15
የሱሲ ጵላፆሳ ስንꬃን
(ማቶ 27:1-2፥ 11-14፤ ሉቃ 23:1-5፤ ዮሀ 18:28-38)
1 ዎንታ ጉራ ኤለስድ ካህነ ሀላቃት፥ ጭማት፥ ህገ አስታማረትነ አይሁደ ሻንጎት ኡባይ ሺቅድ ማቀትዶሶና። ኤንቲ የሱሳ ቃች ኤፍድ ጵላፆሳስ አꬅድ እምዶሶና።
2 ጵላፆስ እያኮ፥ “ኔኒ አይሁደ ካዎ?” ያግድ ኦይችስ።
የሱሲ ዛሪድ፥ “ነ ጋዳሳ” ያግስ።
3 ካህነ ሀላቃት የሱሳ ዳሮባን ሞትዶሶና። 4 ሽን ጵላፆስ ዛሪድ የሱሳኮ፥ “ነዉ ዛርያባይ ባዌ? ኤንቲ ነ ቦላ አይ መላ ሞቱዋ ኤህያኮ በእኪ?” ያግስ።
5 ሽን የሱሲ ሀራባ ዛሮና እፅን፥ ጵላፆስ ማላለትስ።
የሱሲ ሀይቆ ፕርደትስ
(ማቶ 27:15-26፤ ሉቃ 23:13-25፤ ዮሀ 18:39-40፤ 19:1-16)
6 ጵላፆሳስ ፓስካ ባኣለ ቦንችያ ጋላሳን አሳይ ኮያ እስ አስ ቃሾፐ ብልያ ሜዘይ ደኤስ። 7 ሄ ዎደ እስ ባርባና ጌተትያ ኡራይ ኦሹ ከስድ ሸምፖ ዎꬍዳ አሳራ እስፈ ቃሾ ኬꬃን ደኤስ። 8 ሺቅዳ ዳሮ አሳይ ጵላፆስ ካሰይሳዳ ኦꬃና መላ እያ ኦይችዶሶና። 9 ጵላፆስ አሳ ዛሪድ፥ “ታኒ ህንተዉ አይሁደታ ካዋ ብላናይሳ ኮዬቲ?” ያግድ ኦይችስ። 10 ሄሳ እ ግዳይ፥ ካህነ ሀላቃት የሱሳ ቃናትድ አꬅድ እምዳይሳ ኤርያ ግሾሳ።
11 ሽን ካህነ ሀላቃት የሱሳ ግሾ ባርባና ብላናዳ፥ ሄ ሺቅዳ አሳይ ጵላፆሳ ዎሳና መላ አሳ ማቅዶሶና። 12 ጵላፆስ ዛሪድ፥ “ያትን፥ ሀ ህንተ አይሁደ ካዎ ገይሳ ዋቶ?” ያግስ።
13 አሳይ ጵላፆሳ ቦላ ዋስድ፥ “ማስቃለ ቦላ እያ ካቃ” ያግዶሶና።
14 ጵላፆስ፥ “አይስ? እ አይ ኢታባ ኦꬅዴ?” ያግስ።
ሽን አሳይ ካሰይሳፈ ጉጅ ዋስድ፥ “ማስቃለ ቦላ እያ ካቃ” ያግዶሶና።
15 ጵላፆስ አሳ ኡፋይሳናዉ ኮይድ፥ ባርባና አሳስ ብልስ፤ ያትድ ልሶን የሱሳ ጋራፍድ፥ ማስቃልያ ቦላ ካቃና መላ ኤንታዉ አꬅድ እሚስ።
የሱሲ ቶሸትስ
(ማቶ 27:27-31፤ ዮሀ 19:2-3)
16 ሄሳፈ ጉየ፥ ዎታዳረት የሱሳ ደርያ ሃረይሳ ኦሶ ኬꬅ ኤፍድ፥ ሀራ ዎታዳረታ ኡባ እስፈ ፄግዶሶና። 17 ቃስ ዞኦ አፍላ እያ ማይዝዶሶና፤ አጉንꬃ ካላቻ ጊግስድ፥ እያ ሁጰን ዎꬅዶሶና። 18 ሄሳፈ ጉየ፥ እያኮ፥ “አይሁደታ ካዋዉ መርናዉ ካዎታ” ያግድ፥ እያዉ ዝግዶሶና። 19 እያ ሁጵያ ፃምአን ሾጭዶሶና፤ ቃስ እያ ቦላ ጩትዶሶና፤ ጉልባትድ እያዉ ጎይንዶሶና። 20 እያ ቶችዳፐ ጉየ ዞኦ አፍላ እያፐ ቃር ኤክድ፥ እያ አፍላ እያ ማይዝድ ማስቃለ ቦላ እያ ካቃናዉ ኤፍዶሶና።
የሱሲ ካቀትስ
(ማቶ 27:32-44፤ ሉቃ 23:26-43፤ ዮሀ 19:17-27)
21 ኤንቲ ብሸ፥ እስክንድረነ ሩፎሳ አዋ፥ ስሞና ጌተትያ ቀሬና ቢታ አስ፥ ጋፃረፐ ካታማ የይሳራ ጋሄትድ፥ የሱሳ ማስቃልያ ዎልቃን ቶስዶሶና። ሮመ 16:13. 22 ያትድ ጎልጎታ ጌተትያ በሳ የሱሳ ኤፍዶሶና። “ጎልጎታ” ጉሳይ “ሁጰ ጉገ” ጉሱ። 23 ሳኮይ ስኤቶና መላ ካርበራ ዋላከትዳ ዎይነ ኡዮ ግድ እያዉ እምዶሶና፤ ሽን እ ኡዮና እፅስ። 24 ኤንቲ ማስቃለ ቦላ እያ ካቅዶሶና። ኦና አይብ ጋካኔኮ ግድ እያ አፍላ ሻክድ ሳማ የግዶሶና።
25 ኤንቲ ማስቃለ ቦላ እያ ካቅያ ዎደ ዎንታፈ ሄꬑ ሳተ። 26 ኤንቲ፥ “አይሁደ ካዋ” ያግድ እያ ሞትያ ፁፈ ፃፍድ ዎꬅዶሶና። 27 የሱሳራ ናምኡ ፓንጋታ እሱዋ እያፐ ኡሻቻ ባጋራ ሀንኩዋ እያፐ ሀድርሳ ባጋራ ማስቃለ ቦላ ካቅዶሶና። 28 ጌሻ ማፃፋይ፥ “ኢታባ ኦꬅዳ አሳታራ እ ፓይደትስ” ጌተትዳይስ ፖለትስ። እሳ 53:12.
29 ኦገራ አꬍያ አሳይ የሱሳ ካꬍድ፥ ባንታ ሁጵያ ቃꬅድ ጫይዶሶና፤ “ሄኮ! ፆሳ ኬꬃ ላላዳ ሄꬑ ጋላሳ ግዶን ኬፀይሶ፥ ነ ሁጵያ አሻ፤ ማዝ 22:7፤ 109:25፤ ማር 14:58፤ ዮሀ 2:19. 30 አነ ማስቃልያ ቦላፈ ዎꬋ” ያግዶሶና።
31 ሄሳዳካ፥ ካህነ ሀላቃት ህግያ ታማርሰይሳታራ እስፈ የሱሳ ቶችድ፥ “ሀራታ አሽስ፥ ሽን ባና አሻናዉ ዳንዳኤና፤ 32 ኑኒ በእድ አማናና መላ ክርስቶስ፥ እስራኤለ ካዎይ፥ አነ ማስቃለ ቦላፈ ሀእ ዎꬎ” ያግዶሶና። ቃስ ሀር አቶሽን፥ እያራ ማስቃለ ቦላ ካቀትዳይሳትካ እያ ቶችዶሶና።
የሱሳ ሀይቁዋ
(ማቶ 27:45-56፤ ሉቃ 23:44-49፤ ዮሀ 19:28-30)
33 ኡሱፑን ሳተፐ ዶምድ፥ ኡዱፉን ሳተ ጋካናዉ ቢታ ኡባይ ꬉምስ። 34 ኡዱፉን ሳተን የሱሲ፥ “ኤሎሄ፥ ኤሎሄ፥ ላማ ሳባቅታኒ?” ያግድ ዋስስ። ሄሳ ጉሳይ፥ “ታ ፆሳዉ፥ ታ ፆሳዉ፥ ታና አይስ አጋዲ?” ጉሱ። ማዝ 22:1.
35 ሄሳን ኤቅዳ አሳፐ እሶይ እሶይ ሄሳ ስእድ፥ “ሄኮ፥ ኤልያሳ ፄጌስ” ያግስ። 36 ሄ አሳፐ እሶይ ዎፅድ፥ እስፖንጀን ጫላ ዎይነ ኩንꬅስ፤ ሄሳ ፃምአ ፄራን ዎꬅድ፥ “ናግተ፤ ኤልያስ ማስቃለ ቦላፈ እያ ዎꬍሳናዉ ያነኮ አነ በኦስ” ያግድ የሱሳ ዶናኮ ኡሻናዉ ሺሽስ። ማዝ 69:21.
37 የሱሲ ባ ቃላ ꬎቁ ኦꬅ ዋስድ፥ ሀይቅስ።
38 ፆሳ ኬꬃን ካቀትዳ ማጋራጆይ ቆሞፈ ዱገ ጋካናዉ፥ ናምኡ ከይድ ዳከት ዎꬍስ።ከሳ 26:31. 39 ማስቃልያፐ ስንꬃ ባጋራ ያን ኤቅዳ እስ ማቶ ሀላቃይ፥ የሱሲ ዋንድ ሀይቅዳኮ በእዳ ዎደ፥ “ሀ ኡራይ ቱማ ፆሳ ናአ” ያግስ።
40 ሄሳ ሃሆን ኤቅድ በእያ ጉꬃ ማጫሳት ደኦሶና። ኤንታ ግዶን ማግደላ ማይራማ፥ ካሉዋ ያይቆባነ ዮሳ አይያ ማይራማነ ሳሎማ ደኦሶና። 41 ሄ ማጫሳት የሱሲ ጋልላን ደእያ ዎደ እያ ካልዳይሳታነ እያ ሞክዳይሳታ ቃስ የሱሳራ እስፈ የሩሳላመ ብዳ ሀራ ዳሮ ማጫሳት ያን ደኦሶና። ሉቃ 8:2-3.
የሱሲ ሞገትስ
(ማቶ 27:57-61፤ ሉቃ 23:50-56፤ ዮሀ 19:38-42)
42-43 ሳእ ኦማርስዳ ዎደ፥ ሺቅዳ አሳን ቦንቸትዳ አይሁደ ሻንጎታፐ እሶይ፥ ዮሰፋ ጌተትያ ኡራይ፥ ፆሳ ካዎተꬃይ ያናይሳ ናግሸ ደኤይስ፥ አርማተ ካታማ አስ ደኤይስ ይስ። ዎንተ ሳምባታስ ጊገትያ ጋላስ ግድዳ ግሾ፥ ዮሰፍ ምንድ ጵላፆሳኮ ብድ፥ የሱሳ አሀ ኤካናዉ ዎስስ። 44 ጵላፆስ፥ የሱሲ ሀይቅዳይሳ ስእዳ ዎደ ማላለትስ፤ ማቶ ሀላቃ ፄግድ፥ “እ ሀይቅድ ጋምእዴ?” ያግድ ኦይችስ። 45 ጵላፆስ፥ የሱሲ ሀይቅዳይሳ ማቶ ሀላቃፐ ስእድ እያ አሀ ዮሰፋስ እሚስ። 46 ዮሰፍ ሞጎ አፍላ ሻምስ፤ የሱሳ አሀ ማስቃልያፐ ዎꬅድ፥ አፍላን ፃፅድ፥ ሹቻፈ ዎጨትዳ ዱፎን እያ አሀ ሞግስ። ቃስ ሄ ዱፉዋ ዶናን ግታ ሹቹ ጎንዶርስድ ዎꬅስ። 47 ማግደላ ማይራማነ ዮሳ አይያ ማይራማ የሱሳ አሀ ኤንቲ አዉን ዎꬅያኮ በኦሶና።