1 ሌወ ኮቻፈ ቃሃታ ኮቸ ግድዳ ይስአራ ናአይ ቆረይ፥ ሮቤላ ኮቻፈ ኤልኣባ ናይት ዳታነይነ አቤሮይ ቃስ ፋለታ ናአይ ኦን፥ 2 ሙሰ ቦላ ደንድዶሶና። ኤንታራ ናምኡ ፄታነ እሻታሙ አሳት ደኦሶና፤ ሄ አሳት አሳን ኤረትዳይሳታነ ማባራ ካለይሳታ። 3 ኤንቲ ሙሰነ አሮና ስን ሺቅድ፥ “ህንተ ዳርስደታ፤ ማባራ ኡባይ ጌሽ፤ ጎዳይ ኤንታራ ደኤስ። ያትን፥ ጎዳ ማባራ ቦላ ህንተና አይስ ꬎቁ ꬎቁ ኦቲ?” ያግዶሶና።

4 ሙሰይ ሄሳ ስእዳ ዎደ ጎዳ ስንꬃን ጉፋንስ። 5 ቆረኮነ እያ ጩጋኮ፥ “ጎዳይ ዎንቶ ዎንታ ኦን እያ ባገኮነ ኦን ጌሸኮ በሳና፤ ሄ እ ዶርዳ ኡራ ባኮ ሺሻና፤ ሄ ኡራይ እያኮ ሺቃና። 6 ዎንቶ ዎንታ ኔራነ ነ አሳራ ሀይሳ ኦꬅተ፤ እፃነ ጩይስያ ሚሸ ኤክድ፥ 7 ቦንቆ ታማ እያን ዎꬅድ፥ ጎዳ ስንꬃን እፃነ ጩይስተ። ጎዳይ ዶርያ ኡራይ እ ጌሽ ግዳና። ህንተ፥ ሌወት ዛዋፐ አꬍደታ።”

8 ቃስካ ሙሰይ ቆረኮ፥ “ህንተ ሌወት ስእተ። 9 እስራኤለ ፆሳይ ህንተና ባ ማባራ ግዶፈ ዱማይድ፥ ጌሻ ዱንካንያን ኦꬃና መላነ ባ አሳ ስንꬃን ኤቅድ ሀጋዛና መላ ባኮ ሺሽዳይስ ህንተዉ ጉፅዴ? 10 እ ህንተናነ ህንተ እሻታ ሌወታ ኡባ ባኮ ሺሽስ፤ ሽን ሀእ ህንተ ካህነታ በሳ ኮዬታ። 11 ኔንነ ነ ጩጋ ኡባይ ጎዳ ቦላ ማካልድ ደንድደታ፤ ህንተ እያ ቦላ ዙዙማናዉ እ አሮን ኦኔ?” ያግስ።

12 “ያትድ፥ ሙሰይ፥ ኤልኣባ ናይታ፥ ዳታነነ አቤሮ ፄግስስ፤ ሽን ኤንቲ፥ ‘ኑኒ ቦኮ’ ያግዶሶና። 13 ኔኒ መላ ቢታን ኑና ዎꬋናዉ ማꬅነ ኤስ ጎግያ ቢታፈ ኑና ከስዳይስ ጉፅስ ጋዳ ሀእ ኑ ቦላ ሀላቃ ግዳናዉ ኮያይ? 14 ኔኒ ኑና ማꬅነ ኤስ ጎግያ ቢታ ገልሳባካ፤ ዎይኮ ኔኒ ኑስ ላታ ኦꬃዳ ጎሻ ጋደነ ዎይነ ጋደ እማባካ፤ ኔኒ ኑና ጭማሳ፤ ኑኒ ቦኮ” ያግዶሶና።

15 ያትን፥ ሙሰይ ዳሮ ሀንቀትድ፥ ጎዳኮ፥ “ኔኒ ኤንታ ያርሹዋ ኤኮፋ፤ ታ ኤንታፈ እሱዋካ ቆሀብከ፤ ቃስ ሀር አቶሽን እስ ሀረካ ኤንታፈ ኤካብከ” ያግስ።

16 ቃስ ሙሰይ ቆረኮ፥ “ዎንቶ ኔራነ ነ አሳራ ሄሳዳ አሮንካ ጎዳ ስን ሺቅተ። 17 እስ እስ አስ ባ እፃነ ጩይስያ ሚሽያ ኤኮ፤ እፃነካ እያን ዎꬆ፤ ኡባይ እስፈ ናምኡ ፄታነ እሻታሙ እፃነ ጩይስያ ሚሸ ግዴስ፤ እፃነ እያን ዎꬅድ ጎዳ ስን ሺሾ። ኔኒነ አሮን ህንተ እፃንያ ሄሳዳ ሺሽተ” ያግስ። 18 ያትን፥ እስ እስ አስ ባ ሚሸን እፃነነ ታማ ቦንቆ ዎꬅድ ጌሻ ዱንካንያ ፐንገን ሙሰራነ አሮናራ እስፈ ኤቅዶሶና። 19 ቆረይ ባ አሳራ ጌሻ ዱንካንያ ፐንገን ሙሰ ስንꬃንነ አሮና ስንꬃን ኤቅዶሶና። ሄ ዎደ ጎዳ ቦንቾይ ኩመꬃ ማባራስ ቆንጭስ። 20 ጎዳይ ሙሰኮነ አሮናኮ፥ 21 “ታኒ እስ ቶሆ ሀ አሳ ꬋይሳና ግሾ፥ ኤንታፈ ሻከትተ” ያግስ።

22 ሽን ሙሰይነ አሮን ሳአን ጉፋንድ፥ “አቤት ፆሳዉ፥ አሳ ሸምፖ ኡባ መꬍዳ ፆሳዉ፥ እስ አስ ናጋራ ኦꬅኮ፥ ኔኒ ኩመꬃ ማባራ ሀንቀታዬ?” ያግዶሶና።

23 ያትን፥ ጎዳይ ሙሰኮ፥ 24 “አሳስ ‘ቆረ፥ ዳታነነ አቤሮ ዱንካንያ ማታፐ ክችተ’ ጋዳ ኦዳ” ያግስ።

25 ሙሰይ ደንድድ፥ ዳታነኮነ አቤሮኮ ብን፥ እስራኤለ ጭማት እያ ካልዶሶና። 26 እ ማባራኮ፥ “ሀ ኢታ አሳ ዱንካንያ ማታፐ ክችተ፤ ኤንታባ አይብባካ ቦቾፍተ። አካይ፥ ጊኮ፥ ኤንታ ናጋራ ጋሶን ህንተካ ፕተትድ ꬋያና” ያግድ ምንꬅድ ኦድስ።

27 ያትን አሳይ ቆረ፥ ዳታነነ አቤሮ ዱንካንያ ማታፐ ክችዶሶና። ዳታነይነ አቤሮይ ካረ ከይድ፥ ባንታ ማቸታራነ ባንታ ናይታራ ባንታ ዱንካነታ ፐንገን ኤቅዶሶና። 28 ሙሰይ አሳኮ፥ “ታኒ ሀ ኦሶ ኡባ ኦꬃና መላ፥ ጎዳይ ታና ኪትዳይሳነ ታኒ ታ ሸነን ኦꬆናይሳ ህንተ ኤራናይ ሀይሳና። 29 ሀ አሳት አስ ሀይቀይሳዳ ሀይቅኮ ዎይኮ አሳ ቦላ ጋክያባ ፃላል ኤንታ ቦላ ጋክኮ ጎዳይ ታና ኪትቤና። 30 ሽን፥ ጎዳይ ኦራꬃባ ኦꬅድ፥ ቢታይ ዶየትድ ኤንታነ ኤንታዉ ደእያባ ኡባ ምትኮነ ኤንቲ ፓፃ ደእሸ ዱፎ ገልኮ ሄ ዎደ ሀ አሳት ጎዳ ካꬍዳይሳ ህንተ ኤራና” ያግስ።

31 እ ያግድ ኦንግዳ ዎደ ኤንቲ ኤቅዳ ቢታይ ዶየትድ፥ 32 ኤንታነ ኤንታ ሶ አሳ፥ ቆረ ጩጋ ኡባነ ኤንታዉ ደእያባ ኡባ ምትስ። 33 ያትን ኤንቲ ባንታዉ ደእያባ ኡባራ ፓፃ ደእሸ፥ ዱፎ ገልዶሶና። ቢታይ ኤንታ ቦላ ጎርደትስ፤ ኤንቲ ማባራ ግዶፈ ꬋይዶሶና። 34 ኤንታ ዋሱዋ ጋሶን ኤንታ ማታን ደእያ እስራኤለ አሳ ኡባይ፥ “ቢታይ ኑናካ ምታና ሀኔስ” ያግድ ባቃትዶሶና።

35 ቃስ ታም ጎዳ ማታፐ ይድ እፃነ ጩይስያ ናምኡ ፄታነ እሻታሙ አሳ ምስ።

36 ሄሳፈ ጉየ ጎዳይ ሙሰኮ፥ 37 “ካህነይ፥ አሮና ናኣ አላዛር ናሰ ብራታፐ ኦሰትዳ እፃነ ጩይስያ ሚሸታ ፁገትዳ አሳፐ ኤክድ፥ ሄ ሚሸት ጌሽ ግድያ ግሾ፥ ቦንቆ ታማ ሀራ ሶ ኤፍድ ላላና መላ ኦዳ። 38 ሄ ሚሸት ባንታ ደኡዋ ꬋይሳናዉ ናጋራ ኦꬅዳ አሳይ እፃነ ጩይስያ ሚሸ። ሄ ሚሸት ጎዳስ እመትዳ ግሾነ ጌሽ ግድያ ግሾ ሌእሳ ቆፃዳ ያርሾ በሳ ላንፃ። ሄስ እስራኤለ አሳስ ናግሶ ማላ ግዶ” ያግስ።

39 ያትን ካህነይ አላዛር እፃነ ጩይስያ ሚሸታ ኤክድ ያርሾ በሳ ላንፃናዉ ሌእስድ ቆፅስ። 40 ጎዳይ ሙሰ ባጋራ ኪትዳይሳዳ፥ አሮና ኮቸ ግዶና ኦንካ ጎዳ ስንꬃን እፃነ ጩይሳናዉ ሺቆና መላ፥ እፃስ ጊኮ፥ ቆረ ቦላነ እያ ካለይሳታ ቦላ ጋክዳይስ እያ ጋኮና መላ እስራኤለ አሳ አኬክሳናዉ ሀይሳታ ኦꬅስ።

41 ዎንተꬃ ጋላስ እስራኤለ ማባራ ኡባይ፥ “ጎዳ አሳ ህንተ ዎꬍደታ” ያግድ ሙሰ ቦላነ አሮና ቦላ ዙዙምዶሶና። 42 ኤንቲ ሙሰነ አሮና ቦላ ደንዳናዉ ሺቅድ፥ ኤንቲ ጌሻ ዱንካንያ ፄልያ ዎደ ሻራይ ጌሻ ዱንካንያ ካምን፥ ጎዳ ቦንቾይ ቆንጭስ።

43 ሄሳፈ ጉየ፥ ሙሰይነ አሮን ጌሻ ዱንካንያ ስን ይድ ኤቅዶሶና። 44 ያትን ጎዳይ ሙሰኮ፥ 45 “ሀ አሳ ግዶፈ ክችተ፤ ታ ኤንታ እስ ቶሆን ꬋይሳና” ያግስ።

ሙሰይነ አሮን ሳአን ጉፋንዶሶና። 46 ሙሰይ አሮናኮ፥ “እፃነ ጩይስያ ነ ሚሽያ ኤካዳ ያርሾ በሳፈ ቦንቆ ታማ ኤካዳ እያን ዎꬃ፤ እያ ቦላ እፃነ ጉጃዳ እስራኤለ ማባራኮ ኤፋ። ጎዳ ሀንቆይ እያ ማታፐ ከይ ክችስ፤ ቦሻይካ ዶምስ” ያግስ። 47 ያትን አሮን፥ ሙሰይ ኪትዳይሳዳ ባ እፃነ ጩይስያ ሚሽያ ኤክድ ማባራ ግዶ ዎፅድ ገልስ። ቦሻይ አሳ ዎꬎ ኦይክስ ሽን፥ አሮን እፃነ ጩይስድ አሳስ አቶተꬅ ኤህስ። 48 ያትድ፥ እ ሀይቅዳይሳታነ ፓፃታ ግዶን ኤቅን፥ ቦሻይ አግስ። 49 ቆረ ጋሶን ሀይቅዳ አሳይ አትሽን፥ ሄ ቦሻን ሀይቅዳ አሳ ታይቦይ 14,700. 50 ቦሻይ ኤቅዳፐ ጉየ፥ አሮን ጌሻ ዱንካንያ ፐንገን ደእያ ሙሰኮ ስምስ።