11
ግታ ቦንቾን የሩሳላመ ገሉዋ
(ማቶ 21:1-11፤ ሉቃ 19:28-40፤ ዮሀ 12:12-19)
1 ኤንቲ የሩሳላመ ማትሸ፥ ሻማሆ ዙማ ማታን ደእያ ቤተፋገነ ብታነ ካታማታ ጋክዶሶና። የሱሲ ባ ታማረታፐ ናምአታ ስን ኪትድ፥ 2 “ህንተፈ ስንꬃን ደእያ ጉታ ቢተ፤ ያ ገልዳ መላ ኦንካ ቶግቦና ቃሾን ደእያ ሀረ ማር ህንተ ደማና፥ እያ ብልድ፥ ሃ ኤክ ዪተ። 3 ኦንካ ህንተና፥ ‘ሀይሳ አይስ ኦቲ?’ ያግድ ኦይችኮ፥ ‘ጎዳይ እያ ኮዬስ፥ ኤለስድ ሃ የዳና’ ያግተ” ያግስ።
4 ኤንቲ ብድ፥ ሀረ ማር ካረ ቦላ ኦገ ማታን ቃሸትድ ደኤይሳ ደምድ ብልዶሶና። 5 ሄ በሳን ኤቅዳ እስ እስ አሳት ኤንታኮ፥ “ሀረ ማራ ዋታናዉ ብሌቲ?” ያግድ ኦይችዶሶና። 6 እያ ታማረት የሱሲ ባንታና ኪትዳይሳ ኦድን፥ አሳት የድ አግዶሶና። 7 ኤንቲ ሀረ ማራ የሱሳኮ ኤህድ፥ ባንታ ማኡዋ እያ ዞኮን ሂፅን የሱሲ ሄ ሀረ ማራ ቶግስ። 8 ዳሮ አሳይ ባንታ ማኡዋ ኦግያን ሂፅዶሶና፤ ቃስ ሀራት ምꬃ ታሸ ታሽድ፥ ኦገን ሂፅዶሶና። 9 የሱሳፐ ስንꬃራ ሄመትያ አሳይነ እያ ካልያ አሳይ ባንታ ቃላ ꬎቁ ኦꬅድ፥
“ሆሳና!*ሆሳና፦ ማቶ 21:9 በእተ። ፆሳይ ጋላተቶ!
ጎዳ ሱንꬃን የይስ አንጀትዳይሳ። ማዝ 118:25.
10 ጎዳ ሱንꬃን ያ ኑ አዋ
ዳዊታ ካዎተꬃይ አንጀትዳይሳ።
ኡባፈ ቦላ ሳሎን
ደእያ ፆሳይ ጋላተቶ”
ያግዶሶና።
11 የሱሲ የሩሳላመ ብድ፥ ፆሳ ኬꬃ ገልስ። ቃስ ኡባባ ዩይ ፄልዳፐ ጉየ፥ ሳእ ቃምያ ግሾ፥ ታማነ ናምኡ ታማረታራ ብታነ ካታማ ብስ።
የሱሲ ባድዳ ባላሰ ምꬅዉ
(ማቶ 21:18-19)
12 ዎንተꬃ ጋላስ ኤንቲ ብታነፐ ከይድ ብሽን፥ የሱሲ ኮሻትስ። 13 ሃሆን እስ ባላሰ ምꬅዉ ሀይꬃ ፃላላ ማአ ኡትዳሮ በእድ፥ እ ቦላ አይፈይ በንትኮ ግድ፥ በአናዉ ኢኮ ብስ፥ ሽን ኢኮ እ ብያ ዎደ፥ ሀይꬃ ፃላላፐ አትሽን፥ እስ አይፈካ ደምቤና፤ አይስ ጊኮ፥ ባላሰይ አይፍያ ዎደይ ጋክቤና። 14 የሱሲ ሄ ባላስዉ፥ “ህዛ፥ አስ ኔፐ መርናዉ አይፈ ሞፖ” ያግስ። እያ ታማረት እ ገይሳ ስእዶሶና።
ፆሳ ኬꬃን ዛልኤይሳታ ከስስ
(ማቶ 21:12-17፤ ሉቃ 19:45-48፤ ዮሀ 2:13-22)
15 ኤንቲ የሩሳላመ ብዶሶና፤ የሱሲ ፆሳ ኬꬅ ገልድ፥ ያን ባይዘይሳታነ ሻመይሳታ ካረ ጎዶ ኦይክስ፤ ቃስ ሚሸ ላመይሳታ ፃርጴዛነ ሆለ ባይዘይሳታ ኦይድያ ሽር የግድ፥ 16 አስ አይብባካ ቶክድ፥ ፆሳ ኬꬃ ግዶራ አꬎና መላ ድግስ። 17 የሱሲ አሳ ሀይሳዳ ያግድ ታማርስስ፦ “ጌሻ ማፃፋን፥ ‘ታ ኬꬃይ አስ ኡባይ ፆሳ ዎስያ ኬꬅ ግዳና’ ጌተትድ ፃፈትስ። ሽን ህንተ እያ ፓንጋት ቆሰትያ ጎንጎሎ ኦꬅደታ” ያግስ። እሳ 56:7፤ ኤርም 7:11.
18 ካህነ ሀላቃትነ ህገ አስታማረት ሄሳ ስእድ፥ እያ ዎꬋናዉ ኦገ ኮይዶሶና። ሽን ዳሮ አሳይ እያ ትምርትያን ማላለትያ ግሾ፥ እያዉ ባብዶሶና።
19 ሳአይ ኦማርስያ ዎደ የሱሲነ እያ ታማረት ካታማፐ ጋፃ ከይዶሶና።
ባላሰ ምꬅያ መላሱ
(ማቶ 21:20-22)
20 ኤንቲ ዎንተꬃ ጋላስ ሄ ኦግያራ አꬍሸ፥ ሄ ባላስያ ፃጶራ መልዳሮ በእዶሶና። 21 ጰፅሮስ አኬክድ፥ “አስታማርያዉ፥ ሄኮ፥ ኔኒ ባድዳ ባላስያ መላሱ” ያግስ።
22 የሱሲ ዛሪድ፥ “ፆሳ አማንተ። 23 ታኒ ህንተዉ ቱማ ኦዳይስ፤ ኦንካ ባ ዎዛናን ስꬎና ግዳባይ ሀናናይሳ አማንድ፥ ሀ ዙማ፥ ‘ደንዳዳ አባን ኩንዳ’ ያግኮ እያዉ ሀናና። ማቶ 17:20፤ 2 ቆሮ 13:2. 24 ሄሳ ግሾ፥ ታኒ ህንተዉ ኦዳይስ፤ ፆሳ ህንተ ዎስያባነ ኦይችያባ አይባ ግድኮካ ኤክዳዳ አማንተ፥ ህንተ ኤካና። 25 ፆሳ ዎሳናዉ ህንተ ኤቅያ ዎደ፥ ሳሎን ደእያ ህንተ አዋይ ህንተ ናጋራ አቶ ጋና መላ፥ ኦንካ ህንተና ናቅዳባይ ደእኮ፥ እያዉ አቶ ጊተ። 26 ሽን አሳ ናጋራ ህንተ አቶ ጎና እፅኮ፥ ሳሎን ደእያ ህንተ አዋይካ ህንተ ናጋራ ህንተዉ አቶ ጌና” ያግስ።
የሱሳ ማታይ ኦይሸትስ
(ማቶ 21:23-27፤ ሉቃ 20:1-8)
27 ኤንቲ ዛሪድ የሩሳላመ ብዶሶና። የሱሲ ፆሳ ኬꬃን ሄመትሽን፥ ካህነ ሀላቃት፥ ህገ አስታማረትነ ጭማት እያኮ ይድ፥ 28 “ኔኒ ሀይሳ ኦꬃናዉ ነዉ አይ ማት ደኢ? ዎይኮ ነዉ ሀ ማታ እምዳይ ኦኔ?” ያግዶሶና።
29 የሱሲ ዛሪድ፥ “ታ ህንተና እስባ ኦይቻና፥ ታዉ ኦድተ። ታ ቃስ ሀይሳ አይ ማታን ኦꬅያኮ፥ ህንተዉ ኦዳና። 30 ዮሃንሳ ፅንቃተይ ፆሳፈየ ዎይኮ አሳፔ? ታዉ ኦድተ” ያግስ።
31 ኤንቲ ባንታ ግዶን ፓላማ ዶምድ፥ “ኑኒ፥ ‘ፆሳፈ’ ጊኮ፥ እ ኑኮ፥ ‘ያትን፥ ዮሃንስ ኦድዳይሳ አይስ አማንበከቲ?’ ያጋና። 32 ‘አሳፐ ጊኮ’ አሳ ኡባይ ዮሃንስ ናበ ግደይሳ ኤሮሶና።” ሄሳ ግሾ፥ አሳስ ያይዶሶና። 33 ሄሳ ግሾ፥ ኤንቲ የሱሳኮ፥ “ኑኒ ኤሮኮ” ያግድ ዛርዶሶና።
የሱሲ፥ “ታንካ ሀይሳ አይ ማታን ኦꬅያኮ፥ ህንተዉ ኦድከ” ያግስ።