24
ፆሳ ኬꬃይ ላለቶና አተና
(ማር 13:1-2፤ ሉቃ 21:5-6)
1 የሱሲ ፆሳ ኬꬃፈ ከይድ ብሽን፥ እያ ታማረት እያኮ ይድ፥ ማላለትድ ፆሳ ኬꬃ ግምብያ በስዶሶና። 2 የሱሲ ኤንታኮ ዛሪድ፥ “ኤ! ሀይሳ ኡባ በኤቲ? ታኒ ህንተዉ ቱማ ኦዳይስ፤ ሹች ሹቻ ቦላ ግምበትዳ መላ ላለቶና አተና” ያግስ።
ስንꬃፈ ሀናናባታ
(ማር 13:3-13፤ ሉቃ 21:7-19)
3 የሱሲ ሻማሆ ዙማ ቦላ ኡትዳሽን፥ እያ ታማረት ባንታርካ እያኮ ይድ፥ “ሄስ አዉደ ሀናኔኮ ኑስ ኦዳ። ቃስ ነ ዩሳስነ ዎድያ ዉርሰꬃስ ማላታይ አይቤ?” ያግድ ኦይችዶሶና።
4 የሱሲ ዛሪድ፥ “ህንተና ኦንካ ባለꬆና መላ ናገትተ! 5 አይስ ጊኮ፥ ዳሮ አሳት ታ ሱንꬃን፥ ‘ታኒ ክርስቶሳ፥ ፆሳይ አሳ አሻናዉ ኪትዳይሳ’ ያግሸ ይድ ዳሮ አሳ ባለꬃና። 6 ማታን ደእያ ኦላ ግርሳ፥ ሃሆን ደእያ ኦላ ዎረ ስአናዉ ደኤታ። ሄሳ መላባይ ሀናናዉ በሲያ ግሾ ህርጎፍተ። ሽን ዉርሰꬃይ ቡሮና። 7 ደረይ ደርያራ፥ እስ ካዎተꬃይ ሀራ ካዎተꬃራ ኦለታና። ኮሻይነ ቢታ ቃፆይ ኡባ በሳን ሀናና። 8 ሄስ ኡባይ የሎ እቀꬃስ ዞከ መላ።
9 “ሄ ዎደ አሳይ ህንተና ዋዬስ አꬅድ እማና፥ ቃቻናነ ዎꬋና። ታ ሱንꬃ ግሾ አሳ ኡባይ ህንተና እፃና። ማቶ 10:22. 10 ሄ ዎደ ዳሮት አማኖ አጋና። ባንታ ግዶን እሶይ እሱዋ አꬅድ እማና፥ እሶይ እሱዋ እፃና። 11 ቃስ ዳሮ ዎርዶ ናበት ደንድድ ዳሮታ ባለꬃና። 12 ጌላተꬅ ዳርያ ግሾ፥ ዳሮ አሳ ሲቆይ እርፃና። 13 ሽን ዉርሰꬅ ጋካናዉ ገንጭያ ኡራይ አታና። ማቶ 10:22. 14 አሳ ኡባስ ማርካ ግዳና መላ ፆሳ ካዎተꬃ ዎንገላይ ቢታ ኡባን ኦደታና። ሄሳፈ ጉየ፥ ዉርሰꬃይ ያና።
ቱና ꬋዮ
(ማር 13:14-23፤ ሉቃ 21:20-24)
15 “ሄሳ ግሾ፥ ናብያ ዳነል ኦድዳ ꬋዮ ቱናተꬃይ ጌሻ በሳን ኤቅዳይሳ ህንተ በአና። ዛረ 9:27፤ 11:31፤ 12:11. (አኬክሶ፦ ሄስ ዎይ ጉሰኮ ናባበይስ አኬኮ!) 16 ሄ ዎደ ይሁዳ ቢታን ደኤይሳት ደርያኮ ባቃቶ። 17 ኬꬃ ሁጰን ደእያ ኡራይ ባ ሶን ደእያባ ኤካናዉ ሶ ገሎና ባቃቶ። ሉቃ 17:31. 18 ጋደን ደኤይስ ባ ማኡዋ ኤካናዉ ጉየ ስሞፎ። 19 ሄ ዎደ ቃንꬃ ማጫሳታስነ ꬋንꬅያ ማጫሳታስ ዳሮ ኡንአ ግዳና። 20 ባልጎን ዎይኮ ሳምባታን ህንተ ባቃቶይ ግዶና መላ ፆሳ ዎስተ። 21 አይስ ጊኮ፥ ሳእ መቶሳፐ ሀች ጋካናዉ ሀኖናባይ፥ ቃስ ስንꬃፈካ ኡባራካ ሀኖና ዋየይ ሄ ዎደ ሀናና። መ 12:1፤ ቆን 7:14. 22 ፆሳይ ሄ ጋላሳታ ታይቡዋ ጉꬆናኮ አሰ ግድዳ ኦንካ አተና። ሽን እ ባ ዶርዳ አሳታ ግሾ፥ ሄ ጋላሳታ ታይቡዋ ጉꬃና።
23 “ሄ ዎደ ኦንካ ህንተና፥ ‘ሄኮ፥ ክርስቶስ ሀይሳን’ ዎይኮ ‘ህንን ደኤስ’ ያግኮ አማኖፕተ። 24 አይስ ጊኮ፥ ዎርዶ ክርስቶሳትነ ዎርዶ ናበት ደንዳና። ኤንታዉ ዳንዳኤትኮ፥ ሀር አቶሽን ፆሳይ ዶርዳይሳታካ ባለꬃናዉ ግታ ማላታታነ ማላልስያባታ ኦꬃና። 25 አኬክተ፥ ታኒ ህንተዉ ሀይሳ ካሰታዳ ኦዳስ።
26 “ሄሳ ግሾ፥ አሳይ ህንተኮ፥ ‘ሄኮ፥ ክርስቶስ ባዞን ደኤስ’ ጊኮ፥ ያ ቦፕተ። ዎይኮ ህንተኮ፥ ‘ሄኮ፥ ቆልአን ደኤስ’ ጊኮ፥ ኤንታባ አማኖፕተ። ሉቃ 17:23-24. 27 አይስ ጊኮ፥ ዎልአንꬅ ሳሎን ዎልአምድ፥ ዶሎሀፐ ዉሎሀ ጋካናዉ በንተይሳዳ፥ አሳ ናኣ ዩሳይ ሄሳዳ ሀናና።
28 “ባዉት ደእያሶን አንኮት ሺቃና። ሉቃ 17:37.
ክርስቶስ ናምአንꬆ ያና
(ማር 13:24-27፤ ሉቃ 21:25-28)
29 “ሄ ዎደ ሄ ዋየ ጋላሳታፐ ጉየ፥
ኤለስድ አዋይ ꬉማና፥
አጌናይ ባ ፖኡዋ ድጋና። እሳ 13:10፤ ኤርም 2:10.
ፆልንቶት ሳሎፐ ዎꬋና፥
ቃስ ሳሎን ደእያ ዎልቃት ቡቀታና።
30 ሄ ዎደ አሳ ናኣ ዩሳ ማላይ ሳሉዋ ቦላ በንታና። ሳአን ደእያ አስ ኡባይ ዬካና። ቃስ አሳ ናአይ፥ ዎልቃራነ ግታ ቦንቹዋራ ሳሉዋ ሻራ ግዶራ ይሽን ኤንቲ በአና። ዛረ 7:13፤ ዛካ 12:10. 31 እ ባ ኪታንቾታ ግታ ሞይዘ ፑኖራ ኪታና። ኤንቲ ሳኣ ኦይዱ ባጋ ብድ፥ ሀ ጋፃፐ ያ ጋፃ ጋካናዉ ደእያ እያዉ ዶረትዳይሳታ ሺሻና።
ባላሰ ምꬄ ሌምሶ
(ማር 13:28-31፤ ሉቃ 21:29-33)
32 “ባላሰ ምꬃፈ ታማርተ። እያ አጫዳ ሀይፅያ ዎደ ቶርቸይ ማታትዳይሳ ህንተ ኤሬታ። 33 ሄሳዳካ፥ ህንተ ሀ ኡባባ በእያ ዎደ የሱሲ ማትድ ፐንገን ደኤይሳ ኤርተ። 34 ታኒ ህንተዉ ቱማ ኦዳይስ፤ ሀ ኡባባይ ፖለታና ጋካናዉ፥ ሀ የለተꬃይ አና። 35 ሳሎይነ ሳእ አꬋና፥ ሽን ታ ቃላይ ኡባካ አና።መ 6:5.
የሱሲ ያና ዎደ ኦንካ ኤረና
(ማር 13:32-37፤ ሉቃ 17:26-30፥ 34-36)
36 “ሄ ጋላሳነ ሄ ሳትያ ሳሎን ደእያ ታ አዋፐ አትሽን፥ ሀር ሳሎ ኪታንቾታ ግድን ዎይኮ ናኣ ግድን ኦንካ ኤረና። 37 አሳ ናኣ ዩሳይ፥ ኖሄ ዎደ ሀንዳይሳ መላ ግዳና። መ 6:5. 38 ሄ ዎደ ꬋዮ ሃꬃይ ያናፐ ስን ኖሄይ ማርካብያን ገልዳ ጋላሳ ጋካናዉ፥ አሳይ ምሸነ ኡይሸ፥ ኤክሸነ ገልሸ ጋምእስ። 39 ꬋዮ ሃꬃይ ይድ፥ ኤንታ ኡባ ꬋይሳና ጋካናዉ አኬክቦኮና። አሳ ናኣ ዩሳይካ ሄሳዳ ሀናና።
40 “ሄ ዎደ ናምኡ አሳት ጋደን ኦꬃና። ኤንታፈ እሶይ ኤከታና፥ ሀንኮይ አታና። 41 ናምኡ ማጫሳት እስፈ ጋጫና። ኤንታፈ እስንያ ኤከታና ሀንክያ አታና።
42 “ህዛ፥ ህንተ ጎዳይ አይ ጋላስ ያነኮ ህንተ ኤሮና ግሾ፥ ምንድ ናግተ። 43 ሽን ካይሶይ ቃማፈ አይ ሳተን ያነኮ ጎዳይ ኤርያኮ፥ ባ ኬꬃይ ቦከቶና መላ ባርክድ ናጋናሽን። ሉቃ 12:39-40. 44 ሄሳዳካ፥ አሳ ናአይ ህንተ ቆፖና ሳተን ያና ግሾ፥ ህንተካ ጊግድ ደእተ።
ኢታነ ሎኦ አይለ ሌምሶ
(ሉቃ 12:41-48)
45 “ያትን፥ ባ ሶ አሳስ ካꬃ ኮሽያ ዎድያን እማና መላ እያ ጎዳይ ዶርዳ አማንይስነ ዎዛናማ አይለይ ኦኔ? 46 እ ባ ጎዳይ ኪትዳይሳ ኦꬅሽን እያ ጎዳይ ይድ ደምያ አይለይ አንጀትዳይሳ። 47 ታኒ ህንተዉ ቱማ ኦዳይስ፤ ጎዳይ ሄ አይልያ ባባ ኡባ ቦላ ሹማና። 48 ሽን ሄ አይለይ ኢታ ግድኮ፥ ‘ታ ጎዳይ ጋምእድ ያና’ ያግድ ባ ዎዛናን ቆፕድ፥ 49 ባ ላገ ኦሳንቾታ ዋꬎ ዶምኮ፥ ማꬆተይሳታራ ሚኮነ ኡይኮ፥ 50 ሄ አይልያ ጎዳይ እ ቆፖና ጋላስነ እ ኤሮና ሳተን፥ 51 ይድ እያ ቃንፀረꬃና። እያ ቃዳ ጩቦታራ ኦꬃና። ሄ በሳን እያዉ ዬሆነ አቸ ጋርጨꬅ ግዳና።