1 ማታመ ዎꬅዳ አሳ ሱንꬃይ፥ ቢታ አይስያ ናህመይ፥ ሀካልያ ናአይ፥

ካህነታፐ፥ ሰደቅያሳ፥ 2 ሳራያ፥ አዛራ፥ ኤርምያሳ፥ 3 ፓስኮራ፥ አማረ፥ ማልካ፥ 4 ሀፁሳ፥ ሳባና፥ ማሉካ፥ 5 ሀርማ፥ ማረሞታ፥ ኦባዳ፥ 6 ዳነላ፥ ግነቶና፥ ባሮካ፥ 7 ማሱላማ፥ አብያ፥ ምያምና፥ 8 ማኣዛ፥ በልጋያነ ሻማያ።

9 ሌወታፐ፥ አዝናታ ናኣ እያሱ፥ ሄናዳዳ ኮች ግድዳ ብኑያ፥ ቃድምኤላነ 10 ኤንታራ ኦꬅያ ሳባና፥ ሆድያ፥ ቃልፃ፥ ፓላያ፥ ሀናና፥ 11 ምካ፥ ራሆባ፥ ሀሳባያ፥ 12 ዛኩራ፥ ሳራባ፥ ሳባና፥ 13 ሆድያ፥ ባናነ ባንና።

14 ሀላቃታፐ፥ ፓሮሳ፥ ፓሀት-ሞአባ፥ ኤላማ፥ ዛታ፥ ባና፥ 15 ቡና፥ አዝጋዳ፥ በባያ፥ 16 አዶና፥ ብግዋያ፥ አድና፥ 17 አፄራ፥ ህዝቅያሳ፥ አዙራ፥ 18 ሆድያ፥ ሀሱማ፥ በሳያ፥ 19 ሀርፋ፥ አናቶታ፥ ነባያ፥ 20 ማግጳሳ፥ ማሱላማ፥ ኤዝራ፥ 21 ማሰዛቤላ፥ ሳዶቃ፥ ያዱአ፥ 22 ፓላፃ፥ ሀናና፥ አናያ፥ 23 ሆሰ፥ ሀናና፥ ሀሱባ፥ 24 ሀሎሄሳ፥ ፕልሀ፥ ሶበቃ፥ 25 ረሁማ፥ ሀሳብና፥ ማሰያ፥ 26 አክያ፥ ሀናና፥ አናና፥ 27 ማሉካ፥ ሀርማነ ባአና።

28 አትዳ አሳይ፥ ካህነት፥ ሌወት፥ ፐንግያ ናገይሳት፥ ዛማረት፥ ፆሳ ኬꬃ ኦሳንቾት፥ ፆሳ ህግያስ ኪተታናዉ ባንታና አይሁደ ግዶና ደረታፐ ሻክዳ ኡባይ፥ ኤንታ ማቸት፥ አኬካናዉ ዳንዳእያ ኤንታ አደ ናይትነ ማጫ ናይት፥ 29 ባንታና ካለይሳታራ እስፈ ጫቅዶሶና። ኤንቲ ፆሳ አይልያ ሙሰ ባጋራ ፆሳይ እምዳ ኑ ጎዳ፥ ፆሳ ኪታ፥ ህግያነ ዎጋ ናጋናዉ ቃንገꬃንነ ጫቆን ቃላ ገልዶሶና።

30 ኤንቲ ሀይሳዳ ያግድ ጫቅዶሶና፤ “ኑ ማጫ ናይታ አይሁደ ግዶና አደ ናይታስ እሞኮ፤ ኤንታ ማጫ ናይታ ኑ አደ ናይታስ ማቾ ኦꬅድ ኤኮኮ።

31 “አይሁደ ግዶና አሳት ካꬅ ግድን ዎይኮ ሀራባ ሳምባታ ጋላስ ዎይኮ ሀራ ባኣለ ጋላስ ባይዛናዉ ኤህኮ ኤንታፈ ሻሞኮ። ላፑንꬃ ላይꬅ ጋክያ ዎደ ዎደ ኑ ቢታ ጎዮኮ፤ ኑኒ ታልእዳ አጩዋ አቾኮ።

32 “ፆሳ ኬꬃ ኦሱዋስ ኦይዱ ግራመ ብራ ላይꬃን ላይꬃን ቃንፆና እማና። 33 ሄስካ፥ ጎዳ ስንꬃን ዎꬅያ ኡይꬃስ፥ ጋላስ ጋላስ ያርሸትያ ካꬃ ያርሹዋስ፥ ፁሳ ያርሹዋስ፥ ሳምባታ ጋላሳን፥ አጌና ፄሮን፥ ላይꬃን ደእያ ሀራ ባለታን፥ ጌሻ ያርሾታስ፥ እስራኤለ አሳ ናጋራ አቶተꬃስ ያርሸትያ ያርሹዋስነ ኑ ፆሳ ኬꬃ ኦሱዋስ ኮሽያ ኡባ ኩንꬃናሳ።

34 “ኑ፥ ካህነት፥ ሌወትነ ሀራ አሳ ኡባይ፥ ላይꬃን ላይꬃን ኦሰትያ ጋላሳን፥ ህግያን ፃፈትዳይሳዳ ጎዳ፥ ኑ ፆሳ ያርሾ በሳን ኤፅያ ምꬃ እስ እስ ኮቻይ አዉደ ኤሀናዉ በሲያኮ ኤራናዉ ሳማ የግዳ።

35 “ካꬃ ኑ ሺሽያ ዎደነ ዱማ ዱማ ምꬃ አይፍያ ኑ ማፅያ ዎደ ባይራ ፆሳ ኬꬅ ኤሀና።

36 “ህግያን ፃፈትዳይሳዳ ኑኒ ኮይሮ የለትያ ኑ አደ ናይታ፥ ቃስ ኑ ሚዛት፥ ኑ ዶርሳትነ ኑ ዴሻት የልያ ኮይሮ ማራታ ፆሳ ኬꬃን ኦꬅያ ካህነታኮ ኤህድ ፆሳስ ዱማያና።

37 “ኑኒ ኑ ቢታን ካፅዳ ካꬃፈ ኮይሩዋ፥ ኑ ምꬃ ኡባ አይፍያ፥ ዎይንያነ ዛይትያ እሞታ ኦꬅድ፥ ፆሳ ኬꬃን ኦꬅያ ካህነታኮ ኤሀና። ሌወት ኑ ደእያ ካታማታ ጎሻን አይፍያባፐ አስራታ ኤክያ ግሾ፥ ኑ ቢታይ አይፍያባፐ አስራታ ኤሀና። 38 ሌወት አስራታ ሺሽያ ዎደ፥ አሮና ያራ ግድዳ ካህነት ኤንታራ እስፈ ግዳናዉ በሴስ። ሌወት አስራታ ሺሽዳፐ ጉየ፥ አስራታፐ አስራታ ከስድ ኑ ፆሳ ኬꬅ ኤህድ፥ ሚሸ ዎꬅያ ክፍልያን ዎꬆ። 39 እስራኤለ አሳይነ ሌወት ካꬃ፥ ዎይንያነ ሻማሆ ዛይተ እሞታ ጌሻ ሚሸት ኡትያ በሳነ ካህነት፥ ፐንግያ ናገይሳትነ ዛማረት ሸምፕያ ክፍልያ ኤሆ።

“ኑኒ ፆሳ ኬꬃ ኡባካ አጎኮ” ያግድ ጫቅዶሶና።