1 “ሄ ዎደ ሳሎ ካዎተꬃይ ባንታ ፆምፐ ኦይክድ፥ ማቾ ኤሀናዉ ብዳ አድያ ሞካናዉ ከይዳ ታሙ ጌላኦታ ዳኔስ። ሉቃ 12:35. 2 ኤንታፈ እቻሻት ኤያ፥ ቃስ እቻሻት ጭንጫ። 3 ኤያት ፆምፐ ኦይክዶሶና፥ ሽን ጉዣ ዛይተ ኦይክቦኮና። 4 ሽን ጭንጫት ባንታ ፆምፐነ ሀራ ጉዣ ዛይተ ኦይክዶሶና። 5 ማችዉ ኤከይስ ጋምእን፥ ሄ ጌላኦት ባንታና ꬍስኮይ ኦይክን ꬍስክዶሶና።

6 “ግድ ብላሄ ግድያ ዎደ፥ ‘ሄኮ፥ ማችዉ ኤሄይስ ጋክስ፥ እያ ሞካናዉ ከይተ’ ግያ ግታ ጫቦይ ስኤትስ።

7 “ሄ ዎደ ሄ ጌላኦት ኡባይ ባርክድ፥ ባንታ ፆምፕያ ጊግስዶሶና። 8 ኤያት ጭንጫታኮ፥ ‘ኑ ፆምፐይ ቶአና ሀንያ ግሾ፥ ህንተ ዛይትያፐ ኑስ እመርከት’ ያግዶሶና።

9 “ሽን ጭንጫት ዛሪድ፥ ‘አካይ፥ ኑስነ ህንተዉ ግድያ ዛይተይ ባዋ። ሄሳ ግሾ፥ ብድ ህንተዉ ሻምድ ኤክተ’ ያግዶሶና። 10 ኤያ ጌላኦት ዛይተ ሻማናዉ ብን፥ ማችዉ ኤከይስ ፑቱ ግስ። ጊገት ኡትዳ እቻሹ ጌላኦት እያራ እስፈ ያጋኖ ኬꬅ ገልዶሶና፤ ካረይካ ጎርደት አግስ።

11 “ጉየፐ ሀንኮ ጌላኦት ይድ፥ ‘ጎዳዉ፥ ጎዳዉ፥ ኑስ ዶያርክ’ ያግዶሶና።

12 “ሽን እ ዛሪድ፥ ‘ታኒ ህንተዉ ቱማ ኦዳይስ፤ ታ ህንተና ኤርከ!’

13 “ህዛ፥ አሳ ናአይ ያና ጋላሳ ዎይኮ ሳትያ ህንተ ኤሮና ግሾ ባርክድ ናግተ።

14 “ፆሳ ካዎተꬃይ ባ ኦሳንቾታ ፄግድ ባዉ ደእያባ ኤንታዉ ሼꬍድ ኦገ ባናዉ ከይዳ ኡራ ዳኔስ። ሉቃ 19:11-27. 15 ኤንታዉ ሁጰን ሁጰን ኤንታ ዎልቃ መላ እሱዋስ እቻሹ ካርፂተ ብራ፥ እሱዋስ ናምኡ ካርፂተ ብራ ቃስ እሱዋስ እስ ካርፂተ ብራ እምድ ባ ኦግያ ብስ። 16 እቻሹ ካርፂተ ብራ ኤክዳ አይለይ ኤለስ ብድ ዛልእድ፥ ሀራ እቻሹ ካርፂተ ብራ ዎꬍስስ። 17 ሄሳዳካ፥ ቃስ ናምኡ ካርፂተ ብራ ኤክዳ አይለይ ሀራ ናምኡ ካርፂተ ብራ ዎꬍስስ። 18 ሽን እስ ካርፂተ ብራ ኤክዳይስ ብድ፥ ኦላ ቦክድ፥ ባ ጎዳ ሚሽያ ሞግስ።

19 “ዳሮ ዎደፐ ጉየ ሄ አይለታ ጎዳይ ይድ፥ ባ ሚሽያ ኤንታራ ሳላእስ። 20 እቻሹ ካርፂተ ብራ ኤክዳ አይለይ ይድ፥ ሀራ እቻሹ ካርፂተ ብራ ኤህድ፥ ‘ታ ጎዳዉ፥ ኔኒ ታዉ እቻሹ ካርፂተ ብራ እማዳሳ። ሽን ታኒ ሀራ እቻሹ ካርፂተ ብራ ዎꬍሳስ’ ያግስ። 21 እያ ጎዳይ፥ ‘ዛምቦይ! ኔኒ ሎኦነ አማንꬅያ አይለ፤ ኔኒ ጉꬃባን አማነታዳሳ። ታኒ ነና ዳሮባ ቦላ ሹማና፤ ሃ ገላዳ ነ ጎዳራ ኡፋይታ’ ያግስ።

22 “ቃስ ናምኡ ካርፂተ ብራ ኤክዳይስ ይድ፥ ‘ታ ጎዳዉ፥ ኔኒ ታዉ ናምኡ ካርፂተ ብራ እማዳሳ። ሽን ታኒ ሀራ ናምኡ ካርፂተ ብራ ዎꬍሳስ’ ያግስ። 23 እያ ጎዳይ፥ ‘ዛምቦይ! ኔኒ ሎኦነ አማንꬅያ አይለ፤ ኔኒ ጉꬃባን አማነታዳሳ። ታኒ ነና ዳሮባ ቦላ ሹማና፤ ሃ ገላዳ ነ ጎዳራ ኡፋይታ’ ያግስ።

24 “ቃስ እስ ካርፂተ ብራ ኤክዳይስ ይድ፥ ‘ታ ጎዳዉ፥ ኔኒ ዘሮና በሳፈ ጫክያነ ꬋርጮና በሳፈ ማፅያ ኢታ አስ ግደይሳ ታኒ ኤራይስ። 25 ሄሳ ግሾ፥ ያያዳ ነ ብራ ቢታን ሞጋስ። ነ ሚሸይ ሀይስሽ’ ያግስ።

26 “እያ ጎዳይ ዛሪድ፥ ‘ሀ ኢታ አዛላ አይልያዉ፥ ታኒ ዘሮና በሳፈ ጫከይሳነ ꬋርጮና በሳፈ ማፅያ አስ ግደይሳ ኤራዳሳ። 27 ያትን፥ ኔኒ ታ ሚሽያ ባንከን ዎꬅዳባ ግድያኮ፥ ታኒ ስምያ ዎደ ታ ሚሽያ ዎራ ኤካናይሳ ድጋዳሳ። 28 ሄሳ ግሾ፥ ሚሽያ እያፐ ኤክድ፥ ታሙ ካርፂተ ብር ደኤይሳስ እምተ። 29 አይስ ጊኮ፥ ደእያ ኡባስ ጉዠታናነ ዳራና። ሽን ባይናይሳፈ ሀር አቶሽን፥ ሄ እያዉ ደእያ ጉꬅያካ ኤከታና። ማቶ 13:12፤ ማር 4:25፤ ሉቃ 8:18. 30 ሀ ማዶና አይልያ ካረ ꬉማ ከስ የግተ። ያን እያዉ ዬሆነ አቸ ጋርጨꬅ ግዳና’ ያግስ። ማቶ 8:12፤ 22:13፤ ሉቃ 13:28.

31 “አሳ ናአይ፥ ኪታንቾ ኡባታራ፥ ባ ቦንቹዋራ ያ ዎደ እ ባ ቦንቾ ካዎተꬃ አራታ ቦላ ኡታና። ማቶ 16:27፤ ማቶ 19:28. 32 ቢታን ደእያ አስ ኡባይ እያ ስን ሺቃና። ሄንꬃንቾይ ዶርሳታ ዴሻታፐ ሻከይሳዳ እ ሄ አሳ ናምአን ሻካና። 33 ቃስ ዶርሳታ ኡሻቻ ባጋራ ዴሻታ ሀድርሳ ባጋራ ኤሳና።

34 “ሄሳፈ ጉየ፥ ካዎይ ኡሻቻ ባጋራ ደኤይሳታኮ ሀይሳዳ ያጋና፦ ‘ታ አዋይ አንጅዳይሳቶ፥ ሀ ይድ ሳእ መትያ ዎደፐ ዶምድ ህንተዉ ጊግዳ ካዎተꬃ ላትተ። 35 አይስ ጊኮ፥ ታኒ ኮሻትን ሙዝደታ፥ ሳሞትን ኡሽደታ፥ ኤረቶና እማꬃ አስ ግዳዳ ብን ሞክደታ፥ 36 ካሎትን ማይዝደታ፥ ሀርገትን ሀርግስደታ፥ ቃሸትን ታና ኦይችደታ’ ያጋና።

37 “ሄሳፈ ጉየ፥ ፅሎት ዛሪድ፥ ‘ጎዳዉ፥ ኔኒ ኮሻትን አዉደ በእድ ሙዝዶ? ዎይኮ ኔኒ ሳሞትን አዉደ በእድ ኡሽዶ? 38 ኔኒ እማ ግዳዳ ይን አዉደ በእድ ሞክዶ? ዎይኮ ኔኒ ካሎትን አዉደ ማይዝዶ? 39 ኔኒ ሀርግን ዎይኮ ቃሸትን ኔኮ ብድ ነና አዉደ ኦይችዶ?’ ያጋና። 40 ካዎይ ዛሪድ፥ ‘ታኒ ህንተዉ ቱማ ኦዳይስ፤ ህንተ ታና ካልያ ሀ ኡባፈ ጉፀይሳስ ኦꬅዳይሳ ታዉ ኦꬅደታ’ ያጋና።

41 “ሄ ዎደ ሀድርሳ ባጋራ ደኤይሳታኮ፥ ‘ሀ ባደትዳይሳቶ፥ ታ ማታፐ ሃክተ። ፃላሄስነ እያ ኪታንቾታስ ጊግዳ መርና ታማን ቢተ። 42 አይስ ጊኮ፥ ኮሻትን ታና ሙዝቤከታ፤ ሳሞትን ኡሽቤከታ። 43 ታኒ እማ ግዳዳ ብን ታና ሞክበከታ፥ ካሎትን ማይዝቤከታ፥ ሀርግንነ ቃሸትን ታና ኦይችቤከታ’ ያጋና።

44 “ሄ ዎደ ኤንቲ፥ ‘ጎዳዉ፥ ኔኒ ኮሻትን ዎይኮ ሳሞትን ዎይኮ እማ ግዳዳ ብን ዎይኮ ካሎትን ዎይኮ ሀርግን ዎይኮ ቃሸትን በእድ ነና አዉደ ማዶና እፅዶ?’ ያግድ ዛራና።

45 “ሄ ዎደ ካዎይ ዛሪድ ኤንታኮ፥ ‘ታኒ ህንተዉ ቱማ ኦዳይስ፤ ህንተ ታና ካልያ ሀ ኡባፈ ጉፀይሳ ማዶና እፅዳይስ፥ ታና ማዶና እፅዳይሳ’ ያጋና። 46 ሄሳ ግሾ፥ ሄ አሳት መርና ፕርዳስ ቃስ ፅሎት መርና ደኡዋስ ባና” ያግስ። ዳነ 12:2.