1 ሄሳፈ ጉየ፥ የሱሲ ሺቅዳ አሳስነ ባ ታማረታስ ሀይሳዳ ያግስ። 2 “ህገ አስታማረትነ ፋርሳወት ሙሰ ህግያ ብላናዉ ማታራ ደኦሶና። 3 ሄሳ ግሾ፥ ኤንቲ ህንተና ኪትያ ኡባ ኦꬅተነ ናግተ። ሽን ኤንቲ ኦይሳዳ ኦꬆፍተ። አይስ ጊኮ፥ ኤንቲ ኦደይሳዳ ኦꬆኮና። 4 ኤንቲ ቶካናዉ ዳንዳኤቶና ቶሆ ቃችድ አሳ ቶሶሶና። ሽን ባንታዉ ሀር አቶሽን፥ ሄ ቶሁዋ አሳይ ቶክያ ዎደ ብራ ፄራን ቦቻናዉ ኮዮኮና።

5 “ሽን ኤንቲ ባንታ ኦሶ ኡባ አስ በኦና መላ ኦꬆሶና። ባንታ ሶምኦንነ ቀሰን ቃችያ ማፃፋ ፅቅሰይ ደእያ ክታፈ ዳልግሶሶና፥ ባንታ ማኡዋ ማጫራ አዱሶሶና። *ሶምኦንነ ቀሰን ቃችያ ማፃፋ፥ ማኡዋ ማጫራ አዱሶሶና፦ ሄሳ ኤንቲ ኦይ ታኒ ፆሳስ እመታስ ግያ ማላ በሳናሳ (ዛረ 15:37-41)።ማቶ 6:1፤ ዛረ 6:8፤ ታይቦ 15:38. 6 ሞከትያ በሳን ቦንቾ በስነ አይሁደ ዎሳ ኬꬃታን ዳሮ ሎእያ ኦይደ ዶሶሶና። 7 አሳይ ግያን ኤንታና ቦንቾን ሳሮꬃናይሳነ ‘አስታማርያዉ’ ግድ ፄጋናይሳ ኮዮሶና።

8 “ሽን ህንተ አስታማረይ እሱዋ ፃላላ ግድዳ ግሾነ ህንተ ኡባይ እሻታ ግድዳ ግሾ፥ ‘አስታማርያዉ’ ጌተትድ ፄገቶፍተ። 9 ህንተዉ ሳሎን እስ አዋ ፃላል ደእያ ግሾ፥ ሀ ሳአን ኦናካ ‘አዋዉ’ ግድ ፄጎፕተ። 10 ህንተዉ እስ ጎዳይ ክርስቶሳ ፃላል ደእያ ግሾ ‘ጎዳዉ’ ጌተትድ ፄገቶፍተ። 11 ህንተ ግዶን ባይራተይ ህንተ አይለ ግዶ። ማቶ 20:26. 12 ባና ግታያ ኦንካ ካዉያና፤ ባና ካዉሽያ ኦንካ ግታታና። ሉቃ 14:11፤ 18:14.

13 “ህንተኖ፥ ጩቦቶ፥ ህገ አስታማረቶነ ፋርሳወቶ፥ አሳ ስንꬃን ሳሎ ካዎተꬃ ጎርደይሳቶ ህንተና አየ! ህንተ፥ ህንተ ሁጰን ገለከታ ቃስ ሀራታካ ገልሰከታ።

14 [“ህንተኖ ጩቦቶ፥ ህገ አስታማረቶነ፥ ፋርሳወቶ፥ አምኤታ ኬꬃ ህንተ ቦንቅሸ፥ አስ በኦ ግድ ዎሳ አዱሰታ። ሄሳ ግሾ፥ ህንተና አየ! ኡባፈ አꬍያ ፕርዳይ ህንተና ናጌስ።]†እስ እስ በን ማፃፋት ፓይዶ 14 ጉጆሶና።

15 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተ እስ ኡራ አማንꬃናዉ አባራነ ሳአራ ዩየታ። ሽን ህንተ እያ አማንꬅዳ ዎደ ሄ ኡራ ህንተፈ አꬅድ ጋናመስ ጊገትዳይሳ ኦꬅያ ግሾ፥ ህንተና አየ!

16 “ኦንካ ፆሳ ኬꬃን ጫቅኮ አይኮይካ ባዋ። ሽን ፆሳ ኬꬃን ደእያ ዎርቃን ጫቅኮ፥ ሄ ጫቆይ እያ ጎማና ግያ ቆቀቶ፥ ህንተዉ ቆቅድ ሀራታ ካለይሳቶ፥ ህንተና አየ! 17 ህንተኖ፥ ኤያቶ፥ ቆቀቶ፥ ዎርቃይ አꬍዬ? ዎርቅያ ፆሳስ ዱማያ ፆሳ ኬꬃይ አꬊ? 18 ቃስ ‘ኦንካ ያርሾ በሳን ጫቅኮ፥ አይኮይካ ባዋ። ሽን ኦንካ እያ ቦላ ደእያ ያርሹዋን ጫቅኮ፥ ሄ ጫቆይ እያ ጎማና’ ያግድ ታማርሴታ። 19 ህንተኖ፥ ቆቀቶ፥ ያርሾይ አꬍዬ? ያርሹዋ ፆሳስ ዱማያ በሳይ አꬊ? 20 ሄሳ ግሾ፥ ያርሾ በሳን ጫቅያ ኡራይ፥ ሄ ያርሾ በሳንነ እያ ቦላ ደእያ ኡባባን ጫቄስ። 21 ፆሳ ኬꬃን ጫቅያ ኡራይ፥ ሄ ፆሳ ኬꬃንነ እያን ደእያ ፆሳን ጫቄስ። 22 ሳሎን ጫቅያ ኡራይ ፆሳ አራታንነ ሄ አራታ ቦላ ኡትያ ፆሳን ጫቄስ። እሳ 66:1፤ ማቶ 5:34.

23 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ካሬꬃ ሳዎፐ፥ ናትሮፐነ ኦካሸፐ አስራታ ከሴታ። ሽን ህገን ደእያ አꬍድ ኮሸይሳታ አግደታ። ሄስካ፥ ሱረ ፕርዳ፥ ቃተꬅነ ኡባባን አማነተꬅ። ሀራታካ አጎናሽን ሀይሳታ ህንተ ኦꬃናዉ በሴስ። ሌወ 27:30. 24 ህንተዉ ቆቅድ ሀራ አስ ካለይሳቶ፥ ህንተ ኡሻፈ ኡዱንፀ ከስድ ግማለ ምቴታ።

25 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ሻትያስነ ከርያስ ቦላ ባጋ ጌሼታ። ሽን ኤንታዉ ጋርሳን ቦንቀይነ ኡዘተꬅ ኩም ኡትስ። 26 ነኖ ቆቀ ፋርሳውያዉ፥ ሻትያስነ ከርያስ ጋርሳ ካሰታዳ ጌሻ። ሄሳፈ ጉየ፥ ቦላ ባጋይካ ጌሽ ግዳና።

27 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ካረ ባጋራ ቃላመ ትየትድ ሎእድ፥ ግዶን መቀꬅነ ዎቅዳባይ ኩምዳ ዱፎታ ዳነታ። ሀዋ 23:3. 28 ሄሳዳካ፥ ቦላ ባጋራ አሳስ ሎኦ ዳነታ። ሽን ህንተ ጋርሳን ጩቦተꬅነ ኢታተꬅ ኩምስ።

29 “ህንተኖ፥ ጩቦቶ፥ ህገ አስታማረቶነ ፋርሳወቶ፥ ህንተና አየ! ህንተ ናበታስ ዱፎ ኬፀታ፥ ቃስ ፅሎታ ዱፉዋካ ሎይꬄታ። 30 ቃስ ህንተ፥ ‘ኑኒ በን ኑ አዋታ ዎደ ደእዳባ ግድያኮ፥ ኤንታራ እስፈ ናበታ ሱꬃ ጉሶኮሽን’ ያጌታ። 31 ሄሳ ግሾ፥ ህንተ ናበታ ዎꬍዳ አሳ ናይታ ግደይሳ ህንተ ህንተ ሁጰን ማርካቴታ። 32 ህዛ፥ ህንተ አዋት ዶምዳይሳ ህንተ ፖልተ።

33 “ሀ ሾሻቶ፥ ሾሻ ናይቶ፥ ህንተ ጋናመ ፕርዳፈ ዋንድ አታኔ?ማቶ 3:7፤ 12:34፤ ሉቃ 3:7. 34 ሄሳ ግሾ፥ ሄኮ፥ ታኒ ናበታ፥ ጭንጫ አሳታነ አስታማረታ ህንተኮ ኪታና። ኤንታፈ እሶታ እሶታ ህንተ ዎꬋናነ ማስቃላ ቦላ ካቃና። ባጋታ አይሁደ ዎሳ ኬꬃታን ልሶን ጋራፋናነ ካታማፐ ካታማ ጎዳና። 35 ሄሳ ግሾ፥ ፅሉዋ አበላ ዎꬍዳ ዎደፐ ዶምድ፥ ፆሳ ኬꬃስነ ያርሾ በሳፈ ግዶን ህንተ ዎꬍዳ ባራካ ናአ ዛካርያሳ ዎደ ጋካናዉ ሀይቅዳ ፅሎ አሳ ኡባ ግሾ፥ ህንተ ሴረታና። መ 4:8፤ 2 ታር 24:20. 36 ታኒ ህንተዉ ቱማ ኦዳይስ፤ ህንተነ ህንተ አዋት ኦꬅዳ ናጋራስ ሀ ፕርዳ ኡባይ ሀ የለተꬃ ቦላ ጋካና።

37 “የሩሳላመ፥ የሩሳላመ፥ ናበታ ዎꬍያረ! ፆሳይ ኔኮ ኪትዳይሳታ ሹቻን ጫድያረ! ኩቶይ ባ ናይታ ባ ቀፈን ሀጰይሳዳ ታኒ ነ አሳ ታ ቀስያን ገቻናዉ አፑን ቶሆ ኮያድና! ሽን ታና ድጋዳሳ። 38 ህዛ፥ ሄኮ፥ ህንተ ኬꬃይ ካይስ ግዳና። ኤርም 22:5. 39 ታኒ ህንተዉ ኦዳይስ፤ ‘ጎዳ ሱንꬃን የይስ አንጀትዳይሳ’ ህንተ ጋና ጋካናዉ ናምአንꬆ ታና በኤከታ” ያግስ። ማዝ 118:26.