1 እስ ዎደ አደትነ ኤንታ ማቸት ባንታ ኮቸ ግድዳ አይሁደታ ቦላ ዋስዶሶና። 2 ኤንታፈ እሶት እሶት፥ “ኑስ፥ ዳሮ አደ ናይትነ ማጫ ናይት ደእያ ግሾ ኑ ሸምፑዋ አሻናዉ ኑስ ካꬅ ኮሼስ” ያግዶሶና።

3 ሀራት ቃስ፥ “ኑና ጋክዳ ኢታ ኮሻፐ ደንዶይሳን ካꬅ ደማና ግድ፥ ኑ ጎሻ ጋድያ፥ ኑ ዎይነ ጋድያነ ኑ ኬꬃ ኦይꬅዳ” ያግዶሶና።

4 ቃስ አትዳይሳት፥ “ካዎ ጊራ ጊራናዉ ሚሸ ꬋይድ ኑ ጎሻ ጋድያነ ኑ ዎይነ በሳ ኦይꬅድ ሚሸ ታልእዳ። 5 አይሁደ ኮቻታራ ኑኒ እስ አሾነ እስ ሱꬅ፤ ኑ ናይት ኤንታ ናይታ መላ። ሽን ኑኒ ኑ የልዳ ናይታ አይለተꬃስ አꬅድ እማናዉ ኡንኤትዳ፤ ኑ ማጫ ናይታፐ እሶት እሶት አይለተꬃስ ባይዘትዶሶና። ኑ ጎሻነ ኑ ዎይነ ጋድያ ኑፐ ኤከትዳ ግሾ ኑ ዎልቃ ꬋይዳ” ያግዶሶና።

6 ታኒ ኤንታ ዋሱዋነ ኦይሻ ስእዳ ዎደ ዳሮ ይሎታስ። 7 ታ ዎዛናን ኦꬃናባ ቆፕዳፐ ጉየ፥ ካለይሳታነ ሀላቃታ ፄጋዳ፥ “ህንተ፥ ህንተ እሻታስ የሎራ ታልእሸ ኡንኤꬄታ” ያጋዳ ኤንታ ካጫስ።

ሄ መቱዋባ ኤንታራ ኦደታናዉ ደርያ ሺሻዳ፥ 8 “አይሁደ ግዶናይሳታስ ባይዘትዳ አይሁደ ኮቸ ግድዳ ኑ እሻታ ዎዛናዉ ኑስ ዳንዳኤትዳባ ኡባ ኦꬅዳ። ሽን ህንተ እሻ ግድዳ አይሁደት ባንታ ኮቸ ግድዳ ህንተዉ፥ ባንታና ባይዛና መላ ኦꬄታ፤ ኑ ኤንታ ዛር ዎዛናዉ ኮሼስ” ያጋስ። ካለይሳት ዛራናባ ꬋይድ ስእ ግዶሶና።

9 ታኒ ካላዳ፥ “ህንተ ኦꬅያባይ ዎጋ ግደና፤ አይሁደ ግዶና ኑ ሞርከት ኑና ቀልቅሶና መላ ህንተ ኑ ፆሳስ ያያናዉነ ሱረባ ኦꬃናዉ በሰኔ? 10 ታኒ፥ ታ እሻትነ ታ ኦሳንቾት አሳስ ሚሸነ ካꬅ ታልእዳ፤ ግዶሽን፥ ኤንታፈ የሎ ኤከይስ አቶ። 11 ኤንታ ጎሻ፥ ዎይነነ ሻማሆ ዛይተ ጋድያነ ኬꬃ ኡባ ኤንታዉ ዛርተ። ቃስ ሚሸፐ፥ ካꬃፈ፥ ዎይነፐነ ዛይተፐ ህንተ ኤንታፈ ኤክዳ ፄታፐ እስ ኩሸ የሎ ኤክዳይሳ ኤለ ዛርተ” ያጋስ።

12 ኤንቲ ዛሪድ፥ “ኑኒ ኤክዳባ ኡባ ኤንታዉ ጉየ ዛራና፤ ኤንቲ ኑፐ ታልእዳይሳ ዛሮ ግድ አቾኮ፤ ነ ኑና ኪትዳይሳዳ ኦꬃና” ያግዶሶና።

ታኒ ካህነታ ታኮ ፄጋዳ ካለይሳት ባንታ ግዳ ቃላ ፖላና መላ ጫቅሳናዳ ኦꬃስ። 13 ታኒ ታ ማኡዋ ቃራዳ ቆቆፋሸ፥ “ህንተፈ ኦንካ ባ ግዳ ቃላ ፖሎና እፅኮ፥ ፆሳይ እያ፥ እያ ኬꬃፈነ እያ አቁዋፐ ሀይሳዳ ቆቆፍድ መላ ኩሸ አሾ” ያጋስ።

ሺቅዳ አሳ ኡባይ እስ ቃላን፥ “አምንእ” ያግድ ጎዳ ጋላትዶሶና። አሳ ኡባይ ጫቅዳይሳዳ ኦꬅዶሶና።

14 አርፀክስስ ካዎትዳ ላታማንꬆ ላይꬃፈ ዶምድ ሀስታማነ ናምአንꬆ ላይꬅ ጋካናዉ ታኒ ይሁዳ ቢታ ሃራስ። ሄ ታማነ ናምኡ ላይꬃ ግዶን ታና ግድን ዎይኮ ታ እሻት ሹማስ በሲያ ካꬃ ዳሞዘ ኤክቦኮ። 15 ሽን ታፐ ካሰ ሹመትዳይሳት አሳስ ዴፆ ቶሆ ግድድ፥ ጋላስ ጋላስ ካꬃስነ ዎይነ ኡሻስ ኦይታሙ ብራ ቃንፅስዶሶና። ሀር አቶሽን ሹማታ አይለት አሳ ቦላ ጎዳ ግድድ ኡንኤꬅድ ጋምእዶሶና። ሽን ታኒ ፆሳስ ያይዳ ግሾ፥ ሄሳዳ ኦꬃብከ። 16 ታዉ ደእያ ዎልቃ ኡባ የሩሳላመ ግምበ ኦሱዋስ እማስ፤ ታ ኦሳንቾትካ ታራ እስፈ ሄ ኦሱዋ ቦላ ጋምእዶሶና፤ ኑ አይብ ቢታካ ሻምቦኮ። 17 ኑ ሄራን ደእያ ካዎተꬃታፐ ይዳ አሳይ አትሽን፥ ጋላስ ጋላስ ታራ ምያ አይሁደትነ ካለይሳት ፄታነ እሻታማ። 18 ጋላስ ጋላስ እስ ቦር፥ ኡሱፑን ሞꬎ ዶርሳታነ ዳሮ ኩቶታ ሹክድ አሳስ ሺሾሶና፤ ቃስ ታሙ ጋላሳፐ እስ ቶሆ ዳሮ ባꬃ ዎይነ ኡሻ አጎሶና። ሽን አሳ ቦላ ደእያ ዴፆ ቶሁዋ ታ ኤርያ ግሾ ቢታ ሹማስ በሲያ ካꬃ ዳሞዘ ኦይቻብከ።

19 ታ ፆሳዉ፥ ታ ሀ አሳስ ኦꬅዳ ኬሀተꬃ ኡባ ቆፓዳ ታዉ ኬሀ።