1 ኮይሮ አጌናን እስራኤለ አሳ ኡባይ ሲና መላ ቢታ ጋክድ፥ ቃደሳ ጌተትያ በሳን ዱንካንዶሶና። ማይራማ ያን ሀይቃዳ ሞገታሱ።

2 ሄ በሳን አሳስ ሃꬅ ꬋይን፥ አሳይ ሙሰ ቦላነ አሮና ቦላ ደንድዶሶና። 3 ኤንቲ፥ “ኑ እሻት ጎዳ ስንꬃን ሀይቅዳ ዎደ ኑካ ሀይቅዳ ግዶርኮሽን። 4 ኑነ ኑ መሄይ ሀ መላ ቢታን ሀይቃና መላ ጎዳ ማባራ ሀ በሳ አይስ ኤህደቲ? 5 ግብፀፈ ከስድ ሀ ኢታ በሳ ኑና አይስ ኤህደቲ? ሀይሳን ካꬅ ዎይኮ ባላሰይ ዎይኮ ዎይነይ ዎይኮ ኦሮማነይ ባዋ፤ ሀር አቶሽን ኡየትያ ሃꬅካ ሀይሳን ባዋ” ያግድ ሙሰራ ካጨትዶሶና።

6 ያትን ሙሰይነ አሮን አሳ ማታፐ ጌሻ ዱንካንያ ፐንገ ብድ ሳአን ጉፋንዶሶና፤ ጎዳ ቦንቾይካ ኤንታዉ ቆንጭስ። 7 ጎዳይ ሙሰኮ፥ 8 “ነ ፃምአ ኤካ፤ ኔራነ ነ እሻ አሮናራ ማባራ ሺሽተ። ኤንታ ስንꬃን ዛላይ ሃ ከሳና መላ ኦዳ። ህንተ ዛላፈ ሃ ከስድ፥ ኤንታነ ኤንታ መህያ ኡሻና” ያግስ። 9 ጎዳይ ኪትዳይሳዳ ሙሰይ ጎዳ ስንꬃፈ ፃምኣ ኤክስ።

10 ሙሰይነ አሮን ማባራ ዛላ ስንꬃን ሺቃና መላ ኦꬅድ፥ አሳኮ፥ “ህንተኖ ጌላቶ፥ ስእተ፤ ሀ ዛላፈ ህንተዉ ኑኒ ቱማ ሃ ከሳኔ?” ያግስ። 11 ሙሰይ ባ ፃምአ ደንꬅድ ዛላ ናምኡ ቶሆ ሾጭስ፤ ሃꬅ ꬉቅድ ከይን ኤንትነ ኤንታ መሄት ኡይዶሶና።

12 ሽን ጎዳይ ሙሰኮነ አሮናኮ፥ “እስራኤለ አሳ ስንꬃን ህንተ ታ ጌሻተꬃ በሳናዉ አማነትቦና ግሾ ታ ኤንታዉ እምያ ቢታ ሀ አሳ ካለꬅድ ህንተ ገለከታ” ያግስ።

13 እስራኤለ አሳይ ጎዳራ ካጨትዳ ግሾነ ጎዳይ ባ ጌሻተꬃ ኤንታ ግዶን ቆንጭስዳ ግሾ ሄ በሳይ ማርባ *ማርባ፦ ካጨተꬅ ጉሱ። ሃꬃ ጌተትስ።

14 ኤዶመ ካዋኮ ሙሰይ ቃደሳፐ ሀይሳዳ ያግድ ኪታ የድስ። “ነ እሻይ እስራኤለይ ሀይሳዳ ያጌስ፤ ኑና ጋክዳ መቶ ኡባ ነ ስአዳሳ። 15 ኑ ማይዛት ዱገ ግብፀ ዎꬍዶሶና፤ ያን ኑኒ ዳሮ ላይꬅ ደእዳ። ግብፀት ኑናነ ኑ አዋታ ኡንኤꬅዶሶና። 16 ኑኒ ጎዳኮ ዋስን፥ እ ኑ ዋሱዋ ስእድ፥ ባ ኪታንቹዋ ኪትድ ኑና ግብፀፈ ከስስ። ሀእ ኑኒ ነ ቢታ ጋፃን ደእያ ቃደሳ ካታማን ደኦስ። 17 ሀያና፥ ኑኒ ነ ቢታራ ካንꬅድ አꬋና መላ ኦꬃርክ፤ ኑኒ ኦገፐ ጋፃ ከዮኮ፤ ነ ጎሻ ዎይኮ ዎይነ ጋደ ግዶ ገሎኮ፤ ኑኒ ሃꬃ ኦላፈ ሃ ኡዮኮ። ኑኒ ካዎ ኦገ ኦይክድ ባና፤ ኑኒ ነ ቢታራ ካንꬅድ አꬋና ጋካናዉ ሀድርስ ዎይኮ ኡሻች ጎኮ” ያግስ።

18 ሽን ኤዶመ አሳይ፥ “ኑ ቢታራ ካንꬅሶኮ፤ ህንተ ሀይሳራ ካንꬃናዉ ቆፕኮ፥ ኑኒ ደንድድ ህንተና ኦላና” ያግዶሶና።

19 ያትን እስራኤለ አሳይ፥ “ኑኒ ካዎ ኦግያራ ባና፤ ኑኒ ዎይኮ ኑ መሄይ ህንተ ሃꬃፈ ኡይኮ፥ ኑኒ ሄሳስ ጋተ ጭጋና፤ ኑኒ ቶሆራ አꬃ ፃላላ ኮዮስ፤ ሀራባ አይኮካ ኮዮኮ” ያግዶሶና።

20 ኤዶመ አሳይ ዛሪድ፥ “ህንተ ሀይሳራ አꬋናዉ ዳንዳኤከታ” ያግስ። ካልድ፥ ዳሮነ ዎልቃማ ኦላንቾታ ኤክድ እስራኤለ አሳ ኦላናዉ ከይስ። 21 ኤዶመ አሳይ ባንታ ቢታራ እስራኤለ አሳ አꬆና እፅን፥ እስራኤለ አሳይ ስሚድ ሀራ ኦገራ ብዶሶና።

22 እስራኤለ አሳ ኡባይ ቃደሳፐ ደንድድ ሆራ ዙማኮ ብዶሶና። 23 ኤዶመ ዛዋን ደእያ ሆራ ዙማን፥ ጎዳይ ሙሰኮነ አሮናኮ፥ 24 “አሮን ባ ማይዛታን ጋሄትያ ዎደይ ጋክስ። ህንተ ናምአይ ማርባ ሃꬃ ማታን ታ ኪታ ቦላ ጌላትዳ ግሾ እስራኤለ አሳስ ታ እምያ ቢታ እ ገለና። 25 አሮናነ እያ ናኣ አላዛራ ኤካዳ ሆራ ዙማ ቦላ ከያ። 26 አሮና ካህነተꬃ ማኡዋ ቃራዳ፥ እያ ናኣ አላዛራ ማይዛ። አሮን ያን ሀይቃና” ያግስ።

27 ጎዳይ ኪትዳይሳዳ ሙሰይ ኦꬅስ፤ እስራኤለ አሳ ኡባይ በእሽን፥ ኤንቲ ሆራ ዙማ ቦላ ከይዶሶና። 28 ሙሰይ አሮና ካህነተꬃ ማኡዋ ቃርድ እያ ናኣ አላዛራ ማይዝስ። አሮን ሄ ዙማ ሁጰን ሀይቅስ። ሙሰይነ አላዛር ዙማፐ ዎꬍዶሶና። 29 አሮን ሀይቅዳይሳ እስራኤለ አሳይ ኤርዳ ዎደ እስራኤለ አሳይ አሮናስ ሀስታሙ ጋላስ ዬክዶሶና።