ጌሻ ማፃፋ ማቶሳ ዎንገላ 26

የሱሳ ቦላ ማቀትዶሶና

(ማር 14:1-2፤ ሉቃ 22:1-2፤ ዮሀ 11:45-53)

1 የሱሲ ሀ ትምርትያ ኡባ ዉርስዳ ዎደ ባ ታማረታኮ፥ 2 “ናምኡ ጋላሳፐ ጉየ፥ ፓስካ ባኣለ ቦንችያ ጋላስ ግደይሳ ኤሬታ። ሄ ጋላስ አሳ ናእ ማስቃለ ቦላ ካቀታናዉ አሳ ኩሸን አꬍድ እመታና” ያግስ።

3 ሄ ዎደ ካህነ ሀላቃትነ ጭማት፥ ቃያፋ ጌተትያ ካህነ ሀላቃ ኬꬃን ሺቅድ፥ 4 አስ ኤሮና የሱሳ ኦይክድ፥ ዎꬋናዉ ማቀትዶሶና። 5 ሽን ኤንቲ፥ “አሳይ ኦሽ ከሶና መላ ግድ፥ ፓስካ ቦንችያ ጋላስ ሄሳ ኦꬆኮ” ያግዶሶና።

የሱሳ ሽቶ ትይዳ ማጫስዉ

(ማር 14:3-9፤ ዮሀ 12:1-8)

6 የሱሲ ብታነ ካታማን ባሮ ሀርግዳ ስሞና ሶን ደኤስ። 7 የሱሲ እማቱዋ ቦላ ደእሽን እስ ማጫስያ አልባስፅሮሳ ብልቃፀ ኩመꬃ ዳሮ አልኦ ሽቶ ኤካ ያዳ የሱሳ ሁጰን ትጋሱ። 8 ሽን የሱሳ ታማረት ሄሳ በእድ ሀንቀትድ፥ “ሀ ሽቶይ ጮ ኢተይ አይብሴ? 9 ሀ ሽቶይ አልኦ ጋተን ባይዘትድ፥ ሚሸይ ማንቆታስ እመታናዉ ዳንዳኤቴስ” ያግዶሶና።

10 የሱሲ ኤንቲ ገይሳ ኤርድ፥ ኤንታኮ፥ “ሀ ማጫስዉ አይስ ዋይሰቲ? እያ ታዉ ሎኦባ ኦꬃሱ። 11 ማንቆት ኡባ ዎደ ህንተራ ዳና። ሽን ታኒ ህንተራ ኡባ ዎደ ደእከ። 12 እያ ሀ ሽቱዋ ታ ቦላ ትግዳይስ ታና ሞጋናዉ ጊግሳናሳ። 13 ታኒ ህንተዉ ቱማ ኦዳይስ፤ ቢታ ኡባን ሀ ዎንገላይ ሳባከትያ በሳን አዉንካ፥ አሳይ እዮ ሀሳያና መላ እያ ኦꬅዳይስ ኦደታና” ያግስ።

ይሁድ የሱሳ አꬅድ እሙዋ

(ማር 14:10-11፤ ሉቃ 22:3-6)

14 ሄ ዎደ ታማነ ናምኡ የሱሳ ታማረታፐ እሶይ፥ አስቆሮታ ይሁዳ ጌተተይስ ካህነ ሀላቃታኮ፥ 15 ብድ፥ “ታኒ ህንተዉ የሱሳ አꬃ እምኮ፥ ህንተ ታዉ አይ እማኔ?” ያግድ ኤንታ ኦይችስ። ኤንቲ ዞረትድ ሀስታሙ ብራ ሳንትመ *† እምዶሶና። 16 ሄሳፈ ጉየ፥ ይሁድ የሱሳ አꬅድ እማናዉ እንጀትያ ዎደ ዎቼስ።

ጎዳ ካሁዋ

(ማር 14:22-26፤ ሉቃ 22:15-20፤ 2 ቆሮ 11:23-25)

17 ኡይꬃ ባኣለ ቦንችያ ኮይሮ ጋላስ፥ የሱሳ ታማረት እያኮ ይድ፥ “ፓስካ ቦንችያ ጋላስ ኔኒ ማና ካꬅ ኑኒ አዉን ጊግስኖ?” ያግዶሶና።

18 የሱሲ ኤንታኮ፥ “ካታማን ደእያ አድያኮ ብድ፥ ‘አስታማረይ፥ ታዉ ዎደይ ጋክዳ ግሾ፥ ታ ታማረታራ ፓስካ ቦንችያ ጋላሳ ነ ሶን አꬃና ያጌስ’ ያግተ” ያግስ።

19 እያ ታማረት የሱሲ ባንታና ኪትዳይሳዳ ኦꬅድ፥ ፓስካ ባኣለ ጋላስ ማና ካꬃ ጊግስዶሶና።

20 ሳአይ ኦማርስያ ዎደ፥ የሱሲ ታማነ ናምኡ ሀዋረታራ ካꬅ ማናዉ ኡትስ። 21 ኤንቲ ምሽን፥ የሱሲ ኤንታኮ፥ “ታኒ ህንተዉ ቱማ ኦዳይስ፤ ህንተፈ እስ ኡራይ ታና አꬅድ እማና” ያግስ።

22 ኤንቲ ዳሮ ዳጋምድ፥ እሶይ እሶይ፥ “ጎዳዉ፥ ቱማ ታነሻ?” ግድ እያ ኦይችዶሶና።

23 የሱሲ ዛሪድ፥ “ባ ኩሽያ ታራ እስፈ ሻትያን የደይስ እ ታና አꬅድ እማና። 24 አሳ ናአይ፥ ፆሳ ቃላን እያዉ ፃፈትዳይሳዳ ሀይቃና። ሽን አሳ ናኣ አꬅድ እምያ ኡራ አየ! ሄ ኡራይ የለቶና አትዳኮ እያዉ ሎኦሽን” ያግስ።

25 እያ አꬅድ እማናዉ ደእያ ይሁድ ዛሪድ፥ “አስታማርያዉ፥ ኔኒ ገይ ታነዬ?” ያግስ።

የሱሲ ዛሪድ፥ “ኔኒ ነ ሁጰን ጋዳሳ” ያግስ።

26 ኤንቲ ምሽን፥ የሱሲ ኡይꬃ ኤክድ ፆሳ ጋላትስ። ሄ ኡይꬃ መንꬅድ ባ ታማረታስ እምድ፥ “ሄእተ፥ ሚተ፥ ሀይስ ታ አሹዋ” ያግስ።

27 ፁኣ ኤክድ፥ ፆሳ ጋላትስ። ኤንታዉ እምድ፥ “ኡባይ ሀይሳፈ ኡይተ። 28 ሀይስ ዳሮ አሳ ናጋራ አቶተꬃስ መላ ጉክያ ታ ሱꬃ። ሀ ሱꬃይ ፆሳይ ህንተራ ገልያ ጫቁዋ ምንይሳ። 29 ሽን ታኒ ህንተዉ ኦዳይስ፤ ታኒ ታ አዋ ካዎተꬃን ኦራꬃ ዎይነ ኡሻ ህንተራ ኡያና ጋላሳ ጋካናዉ ናምአንꬆ ሀ ዎይነ ኡሻ ኡይከ” ያግስ።

30 ጋላታ ማዝሙረ የፅዳፐ ጉየ፥ ሻማሆ ዙማ ብዶሶና።

ጰፅሮስ የሱሳ ካዳናይስ ኦደትስ

(ማር 14:27-31፤ ሉቃ 22:31-34፤ ዮሀ 13:36-38)

31 ሄ ዎደ የሱሲ ኤንታኮ፥

“ ‘ፆሳይ ሄንꬃንቹዋ ሾጫና

ዶርሳትካ ላለታና’

ጌተትድ ፆሳ ቃላን ፃፈትዳይሳ መላ ሀች ቃማ ህንተ ኡባይ ታና አግድ ባቃታና። 32 ሽን ታኒ ሀይቆፐ ደንድዳፐ ጉየ ህንተፈ ስንꬃታዳ ጋልላ ባና” ያግስ።

33 ጰፅሮስ ዛሪድ፥ “ኤንቲ ኡባይ ነና አግድ ባቃትኮካ፥ ታኒ ነና አግከ” ያግስ።

34 የሱሲ ጰፅሮሳኮ፥ “ታኒ ነዉ ቱማ ኦዳይስ፤ ሀች ቃማ ኩቶይ ዋሳናፐ ስን ኔኒ ታና ሄꬑ ቶሆ ካዳና” ያግስ።

35 ጰፅሮስ ዛሪድ፥ “ታኒ ኔራ እስፈ ሀይቆፐ አትሽን፥ ነና ኡባካ ካድከ” ያግስ።

ሀንኮ እያ ታማረት ኡባይካ ሄሳዳ ግዶሶና።

የሱሲ ጌታሳማነን ዎስስ

(ማር 14:32-42፤ ሉቃ 22:39-46)

36 ያትድ፥ የሱሲ ባ ታማረታራ ጌታሰማነ ጌተትያ በሳ ብድ፥ ኤንታኮ፥ “ታኒ ህን ባዳ ፆሳ ዎሳሻና፥ ህንተ ሀይሳን ኡትተ” ያግስ። 37 ጰፅሮሳነ ዛብድዮሳ ናይታ ናምአታ ባራ ኤክ ብድ ዳሮ አዛኖነ ኡንኤተꬅ ዶምስ። 38 ቃስካ ኤንታኮ፥ “ታኒ ሀይቆስ ጋꬅያ ኡንአ ኡንኤታስ። ሀይሳን ታራ ጋምእተነ ምንድ ናግተ” ያግስ።

39 ጉꬅ ስን ብድ ቢታን ጉፋንድ፥ “ታ አዋዉ፥ ዳንዳኤትያባ ግድኮ ሀ ዋየ ፁኣ ታፐ ድጋ። ሽን ነ ሸነይ ሀኖፐ አትሽን፥ ታ ሸነይ ሀኖፖ” ያግድ ፆሳ ዎስስ።

40 የሱሲ ባ ታማረታኮ ስም ይድ ኤንቲ ꬍስክዳሽን ደምስ። ጰፅሮሳኮ፥ “ህንተ እስ ሳተኮካ ꬍስኮና ታራ ምናናዉ ዳንዳእቤከቲ? 41 ፓጨን ህንተ ገሎና መላ ባርክድ ናግተነ ፆሳ ዎስተ። ህንተዉ ሎኦ አሞይ ደኤስ፥ ሽን ህንተ ዳቡራንቾ አስ” ያግስ።

42 የሱሲ ቃስ ናምአንꬆ ብድ፥ “ታ አዋዉ፥ ታኒ ሀ ዋየ ፁአፐ ኡዮና ደእሸ አꬋናዉ ዳንዳኤቶናባ ግድኮ ነ ሸነይ ሀኖ” ያግድ ፆሳ ዎስስ። 43 ቃስካ ስም ያ ዎደ እያ ታማረታ አይፍያ ꬍስኮይ ጎዝን፥ ዝንእዳሽን ደምስ።

44 ቃስካ ኤንታ አግድ፥ ብድ ካሰ ቃላ ዛር ሄꬓንꬆ ዎስስ። 45 ሄሳፈ ጉየ፥ ባ ታማረታኮ ይድ፥ “ሀእ ጋካናዉ ꬍስከትነ ሸምፐቲ? ሄኮ፥ አሳ ናእ፥ ናጋራንቾታ ኩሸን አꬍድ እመትያ ሳተይ ጋክስ። 46 ደንድድ የꬍተ፥ ታና አꬅድ እመይስ ሀይስሽ ጋክስ” ያግስ።

የሱሲ ኦይከትስ

(ማር 14:43-50፤ ሉቃ 22:47-53፤ ዮሀ 18:3-12)

47 የሱሲ ቡሮ ሄሳ ሃሳይሽን፥ ታማነ ናምኡ ታማረታፐ እሶይ፥ ይሁድ ጋክ ዎꬍስ። ካህነ ሀላቃትነ ደርያ ጭማት ኪትዳ ዳሮ አሳት ማሸነ ፃምአ ኦይክድ እያራ እስፈ ይዶሶና። 48 የሱሳ አꬅድ እምያ ይሁድ ሄ ዳሮ አሳኮ፥ “ታኒ ዬረይስ ህንተ ኮየይስ እያ፥ እያ ኦይክተ” ያግድ ማላ እም ዎꬅስ።

49 ኢራካ የሱሳኮ ሺቅድ፥ “አስታማርያዉ፥ ሳሮ ደአይ” ያግድ እያ ዬርስ።

50 የሱሲ እያኮ፥ “ታ ላግያዉ፥ ኔኒ ኦꬃናባ ኦꬃ አጋ”‡ ያግስ።

ሄሳፈ ጉየ፥ ሺቅድ፥ የሱሳ ኦይክዶሶና። 51 የሱሳራ ደኤይሳታፐ እሶይ ባ ማሻ ሾድድ ካህነ ሀላቃ አይልያ ሾጭድ፥ እያ ሀይꬃ ቃንፅድ የግስ። 52 ሽን የሱሲ፥ “ነ ማሻ ጉየ ሾሁዋን ዛራ። አይስ ጊኮ፥ ማሻ ሾድያ ኡባይ ማሻን ሀይቃና። 53 ታ፥ ታ አዋ ዎስያኮ ዳሮ ሙኩሉን ታይበትያ ኪታንቾታ የዳናዉ ዳንዳኦናባ ነዉ ዳኒ? 54 ያትን፥ ፆሳ ቃላን ሄሳዳ ሀናናዉ በሴስ ጌተትዳይስ ዋንድ ፖለታኔ?” ያግስ።

55 ሄ ሳትያን፥ የሱሲ ሄ ሺቅዳ ዳሮ አሳኮ፥ “ታና ፓንጋ ኦꬅድ ኦይካናዉ ማሻነ ፃምአ ኦይክድ ይደቲ? ታኒ ፆሳ ኬꬃን ጋላስ ጋላስ ታማርሳሸ ህንተራ ደእያ ዎደ ታና ኦይክቤከታ። 56 ሽን ሀይስ ኡባይ ሀንዳይስ ናበት ፆሳ ቃላን ፃፍዳይስ ፖለታና መላሳ” ያግስ።

ሄ ዎደ እያ ታማረት ኡባይ እያ አግድ ባቃትዶሶና።

የሱሲ ፕርዳ ሻንጎ ስንꬃን

(ማር 14:53-65፤ ሉቃ 22:54-55፥ 63-71፤ ዮሀ 18:13-14፥ 19-24)

57 የሱሳ ኦይክዳይሳት ካህነ ሀላቃ ቃያፋኮ እያ ኤፍዶሶና። ያን ህገ አስታማረትነ ቢታ ጭማት ሺቅድ ደኦሶና። 58 ሽን ጰፅሮስ ካህነ ሀላቃ ዛባ ጋካናዉ ሃሆን እያ ካልስ። እያ ዉርሰꬃይ ሻከታና ጋካናዉ ዛባ ገልድ ናገይሳታራ ኡትስ።

59 ካህነ ሀላቃትነ ሺቅዳ አሳ ኡባይ የሱሳ ዎꬋናዉ እያ ቦላ ዎርዶ ማርካ ኮይዶሶና። 60 ዳሮት ይድ እያ ቦላ ዎርዶ ማርካ ማርካትዶሶና፥ ሽን አይኮካ ደምቦኮና። ጉየፐ ናምኡ አሳት ይድ፥ 61 “ሀ ኡራይ፥ ‘ታኒ ፆሳ ኬꬃ ላላዳ ሄꬑ ጋላሳን ዛራ ኬፃናዉ ዳንዳአይስ’ ያግስ” ያግዶሶና።

62 ካህነታ ሀላቃይ ደንድ ኤቅድ የሱሳኮ፥ “ሀይሳቲ ነና ሞትያ ሞቱዋስ ኔኒ ዛርያባይ ባዌ?” ያግስ። 63 ሽን የሱሲ ስእ ግስ። ቃስካ ካህነ ሀላቃይ፥ “ታኒ ነና ደኦ ፆሳ ሱንꬃን ኦይካይስ፤ ኔኒ ፆሳ ናኣ ክርስቶሳ ግድኮ ኑስ ኦዳ” ያግስ።

64 የሱሲ ዛሪድ፥ “ኔኒ ነ ሁጰንካ ጋዳሳ። ሽን ታኒ ህንተዉ ኦዳይስ፤ ህዛፐ ጉየ፥ አሳ ናአይ ዎልቃማ ፆሳ ኡሻቻ ባጋን ኡትዳሽን፥ ቃስ ሳሎ ሻራራ ይሽን ህንተ በአና” ያግስ።

65 ሄ ዎደ ካህነ ሀላቃይ ዳሮ ይሎትድ ባ ማኡዋ ፔꬍድ፥ “ሀይሳ በእተ ፆሳ ጫይስ! ኑና ሀራ ማርካ አይ ኮሺ? እ ሀእ ጫይዳይሳ ህንተ ስእደታ። 66 ህንተ ቆፋይ አይቤ?” ያግስ።

ኤንትካ፥ “እያዉ ሀይቆ በሴስ” ያግድ ዛርዶሶና።

67 ያትን፥ ኤንቲ እያ ሶምኦን ጩትድ ደችዶሶና። ሀራት እያ ባቅድ፥ 68 “ክርስቶሳ! ነና ደችዳይ ኦኔ? አነ ኑስ ኦዳ” ያግዶሶና።

ጰፅሮስ የሱሳ ካድስ

(ማር 14:66-72፤ ሉቃ 22:56-62፤ ዮሀ 18:15-18፥ 25-27)

69 ጰፅሮስ ዛባን ኡትዳሽን፥ እስ አይልያ እያኮ ያዳ፥ “ኔንካ ጋልላ የሱሳራ እስፈ ደኣሳ” ያጋሱ።

70 ሽን እ ኤንታ ኡባ ስንꬃን ሄ አይለኮ፥ “ኔኒ ግያባይ አይበኮ ታኒ ኤርከ” ያግድ ካድስ።

71 ቃስ ብድ ድርሳ ፐንገኮ ጋክሽን ሀራ አይልያ እያ በአዳ፥ ያን ደእያ አሳኮ፥ “ሀ ኡራይ ናዝረተ የሱሳራ ደኤስ” ያጋሱ።

72 ጰፅሮስ ናምአንꬆ ጫቅድ፥ “ታኒ ሄ ኡራ ኤርከ!” ያግስ።

73 ጉꬁ ጋምእሽን፥ ያን ኤቅዳ አሳት ጰፅሮሳኮ ይድ፥ “ነካ ቱማ ኤንታራ እስፈ ደኣሳ፤ ኔኒ ነ ኦዳን ኤረታሳ” ያግዶሶና።

74 ሄሳፈ ጉየ፥ ጰፅሮስ፥ “ታኒ ሄ ኡራ ኤርከ!” ያግድ፥ ባና ባደꬅነ ጫቆ ዶምስ።

ሄ ዎደ ኢራካ ኩቶይ ዋስ አግስ። 75 የሱሲ እያኮ፥ “ኔኒ ኩቶይ ዋሳናፐ ስን ታና ሄꬑ ቶሆ ካዳና” ግዳይሳ ጰፅሮስ አኬክድ፥ ካረ ከይድ ኢታ ዬሆ ዬክስ።

26:2 ከሳ 12:1.

26:7 ሉቃ 7:37.

26:11 ዛረ 15:11.

26:15 ዛካ 11:12.

*26:15 ብራ ሳንትመ፦ አይኮይካ ጉዠትቦና ጌሻ ብራ ሳንትመ ጉሱ።

†26:15 ሀስታሙ ብራ ሳንትመ፦ ሀስታሙ ብራ ሳንትመይ እስራኤለ ቢታን አይለይ ሻመትያነ ባይዘትያ ጋተ።

26:23 ማዝ 41:9.

26:28 ከሳ 24:8፤ ኤርም 31:31.

26:31 ዛካ 13:7.

26:32 ማቶ 28:16.

‡26:50 ታ ላግያዉ፥ ኔኒ ኦꬃናባ ኦꬃ አጋ፦ ዎይኮ ሀራ ብርሸꬃይ ታ ላግያዉ፥ ነ ሀይሳን አይ ኦꬃይ?

26:55 ሉቃ 19:47፤ 21:37.

26:61 ዮሀ 2:19.

26:64 ዳነ 7:13.

26:65 ሌወ 24:15-16.

26:67 እሳ 50:6.