ ኮየይሳ ታኒ ኤርያ ግሾ፥ ያዮፍተ። 6 እ ካሰ ኦድዳይሳ መላ ሀይቆፐ ደንድስ፤ ሀይሳን ዴና። ሃ ይድ እያ ዝንእስዳ በሳ በእተ። 7 ህንተ ሀእ ኤለስ ብድ፥ እያ ታማረታስ፥ ‘የሱሲ ሀይቆፐ ደንድስ። ቃስ እ ህንተፈ ስንꬃትድ ጋልላ ባና፤ ህንተ እያ ያን በአና’ ያግድ ኦድተ። ታኒ ህንተዉ ሀይሳ ኦዳናዉ ያስ” ያግስ።
8 ኤንቲ ያይሸነ ዳሮ ኡፋይትሸ፥ ዱፉዋ ማታፐ ኤለስድ ብድ፥ እያ ታማረታስ ኦዳናዉ ዎፅዶሶና።
9 ቆፖና የሱሲ ኤንታራ ጋሄትድ ኤንታኮ፥ “ሳሮይ ህንተዉ ግዶ” ያግስ። ኤንቲ እያኮ ሺቅድ፥ እያ ቶሁዋ ኦይክድ እያዉ ጎይንዶሶና። 10 ሄ ዎደ የሱሲ ኤንታኮ፥ “ያዮፍተ፤ ብድ ታ ታማረት ጋልላ ባና መላ ኤንታዉ ኦድተ። ኤንቲ ያን ታና በአና” ያግስ።
11 ሄ ማጫሳት ብሽን፥ ዱፉዋ ናግያ ዎታዳረታፐ ባጋት ካታማ ብድ፥ ሀንዳባ ኡባ ካህነ ሀላቃታስ ኦድዶሶና። 12 ካህነ ሀላቃትነ ጭማት ሺቅድ ዞረትድ፥ ዎታዳረታስ ዳሮ ሚሸ እምድ፥ 13 “ ‘ኑኒ ꬍስክዳሽን እያ ታማረት ቃማ ይድ፥ እያ አሀ ካይስዶሶና’ ያግተ። 14 ሀ ኦዳ ደርያ ሃረይስ ስእኮ፥ ሄስ ህንተ ባላ ግዶናይሳ ኑኒ እያ ኦድ አማንꬃና። ህንተና አይብካ ህርግሶፖ” ያግዶሶና።
15 ዎታዳረት ሚሽያ ኤክድ፥ ኪተትዳይሳዳ ኦꬅዶሶና። ሀ ኦዳይ አይሁደ ማታን ሀች ጋካናዉ ኦደትሸ ደኤስ።
ግታ ኪታ
(ማር 16:14-18፤ ሉቃ 24:36-49፤ ዮሀ 20:19-23፤ ሀዋ 1:6-8)
16 ታማነ እስ እያ ታማረት የሱሲ ባንታና ቢተ ግዳ ጋልላ ዙማ ቦላ ከይዶሶና። ማቶ 26:32፤ ማር 14:28. 17 ያን ኤንቲ እያ በእዳ ዎደ እያዉ ጎይንዶሶና፥ ሽን ኤንታፈ እሶት እሶት ስꬍዶሶና።
18 የሱሲ ኤንታኮ ሺቅድ፥ “ሳሎንነ ሳአን ማት ኡባይ ታዉ እመትስ። 19 ህዛ፥ ህንተ ኡባ በሲ ብድ፥ አዋ፥ ናኣ፥ ጌሻ አያና ሱንꬃን አሰ ኡባ ፃማቅድ ታና ካለይሳታ ኦꬅተ።ሀዋ 1:8. 20 ታኒ ህንተና ኪትዳባ ኡባ ኤንቲ ናጋና መላ ኤንታ ታማርስተ። ታኒ ዎድያ ዉርሰꬃ ጋካናዉ ኡባ ዎደ ህንተራ ደአይስ” ያግስ።