8
ኦይዱ ሙኩሉ አሳ
(ማቶ 15:32-39)
1 ጉꬃ ዎደፐ ጉየ፥ ዳሮ አሳይ የሱሳኮ ሺቅዶሶና። አሳስ ምያባይ ꬋይን የሱሲ ባ ታማረታ ባኮ ፄግድ፥ 2 “ሀ አሳይ ታራ ሄꬑ ጋላስ ጋካናዉ ጋምእድ፥ አይኮካ ምያባ ደምቦና ግሾ፥ ታና አሳይ ቃꬄስ። 3 ታኒ አሳ ኮሻራ ሶ የድኮ አሳይ ብሸ ኦገን ዳቡርድ ኩንዳና፥ ባጋ አሳይ ሃሆሶፐ ይዶሶና” ያግስ።
4 የሱሳ ታማረት ዛሪድ፥ “ሀ መላ ቢታን ሀ አሳ ኡባ ሙዛናዉ ግድያ ካꬅ ደማናዉ ዳንዳኤይ ኦኔ?” ያግዶሶና።
5 የሱሲ ኤንታኮ፥ “ህንተዉ አፑን ኡይꬅ ደኢ?” ያግድ ኦይችስ።
ኤንቲ ዛሪድ፥ “ላፑን ኡይꬅ ደኤስ” ያግዶሶና።
6 የሱሲ አሳይ ሳአን ኡታና መላ ኪትስ። ያትድ፥ ላፑን ኡይꬃ ኤክድ ፆሳ ጋላት ስሚድ ሄ ኡይꬃ መንꬅድ፥ አሳስ ግሻና መላ ባ ታማረታስ እሚስ። እያ ታማረት አሳስ ግሽዶሶና። 7 ኤንታዉ ቃስ ጉꬃ ላፋ ሞሎት ደኦሶና። የሱሲ ሄ ሞሎታ ግሾ ፆሳ ጋላትድ፥ አሳስ ግሻና መላ ባ ታማረታ ኪትስ። 8 አሳ ኡባይ ምድ ካልዶሶና። እያ ታማረት አትዳ ቲፍያ ላፑን ጋይታ ኩመꬅ ደንꬅዶሶና። 9 ካꬃ ምዳ አሳ ታይቦይ ኦይዱ ሙኩሉ ግዳና። ሄሳፈ ጉየ፥ የሱሲ አሳ የድስ። 10 እ ቃስ ባ ታማረታራ ኤለስ ዎጎሎን ገልድ ዳልማኑታ ቢታ ብስ።
ማላታ በአናዉ ኦይችዳ ኦይሻ
(ማቶ 16:1-4)
11 ፋርሳወት ይድ የሱሳ ፓጫናዉ ኮይድ፥ ሳሎፐ ባንታና ማላታ በሳና መላ የሱሳራ ፓላማ ኦይክዶሶና። ማቶ 12:38፤ ሉቃ 11:16.
12 የሱሲ ቶክ ሸምፕድ፥ “ሀ ዎድያ አሳይ አይስ ማላታ ኮዪ? ታኒ ህንተዉ ቱማ ኦዳይስ፤ ሀ ዎድያ አሳስ አይ ማላትካ እመተና” ያግስ። ማቶ 12:39፤ ሉቃ 11:29. 13 እ ኤንታ ያን የግ አግድ ዛር ዎጎሎን ገልድ አባፈ ሄፍንꬅ ፕንስ።
ፋርሳወታነ ሄሮዲሳ እርሾ
(ማቶ 16:5-12)
14 እያ ታማረት ካꬅ ኤፋናይሳ ዶግዶሶና፤ ኤንታዉ ዎጎሉዋ ግዶን እስ ኡይꬃፈ ሀር ባዋ። 15 የሱሲ ኤንታኮ፥ “ህንተና ኤርተ። ፋርሳወታ እርሹዋፈነ ሄሮዲሳ እርሹዋፈ ናገትተ” ያግድ ኪትስ። ሉቃ 12:1.
16 ኤንቲ ባንታ ግዶን፥ “እ ሀይሳ ገይ ኑስ ኡይꬅ ባይና ግሾሳ” ያግዶሶና።
17 የሱሲ ኤንቲ ገይሳ ኤርድ ኤንታኮ፥ “ህንተዉ ኡይꬅ ባይና ግሾ አይስ ኦደቴቲ? ሀእካ ኤረከቲ? ዎይኮ አኬከከቲ? ህንተ ዎዛናይ ዶጭዴ? 18 ህንተዉ አይፈይ ደእሽን በኤከቲ? ሀይꬅ ደእሽን ስኤከቲ? ህንተ አኬከቲ?ኤርም 5:21፤ ህዝ 12:2፤ ማር 4:12. 19 ታኒ እቻሹ ኡይꬃ እቻሹ ሙኩሉ አሳስ ባꬅዳ ዎደ አፑን ጋይታ ኩመꬅ ቲፈ ደንꬅደቲ?” ያግስ።
ኤንትካ፥ “ታማነ ናምኡ ጋይታ ኩመꬅ” ያግዶሶና።
20 “ሄሳዳካ፥ ታኒ ላፑን ኡይꬃ ኦይዱ ሙኩሉ አሳስ ባꬅዳ ዎደ አፑን ጋይታ ኩመꬃ ቲፈ ደንꬅደቲ?” ያግስ።
ኤንቲ፥ “ላፑን ጋይታ ኩመꬅ ደንꬅዳ” ያግዶሶና።
21 ያትን፥ “ሀእካ አኬክበከቲ?” ያግስ።
ቤተሳይዳን ደእያ እስ ቆቀ
22 ኤንቲ ቤተሳይዳ ካታማ ብዶሶና። ጉꬃ አሳት ቆቀ ኡራ የሱሳኮ ኤህድ ሄ ኡራ ቦቻና መላ እያ ዎስዶሶና። 23 የሱሲ ቆቀ ኡራ ኩሽያ ኦይክድ ካታማፐ ጋፃ ከስስ። እያ አይፍያን ጩትድ ባ ኩሽያ እያ ቦላ ዎꬅድ፥ “ነዉ አይኮይ በንቲ?” ያግድ ኦይችስ።
24 ኡራይ ꬎቁ ግድ ፄልድ፥ “ታዉ አሳይ በንቴስ፥ ሽን አሳይ ሄመትሸ ምꬅ ዳኔስ” ያግስ።
25 ሄሳፈ ጉየ፥ የሱሲ ዛሪድ፥ ኡራ አይፍያን ባ ኩሽያ ዎꬅስ። ኡራይ ሎይꬅ ፄልስ፥ እያ አይፈይ ፓፅስ፥ ኡባባ ጌሽድ በእስ። 26 የሱሲ አድያኮ፥ “ነ ሶ ባ፥ ሽን ጉታ ገሎፓ” ያግድ ኪትስ።
ጰፅሮሳ ማርካተꬃ
(ማቶ 16:13-20፤ ሉቃ 9:18-21)
27 የሱሲ ባ ታማረታራ ቅሳረ ፍልጶሳ ማታን ደእያ ጉታ ብስ። ኤንቲ ብሽን ኦገ ቦላ የሱሲ፥ “ታና አሳይ ኦና ጎና?” ያግድ ባ ታማረታ ኦይችስ።
28 እያ ታማረት፥ “እስ እስ አሳይ ነና፥ ‘ፃማቅያ ዮሃንሳ’ ጎሶና፤ ሀራት፥ ‘ኤልያሳ ጎሶና’ ቃስ ሀራት፥ ‘ናበታፐ እሱዋ’ ጎሶና” ያግዶሶና። ማር 6:14.
29 የሱሲ ኤንታኮ፥ “ያትን ህንተ ታና ኦና ጌቲ?” ያግድ ኦይችስ።
ጰፅሮስ፥ “ኔኒ ክርስቶሳ” ያግድ ዛርስ።
30 የሱሲ፥ “ታባ ኦደስካ ኦዶፕተ” ያግድ ኤንታ ኪትስ።
የሱሲ ባና ጋካና ዋያ ኦድስ
(ማቶ 16:21-28፤ ሉቃ 9:22-27)
31 የሱሲ ባ ታማረታኮ፥ “አሳ ናአይ፥ ዳሮ መቶ ኤካናዉ በሴስ፤ ጭማት፥ ካህነ ሀላቃትነ ህገ አስታማረት እያ እፃናዉ በሴስ። ኤንቲ እያ ዎꬋናዉነ እ፥ ሄꬑ ጋላሳፐ ጉየ፥ ሀይቆፐ ደንዳናዉ በሴስ” ያግድ ኤንታ ታማርስስ። 32 እ ሄሳ ኤንታዉ ጌሽድ ኦድስ። ጰፅሮስ እያ እስ ባጋ ዛሪድ ሀንቀትስ።
33 ሽን የሱሲ ጉየ ስሚድ፥ ባ ታማረታ ፄልድ፥ ጰፅሮሳ ሀንቀትድ፥ “ሀ ፃላሄይ፥ ታፐ ሃካ። ኔኒ አስ ዶስያባ ቆፓሳፐ አትሽን፥ ፆሳይ ዶስያባ ቆፓካ” ያግስ።
የሱሳ ካሎይ ጭግስያ ጋተ
(ማቶ 10:38-39፤ 16:24-28፤ ሉቃ 9:23-27፤ 14:26-27)
34 ቃስካ የሱሲ ዳሮ አሳነ ባ ታማረታ ባኮ ፄግድ፥ “ታና ካላናዉ ኮይያ ኦንካ ባና ካዶ፤ ባ ማስቃልያ ቶክድ ታና ካሎ። ማቶ 10:38፤ ሉቃ 14:27. 35 ባ ሸምፑዋ አሻናዉ ኮይያ ኡራይ ꬋይሳና። ሽን ታ ግሾነ ዎንገላ ግሾ ባ ሸምፑዋ ꬋይስያ ኡራይ አሻና። ማቶ 10:39፤ ሉቃ 17:33፤ ዮሀ 12:25. 36 እስ አስ ሳአን ደእያ ኡባባ ባዉ ሺሽድ፥ ባ ሸምፑዋ ꬋይስኮ እያ አይ ማዳኔ? 37 እስ አስ ባ ሸምፑዋ ዎዛናዉ አይ እማናዉ ዳንዳኢ? 38 ፆሳ አማኖና ሀ ኢታ የለተꬃን፥ እስ አስ ታናንነ ታ ቃላን ዬላትኮ፥ አሳ ናአይ፥ ቃስ ባ አዋ ቦንቾን ጌሻ ኪታንቾታራ ያ ዎደ እያን ዬላታና” ያግስ።