1 ጎዳይ ሙሰኮ፥ 2 “እስራኤለ አሳ ሀይሳዳ ያጋ፤ ህንተ ዳና መላ ታ ህንተዉ እምያ ቢታ ገልያ ዎደ፥ 3 ፁሳ ያርሾ ግድን ዎይኮ ጋሶ ያርሾ ግድን ዎይኮ ዶሳን ያርሽያ ያርሾ ግድን ዎይኮ ባኣለ ጋላሳ ያርሾ ግድን፥ መሄፐ ዎይኮ ዶርሳፈ ጎዳስ ታማን ፁገትያ ሳውያ ያርሾ ያርሽተ። 4 ያርሹዋ ያርሽያ ኡራይ ካꬃ ያርሹዋስ እስ ክሎ ግራመ ሎኦ ꬊለ ሳይሶ ልትሮ ሻማሆ ዛይተን ሙኑቀትዳይሳ ኤሆ። 5 ቃስ ፁሳ ያርሾስ ዎይኮ ሀራ ያርሾስ ኤህያ እስ እስ ዶርሳራ ሳይሶ ልትሮ ዎይነ ኡሻ ያርሾ ኦꬅድ ጊግስተ። 6 ማራዘ ያርሽያ ዎደ ናምኡ ክሎ ግራመ ሎኦ ꬊለ እስ ልትሮነ ባጋ ሻማሆ ዛይተን ሙኑቀትዳይሳ ኤህተ። 7 ኡሻ ያርሹዋስ ስኮ ልትሮ ዎይነ ኡሻ ያርሹዋስ ኤህተ። ሄስ ጎዳስ ሳውያ ያርሾ ግዳና። 8 ጋሶ ዎይኮ እስፈተꬃ ያርሾስ ዎፋኖ ፁሳ ያርሾ ኦꬃዳ ጎዳስ ያርሽያ ዎደ፥ 9 ዎፋኑዋራ እስፈ ሄꬑ ክሎ ግራመ ሎኦ ꬊለ፥ ናምኡ ልትሮ ሻማሆ ዛይተን ሙኑቀትዳይሳ ካꬃ ያርሾ ኦꬃዳ ኤሀ። 10 ኡሻ ያርሹዋስ ባጋ ልትሮ ዎይነ ኡሻ ኤህተ። ሄስ ጎዳስ ሳውያ ፁሳ ያርሾ ግዳና።

11 “እስ እስ ዎፋኖይ ዎይኮ እስ እስ ማራዘይ ዎይኮ እስ እስ ኮለይ ያርሸትያ ዎደ ሀይሳዳ ሀንድ ኦሰቶ። 12 ዳሮ መሄይ ያርሸትያ ዎደ ያርሸትያ ካꬃ ያርሾይካ ሄሳዳ ዳሮ። 13 እስራኤለ አስ ግድዳ ኦንካ ሳውያ ፁሳ ያርሾ ጎዳስ ያርሽያ ዎደ ኡባን ሀይሳዳ ኦꬃናዉ ኮሼስ። 14 ያና የለተꬃን ህንተ ግዶን ደእያ በተ ዎይኮ ሀራ አስ ኦንካ ሳውያ ፁሳ ያርሾ ጎዳስ ያርሻናዉ ኮይኮ ሄሳዳ ኦꬃናዉ ኮሼስ። 15 ህንተዉነ ህንተ ግዶን ደእያ በተ አሳስ ሄ ዎጋይ እስኖ፤ ሄስ ያና የለተꬃስካ ኤቅድ ዳና ዎጋ፤ ህንተካ በተ አሳትካ ጎዳ ስንꬃን እስኖ። 16 ህንተዉነ ህንተ ግዶን ደእያ በተ አሳስ ህገይነ ዎጋይ እስኖ” ያግስ።

17 ጎዳይ ሙሰኮ፥ 18 “እስራኤለ አሳስ ሀይሳዳ ጋዳ ኦዳ፤ ታኒ ህንተና ኤፍያ ቢታ ህንተ ገልድ፥ 19 ሄ ቢታን ካፅያ ካꬅ ህንተ ምያ ዎደ ሄ ካꬃፈ ፄራ ከስድ ህንተ ጎዳስ ያርሽተ። 20 ሄስካ፥ ባይራ ካፅዳ ካꬃፈ ኡክዳ ኮይሮ ኡይꬅ፥ ግድሽን፥ ካꬅ ቡክያ ዉዱማፈ እምያ ያርሾ ኦꬅድ ያርሽተ። 21 የለተꬃ ኡባን ህንተ ቢታን ካፅዳ ካꬃፈ ኮይሩዋ ኡክድ ጎዳስ ያርሾ ያርሽተ።

22 “ጎዳይ፥ ሙሰስ ኦድዳ ኪታ ህንተ ኤሮና እፅድ ናጎና አትኮ፥ 23 ዎይኮ ጎዳይ እያ ባጋራ እምዳ ኪታ ኡባ፥ ጎዳይ እምዳ ጋላሳፐ ዶምድ ያና የለተꬃ ጋካናዉ ናጎና እፅኮ፥ 24 ቃስ ሄሳ እስራኤለ ማባራይ ኤሮና ኦꬅዳባ ግድኮ ማባራ ኡባይ ጎዳስ እስ ዎፋኖ ሳውያ ፁሳ ያርሾ ኦꬅድ፥ ዎጋይ ኪተይሳዳ ካꬃ ያርሹዋራነ ኡሻ ያርሹዋራ ያርሾ፤ ቃስ ናጋራ ያርሾ ኦꬅድ እስ ኮለ ያርሾ። 25 ካህነይ ኩመꬃ እስራኤለ ማባራስ ናጋራ አቶተꬃ ያርሾ ሺሼስ። ኤንቲ ኤሮና ባልዳ ባንታ ናቁዋ ግሾ ጎዳስ ፁሳ ያርሾነ ናጋራ ያርሾ ያርሽዳ ግሾ ኤንታ ናጋራይ አቶ ጌተታና። 26 እስራኤለ ማባራይነ ኤንታ ግዶን ደእያ በተ አሳይ ኤሮና ሄ ባላ ኦꬅዳ ግሾ አሳ ኡባ ናጋራይ አቶ ጌተታና።

27 “እስ አስ ኤሮና ናጋራ ኦꬅኮ እስ ላይꬃ ኮለ ናጋራ ያርሾ ኦꬅድ ያርሾ። 28 ኤሮና ደእሸ ናጋራ ኦꬅዳ ኡራስ ካህነይ ጎዳ ስንꬃን ናጋራ አቶተꬃ ዎጋ ፖሎ፤ እያ ናጋራይ አቶ ጌተታና። 29 ኤሮና ናጋራ ኦꬅዳ ኡራስ ካህነይ ጎዳ ስንꬃን ናጋራ አቶተꬃ ዎጋ ፖሎ፤ እያ ናጋራይ አቶ ጌተታና።

30 “ሽን እስራኤለ አስ ግድን ዎይኮ በተ አስ ግድን ኤርሸ ኦቶሮን ናጋራ ኦꬅያ ኡራይ ጎዳ ጫዬስ። ሄ ኡራይ ደርያ ግዶፈ ꬋዮ። 31 ሄ ኡራይ ጎዳ ኪታ ኤርሸ ካꬍዳ ግሾነ እያ ኪታ ካዉሽዳ ግሾ እያዉ ꬋዮይ በሴስ። እያ ባላይ እያ ቦላ ግዶ” ያግስ።

32 እስ ጋላስ እስራኤለ አሳይ መላ ቢታን ደእሽን፥ እስ ኡራይ ሳምባታ ጋላስ ምꬅ ምፅሸ ኦይከትስ። 33 ሄ ኡራ አሳይ ሙሰኮ፥ አሮናኮነ እስራኤለ ማባራኮ ኤህዶሶና። 34 ኤንቲ እያ ቦላ ኦꬃናባ ኤርቦና ግሾ ቃሾን ጋምእስዶሶና። 35 ሄሳፈ ጉየ ጎዳይ ሙሰኮ፥ “ሀ ኡራይ ሀይቃናዉ በሴስ፤ እስራኤለ ማባራይ ባንታ ጉታፐ ጋፃ ከስድ ሹቻን ጫድድ ዎꬎ” ያግስ። 36 ያትን እስራኤለ ማባራ ኡባይ ጎዳይ ሙሰ ኪትዳይሳዳ፥ ጉታፐ ጋፃ ከስድ ሹቻን ጫድድ ዎꬍዶሶና።

37 ጎዳይ ሙሰኮ፥ 38 “እስራኤለ አሳስ ሀይሳዳ ጋዳ ኦዳ፤ ህንተነ ያና የለተꬃይ ህንተ አፍላ ጋፃን ማጫራ ከስድ ሄ ማጫራ ጋፃን ካሎሰ ቃጭና ስክተ። 39 ሄ ማጫራ ህንተ በእያ ዎደ ኡባን ታ ኪታታ፥ አኬክድ ፖሌታ፤ ታፐ ሃክድ ህንተ አይፍያ አሙዋነ ህንተ ዎዛና ቆፋ ካልድ ላመተከታ። 40 ሄ ማጫራ በእድ ህንተ ታ ኪታ ኡባ አኬክድ ፖላናነ ፆሳስ ዱማትዳይሳታ ግዳና። 41 ታኒ ጎዳ፥ ህንተ ፆሳ፤ ታ ህንተ ፆሳ ግዳናዉ ህንተና ግብፀፈ ከሳስ። ታኒ ጎዳ፥ ህንተ ፆሳ ያጋ” ያግስ።