1 የሱስነ እያ ታማረት አባ ፕንድ፥ ገርገሶነ ቢታ ጋክዶሶና። 2 የሱሲ ዎጎሉዋፐ ዎꬍያ ዎደ ቱና አያናይ ኦይክዳ እስ ኡራይ ዱፎፐ ከይድ እያራ ጋሄትስ። 3 ሄ ኡራይ አቅ ፔእድ ደኤይ ዱፎና። እያ ኦንካ ሳንꬃላታን ቃቻናዉ ዳንዳኤና። 4 እ ዳሮ ቶሆ ዱꬃንነ ሳንꬃላታን ቃሸትድ ደኤስ። ሽን ሳንꬃላታ ዱሰረꬄስ፥ ዱꬃ መንረꬄስ። እያ ተቃናዉ ዳንዳእያ ኦንካ ባዋ። 5 እ ቃማነ ጋላስ ሄ ዱፉዋንነ ደረ ቦላ ዋሴስ፥ ባ አሳተꬃ ሹቻን ጋሬስ።

6 የሱሳ ሃሆን በእዳ ዎደ ዎፅ ብድ እያ ስንꬃን ጉልባትስ። 7 ሄ ኡራይ ባ ቃላ ꬎቁ ኦꬅድ፥ “ኡባፈ ቦላ ፆሳ ናአዉ የሱሳ፥ ነናነ ታና አይበ ጋይ? ታና ꬋይሶና መላ ታኒ ነና ፆሳ ሱንꬃን ዎሳይስ” ያግስ። 8 እ ሄሳ ግዳይ የሱሲ እያ፥ “ላ ሀ ቱና አያናዉ፥ ሀ አድያፈ ከያ” ያግዳ ግሾሳ።

9 የሱሲ እያኮ፥ “ነ ሱንꬃይ ኦኔ?” ያግድ ኦይችስ።

እ፥ “ኑኒ ዳሮ ግድያ ግሾ፥ ታ ሱንꬃይ ሌግዮና” ያግስ። 10 ቱና አያናት ባንታና ሄ ቢታፈ ከስ የዶና መላ የሱሳ ምንꬅድ ዎስዶሶና።

11 ሄ ደርያ ቦላ ዳሮ ጉዱንꬆ ዉደይ ሄመቴስ። 12 ቱና አያናት የሱሳኮ፥ “ኑና ህን ጉዱንꬆ ዉድያኮ የዳርክ፥ ኤንታን ብድ ገሎስ” ያግድ ዎስዶሶና። 13 የሱሲ ኤንታኮ፥ “ቢተ” ያግስ። ያትን ቱና አያናት አድያፈ ከይድ ጉዱንꬆታን ገልዶሶና። ናምኡ ሙኩሉ ግድያ ጉዱንꬆ ዉደይ አፎ ዶናራ ድርግድ ብድ አባን ገልድ ምተትዶሶና።

14 ጉዱንꬆ ዉድያ ሄመይሳት ባቃት ብድ ሀንዳባ ካታማንነ ጋፃርያን ኦድዶሶና። ያትን አሳይ ሀንዳባ በአናዉ ከይዶሶና። 15 አሳይ የሱሳኮ ያ ዎደ ቱና አያናን ኦይከትዳ ኡራ በእዶሶና። እ ባ ዎዛናኮ ስሚድ፥ ማኦ ማእድ፥ ያን ኡትዳይሳ በእዳ ዎደ ኡባይ ያይዶሶና። 16 ሄሳ በእዳ አሳት ቱና አያናት ኦይክዳ ኡራ ቦላነ ጉዱንꬆታ ቦላ ሀንዳባ ኡባ አሳስ ኦድዶሶና። 17 ሄሳ ግሾ፥ አሳይ ባንታ ቢታፈ የሱሲ ባና መላ ዎስዶሶና።

18 የሱሲ ዎጎሉዋን ገልያ ዎደ ካሰ ቱና አያናይ ኦይክድ የድዳ ኡራይ፥ የሱሳ ካላናዉ እያ ዎስስ። 19 ሽን የሱሲ እፅድ እያኮ፥ “ነ ሶ ስማዳ፥ ጎዳይ ነዉ አይ መላ ግታባ ኦꬅዳኮነ ነዉ አይ መላ ኬህዳኮ ነ ሶ አሳስ ኦዳ” ያግስ። 20 ኡራይ ብድ ታሙ ካታማ ጌተትያ በሳን ዩይድ፥ የሱሲ ባዉ አይ መላ ግታባ ኦꬅዳኮ ኦድስ። እ ኦድዳይሳ ስእዳ አሳ ኡባይ ማላለትዶሶና።

21 የሱሲ ስሚድ፥ ዎጎሉዋን ገልድ፥ አባ ፕንዳፐ ጉየ ዳሮ አሳይ አባ ጋፃን እያ ዩሹዋን ሺቅዶሶና። 22 እያሮሳ ጌተትያ አይሁደ ዎሳ ኬꬃ ሀላቃታፐ እሶይ፥ የሱሳ በእዳ ዎደ እያኮ ይድ እያ ቶሁዋ ቦላ 23 ኩንድድ፥ “ታ ናእያ ሀርጋዳ ሀይቃና ሀናዉሱ። እያ ፓፃዳ ደአና መላ ያዳ ነ ኩሽያ እ ቦላ ዎꬃርክ” ያግድ የሱሳ ምንꬅድ ዎስስ።

24 የሱሲ እያሮሳራ ብስ። እ ብሽን ዳሮ አሳይ እያ ካልድ ኡንኤꬅዶሶና።

25 ታማነ ናምኡ ላይꬅ እፔ ሱꬅ ꬎሂያ እስ ማጫስያ ደአዉሱ። 26 ዳሮ አክመት እዮ አክምዶሶና፥ ሽን እያ ፓፃ ካኤታሱ። እያ ባ ሚሽያ ኡባ ዉርስንካ እዉ ሃ ኢትስፐ አትሽን፥ አይኮካ ማድቤና። 27 ሄ ማጫስያ የሱሳባ ስአዳ፥ አሳ ካንꬃዳ የሱሳ ጉየራ ያዳ እያ ማኡዋ ቦቻሱ። 28 እያ፥ “ታኒ ሀር አቶሽን እያ ማኡዋ ቦችያኮ ፓፃና” ጋዳ ቆፓሱ።

29 ኢፐ ጎግያ ሱꬃይ ኢራካ ኤቅ አግስ። እያ ባ ዋያፐ ፓፅዳይሳ ባ አሳተꬃን ኤራሱ። 30 የሱሲ ባፐ ዎልቅ ከይዳይሳ ባ ሁጰን ኤርድ፥ ኤለስድ ዳሮ አሳ ግዶን ጉየ ስሚድ፥ “ታ ማኡዋ ቦችዳይ ኦኔ?” ያግስ።

31 እያ ታማረት፥ “አሳይ ነና ሱገይሳ በአሸ፥ ‘ዎይጋዳ ታና ኦነ ቦችዳይ ያጋይ?’ ” ያግዶሶና።

32 የሱሲ ሄሳ ኦን ኦꬅዳኮ በአናዉ ዩሽ አꬅ ፄልስ። 33 ሽን ማጫስያ ባዉ ሀንዳባ ኤራዳ፥ ያሻን ኮኮራሸ ያዳ የሱሳ ስንꬃን ጉፋናሱ፤ ቃስ ሀንዳባ ኡባ ቱማ እያዉ ኦዳሱ። 34 ያንን፥ የሱሲ ኢኮ፥ “ታ ናተ፥ ነና ነ አማኖይ ፓꬅስ፥ ሳሮን ባ፥ ነ ዋያፐካ ፓፃ” ያግስ።

35 የሱሲ ቡሮ ሄሳ ኦድሽን፥ አይሁደ ዎሳ ኬꬃ ሀላቃ ሶፐ ኪተትዳ አሳት ይድ፥ “ነ ናእያ ሀይቃሱ፥ አስታማርያ አይስ ዳቡርሳይ?” ያግዶሶና።

36 ሽን የሱሲ ኤንቲ ገይሳ ስእድ፥ አይሁደ ዎሳ ኬꬃ ሀላቃኮ፥ “አማኖ ፃላላ አማናፐ አትሽን፥ ባቦፋ” ያግስ። 37 የሱሲ ጰፅሮሳፐ፥ ያይቆባፐነ ያይቆባ እሻ ዮሃንሳፐ ሀር ኦንካ ባና ካሎና መላ ድግስ። 38 ኤንቲ አይሁደ ዎሳ ኬꬃ ሀላቃ ሶ ጋክያ ዎደ የሱሲ አሳይ ካሀ ꬋይድ ዬከይሳነ ዘሌለይሳ በእስ። 39 ገልድ አሳኮ፥ “አይስ ካሀ ꬋይድ ዬከቲ? ናእያ ꬍስካሱፐ አትሽን፥ ሀይቃቡኩ” ያግስ።

40 አሳይ እያ ቦላ ሚጭስ። ሽን አሳ ኡባ ካረ ከስድ፥ ናኤ አዋ፥ አይዉነ ሄꬑ ታማረታ ባራ ኤክድ ናእያ ደእያሱዋ ገልስ። 41 የሱሲ ናኤ ኩሽያ ኦይክድ፥ “ፃልታ፥ ቁም” (ጉꬃ ናተ፥ ነና ጋይስ ደንዳ) ያግስ።

42 ናእያ ኤለሳ ደንዳ ኤቃዳ ሄመታሱ። እያ ታማነ ናምኡ ላይꬃ ናአ። ሄሳን አሳይ ዳሮ ማላለትዶሶና። 43 የሱሲ ሄሳ ኤንቲ ኦደስካ ኦዶና መላ ኤንታ ምንꬅ ኪትስ። ኤንቲ እዉ ምያባ እማና መላ ኦድስ።