16
የሱሳ ሀይቆፐ ደንዱዋ
(ማቶ 28:1-8፤ ሉቃ 24:1-12፤ ዮሀ 20:1-10)
1 ሳምባት አꬍዳፐ ጉየ፥ ማግደላ ማይራማ፥ ያይቆባ አይያ ማይራማነ ሳሎማ ብድ፥ የሱሳ አሀ ትያናዉ ሽቶ ሻምዶሶና። 2 ዎጋ ዎደ ዎንታ ዳሮ ጉራ ፃልቀይ ጫርሽን፥ ዱፎ ብዶሶና። 3 ኤንቲ ባንታ ግዶን እሶይ እሱዋራ፥ “ዱፉዋ ዶናፐ ኑስ ሹቻ ኦኔ ጎንዶርስድ ድጋናይ?” ያግድ ኦደትዶሶና።
4 ኤንቲ ፄልያ ዎደ ሄ ዳሮ ግታ ሹቻይ ጎንዶረትድ ክችዳይሳ በእዶሶና። 5 የሱሲ ሞገትዳ ዱፉዋ ግዶ ገልያ ዎደ እስ ፓንꬃ አደይ ቦꬃ ማኦ ማእድ፥ ኡሻቻ ባጋራ ኡትዳይሳ በእድ ዳጋምዶሶና።
6 ሽን እ ኤንታኮ፥ “ዳጋሞፍተ፤ ማስቃልያ ቦላ ካቀትዳ፥ ናዝረተ የሱሳ ህንተ ኮየይሳ ታኒ ኤራይስ። እ ሀይሳን ዴና፥ ሀይቆፐ ደንድስ። ኤንቲ እያ ሞግዳ በሳ ሀይሳ በእተ። 7 ሀእ ብድ የሱሳ ታማረታስነ ጰፅሮሳስ፥ ‘የሱሲ ህንተፈ ስንꬃትድ ጋልላ ቤስ። እ፥ ህንተዉ ኦድዳይሳዳ ህንተ እያ ያን በአና’ ያግድ ኦድተ” ያግስ። ማቶ 26:32፤ ማር 14:28.
8 ማጫሳት ያሻን ኮኮርሸ ዱፎፐ ከይድ ባቃትዶሶና። ቃስ ኤንቲ ያይዳ ግሾ፥ ሄሳ ኦደስካ አይኮካ ኦድቦኮና። *እስ እስ በን ማፃፋት ማርቆሳ ዎንገላ ፓይዶ 8 ቦላ ኤሶሶና። ቃስ እስ እስ ማፃፋት ፓይዶ 9-20 ጋካናዉ ደእያ ቆፋ ጉጆኮና። ግዶሽን፥ ፓይዶ 8 ካልድ ደእያ ጉጆሶና። ሄስካ [ማጫሳት ብድ፥ ኪታንቾይ ኦድዳባ ኡባ ጰፅሮሳስነ እያራ ደኤይሳታስ ቃንꬃን ኦድዶሶና። ሄሳፈ ጉየ፥ የሱሲ ባ ታማረታ ጌሽነ መርና አቶተꬃ ዎንገላ ኪታ ዶሎሀፐ ዉሎሀ ጋካናዉ ኪትስ።]
የሱሲ ማግደላ ማይራምስ ቆንጭስ
(ማቶ 28:9-10፤ ዮሀ 20:11-18)
9 የሱሲ ሀይቆፐ ደንድዳፐ ጉየ፥ ዎጋ ጋላስ ዎንታ፥ ላፑን ቱና አያናታ ከስዳ ማግደላ ማይራምስ ኮይሮትድ በንትስ። 10 እያ ባዳ ካሰ እያራ ደኤይሳታስ፥ ኤንቲ አዛንሸነ ዬክሸ ደእሽን ኦዳሱ። 11 ሽን የሱሲ ፓፃ ደኤይሳነ እዉ በንትዳይሳ ኤንቲ ስእዳ ዎደ እያ ገይሳ አማንቦኮና።
የሱሲ ናምኡ ታማረታስ ቆንጭስ
(ሉቃ 24:13-35)
12 ሄሳፈ ጉየ፥ ኤንታፈ ናምአት ካታማፐ ከይድ ብሽን፥ ኦገ ቦላ የሱሲ ካሰፐ ዱማትድ ኤንታዉ በንትስ። 13 ኤንቲ ጉየ ስሚድ፥ ሀራታስ ኦድዶሶና፥ ሽን ሀራትካ ኤንታ ኦዳ ቱማ ግቦኮና።
የሱሲ ታማነ እስ ታማረታስ ቆንጭስ
(ማቶ 28:16-20፤ ሉቃ 24:36-49፤ ዮሀ 20:19-23፤ ሀዋ 1:6-8)
14 ጉየፐ ታማነ እስ እያ ታማረት ካꬅ ምሽን፥ የሱሲ ኤንታዉ በንትስ። ኤንታዉ አማኖይ ባይና ግሾነ ሀይቆፐ እ ደንድዳይሳ በእዳ አሳይ ኦድን፥ ኤንቲ አማኖና እፅዳ ግሾ እ ኤንታ ቦርስ።
15 እ ኤንታኮ፥ “ቢታ ኡባ ብድ አሳ ኡባስ ዎንገላ ኦድተ። ሀዋ 1:8. 16 አማነይነ ፃማቀተይ አታና፥ ሽን አማኖናይ ፕርደታና። 17 አማነይሳታስ ሀ ማላታት እመታና። ኤንቲ ታ ሱንꬃን ቱና አያናታ ከሳና፥ ኦራꬃ ዶናን ኦደታና። 18 ኤንቲ ሾሹ ኦይክኮካ ዎይኮ ዎꬍያባ ኡይኮካ ኤንታ ቆሄና። ቃስ ኤንቲ ባንታ ኩሽያ ሀርጋንቾታ ቦላ ዎꬅድ ኤንታ ፓꬃና” ያግስ።
የሱሲ ፑደ ሳሎ ብስ
(ሉቃ 24:50-53፤ ሀዋ 1:9-11)
19 ጎዳይ የሱሲ ታማረታራ ኦደትዳፐ ጉየ፥ ፑደ ሳሎ ከይስ፤ ፆሳፈ ኡሻቻ ባጋራ ኡትስ። ሀዋ 1:9. 20 እያ ታማረት ብዳ በሳ ኡባን ቃላ ኦድዶሶና። ጎዳይካ ኤንታራ እስፈ ኦꬄስ። ኤንቲ ኦድያ ቃላይ ቱማ ግድዳይሳ ፆሳይ ኤንታዉ እምያ ማላታታን ኤርስስ።