1 ጎዳይ ሙሰኮ፥ 2 አሳ ሺቆስ ፄጋናዉነ ዱንካንዳ ጉታፐ ደንꬃናዉ ማድያ ናምኡ ሞይዘታ ብራፐ ቆፃዳ መꬋ። 3 ሀ ናምኡ ሞይዘት ፑነትያ ዎደ አሳ ኡባይ ጌሻ ዱንካንያ ፐንገን ኔኮ ሺቆ። 4 ሽን እስ ሞይዘ ፃላል ፑነትኮ፥ እስራኤለ ኮቻ ሀላቃት ነ ስን ሺቆ። 5 ሞይዘይ ኮይሮ ፑነትያ ዎደ ጌሻ ዱንካንያፐ ዶሎሀ ባጋን ዱንካንዳ ኮቻይ ደንዶ። 6 ሞይዘይ ናምአንꬆ ፑነትያ ዎደ ዱገሀ ባጋን ዱንካንዳ ኮቻይ ደንዶ። ሞይዘይ ሄሳꬆ ፑነትያ ዎደ ጉታፐ ደንዳናዉ ማላ ግዶ። 7 አሳ ሺሻናዉ ሞይዘ ፑና፥ ሽን ሀንኮይሳዳ ዱማ ማላራ ፑኖፋ። 8 ካህነት፥ አሮና ናይት ሞይዘ ፑኖ። ሀይስ ነዉነ ያና የለተꬃ ኡባስ መርና ዎጋ ግዶ።

9 “ህንተ ጋድያ ቦላ ኦላ ደንꬅዳ ህንተ ሞርክያራ ህንተ ኦለታናዉ ከይያ ዎደ ሄ ሞይዘታ ጎችድ ፑንተ። ሄ ዎደ ጎዳይ፥ ህንተ ፆሳይ ህንተና አኬክድ፥ ህንተ ሞርከታፐ አሻና። 10 ህንተ ኡፋይሳ ጋላሳታን ሄስካ አጌና ፄሮን፥ ኤረትዳ ባለታን፥ ፁሳ ያርሾ ዎደንነ እስፈተꬃ ያርሾ ዎደ ሞይዘ ፑንተ። ሄስ ፆሳ ስንꬃን ህንተና አኬክስያባ ግዳና። ታኒ ጎዳ፥ ህንተ ፆሳ” ያግስ።

11 አሳይ ግብፀፈ ከይን፥ ናምአንꬆ ላይꬃን፥ ናምአንꬆ አጌናን፥ ላታማንꬆ ጋላሳን፥ ሻራይ ጌሻ ዱንካንያ ቦላፈ ደንድስ። 12 ያትን አሳይ ሲና መላ ቢታፈ ማራን ማራን ደንድዶሶና፤ ሻራይ ፓራና መላ ቢታ ጋክድ ዎꬍስ። 13 ጎዳይ ሙሰ ኪትዳይሳዳ ኤንቲ ባናዉ ኮይሮ ደንድዶሶና።

14 ኮይሮ ይሁዳ ኮቻ ባጋን ዱንካንዳ ኮቻይ ባንታ ማላ ኤክድ ከይዶሶና። ኤንታና ካለይ አምናዳበ ናኣ ናአሶና። 15 ይሳኮራ ኮቻ ካለይ ዙአራ ናኣ ናትናኤላ። 16 ዛብሎና ኮቻ ካለይ ሄሎና ናኣ ኤልኣባ።

17 ያትን፥ ጌሻ ዱንካነይ ሾደትን፥ ገድሶና ኮቻትነ መራራ ኮቻት ቶክድ ደንድዶሶና።

18 ካልድ ሮቤላ ኮቻ ባጋን ዱንካንዳ ኮቻይ ባንታ ማላ ኦይክደ ከይዶሶና። ሮቤላ ኮቻ ካለይ ሻደኡራ ናኣ ኤልዙራ። 19 ስሞና ኮቻ ካለይ ዙርሻዳያ ናኣ ሳሉምኤላ። 20 ጋደ ኮቻ ካለይ ራጉኤላ ናኣ ኤልያሳፋ።

21 ያትን ቃሃታ ኮቻይ ጌሻ ሚሸታ ቶክድ ደንድዶሶና። ኤንቲ ካልያ ጉታ ጋካናፐ ስን ጌሻ ዱንካነይ ቶከትድ ኡቴስ።

22 ካልድ ኤፍሬማ ኮቻ ባጋን ዱንካንዳ ኮቻት ባንታ ማላ ኦይክድ ከዮሶና። ኤፍሬማ ኮቻ ካለይ አምሁዳ ናኣ ኤልሻማአ። 23 ምናሰ ኮቻ ካለይ ፓዳዙራ ናኣ ጋማልኤላ። 24 ብንያመ ኮቻ ካለይ ጋድዮና ናኣ አብዳና።

25 ዉርሰꬃን ዳነ ኮቻ ባጋን ዱንካንዳ ኮቻይ፥ ኡባስ ጉየ ባጋራ ካተ ግድድ፥ ባንታ ማላ ኦይክድ ከይዶሶና። ዳነ ኮቻ ካለይ አምሳዳያ ናኣ አክኤዘራ። 26 አሴራ ኮቻ ካለይ ኦክራና ናኣ ፓግኤላ። 27 ንፍታለመ ኮቻ ካለይ ኤናና ናኣ አክራ። 28 እስራኤለ አሳይ ባንታ ዘረꬃን ዘረꬃን ጉታፐ ደንድድ ብያ ማራይ ሄሳ።

29 ሙሰይ ምድያመ አድያ ራጉኤላ ናኣ ሆባባኮ፥ “ጎዳይ ኑስ እማና ግዳ ቢታ ላታናዉ ቦስ፤ ጎዳይ እስራኤለ አንጃና ግዳ ግሾ ኑራ የꬋ፤ ኑኒ ነዉ ሎኦባ ኦꬃና” ያግስ።

30 ያትን ሆባብ፥ “አካይ፥ ታኒ ታ ቢታ ታ ዳቦታኮ ባና” ያግስ።

31 ሙሰይ ዛሪድ፥ “ሀያና፥ ኑና የጋዳ ቦፓ። ኑ ብያ መላ ቢታን ኑኒ ዱንካናና በሳ ነ ኤራሳ፤ ኑ ባና ኦግያ ኑና ካለꬃናዉ ዳንዳኣሳ። 32 ኔኒ ኑራ ቢኮ፥ ጎዳይ ኑስ እምያ አንጁዋ ኡባ ኑ ኔው ሻካና” ያግስ።

33 አሳይ ጎዳ ዙማፐ ደንድድ፥ ሄꬑ ጋላሳ ኦገ ብዶሶና። ጎዳ ጫቆ ታቦተይ ኤንቲ ሸምፓና በሲ ኮይሸ ሄꬑ ጋላስ ኤንታፈ ስን ስን ብስ። 34 ኤንቲ ዱንካንዳ ጉታፐ ደንድያ ዎደ ኡባን ጎዳ ሻራይ ጋላስ ጋላስ ኤንታፈ ቦላራ ደኤስ። 35 ታቦተይ ደንድያ ዎደ ኡባን ሙሰይ፥ “አቤት ጎዳዉ፥ ደንዳ፤ ነ ሞርከት ላለቶ፤ ነና እፀይሳት ነ ስንꬃፈ ባቃቶ” ያጌስ። 36 ታቦተይ ሸምፕያ ዎደ ኡባን ሙሰይ፥ “አቤት ጎዳዉ፥ ዳሮ ሙኩላን ታይበትያ እስራኤለ አሳኮ ስማ” ያጌስ።