1 የሱሲ ያፐ ከይድ፥ ባ ታማረታ ካለꬅድ፥ ባ ካታማ ናዝረተ ብስ። 2 ሳምባታ ጋላስ አይሁደ ዎሳ ኬꬃን ታማርሶ ኦይክስ። እ ታማርሰይሳ ስእዳ ዳሮ አሳይ ማላለትድ፥ “ሀይስ ሀ ኡባ አዉፐ ደምዴ? ሀ ጭንጫተꬃ እ አዉፐ ኤክዴ? ሀ ማላታታ ኦꬅያ ማታ እ አዉፐ ደምዴ? 3 ሀይስ አናፅያ ግደኔ? ማይራም ናአ፥ ያይቆባ፥ ዮሳ፥ ይሁዳነ ስሞና እሻ ግደነዬ? እያ ምቸት ኑራ ሀይሳን ደኦኮናዬ?” ያግድ፥ እ ግያባ ኤኮና እፅዶሶና።

4 የሱሲ ሄ አሳኮ፥ “ናበይ ባ ቢታን፥ ባ ዳቦታንነ ባ ሶ አሳን ቦንቸተናፈ አትሽን፥ ሀራታ ማታን ቦንቸቴስ” ያግስ። ዮሀ 4:43. 5 እ ሄ በሳን ባ ኩሽያ ጉꬃ አሳ ቦላ ዎꬅድ ፓꬅዳይሳፈ አትሽን፥ ሀራ ማላታታ ኦꬃናዉ ዳንዳእቤና። 6 አሳይ አማንቦና ግሾ ዳሮ ማላለትስ።

ሄሳፈ ጉየ፥ የሱሲ ሄ ሄራን ደእያ ጉታታን አሳ ታማርሴስ። 7 የሱሲ ታማነ ናምኡ ታማረታ ባኮ ፄግድ፥ ናምኣ ናምኣ ጋꬅድ ኪትስ። ኤንታዉ ቱና አያናታ ከስያ ዎልቃ እሚስ። 8 ኤንታ፥ “ኦገ ፃምአፈ አትሽን፥ ካꬅ፥ ካርፂታ፥ ህንተ ኪሰን ሚሸ አይብባካ ኦይኮፍተ። ሉቃ 10:4-11. 9 ህንተ ቶሁዋን ጫማ አꬅተ፥ ሽን ናምኡ አፍላ ኦይኮፍተ” ያግስ። 10 ቃስካ፥ “ህንተና አስ ሞክዳ ሶ አዉንካ ግድን ሄ በሳ የድድ ባና ጋካናዉ ሄ ኬꬃን ጋምእተ። 11 ህንተና አስ ሞኮናሱዋ ዎይኮ ህንተ ኦድያባ ስኦናሱዋ አዉን ግድኮካ፥ ሄ ቢታን ደእያ አሳስ ማርካ ግዳና መላ ሄ በሳፈ ከይሸ፥ ህንተ ቶሁዋፐ ባና ፕትተ” ያግስ። ሀዋ 13:51.

12 ታማነ ናምኡ ታማረት ብድ፥ አሳይ ባንታ ናጋራፐ ስማናዳ ቃላ ኦድዶሶና። 13 ኤንቲ አሳፐ ዳሮ ቱና አያናታ ከስዶሶና። ዳሮ ሀርጋንቾታ ዛይተ ትይድ ፓꬅዶሶና።ያይ 5:14.

14 የሱሳ ሱንꬃይ ኡባ በሳን ከይዳ ግሾ፥ ካዎይ ሄሮዲስ እያባ ስእስ። እስ እስ አሳይ፥ “ፃማቅያ ዮሃንስ ሀይቆፐ ደንድስ፥ ሄሳ ግሾ ሀ ማላታታ ኦይ እያ” ያግዶሶና። ማቶ 16:14፤ ማር 8:28፤ ሉቃ 9:19.

15 ባጋት፥ “ሀይስ ኤልያሳ ግደኔ?” ያግዶሶና።

ሀራት ቃስ፥ “ሀይስ በን ዎደ ናበታፐ እሱዋ ግዶና አገና” ያግዶሶና።

16 ሽን ሄሮዲስ ሄሳ ስእዳ ዎደ፥ “ሀይስ ታኒ ቆꬍያ ቃንፅስዳ ፃማቅያ ዮሃንሳ ግደኔ? እ ሀይቆፐ ደንድስ” ያግስ።

17 ሄሮዲስ ባ እሻ ፍልጶሳ ማችዉ ሄሮድያዳ ኤክዳ ግሾ እ ጋሶን ዮሃንሳ ኦይꬅድ ቃሽስስ። 18 ዮሃንስ ሄሮዲሳ፥ “ኔኒ ነ እሻ ማችዉ ኤካናዉ በሰና” ያግስ። ሉቃ 3:19-20.

19 ሄሮድያዳ ዮሃንሳ ባ ኡሎን ሞርካዳ እያ ዎꬍሳናዉ ኮያሱ፥ ሽን ዳንዳአቡኩ። 20 ዮሃንስ ፅሎነ ጌሻ አስ ግድዳይሳ ሄሮዲስ ኤርዳ ግሾ፥ እያዉ ባብድ ሎይꬅ ናግሴስ። ሄሮዲስ ዮሃንስ ግያባ ስአናዉ ዶስኮካ እ ግያባ ስእያ ዎደ ዳሮ ዳጋሜስ።

21 ሄሮዲስ ባ የለትዳ ጋላሳ ቦንቻናዉ ደርያ ሃረይሳታስ፥ ሻላቃታስነ ጋልላን ደእያ ግታ አሳስ እማቶ ጊግስስ። ሄስ ሄሮድያዳስ እንጀ ጋላስ ግድስ። 22 ሄሮድያዳ ናእያ እማꬃይ ሞከትያ በሳ ገላ ዱራዳ፥ ሄሮዲሳነ እያ እማꬃታ ኡፋይሳሱ። ካዎይ ናእዉ፥ “ነ ኮያባ አይባ ግድኮካ ታና ኦይቻ፥ ታኒ ነዉ እማና” ያግስ። 23 ቃስ እዉ ጫቅድ፥ “ኔኒ ኦይችያባ አይባ ግድኮካ፥ ታኒ ነዉ እማና። ሀር አቶሽን፥ ታ ካዎተꬃ ባጋ ግድኮካ ታኒ ነዉ እማና” ያግስ።

24 ናእያ ካረ ከያዳ ባ አየኮ፥ “አይ እማ ጎ?” ጋዳ ኦይቻሱ።

እ አይያ፥ “ፃማቅያ ዮሃንሳ ሁጵያ እማ ጋ” ያጋሱ።

25 ናእያ ኤለሳዳ ካዋኮ ባዳ፥ “ፃማቅያ ዮሃንሳ ሁጵያ ሳነን ዎꬃዳ ሀእ ታዉ እማና መላ ኮያይስ” ያጋሱ።

26 ያንን፥ ካዎይ ዳሮ ቂሮትስ፥ ሽን ባ እማꬃታ ግሾ እዉ ጫቅዳ ባ ጫቁዋ መንꬃናዉ ኮይቤና። 27 ሄሳ ግሾ፥ ኤለስድ ናገይሳ ዮሃንሳ ሁጵያ ኤሀና መላ ኪትስ። ናገይስ ቃሾ ኬꬅ ብድ ዮሃንሳ ቆꬍያ ቃንፅስ። 28 ሄ ቃንፀትዳ ሁጵያ ሳነን ዎꬅ ኤህድ ናኤስ እሚስ። ናእያ ቃስ ባ አየስ እማሱ። 29 ዮሃንሳ ታማረት ሄሳ ስእዳ ዎደ ብድ እያ አሀ ኤክ ኤፍድ ሞግዶሶና።

30 ታማነ ናምኡ ሀዋረት ስም ይድ ኤንቲ ኦꬅዳባነ ታማርስዳባ ኡባ የሱሳስ ኦድዶሶና። 31 ኤንታኮ ያ አሳይነ ብያ አሳይ ዳርዳ ግሾ፥ የሱሳራነ እያ ታማረታራ፥ ሀር አቶሽን ካꬅ ማናዉካ ኤንታ ጋꬆና እፅስ። ያንን፥ የሱሲ ኤንታኮ፥ “ኑርካ ጉꬅ ሸምፕ ኤካናዉ አስ ባይና በሲ የꬍተ” ያግስ። 32 ሄሳ ግሾ፥ ኤንቲ ባንታርካ ዎጎሎን ገልድ አስ ባይና በሲ ብዶሶና።

33 ኤንቲ ብሽን ዳሮ አሳይ ኤንታ በእድ ኤርዶሶና። ያትን፥ ካታማ ኡባፈ አሳይ ቶሆራ ዎፅ ብድ ኤንቲ ብያ በሳ ኤንታፈ ስን ጋክዶሶና። 34 የሱሲ ዎጎሉዋፐ ዎꬍድ ዳሮ አሳ በእስ። አሳይ ሄምያ አስ ባይና ዶርሳ መላ ግድዳይሳ በእድ ኤንታዉ ቃትድ ኤንታ ዳሮባ ታማርስስ። ታይቦ 27:17፤ 1 ካዎ 22:17፤ ህዝ 34:5፤ ማቶ 9:36.

35 ሳአይ ኦማርስያ ዎደ የሱሳ ታማረት እያኮ ይድ፥ “ሀይስ በሳይ አስ ባይና በሲ፤ ሀእ ሳእካ ቃምስ። 36 አሳይ ጉታታነ ካታማታ ብድ ባንታዉ ምያባ ሻማና መላ አሳ የዳ” ያግዶሶና።

37 ሽን የሱሲ ዛሪድ ኤንታኮ፥ “አሳስ ምያባ ህንተ እምተ” ያግስ።

ኤንቲ፥ “ኑኒ ብድ ናምኡ ፄቱ ድናረን ኡይꬁ ሻምድ አሳ ሙዛና መላ ኮያይ?” ያግድ ኦይችዶሶና።

38 የሱሲ ኤንታኮ፥ “ህንተዉ አፑን ኡይꬅ ደኢ? አነ ብድ በእተ” ያግስ።

ኤንቲ በእድ፥ “እቻሹ ኡይꬁነ ናምኡ ሞሎ” ያግዶሶና።

39 የሱሲ ባ ታማረታ አሳ ኡባ ጩጋን ጩጋን ሻክድ ማታን ኡትሳና መላ ኪትስ። 40 አሳይ ፄቱ ጩጋንነ እሻታሙ ጩጋን ሻከት ሻከት ኡትዶሶና። 41 የሱሲ እቻሹ ኡይꬃነ ናምኡ ሞሎታ ኤክድ፥ ፑደ ሳሎ ፄልድ ፆሳ ጋላትስ። ኡይꬃ መንꬅድ አሳስ ግሻና መላ ባ ታማረታስ እሚስ። ቃስ ናምኡ ሞሎታ ኤንታ ኡባስ ሻክስ። 42 አሳ ኡባይ ምድ ካልዶሶና። 43 አትዳ ኡይꬃ ቲፍያነ ሞሎታ ቲፍያ፥ እያ ታማረት ታማነ ናምኡ ጋይታ ኩመꬅ ደንꬅዶሶና። 44 ኡይꬃ ምዳ አደ አሳ ታይቦይ እቻሹ ሙኩሉ።

45 ኤለስድ የሱሲ ባ ታማረት ዎጎሉዋን ገልድ፥ አባፈ ሄፍንꬃን ደእያ ቤተሳይዳ ባፐ ስንꬃትድ ባና መላ ኪትስ። ሽን ባዉ አሳ ሞይዛናዉ ጉየ አትስ። 46 አሳ ሞይዝዳፐ ጉየ፥ ፆሳ ዎሳናዉ ዙማ ቦላ ከይስ።

47 ሳአይ ቃምያ ዎደ ዎጎሎይ አባ ግዶን ደኤስ፥ ሽን የሱሲ አባፈ ጋፃን ባርካ ደኤስ። 48 ጫርኮይ እያ ታማረታኮ ጫርክያ ግሾ፥ አባ ፕꬎይ ዋይሰይሳ የሱሲ በእስ። ዎንትማ ሳእ ጌያና ሀንያ ዎደ እ አባ ቦላ ሄመትሸ ኤንታኮ ይድ፥ ኤንታ የግድ አꬋናዉ ኮይስ። 49 ሽን እ አባ ቦላ ሄመትሽን፥ ኤንቲ በእድ፥ ኤንታዉ ሞይትለ ዳንን ዋስዶሶና። 50 ኤንቲ ኡባይ እያ በእድ፥ ያሻን ኮኮርዶሶና።

ሽን የሱሲ ኤለስድ ኤንታኮ፥ “ታና፥ አይኮይ ባዋ፤ ያዮፍተ” ያግስ። 51 የሱሲ ዎጎሉዋን ገልድ ኤንታራ እስፈ ኡትን ጫርኮይ ዎፑ ግስ። ኤንቲ ዳሮ ማላለትዶሶና። 52 ኤንታ ዎዛናይ ዘልኡምዳ ግሾ፥ ኤንቲ ኡይꬃባ አኬክቦኮና።

53 ኤንቲ አባ ፕንድ፥ ገንሳሬፀ ቢታ ጋክድ፥ ዎጎሉዋ ጋፃ ሺሽድ ቃችዶሶና። 54 ኤንቲ ዎጎሉዋፐ ዎꬍያ ዎደ አሳይ ኤለስድ የሱሳ ኤርዶሶና። 55 ኤንቲ ሄራን ደእያ ቢታ ኡባን ዎፀረትድ ሀርጋንቾታ ሀላን ቶክድ፥ “የሱሲ ደኤስ” ግን ስእዳ በሳ ኤህዶሶና። 56 አሳይ እ ብዳ ሶ ኡባን፥ ጋፃርያን ግድን፥ ካታማን፥ ደእያ ሀርጋንቾታ ዳባባ ኤፎሶና። ሀርጋንቾት እያ አፍላ ማጫራ ግድኮካ ቦቻና መላ አሳይ እያ ዎስዶሶና። ቦችዳ ኡባይ ፓፅስ።