21
አራዳ ፆነተꬃ
1 ካናነ ቢታን፥ ነገበ መላ ቢታን ደእያ አራዳ ካዎይ፥ እስራኤለ አሳይ አታርማ ኤፍያ ኦግያራ የይሳ ስእዳ ዎደ እስራኤለ አሳራ ኦለትድ ኤንታፈ ጉꬃ አሳ ድእዶሶና። 2 ሄ ዎደ እስራኤለ አሳይ፥ “ኔኒ ሀ አሳ ኑ ኩሸን አꬃዳ እምኮ፥ ኑኒ ኤንታነ ኤንታ ካታማታ ኩመꬅ ꬋይሳና” ያግድ ጎዳስ ቃንግዶሶና። 3 ጎዳይ እስራኤለ አሳ ዎሳ ስእድ፥ ካናነታ ኤንታ ኩሸን አꬅድ እምን፥ ኤንቲ ካናነታነ ኤንታ ካታማታ ኩመꬅ ꬋይስዶሶና። ሄሳ ግሾ፥ ሄ በሳይ ሆርማ *ሆርማ፦ ኩመꬅ ዎይኮ ፖሎ ꬋይሶ ጉሱ ጌተትድ ሱንትስ።
ናሰ ብራታፐ ኦሰትዳ ሾሹ
4 እስራኤለ አሳይ ሆራ ዙማፐ ደንድድ፥ ኤዶመ ቢታ ዩሹዋራ ባናዉ ዞኦ አባኮ ኤፍያ ኦግያራ ብዶሶና፤ ሽን ኦገ ቦላ አሳስ ዳንዳአይ ዉርስ። 5 አሳይ፥ “ኑኒ መላ ቢታ ሀይቃና መላ ግብፀፈ ኑና አይስ ከስደቲ? ካꬅ ባዋ፤ ሃꬅ ባዋ፤ ሀ ኢታ ካꬃይ ኑና ሻትስ” ያግድ ፆሳ ቦላነ ሙሰ ቦላ ዙዙምዶሶና።
6 ያትን፥ ጎዳይ አሳ ግዶ ማርዘራ ደእያ ሾሽ የድን፥ እስራኤለ አሳፐ ዳሮት ዱከትድ ሀይቅዶሶና። 7 አሳይ ሙሰኮ ይድ፥ “ኑኒ ጎዳ ቦላነ ነ ቦላ ዙዙምድ፥ ናጋራ ኦꬅዳ። ጎዳይ ሀ ሾሻታ ኑፐ ሃሳና መላ ኑስ ዎሳርክ” ያግዶሶና። ያትን፥ ሙሰይ አሳ ግሾ ዎስስ።
8 ሄ ዎደ ጎዳይ ሙሰኮ፥ “ናሰ ብራታፐ ሾሽ መꬋዳ፥ ኤንታ ስንꬃን ምꬃ ቦላ ካቃ፤ ሾሻን ዱከትዳ ኦንካ እያ በእኮ ፓፃና” ያግስ። 9 ያትን፥ ሙሰይ ናሰ ብራታፐ ሾሽ መꬍድ፥ ምꬃ ቦላ ካቅስ። ሾሻን ዱከትዳ አሳ ኡባይ ናሰ ብራታ ሾሻ በእድ ፓፅዶሶና።
ሆራ ዙማፐ ሞአበ ጋካናዉ
10 እስራኤለ አሳይ ሆራፐ ደንድድ ኦቦታ ጌተትያ በሳን ዱንካንዶሶና። 11 ኦቦታፐ ደንድድ፥ ሞአበፐ ስንꬃ ባጋን ደእያ መላ ቢታን፥ ዶሎሀ ባጋን አባሪማን ዱንካንዶሶና። 12 ያፐ ደንድድ፥ ዛሬዳ ዛንጋራን ዱንካንዶሶና። 13 ያፐ ደንድድ፥ አሞረታ ቢታ ጋፃ ጋካናዉ ደእያ መላ ቢታን አርኖና ሻፋፐ ሄፍንꬃን ዱንካንዶሶና። አርኖና ሻፋይ ሞአበ ቢታስነ አሞረ ቢታስ ግዶን ደእያ ዛዋ። 14 ሄሳ ግሾ፥ ጎዳ ኦላ ታርክያ ኦድያ ማፃፋን፥ “ሱፋ ሄራን ደእያ ዋሄባ ካታማነ አርኖና ሻፋ ዛንጋራ፥ 15 ኤራ ካታማነ ሞአበ ቢታ ዛዋ ጋካናዉ ደእያ ዛንጋራ” ያገትድ ፃፈትስ።
16 ኤንቲ ያፐ ደንድድ፥ ጎዳይ ሙሰኮ፥ “አሳ ሺሻ፤ ታ ኤንታዉ ሃ እማና” ያግድ ኦድዳ ቤራ ጌተትያ ሃꬃ ኦላኮ ብዶሶና።
17 ሄ ዎደ እስራኤለ አሳይ ሀ ማዝሙርያ የፅዶሶና።
“ሃꬃ ኦላዉ፥ ፑልታ፤
ህንተካ የፅተ።
18 ሀላቃት ቦክዳ ሃꬃ ኦላስ፥
ካለይሳት ካዎተꬃ ፃምአንነ ባንታ ፃምአን
ቦክዳ ሃꬃ ኦላስ የፅተ” ያግስ።
ኤንቲ ሄ መላ ቢታፈ ደንድድ ማታና ጌተትያ በሳ ብዶሶና። 19 ማታናፐ ናህልኤላ፥ ናሀልኤላፐ ባሞታ ጌተትያ በሳ ብዶሶና። 20 ባሞታፐ ደንድድ፥ ሞአበን ደእያ ዛንጋራ ብዶሶና፤ ሄ ዛንጋራይ ፕስጋ ዙማፐ ጋርሳን ባዙዋ ግናን ደኤስ።
ስሆናነ ኦገ ፆነተꬃ
21 ሄሳፈ ጉየ፥ እስራኤለ አሳይ አሞረ ካዋ ስሆነኮ ሀይሳዳ ያግድ ኪታ የድዶሶና። 22 “ሀያና፥ ኑ ነ ቢታራ ካንꬅድ አꬋና መላ ኦꬃርክ፤ ኑኒ ኦገፐ ጋፃ ከዮኮ፤ ነ ጎሻ ዎይኮ ዎይነ ጋደ ግዶ ገሎኮ፤ ኑኒ ሃꬃ ኦላፈ ሃ ኡዮኮ። ኑኒ ነ ቢታራ ካንꬅድ አꬋና ጋካናዉ ሀድርስ ዎይኮ ኡሻች ጎኮ” ያግስ።
23 ስሆነይ እስራኤለ አሳይ ባ ቢታራ ካንꬆና መላ ድግስ። እ ባ ኦላንቾታ ኡባ ሺሽድ፥ እስራኤለ አሳ ኦላናዉ መላ ቢታ ብስ፤ ያሃፃ ጌተትያ በሳ ብድ እስራኤለ አሳራ ኦለትስ። 24 እስራኤለ አሳይ ኦላን አሞረታፐ ዳሮታ ማሻን ዎꬍድ፥ አርኖና ሻፋፐ ዶምድ፥ አሞነታ ዛዋን ደእያ ያቦቃ ሻፋ ጋካናዉ ኦይክስ። አሞነ አሳ ቢታ ዛዋይ ግምበትድ ደእያ ግሾ፥ ኤንቲ ያ ገልቦኮና። 25 እስራኤለ አሳይ አሞረታ፥ ሀሰቦናነ እያ ዩሹዋን ደእያ ካታማታ ኡባ ፆን ኤክድ ያን ኡትዶሶና። 26 ሀሰቦና ካታማይ አሞረታ ካዋ ስሆነ ኡትያ ካታማ። ስሆነይ ካሰ ሞአበ ቢታ ካዋ ኦልድ፥ አርኖና ሻፋ ጋካናዉ ደእያ ቢታ ኡባ ኤክስ።
27 ሄሳ ግሾ፥ ሌምሶን ሀይሳዳ ያግዶሶና፤
“ሀሰቦናኮ ሃይተ፤
ሀ ካታማይ ዛሪድ ኬፀቶ፤
ስሆነ ካታማይ
ካሰ ባ በሳ ስሞ።
28 ታም ሀሰቦናፐ ከይስ፤
ላጮይ ስሆና ካታማን በንትስ፤
ሞአበን ደእያ ኤራ ꬋይስስ፤
አርኖና ꬎቃ በሳታ ምስ።
29 ሞአበ፥ ነና አየ!
ካሞሻ አሳይ ꬋይደታ።
ህንተ አደ ናይት ባቃታናዳ፥
ህንተ ማጫ ናይት ድኤታናዳ፥
አሞረታ ካዋ ስሆነስ እሚስ።
30 ኑኒ ህንተ ኮቻታ ሀሰቦናፐ ዶምድ፥
ድቦና ጋካናዉ ኩመꬅ ꬋይስዳ።
መደባ ማታን ደእያ ኖፋ ጋካናዉ
ደእያ ኡባ ታም ꬋይስስ” ያግዶሶና።
31 ያትድ፥ እስራኤለ አሳይ አሞረታ ቢታን ደእዶሶና። 32 ቃስ ሙሰይ ዎቸይሳታ ያእዜራ ካታማ የድን፥ እስራኤለ አሳይ ሄ ካታማነ እያ ሄራን ደእያ ጉꬃ ካታማታ ኦይክድ፥ ያን ደእያ አሞረታ ከስድ ጎድዶሶና።
33 ሄሳፈ ጉየ፥ እስራኤለ አሳይ ስሚድ፥ ባሳነ ኤፍያ ኦግያራ ከይዶሶና። ባሳነ ካዎይ ኦገይ ባ ኦላንቾታራ ኤድራአ ካታማን ኤንታራ ኦለታናዉ ከይስ። 34 ሽን ጎዳይ ሙሰኮ፥ “ሀ ኡራስ ባቦፋ፤ ህዛ፥ ካዋ ኦገ፥ እያ አሳነ እያ ቢታ ኡባ ነ ኩሸን አꬃዳ እማስ። ሀሰቦናን ኡትድ ሃርዳ አሞረታ ካዋ ስሆነ ቦላ ኦይሳዳ ኔኒ እያ ቦላ ኦꬃና” ያግስ። 35 ሄሳ ግሾ፥ እስራኤለ አሳይ ኦገ፥ እያ ናይታነ እያ አሳ ኡባ እሶይ አቶና ዎꬍድ እያ ቢታ ላትዶሶና።