1 ካህነ ሀላቃይ ኤልያሴብነ ሀራ ካህነት ዶርሳ ፐንግያ ዛር ግምብድ ፆሳስ ዱማይዶሶና፤ ሳንቃ አꬅዶሶና። ኤንቲ ፄታ ጌተትያ ግምበ ሻኩዋፈ ብድ ሀናንኤላ ጌተትያ ግምበ ሻኩዋ ጋካናዉ ግምብድ ፆሳስ ዱማይዶሶና።

2 ኤንታ ላንቀን ደእያ በሳ እያርኮ አሳይ ግምብን፥ ካልድ ደኤይሳ እምራ ናአይ ዛኩር ግምብስ።

3 ሀስናአ ናይት ሞሎ ፐንግያ ግምብዶሶና። ኤንቲ ጎባነ ኤስድ፥ ሳንቃ አꬅዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።

4 ኤንታ ካልድ ደእያ በሳ ሀቆፃ ናአ ግድዳ ኡራያ ናአይ ማረሞት ግምብስ።

እያፐ ካልድ ደእያ በሳ ማሰዛቤላ ናአ ባራካ ናአይ ማሱላም ግምብስ።

እያፐ ካልድ ደእያ በሳ ባአና ናአይ ሳዶቅ ግምብስ።

5 እያ ማታን ደእያ በሳ ታቆሀ ካታማ አሳት ግምብዶሶና። ሽን ሄ ካታማ ሀላቃት ባንታዉ እመትዳ ኦሱዋ ኦꬆና እፅዶሶና።

6 ፓሰሀ ናአይ ዮዳሄይነ ባሶድያ ናአይ ማሱላም ጋልአ ፐንግያ ግምብዶሶና። ኤንቲ ጎባነ ኤስድ፥ ሳንቃ አꬅዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።

7 ኤንታ ላንቀን ደእያ በሳ ጋባኦና ካታማ አስ ግድዳ ማላፅነ መሮኖታ ካታማ አስ ግድዳ ያዶን ግምብዶሶና። ጋባኦናነ ምፅጳ ካታማ አሳይ ኤንታራ እስፈ ግድድ፥ ኤፍራፂሳ ሻፋፐ ዉሎሀ ባጋ ቢታ ሃረይስ ደእያ ኬꬃ ጋካናዉ ደእያ በሳ ግምብዶሶና።

8 ዎርቃ ሼሽያ ሀርሀያ ናአይ ኡዝኤል ኤንታ ማታን ደእያ በሳ ግምብስ። ቃስ እያ ማታን ደእያ በሳ ሽቶ ኦꬅያ ሀናን ግምብስ። ኤንቲ ናምአይ እስፈ የሩሳላመ ዳልጋ ግምብያ ጌተትያ በሳ ጋካናዉ ደእያ በሳ ግምብዶሶና።

9 ኤንታ ማታን ደእያ በሳ ሁራ ናአይ፥ የሩሳላመ ዎራዳስ ባጋ ሃርያ ራፋይ ግምብስ።

10 ሀሩማ ናአይ ያዳይ ባ ኬꬃፈ ስንꬃ ባጋራ ደእያ በሳ ግምብስ።

እያ ማታን ደእያ በሳ አሰባና ናአይ ሀቱሽ ግምብስ።

11 ሀርማ ናአይ ማልከይነ ፓሀት-ሞአባ ናአይ ሀሹብ እያ ማታን ደእያ በሳነ እቶነ ሻኮ ግምብያ ግምብዶሶና።

12 ኤንታ ማታን ደእያ በሳ ሀሎሄሳ ናአይ፥ የሩሳላመ ዎራዳስ ናምአንꬆ ባጋ ሃርያ ሳሉምነ እያ ማጫ ናይት ግምብዶሶና።

13 ሀኑንነ ዛኖሀ ካታማን ደእያ አሳይ እስፈ ዛንጋራ ፐንግያ ግምብዶሶና። ኤንቲ ጎባነ ኤስድ፥ ሳንቃ አꬅዶሶና፤ ሳንቃ ጎርድያ ምꬃነ ምꬃ ገልስያ ሳጋዩዋ ጊግስዶሶና። ፕቶ ፐንግያ ጋካናዉ እስ ሙኩሉ ዋꬋ አዱሳ ግምብያ ጉጅድ ግምብዶሶና።

14 ራካባ ናአይ፥ ቤት-ሀካሬማ ዎራዳ ሃርያ ማልከይ ፕቶ ፐንግያ ግምብስ። ኤንቲ ጎባነ ኤስድ፥ ሳንቃ አꬅዶሶና፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስዶሶና።

15 ኮልሃዛ ናአይ፥ ምፅጳ ዎራዳ ሃርያ ሳሉም ፑልቶ ፐንግያ ዛሪድ ግምብስ። እ ፐንግያስ ካማ ጊግስድ ሳንቃ አꬅስ፤ ሳንቃ ጎርድያ ካሱዋነ ካሱዋ ገልስያ ሳጋዩዋ ጊግስስ። ቃስ፥ ሰላሀ ተቀ ሃꬃይ ደእያ ባጋራ ካዋ አታክልተ በሳፈ ዶምድ፥ ዳዊታ ካታማፐ ዱገ ዎꬍስያ ደꬃ ጋካናዉ ደእያ ግምብያ ግምብስ። 16 ቤት-ፁራ ዎራዳስ ባጋ ሃርያ አዝቡቀ ናአይ ናህመይ ግምብስ። እ ዳዊታ ዱፉዋፐ ስንꬃ ባጋራ ደእያ በሳ ጋካናዉ፥ አስ ኦꬅዳ ተቀ ሃꬃይ ደእያ በሳ ጋካናዉ፥ ኦላንቾታ ኬꬃ ጋካናዉ ደእያ በሳ ግምብስ።

17 ሀይሳፈ ካለይሳ ባና ናኣ ረሁማ አዋተꬃ ጋርሳን ደእያ ሌወት ግምብዶሶና።

ኤንታ ማታን ደእያ በሳ ቅኣላ ዎራዳስ ባጋ ሃርያ ሀሻብ ባ ዎራዳ ሱንꬃን ግምብስ። 18 እያፐ ካልድ ሄናዳዳ ናአይ፥ ቅኣላ ዎራዳስ ናምአንꬆ ባጋ ሃርያ ባው ግምብዶሶና። 19 ኤንታ ማታን ደእያ በሳ እያሱ ናአይ፥ ምፅጳ ዎራዳ ሃርያ ኤዘር ግምብስ። እ ኦላ ሚሸ ዎꬅያ ኬꬃፈ ስንꬃ ባጋራ ግምብያ ማዛንያ ጋካናዉ ደእያ በሳ ግምብስ። 20 እያፐ ካለይሳ ዛባያ ናአይ ባሮክ፥ ግምብያ ማዛንያፐ ብድ፥ ካህነ ሀላቃ ኤልያሴባ ኬꬃ ፐንግያ ጋካናዉ ደእያ በሳ ግምብስ። 21 እያፐ ካለይሳ ሀቆፃ ናኣ ግድዳ ኡራያ ናአይ ማረሞት ኤልያሴባ ኬꬃ ፐንግያፈ ዶምድ፥ ዉርሰꬅ ጋካናዉ ደእያ በሳ ግምብስ።

22 እያፐ ካልድ ደኤይሳ ሄራን ደእያ ካህነት ግምብዶሶና። 23 ኤንታፈ ካልድ ብንያመይነ ሀሹብ ባንታ ኬꬃ ስንꬃን ደእያ በሳ ግምብዶሶና።

ኤንታፈ ካልድ አናንያ ናአ ግድዳ ማእሰያ ናአይ አዛር ባ ኬꬃ ስንꬃን ደእያ በሳ ግምብስ። 24 እያፐ ካልድ አዛራ ኬꬃፈ ብድ፥ ግምብያ ማዛንያ ጋካናዉ ደእያ በሳ ሄናዳዳ ናአይ በኑይ ግምብስ። 25 ኡዛያ ናአይ ፓላል ግምብያ ማዛንያፐ ዶምድ፥ እ ናገይሳታ ዳባባ ማታን ደእያ ቆሞ ባጋ ካዎ ጋꬎ ናጎ ግምብያ ጋካናዉ ደእያ በሳ ግምብስ።

እያፐ ካልድ ደኤይሳ ፓኖሰ ናአይ ፓዳይነ 26 ኦፌላ ደርያ ቦላ ደእያ ፆሳ ኬꬃ አይለት ግምብዶሶና። ኤንቲ ሃꬃ ፐንግያ ማታን ዶሎሀ ባጋን ደእያ በሳነ ናጎ ግምብያ ጋካናዉ ደእያ በሳ ግምብዶሶና። 27 ኤንታፈ ካልድ ታቆሀ ካታማ አሳይ ግምብያ ስንꬃን ደእያ በሳፈ ብድ፥ ኦፌላ ማታን ደእያ ግምብያ ጋካናዉ ደእያ በሳ ግምብዶሶና።

28 ፓራ ፐንግያፈ ቆሞ ባጋን፥ ባንታ ኬꬃ ስንꬃን ደእያ በሳ ካህነት ግምብዶሶና። 29 ኤንታፈ ካልድ እመራ ናአይ ሳዶቅ ባ ኬꬃ ስንꬃን ደእያ በሳ ግምብስ።

እያፐ ካልድ ዶሎሀ ፐንግያ ናግያ ሳካና ናአይ ሻማየይ ግምብስ። 30 እያፐ ካልድ ሳላማ ናአይ ሀናንነ ዛላፋ ኡሱፑንꬆ ናአ ግድዳ ሀኑኒራ ግምብዶሶና።

ኤንታፈ ካልድ ባራካ ናአይ ማሱላም ባ ክፍልያፐ ስንꬃን ደእያ በሳ ግምብስ። 31 እያፐ ካልድ ፆሞሶ ፐንግያ ስንꬃን ደእያ ፆሳ ኬꬃ ኦሳንቾታነ ዛልአንቾታ ኬꬃ ጋካናዉ ደእያ በሳ ዎርቃ ሼሽያ ማልከይ ግምብስ። ቃስ እ ግምበ ማዛንያስ ቦላ ባጋራ ደእያ በሳካ ግምብስ። 32 ማዛንያስ ቆሞ ባጋ ክፍልያፐነ ዶርሳ ፐንግያፈ ግዶን ደእያ በሳ ዎርቃ ሼሸይሳትነ ዛልአንቾት ግምብዶሶና።