1 ጎዳይ ሙሰኮ፥ 2 “እስራኤለ አሳይ እስ እስ ኮቻ ሀላቃታፐ እስ እስ ፃምአ ኤክድ ታማነ ናምኡ ፃምአ ነዉ ኤሀና መላ ኤንታዉ ኦዳ። ሄ ፃምኣ ቦላ እስ እስ አሳ ሱንꬃ ፃፋ። 3 እስ እስ ኮቻ ሀላቃስ እስ ፃምአ ኮሽያ ግሾ፥ ሌወ ፃምኣ ቦላ አሮና ሱንꬃ ፃፋ። 4 ሄ ፃምአታ ጌሻ ዱንካንያ ግዶን ታ ኔራ ጋሄትያ ታቦትያ ስንꬃን ዎꬃ። 5 ታ ዶርያ ኡራ ፃምአይ አጫና፤ ሄሳዳ ኦꬃዳ ህንተ ቦላ እስራኤለ አሳ ዙዙንꬃ ታ ተቃና” ያግስ።

6 ሄሳ ሙሰይ እስራኤለ አሳስ ኦድን፥ ታማነ ናምኡ ሀላቃት ሁጰን ሁጰን እስ እስ ፃምአ ኤህዶሶና። አሮና ፃምአይካ ሄ ፃምአታ ግዶን ደኤስ። 7 ሙሰይ ሄ ፃምአታ ኡባ ጌሻ ዱንካንያ ግዶን ጎዳ ስንꬃን ዎꬅስ።

8 ዎንተꬃ ጋላስ ሙሰይ ጌሻ ዱንካንያ ግዶ ገልያ ዎደ ሌወ ኮቸ ግድዳ አሮና ፃምአይ አጭዳይሳ፥ ጋምቡፅዳይሳ፥ ጪይዳይሳነ ላዉዘ ምꬃ አይፈ አይፍዳይሳ በእስ። 9 ሙሰይ ፃምአ ኡባ ጎዳ ስንꬃፈ ኤህድ እስራኤለ አሳ በስስ። ኤንቲ ሀንዳባ በእዳፐ ጉየ እስ እስ ሀላቃይ ባንታ ፃምኣ ፃምኣ ኤክዶሶና። 10 ጎዳይ ሙሰኮ፥ “አሮና ፃምኣ ታቦትያ ስንꬃን ዛራዳ ዎꬃ። ማካልዳ እስራኤለ አሳይ ታ ቦላ ዙዙንꬃ አጎና እፅኮ ሀይቃናይሳ ኤንታዉ ማላታ ኦꬃዳ ዎꬃ” ያግስ። 11 ሙሰይ፥ ጎዳይ ኪትዳይሳዳ ኦꬅስ።

12 እስራኤለ አሳይ ሙሰኮ፥ “ሄሳ ግድኮ፥ ኑ ኡባይ ሀይቃና፤ ꬋያና። 13 ጌሻ ዱንካንያኮ ሺቅያ ኡባይ ሀይቃና ግድኮ፥ ኑ ኡባይካ ሀይቆስ ጉሰዬ?” ያግዶሶና።