1 ሳንባላፅ፥ ፆበይ፥ አራበ ቢታ አስ ግድዳ ጌሳመይነ ሀንኮ ኑ ሞርከት ኑኒ ግምብያ ኦꬅድ ፖልዳይሳነ ዶያ በሲ ባይናይሳ ስእዶሶና። ግዶሽን፥ ታ ግምበ ፐንገታስ ሳንቃ አꬃብከ። 2 ሳንባላፅነ ጌሳመይ፥ “ኦኖ ደምባን ደእያ ጉታታፐ እሱዋን ያዳ ኑራ ጋሄታ” ያግድ ኪታ የድዶሶና። ሄስ ኤንቲ ታና ቆሀናዉ ማቅዳ ማቆ።

3 ታኒ ኤንታዉ፥ “ታዉ ግታ ኦሶይ ደእያ ግሾ ሄሳ አጋዳ ህንተ ግዳ በሳ ባናዉ ዳንዳእከ። ታኒ ያ ብን፥ ኦሶይ አይስ ꬉበቲ?” ያጋዳ ዛራስ። 4 ሄ ኪታ ዛር ዛር ኦይዱ ቶሆ ኪትዶሶና፤ ሽን ታኒ እስ ቆሞ ዛሮ ኤንታዉ እማስ።

5 እቻሻንꬆ ሳንባላፅ ባ አይለታፐ እሱዋ ዶያ ደእያ ዳብዳበ ኦይꬅድ ታኮ ኪትስ። ዳብዳበይ ሀይሳዳ ያግድ ፃፈትስ፤ 6 “ኔንነ ነ ኮቸ ግድዳ አይሁደት ማካላናዉ ቆፕዳይሳነ ሄሳ ጋሶን ግምብያ ግምበይሳ ሾሮ ቢታን ደእያ አሳ ኡባይ ኦደተይሳ ጌሳመይ ታዉ ኦድስ። ቃስ ኔኒ ነና ካዎ ከሳናዉ ኮየይሳነ 7 ኔኒ ይሁዳ ካዎ ግደይሳ የሩሳላመን አዋጃና መላ ናበ ዎꬅዳይሳ ታዉ ኦድስ። ሀ ዎርያ ካዎይ ስአናይስ አተና። ሄሳ ግሾ፥ ታራ ጋሄታዳ ዞረታናዉ ሃያ” ያጌስ።

8 ታኒ፥ “ሀ ኔኒ ግያ ኦዳ ኡባይ ቱማ ግዶናባነ ነ ኔፐ መꬍዳባ” ያጋዳ ዛራስ።

9 ኑ ኦꬅያ ኦሶይ ፖለቶና መላ፥ “ኤንታ ኩሸይ አርጋጫና፤ ኦሶይካ ፖለቶና ኤቅ አታና” ያግድ ኑና ያሽሳናዉ ቆፕዶሶና።

ሽን ታኒ፥ “ፆሳዉ፥ ሀእ ታ ኩሽያ ምንꬃ” ያጋዳ ዎሳስ።

10 ታኒ እስ ጋላስ ሶፐ ከዮና መላ ጎርድ ዎꬅዳ ማሄፃቤላ ናኣ ናኣ ዳላያ ናኣ ሻማያኮ ባስ። እ ታኮ፥ “ቃማ ይድ ኤንቲ ነና ዎꬋናዉ ዳንዳእያ ግሾ ኔራ ታራ ፆሳ ኬꬅ ገልድ፥ ፐንግያ ጎርድድ ቆሰታና” ያግስ።

11 ሽን ታኒ፥ “ታ መላ አስ ያይድ ቆሰቲ? ዎይኮ ታና ዳንያ አስ ባ ሸምፑዋ አሻናዉ ፆሳ ኬꬅ ገሊ? ታ ሄሳ ሀንከ” ያጋስ። 12 ታ ቆፓ በእያ ዎደ ሻማየይ ፆሳይ ኪትዳ ናበ ግዶናሽን ፆበይነ ሳንባላፅ እያ ሚሸን ሻምድ የድን ታ ቦላ ዎርዶ ትንብተ ኦደይሳ አኬካስ። 13 እ ሚሸን ሻመትዳ ጋሶይ ታና ያሽሳናሳ፤ ታ ሄሳ ኦꬃዳ ናጋራን ገላና መላነ ታና ቦርስያባ ደምድ ታና ካዉሻናሳ።

14 ታኒ፥ “ታ ፆሳዉ፥ ፆበይነ ሳንባላፅ ኦꬅዳባ ኡባ በአ። ኖኣዶ ጌተትያ ማጫ ናብያነ ሀራ ዎርዶ ናበት ታና ያሽሳናዉ ኦꬅዳባ ኡባ በአ” ያጋዳ ዎሳስ።

15 ግምበ ኦሶይ ዶመትን እሻታማነ ናምኡ ጋላሳፐ ጉየ ኤሉለ ጌተትያ አጌናን ላታማነ እቻሻንꬆ ጋላሳን ኦሶይ ፖለትስ። 16 ኑ ዩሹዋን ደእያ ካዎተꬃታን ደእያ ኑ ሞርከት ሄሳ ስእዳ ዎደ ያይዶሶናነ ዬላትዶሶና። አይስ ጊኮ፥ ኦሶይ ኑ ፆሳ ማደን ፖለትዳይሳ አኬክዶሶና።

17 ሄ ዎደ ይሁዳ ሹማት ፆቢያስ ዳብዳበ ፃፍሸ ጋምእዶሶና፤ እካ ኤንታዉ ዛርሸ ጋምእስ። 18 ኤራ ናአይ ሳካን፥ ፆቢያ ቦሎ ግድያ ግሾነ እያ ናአይ ዮሃናን ባራካ ናኣ ማሱላማ ናእዉ ኤክዳ ግሾ፥ አይሁደታፐ ዳሮት እያራ ጫቅድ ደኦሶና። 19 ሄ አሳት ፆበይ ኦꬅዳ ሎኦባ ኡባ ታ ስንꬃን ናሽድ ሃሳዮሶና፤ ታኒ ግያባ እያዉ ኦዶሶና። ሄሳ ግሾ፥ ፆበይ ኡባ ዎደ ታና ያሽሳናዉ ዳብዳበ ፃፎ አግቤና።