1 እስራኤለ አሳይ ግብፀፈ ከይዳ ናምአንꬆ ላይꬃን ኮይሮ አጌናን ሲና መላ ቢታን ጎዳይ ሙሰኮ ሀይሳዳ ያግስ፤ 2 “እስራኤለ አሳይ ፓስካ ባኣለ እያ ቃማን ቦንቾ። 3 ሀ አጌናን ታማነ ኦይዳንꬆ ጋላሳን እያ ቃማን ኦማርስ እያ ዎጋ ኡባዳነ እያ ኪታ ኡባዳ ቦንቾ” ያግስ። 4 ሄሳ ግሾ፥ ሙሰይ እስራኤለ አሳይ ፓስካ ባኣለ ቦንቻና መላ ኤንታዉ ኦድስ። 5 ጎዳይ ሙሰ ኪትዳይሳዳ፥ እስራኤለ አሳይ ኮይሮ አጌናን ታማነ ኦይዳንꬆ ጋላሳን፥ ኦማርስ ሲና መላ ቢታን ፓስካ ባኣለ ቦንችዶሶና።

6 ሽን ኤንታፈ ባጋት አሀ ቦችድ ቱንዳ ግሾ ሄ ጋላስ ፓስካ ባኣለ ቦንቻናዉ ዳንዳእቦኮና። ሄሳ ግሾ፥ ኤንቲ ሄ ጋላስ ሙሰኮነ አሮናኮ ይድ፥ 7 “ኑኒ አሀ ቦችዳ ግሾ ቱንዳ፥ ሽን ሄ ቃማን ሀራ እስራኤለ አሳራ ጎዳስ ያርሾ ያርሾና መላ አይስ ድገትዶ?” ያግዶሶና።

8 ሙሰይ ዛሪድ፥ “ጎዳይ ህንተባ ታዉ ኦዳና ጋካናዉ ጋምእሽተ” ያግስ።

9 ጎዳይ ሙሰኮ፥ 10 “እስራኤለ አሳኮ ሀይሳዳ ያጋ፤ ህንተፈ ዎይኮ ህንተ ኮቻፈ ኦንካ አሀ ቦችድ ቱንኮ ዎይኮ ኦገትዳባ ግድኮ፥ ፓስካ ባኣለ ቦንቻናዉ ዳንዳኤስ። 11 ናምአንꬆ አጌናን ታማነ ኦይዳንꬆ ጋላስ ኦማርስ ፓስካ ባኣለ ቦንቾ። ፓስካ ዶርሳ ኡይꬃራነ ጫሞ ቦንጮራ ሞ። 12 ሳአይ ዎንታና ጋካናዉ ዶርሳ አሹዋፐ አይብካ አቶፎ፤ ቃስ እያ መቀꬃፈ እሱዋካ መንꬆፎ። ፓስካ ባልያ ዎጋ ኡባ ኦꬆ። 13 ሽን ጌሽነ ኦገቶና አስ ፓስካ ቦንቾና እፅኮ፥ እ ታ አሳ ግዶፈ ኩረቶ። ጎዳ ያርሹዋ እያ ቃማን ያርሽቦና ግሾ ባ ናጋራ ግሾ ፕርዳ ኤኬስ።

14 “ህንተ ግዶን ደእያ በተ አስ ፓስካ ባኣለ ቦንቻናዉ ኮይኮ፥ ፓስካ ዎጋዳ ቦንቾ። በታንቾይነ ቢታ አዉ ናእ ኡባይ ሄ ዎጋꬆ ኦꬆ” ያግስ።

15 ጌሻ ዱንካነይ ቶከትዳ ጋላስ ሻራይ ጌሻ ዱንካንያ ማእስ። ኦማርሳፈ ዶምድ፥ ዎንታ ጋካናዉ ጌሻ ዱንካንያ ቦላራ ደእያ ሻራይ ታማ ዳኔስ። 16 ሄሳዳ ጋላስ ጋላስ ሻራይ ማኤስ፤ ቃማ ቃማ ሄ ሻራይ ታማዳ ፖኤስ። 17 ሄ ሻራይ ጌሻ ዱንካንያ ቦላፈ ደንድያ ዎደ ኡባን እስራኤለ አሳይ ባንታ ዱንካንዳ ጉታፐ ደንዶሶና። ቃስ ሄ ሻራይ ዎꬍያ በሳን እስራኤለ አሳይ ዱንካኖሶና። 18 እስራኤለ አሳይ ጎዳ ኪታን ጉታፐ ደንዶሶና፤ ቃስ ጎዳ ኪታን ዱንካኖሶና። ሻራይ ጌሻ ዱንካንያ ቦላ ጋምእያ ዎደ ኡባን ባንታ ዱንካንዳ ጉታን ጋምኦሶና። 19 ሻራይ ጌሻ ዱንካንያ ቦላ ዳሮ ጋላስ ጋምእኮካ፥ እስራኤለ አሳይ ጎዳ ኪታ ናጎሶናፐ አትሽን፥ አዉካ ቦኮና። 20 እስ እስ ቶሆ ሻራይ ጌሻ ዱንካንያ ቦላ ጉꬃ ጋላስ ጋምኤስ። ግድኮካ ኤንቲ ጎዳ ኪታን ዱንካኖሶና፤ ቃስ ጎዳ ኪታን ጉታፐ ደንዶሶና። 21 እስ እስ ቶሆ ሻራይ ኦማርሳፈ ዎንታና ጋካናዉ ፃላላ ጋምኤስ፤ ሻራይ ደንድያ ዎደ ኤንቲ ደንዶሶና። ጋላስ ግድን፥ ቃማ ግድን፥ ሻራይ ደንድያ ዎደ ኤንቲ ደንዶሶና። 22 ሻራይ ጌሻ ዱንካንያ ቦላ ናምኡ ጋላስ ግድን ዎይኮ እስ አጌና ዎይኮ እስ ላይꬅ ጋምእን እስራኤለ አሳይ ባንታ ዱንካንዳ ጉታን ጋምኦሶናፐ አትሽን፥ ቦኮና። ሽን ሻራይ ደንድያ ዎደ ኤንትካ ደንዶሶና። 23 ጎዳይ ሙሰ ኪትዳይሳዳ ኤንቲ ጎዳ ኪታን ዱንካኖሶና ቃስ ጎዳ ኪታን ጉታፐ ደንድድ ቦሶና።