1 ዎንታ ጉራ ካህነ ሀላቃትነ ቢታ ጭማት ኡባይ የሱሳ ዎꬍሳናዉ ማቀትዶሶና። 2 ኤንቲ የሱሳ ቃች ኤፍድ ደርያ ሃርያ ጵላፆሳስ አꬅድ እምዶሶና።

3 ሄ ዎደ የሱሳ ኦይꬅዳ ይሁድ፥ ጵላፆስ የሱሳ ቦላ ፕርድዳይሳ በእድ፥ ቂሮትድ፥ ሄ ሀስታሙ ብራ ሳንትመ ካህነ ሀላቃታስነ ደርያ ጭማታስ ጉየ ዛርስ። ሀዋ 1:18-19. 4 “ታኒ ፅሎ አስ ሀይቆስ አꬃ እማዳ ናጋራ ኦꬃስ” ያግስ።

ሽን ኤንቲ፥ “ሄስ ኑ መቶ ግደና ነ መቶ” ያግዶሶና።

5 ይሁድ ሚሽያ ፆሳ ኬꬃን የግ አግድ ኤንታ ማታፐ ብድ፥ ሱለትድ ሀይቅስ።

6 ካህነ ሀላቃት ሚሽያ ኤክድ፥ “ሀ ሚሸይ ሱꬃ ሚሸ ግድያ ግሾ፥ ኑኒ ፆሳ ኬꬃ ሚሽያራ ጋይስ ዎጋ ግደና” ያግዶሶና። 7 ሄሳፈ ጉየ፥ እስፈ ዞረትድ፥ በተ አስ ሞጋናዉ ማና ቢታ ሻምዶሶና። 8 ሄሳ ግሾ፥ ሄ ጋደይ ሀች ጋካናዉ ሱꬃ ቢታ ጌተትድ ፄገቴስ።

9 ናብያ ኤርምያስ፥ “እስራኤለ አሳይ እያዉ ቃንፃናዉ ጋማትዳ ሀስታሙ ብራ ሳንትመ ኤክዶሶና። ዛካ 11:12-13. 10 ጎዳይ ታና ኪትዳይሳዳ ማና ቢታ ሻማናዉ እምዶሶና” ግዳይስ ሄ ዎደ ፖለትስ።

11 የሱሲ ደርያ ሃርያ ጵላፆሳ ስን ሺቅን፥ ጵላፆስ እያኮ፥ “ኔኒ አይሁደ ካዎ?” ያግድ ኦይችስ።

የሱሲ ዛሪድ፥ “ነ ጋዳሳ” ያግስ።

12 ካህነ ሀላቃትነ ቢታ ጭማት እያ ሞትያ ዎደ ኤንታዉ አይብ ዛሮካ እምቤና።

13 ሄ ዎደ ጵላፆስ የሱሳኮ፥ “ሀይሳቲ ነና ሞትያ ሞቱዋ ኡባ ስእኪ?” ያግስ።

14 የሱሲ ሀር አቶሽን፥ እስ ቃላካ ዛሮና እፅን፥ ደርያ ሃረይስ ዳሮ ማላለትስ።

15 ደርያ ሃረይስ ላይꬃን ላይꬃን ፓስካ ባኣለ ቦንችያ ጋላሳን፥ አሳይ ኮይያ እስ አስ ቃሾፐ ብርሽያ ዎግ ደኤስ። 16 ሄ ዎደ እስ ባርባና የሱሳ ጌተትያ ዳሮ ኤረትዳ ኢታ አስ ቃሾ ኬꬃን ደኤስ። 17 ሄሳ ግሾ፥ ዳሮ አሳይ ሺቅድ ደእሽን ጵላፆስ፥ “ታኒ ህንተዉ ባርባና ብሎየ ዎይኮ የሱሳ ጌተትያ ክርስቶሳ ብሎ?” ያግድ አሳ ኦይችስ። 18 እ ሄሳ ግዳይ ኤንቲ ቃናትድ የሱሳ ኦይꬅዳይሳ ኤርያ ግሾሳ።

19 ጵላፆስ ፕርዳ ኬꬃን ኡትዳሽን፥ እያ ማችያ፥ “ታኒ ሀች ቃማ አሙሆን እያባ ዳሮ ዋየታሸ አቅዳ ግሾ፥ ሄ ፅሎ ኡራ ቦላ አይብባካ ኦꬆፋ” ያጋዳ ኪታሱ።

20 ሄ ዎደ ካህነ ሀላቃት፥ “ባርባን ብለቶ፥ የሱሲ ሀይቆ” ግድ ጵላፆሳ ዎሳና መላ አሳ ጭምዶሶና።

21 ጵላፆስ ዛሪድ፥ “ታኒ ኤንታ ናምኣፈ ህንተዉ ኦና ብላና መላ ኮዬቲ?” ያግድ ኦይችስ።

ኤንቲ፥ “ባርባና ብላና መላ ኮዮስ” ያግዶሶና።

22 ጵላፆስ፥ “ያትን፥ የሱሳ ጌተትያ ክርስቶሳ ዋቶ?” ያግድ ኤንታ ኦይችስ።

ኡባይ ዛሪድ፥ “ማስቃልያ ቦላ እያ ካቃ” ያግዶሶና።

23 ጵላፆስ አሳኮ፥ “አይስ? እ አይ ኢታባ ኦꬅዴ?” ያግድ ኦይችስ።

ሽን አሳይ ካሰይሳፈ አꬅድ፥ “ማስቃልያ ቦላ እያ ካቃ” ግድ ዋስዶሶና።

24 ኦሽ ደንꬆፈ ሀራ አይብባካ ኦꬃናዉ ዳንዳኤቶናይሳ ጵላፆስ በእድ፥ ሃ ኤክድ፥ “ሀ ኡራ ሀይቁዋን ታኒ ደእከ። ሄሳ ኦይ ህንተና” ያግድ አሳ ስንꬃን ባ ኩሽያ ሜጨትስ። ዛረ 21:6.

25 አሳ ኡባይ ዛሪድ፥ “እያ ሱꬃ ጎመይ ኑናነ ኑ ናይታ ጋኮ” ያግዶሶና።

26 ያትን፥ ጵላፆስ ባርባና ኤንታዉ ብልድ፥ የሱሳ ልሶን ጋራፍድ፥ ማስቃልያ ቦላ ካቀትድ ሀይቃና መላ ኤንታዉ አꬅድ እሚስ።

27 ሄሳፈ ጉየ፥ ጵላፆሳ ዎታዳረት የሱሳ ደርያ ሃረይሳ ሶ ኤክ ኤፍን፥ ዎታዳረት ኡባይ እያ ዩሹዋን ኤቅዶሶና። 28 እያ አፍላ ቃር ኤክድ ዞኦ አፍላ *ዞኦ አፍላ፦ በን ዎደ ካዎት ቦላራ ማእያ አፍላ። ማይዝዶሶና። 29 ቃስ አጉንꬃ ካላቻ ጊግስድ፥ እያ ሁጰን ዎꬅዶሶና። እያ ኡሻቻ ኩሽያን ማይረ ፃምአ ኦይꬅድ፥ እያ ስንꬃን ጉልባትድ፥ “አይሁደ ካዋዉ፥ ሙኩሉ ላይꬅ ካዎታ!” ያግድ፥ እያ ቦላ ቀልቅስዶሶና። 30 እያ ቦላ ጩትዶሶና። ሄ ማይረ ፃምኣ ኤክድ፥ እያ ሁጰን ሾጭዶሶና። 31 ኤንቲ እያ ቦላ ቀልቅስዳፐ ጉየ፥ ዞኦ አፍላ እያፐ ቃር ኤክድ፥ እያ አፍላ እያ ማይዝዶሶና። ማስቃልያ ቦላ እያ ካቃናዉ ኤክ ኤፍዶሶና።

32 ኤንቲ ካረ ከይድ፥ እስ ስሞና ጌተትያ ቀሬና ቢታ አስ ደምድ፥ የሱሳ ማስቃልያ ዎልቃን ቶስዶሶና። 33 ጎልጎታ ጌተትያ በሲ ጋክዶሶና። “ጎልጎታ” ጉሳይ “ጉገ በሲ” ጉሱ። 34 ሄሳን ኤንቲ ጪየ ዋላከትዳ ዎይነ ኡሻ ኡዮ ግድ እያዉ እምዶሶና። ሽን እ ሄሳ ጋንፅ ኤክድ፥ ኡዮና እፅስ። ማዝ 69:21.

35 ኤንቲ ማስቃልያ ቦላ እያ ካቅዳይሳፈ ጉየ፥ እያ አፍላ ሻክድ፥ ሳማ የግድ ኤክዶሶና። ማዝ 22:18. 36 ሄሳፈ ጉየ፥ ያን ኡትድ እያ ናግዶሶና። 37 ቃስ፥ “ሀይስ አይሁደ ካዋ የሱሳ” ግያ ሞቶ ፁፍያ እያ ሁጰ ሶን ዎꬅዶሶና። 38 የሱሳራ ሄ ዎደ ናምኡ ፓንጋታ እሱዋ እያፐ ኡሻቻ ባጋን፥ ሀንኩዋ እያፐ ሀድርሳ ባጋራ፥ ማስቃልያ ቦላ ካቅዶሶና።

39 ኦግያራ አꬍያ አሳይ የሱሳ ቦርድ፥ እያ ቦላ ጩትሸ፥ ማዝ 22:7፤ 109:25. 40 “ፆሳ ኬꬃ ላላዳ ሄꬑ ጋላሳ ግዶን ኬፀይሶ፥ ነና አሻ። ኔኒ ፆሳ ናአ ግድኮ፥ አነ ማስቃልያ ቦላፈ ዎꬋ” ያግዶሶና። ማቶ 26:61፤ ዮሀ 2:19.

41 ሄሳዳካ፥ ካህነ ሀላቃት፥ ህገ አስታማረትነ ቢታ ጭማት እስፈ የሱሳ ቦላ ቀልቅስዶሶና። ሀይሳዳ ያግዶሶና፦ 42 “ሀራታ አሽስ፥ ሽን ባና አሻናዉ ዳንዳእቤና። እ እስራኤለ ካዎ ግድኮ፥ አነ ማስቃልያ ቦላፈ ሀእ ዎꬎ፥ ኑካ እያ አማናና። 43 ፆሳን እ አማነቴስ፥ ፆሳይ እያ አሻናዉ ኮይኮ አነ አሾ። አይስ ጊኮ፥ እ ባና፥ ‘ታኒ ፆሳ ናአ’ ጌስ” ያግዶሶና። ማዝ 22:8.

44 ቃስ ሀር አቶሽን፥ እያራ ማስቃልያ ቦላ ካቀትዳ ፓንጋትካ ሄሳዳ ግድ እያ ቦላ ቀልቅስዶሶና።

45 ኡሱፑን ሳተፐ ብድ፥ ኡዱፉን ሳተ ጋካናዉ ቢታ ኡባይ ꬉምስ። 46 ኡዱፉን ሳተ ግድያ ዎደ የሱሲ፥ “ኤሎሄ፥ ኤሎሄ፥ ላማ ሳባቅታኒ?” ግድ ግታ ዋሶ ዋስስ። “ኤሎሄ፥ ኤሎሄ፥ ላማ ሳባቅታኒ?” ገይሳ ብርሸꬃይ “ታ ፆሳዉ፥ ታ ፆሳዉ፥ ታና አይስ አጋዲ?” ጉሱ። ማዝ 22:1.

47 ሄሳን ኤቅዳ አሳፐ እሶት እሶት ሄሳ ስእድ፥ “ሀ ኡራይ ኤልያሳ ፄጌስ” ያግዶሶና። 48 ኢራ ኤንታፈ እሶይ ዎፅ ብድ፥ እስፖንጀ ኤክድ፥ ጫላ ዎይነ ኡሻ ኩንꬅስ። ሄሳ ማይረ ፃምአ ፄራን ዎꬅድ ኡሻናዉ እያ ዶናኮ ሺሽስ። ማዝ 69:21. 49 ሽን ሀንኮት፥ “ናጋ፥ ኤልያስ እያ አሻናዉ ያነኮ አነ በኦስ” ያግዶሶና። 50 የሱሲ ናምአንꬆ ግታ ዋሶ ዋስድ፥ ሀይቅ አግስ።

51 ሄ ሳተን ፆሳ ኬꬃን ካቀትዳ ማጋራጆይ ቆሞፈ ዱገ ጋካናዉ ናምኡ ከይድ፥ ፔት ዎꬍስ። ቢታይ ቃፅስ፥ ዛላይካ ጳልቀትስ። ከሳ 26:31. 52 ዱፎት ዶየትን ፆሳ አሳታፐ ዳሮት ሀይቆፐ ደንድዶሶና። 53 ኤንቲ ዱፎፐ ከይድ፥ የሱሲ ሀይቆፐ ደንድዳፐ ጉየ፥ ጌሻ ካታማ ብዶሶና፤ ያን ኤንቲ ዳሮ አሳስ በንትዶሶና።

54 ማቶ ሀላቃይነ እያራ የሱሳ ናግያ ዎታዳረት ቢታይ ቃፅዳይሳነ ሄሳን ሀንዳባ በእዳ ዎደ ዳሮ ያይድ “ቱማ ሀይስ ፆሳ ናኣ” ያግዶሶና።

55 ሄሳን ዳሮ ማጫሳት፥ ጋልላፐ ዶምድ የሱሳ ሀጋዝሸ ካልዳይሳት ሃሆን ኤቅድ ፄሎሶና። ሉቃ 8:2-3. 56 ኤንታ ግዶን ማግደላ ማይራማ፥ †ማግደላ ማይራሞ፦ ጉሳይ ማግደላ ካታማፐ ይዳ ማይራሞ ጉሱ። ያይቆባነ ዮሰፋ አይያ ማይራማነ ዛብድዮሳ ማችያ ደኦሶና።

57 ሳአይ ኦማርስያ ዎደ ዮሰፋ ጌተትያ እስ ዱረ አደይ፥ አርማተ ካታማፐ ይስ። እ ባ ሁጰንካ የሱሳ ካልያ አስ። 58 ዮሰፍ ጵላፆሳኮ ብድ፥ የሱሳ አሀ ኤካናዉ ዎስስ። ጵላፆስ አሀይ ዮሰፋስ እመታና መላ ኪትስ። 59 የሱሳ አሀ ኤክድ፥ ጌሻ ሞጎ አፍላን ፃፅስ። 60 ባዉ ሞገታናዉ ሹቻፈ ዎጭዳ ኦራꬃ ጎንጎሎን እያ አሀ ዎꬅስ። ቃስ ሄ ጎንጎሉዋ ዶናን ግታ ሹቻ ጎንዶርስ ዎꬅድ፥ አግድ ብስ። 61 ማግደላ ማይራማነ ሀንኮ ማይራማ ሄ ጎንጎሉዋኮ ስሚድ ኡትዶሶና።

62 ዎንተ ሳምባታ ጋላስ፥ ካህነ ሀላቃትነ ፋርሳወት ጵላፆሳኮ ይድ፥ ሀይሳዳ ያግዶሶና፦ 63 “ጎዳዉ፥ ሀ ዎርዳንቾይ ፓፃ ደእሸ፥ ‘ታኒ ሄꬑ ጋላሳፐ ጉየ፥ ሀይቆፐ ደንዳና’ ያግዳይስ ኑስ ሀሳየትስ። ማቶ 16:21፤ 17:23፤ 20:19፤ ማር 8:31፤ 9:31፤ 10:33. 64 ሄሳ ግሾ፥ እ ሞገትዳ ጎንጎሉዋ ሄꬑ ጋላስ ጋካናዉ፥ ምንꬅ ናጋና መላ ኪታርክ። ሄስ ሀኖና እፅኮ፥ እያ ታማረት ብድ እያ አሀ ካይስ ꬋይስድ፥ ‘ሀይቆፐ ደንድስ’ ያግድ አሳስ ኦድኮ ናምአንꬆ ባለሶይ ኮይሮይሳፈ ኡባ ሃ ኢታና” ያግዶሶና።

65 ጵላፆስ ኤንታኮ፥ “ህንተዉ ናገይሳት ደኦሶና፤ ብድ ህንተዉ ዳንዳኤትዳ መላ ናግስተ” ያግስ።

66 ሄሳ ግሾ፥ ኤንቲ ብድ ዱፎይ ቦሸቶና መላ ሹቻ ቦላ ማታመ ዎꬅድ ዎታዳረታን ናግስዶሶና።