1 አርፀክስስ ካዎትዳ ላታማንꬆ ላይꬃን፥ ንሳነ ጌተትያ አጌናን፥ እስ ጋላስ ካዋ ስንꬃን ዎይነ ኡሻ ሺሻስ። ሄ ጋላሰፐ አትሽን፥ ካሰ ካዋ ስንꬃን አዛና ኤርከ። 2 ሄሳ ግሾ፥ ካዎይ፥ “ነና ሳክያባይ ባዋ፥ ሽን ሀይሳ መላ አይስ አዛናዲ? ሄስ ነ ዎዛናይ እስባን አዛንዳይሳ በሴስ” ያግስ።

ያግን፥ ታኒ ዳሮ ያያዳ፥ ካዋኮ፥ 3 “ካዎይ መርናዉ ካዎቶ! ታ ማይዛት ሞገትዳ ካታማይ ላለትድ ꬋይን፥ ቃስ ሄ ካታማ ድርሳ ፐንገት ታማን ፁገትን አይስ አዛንክና?” ያጋስ።

4 ካዎይ ዛሪድ፥ “ያትን፥ ሀእ ታ ነዉ አይ ኦꬃና መላ ኮያይ?” ያግስ።

ታኒ ሳሎ ፆሳ ዎሳ ስማዳ፥ 5 ካዋኮ፥ “ካዋዉ፥ ታ ነ ስንꬃን ሳባ ደምዳባ ግድኮነ ታ ኦይሻይ ኡፋይስያባ ግድኮ፥ ይሁዳ ቢታ፥ ታ ማይዛት ሞገትዳ ካታማ ባዳ ዛራ ኬፃና መላ ታና የዳርክ” ያጋስ።

6 ሄ ዎደ ካውያ፥ ካዋ አርፀክስሳ ማታን ኡትዳ ደእሽን፥ ካዎይ ዛሪድ፥ “ነ ኦገይ አይ መላ ዎደ ኤካኔ? ነ አዉደ ስማኔ?” ያግድ ታና ኦይችስ። ታኒ ታ ስማና ዎድያ እያዉ ኦድን፥ ካዎይ ኡፋይትድ ታና የድስ።

7 ቃስ፥ “ካዋ፥ ነና ኡፋይስያባ ግድኮ፥ ታ ይሁዳ ጋካናዉ ሄ ቢታራ ካንꬃዳ አꬋና መላ ኤፍራፂሳ ሻፋፐ ዉሎሀ ባጋራ ደእያ ቢታ ሃረይሳታስ ዳብዳበይ ፃፈቶ” ያጋዳ ካዋ ዎሳስ። 8 ሄሳዳካ፥ “ፆሳ ኬꬃ ፐንግያ ጊግሳናዉ፥ ካታማ ግምበ ድርሳ ድራናዉነ ታ ዳና ኬꬃ ኬፃናዉ ታዉ ምꬅ እማና መላ ካዎ ዎራ ናግያ አሳፋስ ዳብዳበይ ፃፈቶ” ያጋዳ ኦይቻስ። ፆሳ ሎኦ ኩሸይ ታራ ደእያ ግሾ ካዎይ ታኒ ኦይችዳባ ኡባ እሚስ።

9 ካዎይ ታራ ጉꬃ ቶራ ሞጮናታነ ፓራ ቶገይሳታ የድስ። ታኒ ኤንታራ እስፈ ኤፍራፂሳ ሻፋፐ ዉሎሀ ባጋ ቢታ ጋካዳ ካዎይ የድዳ ዳብዳብያ ሄ ቢታ ሃረይሳታስ እማስ። 10 ሽን ሆሮና ካታማ አስ ግድዳ ሳንባላፅነ አሞነ ቢታ ሀላቃ ግድዳ ፆበይ፥ “እስራኤለ አሳስ ሎኦባ ኦꬅያ አስ ይስ” ጌተትዳይሳ ስእዳ ዎደ ዳሮ ይሎትዶሶና።

11 ታኒ የሩሳላመ ጋካዳ ሄꬑ ጋላስ ያን ጋምአስ። 12 የሩሳላመስ ታኒ ኦꬃና መላ ፆሳይ ታ ዎዛናን ዎꬅዳ ቆፋ ኦደስካ ኦዳብከ። ሄሳፈ ጉየ፥ ታራ ደእያ አሳፐ ጉꬃታ ኤካዳ ቃማ ደንዳዳ ባስ። ሄ ዎደ ታኒ ቶግዳ መህያፐ ሀራ ቶጋ መሄይ ኑስ ባዋ። 13 ታኒ ብላሄ ደንዳዳ ዛንጋራ ፐንግያራ ካንꬃዳ፥ ዳወ ፑልቶ ጌተትያ በሳራ አꬋዳ፥ ፕቶ ፐንገ *ፕቶ ፐንገ፦ የሩሳላመ ካታማ ቡረን ኬꬃ ፕቶ ኡባ የግያ በሲ ጉሱ። ጌተትያ በሳ ጋካናዉ ባስ። ያራ አꬋሸ ላለትዳ የሩሳላመ ግምብያነ ታማን ፁገትዳ ግምበ ፐንገታ በአስ። 14 ሄሳፈ ስማዳ ፑልቶ ፐንግያኮነ ካዋ ተቀ ሃꬃይ ደእያ በሳ ባስ። ግዶሽን፥ ታ ቶግዳ መሄይ አꬍያ ኦገ ደማብከ። 15 ሄሳ ግሾ፥ ቃማ ቀድሮና ዛንጋራ ግዶራ አꬋዳ ግምብያ በአስ። ዉርሰꬃን፥ ጉየ ስማዳ ዛንጋራ ፐንግያራ ካታማ ገላስ።

16 ያን ደእያ ሀላቃታፐ ኦንካ ታኒ አዉ ብዳኮ፥ ዎይኮ አይ ኦꬅዳኮ ኤርቤና። አይስ ጊኮ፥ ታኒ አይሁደታስ፥ ካህነታስ፥ ቦንቸትዳ አሳታስ፥ ሀላቃታስነ ኦሱዋ ኦꬃናዉ ደእያ አሳፐ ኦደስካ ታ ቆፋ ኦዳብከ። 17 ሄሰፈ ጉየ፥ ኤንታኮ፥ “ኑኒ አይ መላ መቶን ደእያኮ በኤታ፤ የሩሳላመ ካታማይ ላለትስ፤ ግምበ ፐንገት ታማን ፁገትዶሶና። ሀ ዪተ፥ የሩሳላመ ግምብያ ዛሪድ ግምቦስ፤ ኑና ጋክዳ ዬላ አነ ድጎስ” ያጋስ። 18 ቃስ ፆሳ ሎኦ ኩሸይ ታራ ደኤይሳነ ካዎይ ታዉ ኦድዳባ ኡባ ኤንታዉ ኦዳስ።

ኤንቲ ዛሪድ፥ “አነ ደንዶስ፤ ዛሪድ ግምቦስ” ያግድ ባንታ ኩሽያ ሎኦ ኦሶስ ምንꬅዶሶና።

19 ሽን ሆሮና ካታማ አስ ግድዳ ሳንባላፅ፥ አሞነ ቢታ አስ ግድዳ ፆበይነ አራባ ቢታ አስ ግድዳ ጌሳመይ ሄሳ ስእዳ ዎደ፥ ኑ ቦላ ቀልቅስድ ሚጭዶሶና። “ሀይስ ህንተ ኦꬅያባይ አይቤ? ዎይኮ ካዋ ቦላ ማካላናዉ ኮዬቲ?” ያግድ ኦይችዶሶና።

20 ታኒ ዛራዳ፥ “ሳሎ ፆሳይ ኑና ፖልሳና፤ ኑኒ እያ አይለት ደንድድ ኦꬃና። ሽን የሩሳላመን ህንተዉ ግሾይ ዎይኮ ህንተና ጋꬅያባይ ዎይኮ ህንተና ቆፍስያባይ ባዋ” ያጋስ።