“እያ ቦንቾ ሱንꬃ አንጅተ፤ ጋላታፐነ አንጆፈ አꬍያ እያ ሱንꬃ ሳቢተ።” 6 ፆሳዉ፥ ነ ፃላል ጎዳ! ኔኒ ሳሎታነ ꬎቃ ሳሎታን ደእያ መተꬃታ፥ ሳኣነ እያ ቦላ ደእያ መተꬃታ፥ አባታነ ኤንታ ግዶን ደእያ መተꬃታ ኡባ መꬋዳሳ። ኡባስ ደኦ እማዳሳ፤ ሳሎ መተꬃት ነዉ ጎይኖሶና።

7 ጎዳዉ፥ ኔኒ ፆሰ! ኔኒ ካልዳወታ ቢታ ኡረፐ አብራመ ዶራዳ ከሳዳሳ። እያ ሱንꬃ ላማዳ አብራሃመ ጋዳ ሱንꬃዳሳ። 8 እ ነዉ አማንꬅያ አስ ግደይሳ በአዳ፥ ካናነታ፥ ህተታ፥ አሞረታ፥ ፓርዘታ፥ ያቡሰታነ ገርገሰታ ቢታ እያ ኮቻስ ላታ ቢታ ኦꬃዳ እማናዉ እያዉ ጫቃዳሳ። ኔኒ ፅሎ ግድያ ግሾ ነ ግዳ ቃላ ፖላዳሳ።

9 ኔኒ ኑ ማይዛታ ግብፀ ቢታን ጋክዳ ኡንኣ በአዳሳ፤ ቃስ ዞኦ አባ ማታን ደእሸ ኤንቲ ዋስዳ ዋሱዋ ስአዳሳ። 10 ግብፀ ካዎይ፥ እያ ሹማትነ ሄ ቢታ አሳ ኡባይ እስራኤለ አሳ ቦላ ኦቶርትዳ ግሾ ኤንታ ቦላ ማላታነ ማላልስያባታ ኦꬃዳሳ። ሄሳ ኦꬃዳ ሀች ጋካናዉ ነ ሱንꬃይ ቦንቾን ፄገታናዳ ኦꬃዳሳ። 11 አባ ሻካዳ ነ አሳ መላ ቢታራ ፕንꬃዳሳ። ሽን ሹች ጪሞ ሃꬃን ሆልን፥ ምተተይሳዳ ኤንታ ጎድያ ሞርከታ አባን ምትሳዳ ꬋይሳዳሳ። 12 እስራኤለ አሳ ጋላስ ሻራ ቱሳን፥ ቃማ ታማ ቱሳን ኤንታ ኦግያ ፖእሳዳ ካለꬃዳሳ።

13 ኔኒ ሳሎፐ ዎꬋዳ ነ አሳ ሲና ዙማ ቦላ ኦድሳዳሳ። ሱረ ፕርዳነ ቱማ ግድዳ ህግያ፥ ሎኦ ዎጋነ ኪታ ኤንታዉ እማዳሳ። 14 ጌሻ ነ ሳምባታ ኤንቲ ቦንቻና መላ ኤንታ ታማርሳዳሳ። ነ አይልያ ሙሰ ባጋራ ኤንታዉ ኪታ፥ ዎጋነ ህገ እማዳሳ። 15 ኤንቲ ኮሻትዳ ዎደ ሳሎፐ ካꬅ እማዳሳ፤ ቃስ ኤንቲ ሳሞትዳ ዎደ ዛላፈ ሃ ፑልትሳዳሳ። ኔኒ ኤንታዉ እማና ጋዳ ጫቅዳ ቢታ ኤንቲ ገልድ ላታና መላ ኪታዳሳ።

16 ሽን ኑ ማይዛት ኦቶርትዶሶና፤ ስኦና እፅድ ነዉ ኪተትቦኮና። 17 ኪተቶና እፅዶሶና፤ ኔኒ ኤንታዉ ኦꬅዳ ማላልስያባ ኡባ ሀሳይቦኮና። ኤንቲ ስኦና አስ ግድዶሶና፤ ባንታ ጌላተꬃን አይለተꬃስ ግብፀ ቢታ ጉየ ካለꬃና መላ ሀላቃ ባንታዉ ዶርዶሶና። ግዶሽን፥ ኔኒ አቶ ግያ ፆሲ፥ ኬሀነ ማርያ ፆሲ፤ ሲቆን ኩምዳይሳነ ሀንቆስ ኤለሶና ፆሲ ግድያ ግሾ ኤንታ አጋባካ።

18 ኤንቲ ማራ ማላን ኤቃ መꬍድ፥ “ህንተና ግብፀ ቢታፈ ከስዳ ህንተ ፆሳይ ሀይሳ” ያግድ ነና ግታ ጫሸ ጫይዶሶና። 19 ነ ዳሮ ማሮተꬃን ኔኒ ኤንታ መላ ቢታን አጋባካ። ኤንቲ ብያ ኦግያ ፖእሳና መላ ጋላስ ሻራ ቱሳን፥ ቃማ ታማ ቱሳን ኤንታ ካለꬃዳሳ። 20 ኤንታ ታማርሳና መላ ነ ሎኦ አያና ኤንታዉ እማዳሳ። ማናዉ ማና፥ ኡያናዉ ሃ ኤንታዉ እማዳሳ። 21 ኦይታሙ ላይꬅ ኩመꬅ መላ ቢታን ሄመትያ ዎደ ኤንታዉ ኮሽያባፐ እስባካ ፓጭሳባካ። ኤንታ ማኦይ ዉርቤና፤ ኤንታ ቶሆይ ክፅቤና።

22 ነ ኤንታ ካዎተꬃታነ ደረታ ሀር አቶሽን ሃሆን ደእያ ቢታታ ፆንድ ኦይካና መላ ኦꬃዳሳ። ካዎይ ስሆነይ ሃርያ ሀሰቦና ቢታነ ካዎይ ኦገይ ሃርያ ባሳነ ቢታ ኤንታና ላትሳዳሳ። 23 ኤንታ ኮቻ ታይቡዋ ሳሎ ፆልንቶዳ ዳርሳዳሳ። ኤንታ ማይዛታስ እማና ጋዳ ጫቅዳ ቢታ ኤንታ ላትሳዳሳ። 24 ኤንታ ናይት ካናነ ቢታ ላትዶሶና። ሄ ቢታን ደእያ ካናነ አሳ ኤንታ ስንꬃን ኔኒ ካዉሻዳሳ። ኤንቲ ካናነ አሳ ቦላ፥ ኤንታ ካዎታ ቦላነ ቢታን ደእያ አሳ ቦላ ዶስዳባ ኦꬃና መላ ኤንታ ኩሸን አꬃ እማዳሳ። 25 ኤንቲ ዩሾይ ግምበትዳ ካታማታነ አራዳ ቢታ ፆንድ ኤክዶሶና። ሎኦባ ኡባይ ኩምዳ ኬꬃታ፥ ቦከትዳ ሃꬃ ኦላታ፥ ዎይነ በሳታ፥ ሻማሆነ ሀራ አይፈ አይፍያ ዳሮ ምꬃታ ላትዶሶና። እያፐ ምድ ካልድ ኦርድዶሶና፤ ነ ግታ ኬሀተꬃን ኡፋይትዶሶና።

26 ግዶሽን፥ ኤንቲ ኪተቶና እፅድ፥ ነ ቦላ ማካልዶሶና፤ ነ ህግያ ቦላ ዞኮ ዛርዶሶና። ኔኮ ስማናዳ ኤንታዉ ምንꬅድ ኦድዳ ነ ናበታ ዎꬍዶሶና። ዳሮ ኢታ ጫሽ ነና ጫይዶሶና። 27 ሄሳ ግሾ፥ ኤንታ ኡንኤꬅያ ሞርከታ ኩሸን አꬃ እምን፥ ሞርከት ኤንታ ኡንኤꬅዳ ዎደ ኔኮ ዋስዶሶና። ኤንታ ዋሱዋ ሳሎን ግዳዳ ስአዳሳ፤ ነ ማሮተꬃ ዳሩዋን ኤንታ፥ ኤንታ ሞርከታ ኩሸፐ አሽያ አሳታ ኪታዳሳ።

28 ሽን ኤንቲ ሸምፖ ደም ስሚድ ዛሪድ ነ ስንꬃን ናጋራ ኦꬅዶሶና። ነ ዛራዳ ኤንታ ሞርከታ ኩሸን አꬃዳ እምን፥ ኤንታ ሞርከት ኤንታ ሃርዶሶና። ሽን ሀእካ ኤንቲ ኔኮ ዋስን፥ ኤንታ ዋሱዋ ሳሎን ግዳዳ ስአዳሳ። ነ ማሮተꬃን ኤንታ ዛራ ዛራዳካ አሻ ኤካዳሳ።

29 ነ ህግያኮ ኤንቲ ስማና መላ ኤንታዉ ምንꬃዳ ኦዳዳሳ፥ ሽን ኤንቲ ኦቶርትዶሶና፤ ነዉ ኪተቶና እፅዶሶና። አስ ኪተትድ ደኦ ደምያ ነ ህግያ መንꬅዶሶና። ነዉ ዞኮ ዛሪድ ስኦና እፅዶሶና፤ ኪተቶና እፅዶሶና። 30 ግድኮካ ነ ኤንታ ዳሮ ላይꬅ ዳንዳአዳሳ፤ ነ አያናን ናበታ ባጋራ ኤንታዉ ኦዳዳሳ፥ ሽን ኤንቲ ስእቦኮና። ሄሳ ግሾ፥ ሾሮ ካዎተꬃት ኤንታ ሃራና መላ አꬃ እማዳሳ። 31 ሽን ኔኒ ኬሀነ ማርያ ፆሲ ግድያ ግሾ፥ ነ ግታ ማሮተꬃን ኤንታ አጋባካ፤ ቡርፆራ ꬋይሳባካ።

32 ህዛ ኑ ፆሳዉ፥ ግታዉ፥ ዎልቃማነ ያየትዳ ፆሳዉ፥ ነ መርና ሲቆ ጫቁዋ ናገይሶ፥ በን አሶረ ካዎተꬃፈ ሀች ጋካናዉ ኑ ቦላ፥ ኑ ካዎታ ቦላ፥ ኑ ሀላቃታ ቦላ፥ ኑ ካህነታ ቦላ፥ ኑ ናበታ ቦላ፥ ኑ ማይዛታ ቦላነ ነ አሳ ኡባ ቦላ ጋክዳ መቶይ ነ ስንꬃን ላፋባ ዳኖፖ። 33 ኑና ጋክዳባ ኡባን ኔኒ ፅሎ። ኑኒ ነና ናቅኮካ ነ አማነተꬃ አጋባካ። 34 ኑ ካዎት፥ ኑ ሀላቃት፥ ኑ ካህነትነ ኑ ማይዛት ነ ህግያ ናግቦኮና። ቃስ ነ ኤንታዉ እምዳ ኪታነ ናግሱዋ ስእቦኮና። 35 ነ ኤንታ ካዎተꬃን ኤንታዉ ግታ አንጁዋ እማዳሳ፤ ዳልጋነ አራዳ ቢታ ኤንታዉ እማዳሳ። ሽን ኤንቲ ነና ጎይንቦኮና፤ ባንታ ኢታ ኦሱዋፐ ስምቦኮና።

36 “ህዛ፥ ሀች ኑኒ አይለ ግደይሳ በአ። ኑ ማይዛት ሄ ቢተ አይፍያነ እያ እምያ አንጁዋ ኡባ ማና መላ ነ እምዳ ቢታን ኑ ሀች አይለ ግድዳ። 37 ኑ ናጋራ ግሾ፥ ነ ኑ ቦላ ደንꬅዳ ካዎት ቢታይ እምያ አይፍያ ኡባ ጎኤቶሶና። ኑ ቦላነ ኑ መህያ ቦላ ባንታ ኮይዳባ ኦꬆሶና፤ ኑኒ ግታ መቶ ግዶን ደኦስ” ያግዶሶና።