10
ኤኮ ገሎ ትምርተ
(ማቶ 19:1-2፤ ሉቃ 16:18)
1 የሱሲ ሄሳፈ ደንድድ፥ ይሁዳ ቢታ ብድ ዮርዳኖሰ ሻፋ ፕንስ። ዳሮ አሳይ ዛሪድ እያኮ ሺቅን፥ ካሰይሳዳካ ሄ አሳ ታማርስስ።
2 እስ እስ ፋርሳወት ፓጫናዉ ኮይድ የሱሳ፥ “እስ አስ ባ ማችዉ የዳና መላ ሙሰ ህገይ ኪቲ?” ያግድ እያ ኦይችዶሶና።
3 እ ዛሪድ፥ “ሙሰይ ህንተና ዎይግድ ኪትዴ?” ያግስ።
4 ኤንቲ፥ “ሙሰይ፥ ‘እስ አስ ባ ማቼስ አንጆ ዎርቃተ እምድ የዶ’ ግስ” ያግዶሶና። ዛረ 24:1.
5 የሱሲ ዛሪድ፥ ኤንታ “ህንተ ኦድን ስኦናይሳታ ግድያ ግሾ፥ ሙሰይ ሀ ኪታ ህንተዉ ፃፍስ። 6 ሽን ፆሳይ ኮይሮ መꬍያ ዎደ፥ አደነ ማጫ ኦꬅድ፥ ኤንታ መꬍስ።መ 1:27፤ 5:1. 7 ሄሳ ግሾ፥ እስ አስ ባ አዋነ ባ አይዉ አግድ፥ ባ ማቸራ እስፈ ደኤስ። መ 2:24. 8 ኤንቲ ናምአይ እስ አሰ ግዶሶና፤ ህዛፐ፥ ኤንቲ እስ አሰ ግዶሶናፐ አትሽን፥ ናምኡ አስ ግዶኮና። 9 ሄሳ ግሾ፥ ፆሳይ እስፈ ቃችዳይሳ አስ ሻኮፎ” ያግስ።
10 ኤንቲ ሶ ስምዳ ዎደ፥ እያ ታማረት ሀ ኦዳባ የሱሳ ናምአንꬆ ኦይችዶሶና። 11 የሱሲ ኤንታኮ፥ “ባ ማችዉ የድድ ሀራ ኤክያ ኦንካ ላይማቴስ። ማቶ 5:32፤ 2 ቆሮ 7:10-11. 12 ቃስ ማጫስያካ ባ አዝናፐ ከያዳ ሀራ አዝና ገልኮ ላይማታዉሱ” ያግስ።
የሱሲ ዮጋ ናይታ አንጅስ
(ማቶ 19:13-15፤ ሉቃ 18:15-17)
13 የሱሲ ጉꬃ ናይታ ቦላ ባ ኩሽያ ዎꬃና መላ፥ እስ እስ አሳይ ናይታ እያኮ ኤሆሶና፥ ሽን እያ ታማረት ሄ አሳ ሀንቀትዶሶና። 14 የሱሲ ሄሳ በእድ፥ ባ ታማረታ ሀንቀትድ፤ ኤንታኮ፥ “ጉꬃ ናይት ታኮ የይሳ ድጎፍተ፤ ፆሳ ካዎተꬃይ ሀይሳታ መላሳ። 15 ታኒ ህንተዉ ቱማ ኦዳይስ፤ ፆሳ ካዎተꬃ ጉꬃ ናአዳ ኤኮና ኡራይ ኦንካ ሄ ካዎተꬃ ኡባራካ ገለና” ያግስ። ማቶ 18:3. 16 ጉꬃ ናይታ እድምድ፥ ባ ኩሽያ ኤንታ እሱዋ እሱዋ ቦላ ዎꬅድ አንጅስ።
ዱረ ናአተꬃ ኡራ
(ማቶ 19:16-30፤ ሉቃ 18:18-30)
17 የሱሲ ባናዉ ከይዳ ዎደ፥ እስ ኡራይ ዎፅ ይድ፥ እያ ስንꬃን ጉልባትድ፥ “ኬሀ አስታማርያዉ፥ ታኒ መርና ደኦ ላታናዉ አይ ኦꬆ?” ያግድ ኦይችስ።
18 የሱሲ፥ “አይስ ታና ኬሀዉ ጋዳ ፄጋይ? ፆሳ ፃላላፐ አትሽን፥ ሀር ኬህ ኦንካ ባዋ። 19 ፆሳ ኪታ፥ ዎꬎፓ፤ ላይማቶፓ፤ ካይሶቶፓ፤ ዎርዶ ማርካቶፋ፤ እንፃርሳን ጭሞፋ፤ ነ አዋነ ነ አይዉ ቦንቻ ያገይሳ ኤራሳ” ያግስ። ከሳ 20:12-16፤ ዛረ 5:16-20.
20 ኡራይ፥ “አስታማርያዉ፥ ታኒ ሄሳ ኡባ ናአተꬃፈ ዶማዳ ሀእ ጋካናዉ ናጋይስ” ያግስ።
21 የሱሲ ኡራ ትሽ ኦꬅ ፄልድ ዶስስ፤ “ነዉ እስባይ ፓጬስ፤ ባዳ ነዉ ደእያባ ኡባ ባይዛዳ፥ ሄ ሚሽያ ማንቆታስ እማ፤ ኔኒ ሳሎን ዱረ ግዳና። ያታ ስማዳ ታና ካላ” ያግስ። 22 ሽን ኡራይ ሄሳ ስእድ፥ እ ዳሮ ዱረ ግድያ ግሾ፥ ባ ሶምኡዋ ካሬꬅስ፥ ኡፋይቶና አግድ ብስ።
23 የሱሲ ባ ታማረታ ዩሽ አꬅ ፄልድ፥ “ዱረ አስ ፆሳ ካዎተꬃ ገላናይስ ዋንድ መታንዴሻ!” ያግስ።
24 እያ ታማረት እያ ትምርትያ ስእድ ማላለትዶሶና። ሽን የሱሲ ቃስካ ኤንታኮ፥ “ናይቶ፥ ፆሳ ካዎተꬃ ገላናይስ ዋንድ መታንዴሻ! 25 ዱረ አስ ፆሳ ካዎተꬃ ገላናይሳፈ፥ ግማለይ ናርፐ ሉሆራ አይስ ካዉዬስ” ያግስ።
26 እያ ታማረት ማላለትድ፥ “ያትን፥ ኦን አታኔ?” ያግድ፥ እሶይ እሱዋ ኦይችዶሶና።
27 የሱሲ ኤንታ ትሽ ኦꬅ ፄልድ፥ “ሀይስ ፆሳስ ዳንዳኤተስፐ አትሽን፥ አሳስ ዳንዳኤተና፤ ፆሳስ ኡባባይ ዳንዳኤቴስ” ያግስ።
28 ጰፅሮስ የሱሳኮ፥ “ሄኮ፤ ኑኒ ኑባ ኡባ አግድ፥ ነና ካልዳ” ያግስ።
29 የሱሲ “ታኒ ህንተዉ ቱማ ኦዳይስ፤ ታ ግሾነ ዎንገላ ግሾ፥ ኬ ዎይኮ እሻታ ዎይኮ ምቸታ ዎይኮ አዋ ዎይኮ አዮ ዎይኮ ማችዉ ዎይኮ ናይታ ዎይኮ ጋደ አግዳ ኦንካ፥ 30 ሀእ ሀ ዎድያን ፄቱ ኩሸ ኬꬃ፥ እሻታ፥ ምቸታ፥ አየታ፥ ናይታ፥ ጋድያ፥ ጎደተꬃራ እስፈ ኤካና። ስንꬃፈ ያና ዎድያንካ መርና ደኡዋ ኤካና። 31 ሽን ዳሮት ሀእ ደꬃን ስን ግድዳይሳት ጉየ ግዳና፥ ቃስ ዳሮት ሀእ ጉየ ግድዳይሳት ስን ግዳና” ያግስ። ማቶ 20:16፤ ሉቃ 13:30.
የሱሲ ባ ሀይቁዋባ ሄꬓንꬆ ኦድስ
(ማቶ 20:17-19፤ ሉቃ 18:31-34)
32 የሱሳራነ እያ ታማረታራ የሩሳላመ ብሽን፥ የሱሲ ባ ታማረታ ስንꬃን ሄመቴስ። ኤንቲ ማላለትዶሶና። እያ ካለይሳትካ ያይዶሶና። ናምአንꬆ፥ ታማነ ናምኡ ታማረታ ጋፃ ከስድ፥ ባና ጋካናባ ዱማ ኤንታዉ ሀይሳዳ ያግድ ኦድስ። 33 “ሄኮ፥ ኑኒ የሩሳላመ ሀእ ከዮስ። ያን አሳ ናአይ፥ ካህነ ሀላቃታስነ ህገ አስታማረታስ አꬍድ እመታና። ኤንቲ እያ ቦላ ሀይቆ ፕርዳ ፕርዳና፤ ቃስ አይሁደ ግዶና ደርያስ እያ አꬅድ እማና። 34 አይሁደ ግዶና ደረይ እያ ቶቻና፥ እያ ቦላ ጩታና፥ ልሶን ጋራፋናነ ዎꬋና። እ ሄꬑ ጋላሳፐ ጉየ፥ ሀይቆፐ ደንዳና” ያግስ።
ያይቆባነ ዮሃንሳ ዎሳ
(ማቶ 20:20-28)
35 ዛብድዮሳ ናይት ያይቆብነ ዮሃንስ የሱሳኮ ይድ፥ “አስታማርያዉ፥ ኑኒ ነና ዎስያ እስባ ኑስ ኦꬃርክ” ያግዶሶና።
36 የሱሲ ኤንታኮ፥ “ታኒ ህንተዉ አይ ኦꬆ?” ያግስ።
37 ኤንቲ፥ “ኔኒ ነ ቦንቾ ካዎተꬃን ኡትያ ዎደ፥ ኑፐ እሱዋ ኡሻቻ ባጋራ ቃስ እሱዋ ሀድርሳ ባጋራ ኡትሳርክ” ያግዶሶና።
38 ሽን የሱሲ ኤንታኮ፥ “ህንተ አይ ዎስያኮ ኤረከታ፥ ታ ኡያናዉ ደእያ ፁኣ ኡያናዉ ዳንዳኤቲ? ቃስ ታኒ ፃማቀታናዉ ደእያ ፅንቃትያ ፃማቀታናዉ ዳንዳኤቲ?” ያግስ። ሉቃ 12:50.
39 ኤንቲ ዛሪድ፥ “ኤ ዳንዳኦስ” ያግዶሶና።
የሱሲ ቃስ፥ “ቱማካ ታ ኡያናዉ ደእያ ፁኣ ህንተ ኡያና፥ ታኒ ፃማቀታናዉ ደእያ ፅንቃትያ ህንተ ፃማቀታና። 40 ሽን ታፐ ኡሻቻ ባጋራነ ሀድርሳ ባጋራ ኡታናይሳታ ዶራናዉ ታዉ ማት ባዋ፥ ሽን ሄ በሳይ ፆሳይ እማናዉ ጊግስድ ዎꬅዳይሳታሳ” ያግስ።
41 ሀንኮ ታሙ ታማረት ሄሳ ስእዳ ዎደ፥ ያይቆባነ ዮሃንሳ ቦላ ሀንቀትዶሶና። 42 የሱሲ ኤንታ ኡባ ባኮ ፄግድ፥ “አይሁደ ግዶና አሳ ሀላቃት ደርያ ሃረይሳታ ጌተትድ ፄገተይሳነ ሃረይሳታስ ደርያ ቦላ ማት ደኤይሳ ህንተ ኤሬታ። ሉቃ 22:25-26፤ ማቶ 23:11፤ ማር 9:35፤ ሉቃ 22:26. 43 ሽን ህንተ ግዶን ሄሳ መላ ግደና፤ ህንተ ግዶን ግታታናዉ ኮየይ ኦንካ ህንተዉ አይለ ግዳናዉ በሴስ። 44 ቃስ ህንተ ግዶን ኡባፈ ቦላ ግዳናዉ ኮየይ ኦንካ ህንተ ኡባስ አይለ ግዳናዉ በሴስ። 45 ሀር አቶሽን፥ አሳ ናአይካ፥ አሳስ ኦꬃናዉነ ዳሮታ ዎዛናዉ ባ ሸምፑዋ አꬅድ እማናዉ ይስፐ አትሽን፥ አስ እያዉ ኦꬃና መላ ይቤና” ያግስ።
ቆቅያ ባርፅሞሳ
(ማቶ 20:29-34፤ ሉቃ 18:35-43)
46 ኤንቲ እያርኮ ካታማ ብዶሶና። የሱሲ ባ ታማረታራነ ዳሮ አሳራ እያርኮፈ ከይሽን፥ ፅሞሳ ናአይ፥ ቆቀይ፥ ባርፅሞሳ ጌተተይስ፥ ኦገ ጋፃን ዎስሸ ኡትስ። 47 ባርፅሞስ፥ ያራ አይ ናዝረተ የሱሳ ግድዳይሳ ስእዳ ዎደ፥ ባ ቃላ ꬎቁ ኦꬅድ፥ “ዳዊታ ናኣ የሱሳ፥ ታና ማራርክ!” ያግድ ዋሶ ዶምስ።
48 ዳሮ አሳይ እያ፥ “ሀይዛ!” ግድ ሀንቀትዶሶና።
ሽን፥ እ ባ ቃላ ካሰይሳፈ ዳሮ ꬎቁ ኦꬅድ፥ “ዳዊታ ናአዉ፥ ታና ማራርክ!” ያግስ።
49 የሱሲ ኤቅድ፥ “እያ ሃ ፄግተ” ያግስ።
ኤንቲ ቆቅያኮ፥ “አይኮይ ባዋ፥ ደንዳ ኤቃ፥ ነና ፄጌስ” ያግዶሶና። 50 ቆቀይ ባ ማኡዋ ሆል የግድ፥ ጉፕ ደንድ ኤቅድ፥ የሱሳኮ ብስ።
51 የሱሲ፥ “ታኒ ነዉ አይ ኦꬃና መላ ኮያይ?” ያግስ።
ቆቀይ፥ “አስታማርያዉ፥ ታ ፄላናዉ ኮያይስ” ያግስ።
52 የሱሲ፥ “ባ፥ ነ አማኖይ ነና ፓꬅስ” ያግስ። ኢራካ እያ አይፈይ ፄልን፥ የሱሳ ካልስ።