1 ጎዳይ ሙሰኮ፥ 2 “እስራኤለ አሳ ሀይሳዳ ያጋዳ ኪታ፤ ፁገትያ ሳውያ ካꬃ ያርሾ ዎደን ዎደን ታዉ ያርሽተ። 3 ጎዳስ ታማን ፁገትድ ያርሸትያ ያርሾይ ሀይሳ፤ ኩመꬃ ቦላራ ደእያ እስ ላይꬅ ኩምዳ ናምኡ ማራዘታ ዎንታ ዎንታ ፁሳ ያርሾ ኦꬅድ ያርሽተ። 4 ማራዘታፐ እሱዋ ዎንታ እሱዋ ቃስ ኦማርስ ያርሽተ። 5 ቃስ ሄ ማራዝያራ እስ ልትሮ ሻማሆ ዛይተን ሙኑቀትዳ እስ ክሎ ግራመ ሎኦ ግስተ ꬊለ ካꬃ ያርሾ ያርሽተ። 6 ሀይስ ጎዳ ኡፋይስያ ፁሳ ያርሾ። እካ ሲና ዙማ ቦላ ያርሸትዳ ኮይሮ ፁሳ ያርሾ። 7 ኮይሮ ማራዝያራ እስ ልትሮ ጫላ ዎይነ ኡሻ ያርሾ ኦꬅድ ያርሾ በሳን ጎዳስ ጉስተ። 8 ኦማርስ ናምአንꬆ ማራዝያ ያርሽያ ዎደ ኮይሮይሳ መላ ካꬃ ያርሹዋነ ኡሻ ያርሹዋ ጉጅድ ያርሽተ። እካ ጎዳ ኡፋይስያ ሳዎ ያርሾ ግዳና።”

9 “ሳምባታ ጋላስ ቦረይ ባይና እስ ላይꬅ ኩምዳ ናምኡ ማራዘታ ዛይተን ሙኑቀትዳ ናምኡ ክሎ ግራመ ሎኦ ግስተ ꬊለ ኤክድ ካꬃ ያርሾነ ኡሻ ያርሾ ኦꬅድ ያርሽተ። 10 ጋላስ ጋላስ ያርሸትያ ፁሳ ያርሹዋ ቦላ ሳምባታን ሳምባታን ህንተ ያርሻና ፁሳ ያርሾይነ ኡሻ ያርሾይ ሀይሳ።”

11 “አጌን ፄርያ ኮይሮ ጋላስ ናምኡ ዎፋኖታ፥ እስ ማራዘነ እስ ላይꬅ ኩምዳ ቦረይ ባይና ላፑን ዶርሳ ኡርገታ ፁሳ ያርሾ ኦꬅድ ጎዳስ ያርሽተ። 12 እስ እስ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ግድያ ሎኦ ግስተ ꬊለራ ካꬃ ያርሾ ኦꬅድ ያርሽተ። ቃስ ሻማሆ ዛይተን ሙኑቀትዳ ናምኡ ክሎ ግራመ ግድያ ሎኦ ግስተ ꬊልያ ማራዝያራ ዎላ ያርሻ። 13 ላፑን ማራዘታፐ እስ እስ ማራዘ ሻማሆ ዛይተን ሙኑቀትዳ እስ ክሎ ግራመ ሎኦ ግስተ ꬊለራ ፁገትያ ሳውያ ካꬃ ያርሾ ኦꬃዳ ጎዳስ ያርሻ። 14 ቃስ ኡሻ ያርሹዋ እስ እስ ዎፋኑዋስ ናምኡ ልትሮ ዎይነ፥ እስ ማራዝያስ እስ ልትሮነ ባጋ ዎይነ ኡሻነ እስ እስ ዶርሳ ኡርግያስ እስ ልትሮ ግድያ ዎይነ ኡሽ ሺሽተ። ሀይስ ላይꬃ ግዶን አጌን ፄርያ ኮይሮ ጋላሳን ኦሰትያ ፁሳ ያርሾ። 15 ጋላስ ጋላስ ያርሸትያ ፁሳ ያርሹዋ ቦላነ ኡሻ ያርሹዋ ቦላ እስ ኮለ ናጋራ ያርሾ ኦꬅድ ጎዳስ ያርሽተ።”

16 “ኮይሮ አጌናን ታማነ ኦይዳንꬆ ጋላሳይ ጎዳ ፓስካ ቦንችያ ጋላስ ግዶ። 17 ቃስ ሄ አጌናን ታማነ እቻሻንꬆ ጋላሳን ኡይꬃ ባለይ ቦንቸቴስ፤ ሄ ጋላሳፐ ዶምድ ላፑን ጋላስ ጋካናዉ እርሾይ ገልቦና ኡይꬃ ሚተ። 18 ሄ ጋላሳታፐ ኮይሮ ጋላሳን ጎይናናዉ ሺቅተ፤ ሄ ጋላሳን አይ ኦሶካ ኦꬆፍተ። 19 ቦረይ ባይና ናምኡ ዎፋኖታ፥ እስ ማራዘነ እስ ላይꬅ ኩምዳ ላፑን ዶርሳ ኡርገታ ፁሳ ያርሾ ኦꬅድ ጎዳስ ያርሽተ። 20 እስ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ሎኦ ግስተ ꬊለ፥ እስ ማራዝያራ ናምኡ ክሎ ግራመ ꬊለነ 21 ላፑን ዶርሳ ኡርገታፐ እስ እስ ዶርሳራ እስ ክሎ ግራመ ꬊለ ያርሽተ። 22 ቃስ እስ ዴሽ ደርያ ናጋራስ አቶተꬅ ግዳና መላ ናጋራ ያርሾ ኦꬅድ ያርሽተ። 23 ሄሳ ኡባ ዎደ ጋላስ ጋላስ ያርሸትያ ያርሹዋ ቦላ ጉጅድ ያርሽተ። 24 ኡባ ዎደ ኦሰትያ ፁሳ ያርሹዋ ቦላነ ኡሻ ያርሹዋ ቦላ ጉጅድ ላፑን ጋላስ ጎዳስ ሳውያ ካꬃ ያርሾ ኦꬅድ ያርሽተ። 25 ላፑንꬃ ጋላሳን ጎይኖስ ሺቅተ፤ ሄ ጋላስ አይ ኦሶካ ኦꬆፍተ።”

26 “ካꬃ ሺሾ ባኣለ ሳምንታን ኮይሮ ጋላስ ጎይኖስ ሺቅያ ዎደ ህንተ ኦራꬃ ካꬃፈ ያርሾ ያርሽተ፤ ሄ ዎደ አይ ኦሶካ ኦꬆፍተ። 27 ናምኡ ዎፋኖታ፥ እስ ማራዝያነ እስ ላይꬅ ኩምዳ ላፑን ዶርሳ ኡርገታ ጎዳስ ሳውያ ፁሳ ያርሾ ኦꬅድ ያርሽተ። 28 እስ እስ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ሎኦ ግስተ ꬊለ፥ እስ ዶርሳ ኡርግያራ ናምኡ ክሎ ግራመ ꬊለነ 29 ላፑን ዶርሳ ኡርገታፐ እስ እስ ኡርግያራ እስ ክሎ ግራመ ግስተ ꬊለ ኤክድ ያርሽተ። 30 እያ ቦላ ጉጅድ እስ ኮለ ናጋራ አቶꬃ ያርሾ ኦꬅድ ያርሽተ። 31 ጋላስ ጋላስ ያርሸትያ ያርሹዋ ቦላነ ኡሻ ያርሹዋ ቦላ ካꬃ ያርሾ ያርሽተ። ህንተ ያርሽያ መሄት ቦረይ ባይናባ ግዶ።”