7
ፋርሳወታ ዎጋ
(ማቶ 15:1-9)
1 የሩሳላመፐ ይዳ ጉꬃ ፋርሳወትነ ህገ አስታማረት የሱሳ ማታን ሺቅዶሶና። 2 የሱሳ ታማረታፐ እሶት እሶት ጌዮና ኩሽያን፥ ሄስካ ኩሸ ሜጨቶና ካꬅ መይሳታ በእዶሶና።
3 ፋርሳወትነ አይሁደ አሳ ኡባይ ባንታ አዋታ ዎጋꬆ ባንታ ኩሽያ ሜጨቶና ሞኮና። 4 ሄሳዳካ፥ ኤንቲ ግያፐ ሻመትዳባ ሜጮና ደእሸ ሞኮና። ቃስ ኤንቲ ባንታ አዋታፐ ኤክዳ ሀራ ዳሮ ዎግ ደኤስ፦ ሄስካ ስነታ፥ ከረታ፥ ብራታ ሚሸታነ አርሳ ሜጭያ ዎጋ ናገይሳ።
5 ፋርሳወትነ ህገ አስታማረት የሱሳ፥ “ነ ታማረት አይስ አዋታ ዎጋ መንꬅድ ባንታ ኩሽያ ሜጨቶና ካꬅ ሞና?” ያግድ ኦይችዶሶና።
6 የሱሲ ኤንታኮ፥ “እሳያስ ህንተና ጩቦታ፥
“ ‘ሀይስ አሳይ ታና ባ እንፃርሳ ፃላላን ቦንቼስ፥
ሽን ኤንታ ዎዛናይ ታፐ ሃሆን ደኤስ። እሳ 29:13.
7 አስ መꬍዳ ዎጋ ፆሳ ህገ ዳንስድ ታማርስያ ግሾ፥
ኤንቲ ታዉ መላ ጎይኖሶና’ ”
ግድ ፃፍዳይስ ቱማ።
8 “ህንተ ፆሳ ኪታ አግድ አሳ ዎጋ ምንꬅድ ናገታ” ያግስ።
9 ቃስካ የሱሲ፥ “ህንተ ህንተ ዎጋ ናግድ ፆሳ ኪታ የግ አጋናዉ ሎኦ ኦገ ደምደታ። 10 ሙሰይ፥ ‘ነ አዋነ ነ አይዉ ቦንቻ’፥ ቃስ ‘ባ አዋነ ባ አይዉ ጫየይስ ሀይቃናዉ በሴስ’ ያግስ። ከሳ 20:12፤ ዛረ 5:16፤ ከሳ 21:17፤ ሌወ 20:9. 11 ሽን እስ አስ ባ አዋ ዎይኮ ባ አይዉ ማዳናይሳ አግድ፥ ‘ሀይስ ታኒ ፆሳስ እምዳ ያርሾ’ ጊኮ፥ 12 እ ባ አዋ ዎይኮ ባ አይዉ ማዶና መላ ኦꬄታ። 13 ሄሳዳካ፥ ህንተ ሀራታ ታማርስዳ ህንተ ዎጋን ፆሳ ቃላ ካꬍደታ። ሄሳ መላ ሀራ ዳሮባ ኦꬄታ” ያግስ።
አሰ ቱንስያባታ
(ማቶ 15:10-20)
14 የሱሲ ዳሮ አሳ ቃስካ ባኮ ፄግድ፥ “ኡባይ ታኒ ኦደይሳ ስእተነ አኬክተ። 15 አሳ ዎዛናፐ ከያባይ አሰ ቱንሴስፐ አትሽን፥ ካረፐ አሳ ኡሎ ገልድ አሰ ቱንስያባይ አይብካ ባዋ። 16 ስእያ ሀይꬅ ደእያ ኦንካ ስኦ” ያግስ።
17 የሱሲ ዳሮ አሳ የግ አግድ ሶ ገልን እያ ታማረት ሄ ሌምሱዋባ እያ ኦይችዶሶና። 18 እ ኤንታኮ፥ “ህንተዉካ ቃስ ገልቤኔ? ካረፐ አሳን ገልያባይ አይብካ አሰ ቱንሳናዉ ዳንዳኦናይሳ አኬከቲ? 19 አይስ ጊኮ፥ ካꬅ አሳ ኡሎ ግዶ ገልድ ካንꬅድ አስፐ አትሽን፥ አሳ ዎዛና ግዶ ገለና” ያግስ። ሄሳን የሱሲ ካꬅ ኡባይ ጌሽ ግደይሳ ኤርስስ።
20 ካልድካ፥ የሱሲ፥ “አሳ ቱንስያባይ አሳ ዎዛና ግዶፈ ከያባ። 21 አሳ ዎዛና ግዶፈ ከያባይ ኢታ ቆፋ፥ ላይማተꬅ፥ ካይሶ፥ አሰ ዎꬎ፥ ላመ፥ 22 ኢታ አሞ፥ ኢታተꬅ፥ ገነ፥ ቃይፀ፥ ጭሞ፥ ቃናተ፥ ጫሸ፥ ኦቶሮነ ቦዛተꬅ። 23 ሀ ኢታባይ ኡባይካ አሳ ዎዛና ግዶፈ ከይድ አሰ ቱንሴስ” ያግስ።
እስ ማጫሰ አማኖ
(ማቶ 15:21-28)
24 የሱሲ ያፐ ከይድ፥ ፅሮሳ ካታማ ማታን ደእያ ቢታ ብስ። እ እስ ኬꬅ ገልድ ያን ደኤይሳ ኦንካ ኤራና መላ ኮይቤና። ሽን ቆሰትድ ጋምአናዉ ዳንዳእቤና። 25 ሽን እ ጉꬃ ናእዉ ቱና አያናይ ኦይክዳ እስ ማጫስያ የሱሳባ ስአዳ ኤለሳ እያኮ ያዳ እያ ቶሁዋ ቦላ ኩንዳሱ። 26 እያ አይሁደ ማጫስ ግዱኩ፤ እያ የለትዳይ ስሮፍንቀ ቢታና። እያ፥ ባ ናኤፐ ቱና አያና ከሳና መላ የሱሳ ዎሳሱ።
27 ሽን የሱሲ ዛሪድ፥ “ናይት ኮይሮትድ ካꬃ ካሎ፤ ናይታ ካꬃ ኤክድ ካናታስ የገይስ ሎኦ ግደና” ያግስ።
28 ማጫስያ ዛራዳ፥ “ታ ጎዳዉ ሄስ ቱማ፥ ሽን ጋይታ ማታን ደእያ ካናት ናይታፐ ዎꬍያ ቲፍያ ሞሶና” ያጋሱ።
29 የሱሲ ቃስ ኢኮ፥ “ሀ ነ ቃላ ግሾ፥ ነ ሶ ባ፤ ቱና አያናይ ነ ናኤፐ ከይስ” ያግስ።
30 ማጫስያ ባ ሶ ብያ ዎደ ቱና አያናይ ኢፐ ከይን ሂፃን ዝንእዳሮ ደማሱ።
ቱለነ ሙመ ኡራ
31 የሱሲ ፅሮሳ ካታማፐ ከይድ፥ ስዶናራነ ታሙ ካታማታ ጌተትያ ቢታራ ካንꬅድ ጋልላ አባኮ ብስ። 32 አሳይ ቱለነ ዋይድ ኦደትያ አስ የሱሳኮ ኤህድ፥ ባ ኩሽያ እያ ቦላ ዎꬃና መላ እያ ዎስዶሶና። 33 የሱሲ ባርካ ሄ ኡራ ዳሮ አሳፐ ጋፃ ከስድ፥ ባ ብራꬍያ እያ ሀይꬃን የድስ። ቃስ ጩቹ ጩትድ እያ እንፃርሳ ቦችስ። 34 ሳሎ ፑደ ፄልድ፥ ቶክ ሸምፕድ፥ “ኤፍታህ” ግስ። ብርሸꬃይካ “ዶየታ” ጉሱ። 35 ኡራ ሀይꬃይ ኤለስድ ዶየትስ፥ ቃሸትዳ እንፃርሳይካ ብርሸትስ፥ ኡራይ ጌሽድ ኦደትስ።
36 የሱሲ አሳኮ፥ “ሀይሳ ኦደስካ ኦዶፕተ” ያግስ። ሽን እ ዳሮ ምንꬅድ ኦዶፕተ ግን፥ አሳይ ኦዳ ያ ዳርስስ። 37 ሄሳ ስእዳ አሳ ኡባይ ዳሮ ማላለትድ፥ “ኡባባ እ ሎይꬅ ኦꬄስ። ሀር አቶሽን፥ ቱልያ ስሴስ፥ ሙምያ ኦድሴስ” ያግዶሶና።